ဣလဵုၚုဟ်မးလိက်ပတ်ပိုဲ
ဣလဵုၚုဟ်မးလိက်ပတ်ပိုဲ
တ္ၚဲဏံယဝ်ရဟီုစိုပ်အာပရေၚ်လိက်ပတ်လ္တူလပှ်ကျာမ္ဂးတှ်ေ ဗွဲကိုပ်ကၠာဂှ်ဒးဟီုစိုပ်တက်ကျာပရေၚ်ယူနဳခတ်ကၠာတုဲ ဇၟာပ်သွာၚ်ဇၟာပ်ဂကောံဇၟာပ်ပူဂဵုဒးပြံၚ်သၠာဲသုၚ်စောဲစကာယူနဳခတ် Unicodeတုပ်တုပ်မာန်ညိကၠာ။
ဆလအ်မှၚုဟ်မးအ္စာကၞေဟ်မန်ပိုဲနွံဂှ်ရော၊ ကောန်ဂကူညးတၞဟ်ချူလိက်စောန်ဇန်လိက်ခိုဟ်ဂတာပ်အခေတ်တှ်ေဒှ်ကၠုၚ်ၚုဟ်မးသၠာဲကဵုသြန်ဂွံ၊ နဲကဲနာနာယဝ်ပိုဲဟွံပြံၚ်သၠာဲထောံညံၚ်ဂွံဂတာပ်အခေတ်မ္ဂးတှ်ေ အာစာကၞေဟ်တံလေဝ်ဒြဟတ်အောန်ကၠုၚ်သိုက်သိုက်ရ၊ ယဝ်ဒှ်သာ်ဏံတှ်ေ ဗီုလဵုပိုဲဂွံဟီုသၠုၚ်ပ္တိုန်ၚုဟ်မးလိက်ပတ်ဂကူပိုဲမာန်ရော၊ ကမၠောန်စေတနာဏံဂှ် ကၠောန်လေဝ်ဂွံဟွံကၠောန်လေဝ်ဂွံတုဲ ဒှ်နဲကဲဂတာပ်အခေတ်မွဲဟွံသေၚ်ရ၊ ၜိုတ်ဆထ္ၜးအာရုပ်ရဴညိညဖအိုတ်ဝေၚ်အခိၚ်ရဂွံ၊ ကမၠောန်ခိုၚ်ခိုၚ် ဂွံဂျိုၚ်အာလ္တူဂၠးတိဏံဂှ်လမျီုအောန်မံၚ်ရ၊ တ္ၚဲဏံဇၟာပ်တၠပညာအာစာကၞေဟ်ချူမံၚ်လိက်ဖအိုတ်တံဂှ် နကဵုစိုတ်ဓါတ်မွဲဟေၚ်ရညးတံဖအိုတ်အခိၚ်ချူမံၚ်လိက်တ္ၚဲဏံရ၊ ယဝ်ရဇၟာပ်မလိက်ညးချူလိက်တံဒှ်ကၠုၚ်ၚုဟ်မးကဆံၚ်ဍေံကဵုဏောၚ်တှ်ေ အာစာချူလိက် အာစာကၞေဟ်တံမံက်တိုန်ဗဝ်သအဝ်မာန်ရ၊ အခိၚ်ဂှ်ဟေၚ် လိက်ဗီုလဵုဒးစိုတ်ဂှ်ရုဲစှ်ကေတ်နာနာသာ်မာန်ရ၊ တ္ၚဲတေံရအာစာကၞေဟ်မန်ပိုဲမံက်ဂၠိုၚ်တိုန် လိက်နာနာနဲကဲနာနာသာ်မံက်တိုန်တုပ်ကဵုဂကူဍုၚ်တဴတက်တံကီုရ၊ သၟတ်တံကောန်ဂကူမန်ပိုဲတံဗှ်ကၠုၚ်လိက်အိုတ်ရ ဟိုတ်နူကဵုလိက်မန်ပိုဲနဲကဲနာနာသာ်နွံမံၚ်တုဲ မုလိက်မိက်ဂွံဗှ်မာန်ဂှ်နွံတဴအိုတ်တုဲ သာ်ဏံဟေၚ်ရစွံၚုဟ်မးလိက်ပတ်ဂကူဇကုဒးဂတာပ်အခေတ်တုဲ ဖျုန်လိက်ပတ်မန်ပိုဲလေဝ်နွံကၠုၚ်ကဵုၚုဟ်မး အ္စာချူလိက်မန်ပိုဲတံလေဝ်သီုလကျာ်သီုခရှ်သီုကဵုသဳလတံနွံကၠုၚ်ကဵုၚုဟ်မးအိုတ်ရ။
ကောန်ဂကူညးတၞဟ် ချူတိုန်လိက်မွဲအုပ် ဖျုန်လိက်ပ္ဍဲတံဂှ်နွံကဵုၚုဟ်မးဂတာပ်သွက်ညးလောကတံဒုၚ်တဲတုဲ အ္စာကၞေဟ်ချူလဝ်လိက်ဂှ် စဵုကဵုဒှ်အာသေဋ္ဌဳလေဝ်နွံတဴဗဝ်သအဝ်ရ၊ သွက်ညးဗှ်လိက်တံတှ်ေတီမံၚ်ဖအိုတ်အ္စာကၞေဟ်လဵုချူလိက်ခိုဟ်၊ ယၟုအ္စာကၞေဟ်ဂှ်ဟေၚ်ရရာန်ဗှ်စလိက်ဂၠိုၚ်ရ၊ ဣဏံအၚာပ်စိုတ်အဲပူဂဵုတုဲ ဇေတ်ဇေတ်ဂှ်တှ်ေ လိက်နာနာသာ်ရာန်ဗှ်ဖအိုတ်ရ၊ ဆဂး အၚာပ်စိုတ်ဗီုညးဗီုအဲဟွံတုပ်တုဲ လ္ၚဵုဂှ်ဒးစိုတ်ဗှ်လိက်ပရေၚ်ဂၠးကဝ်၊ လ္ၚဵုဂှ်ဗှ်လိက်ပရေၚ်စက္ကဝါ၊ လ္ၚဵုဂှ်ဗှ်လိက်ပရေၚ်ကျာ်၊ လ္ၚဵုဂှ်ဗှ်လိက်ပရေၚ်စိုတ်ဓါတ်နာနာ၊ လ္ၚဵုဂှ်ဗှ်လိက်ပရေၚ်ပညာစိုတ်၊ လ္ၚဵုဂှ်ဗှ်လိက်ပရေၚ်ကလော်၊ လ္ၚဵုဂှ်ဗှ်လိက်ပရေၚ်တဵုလွဳကေုာံပရေၚ်လွဳပရာ နာနာသာ်ဗီုညးဒးစိုတ်ရာန်ဗှ်အိုတ်ရ၊ လိက်မန်ပိုဲဂွံနွံဂွံမံက်တိုန်ဗီုကဵုဂကူတဴတက်တံကီုဂှ် သွက်ညးချူလိက်ဂတာပ်အခေတ်တံဒးနွံကဵုကဵုၚုဟ်မးလာပ်ဗဇဴမှ အာစာချူလိက်တံလေဝ်ချူစတ္ၚအ်ကွေံကွေံရ။
တ္ၚဲဏံအခိၚ်စိုပ်ကၠုၚ်ယျတုဲ ပိုဲတံဖအိုတ်မံၚ်အခိၚ်မိပ်မံၚ်မွဲတ္ၚဲတုဲမွဲတ္ၚဲဟွံဂွံရ၊ အရာပြံၚ်သၠာဲမွဲ ယဝ်ရမၞိဟ်မွဲဂှ်ဟွံစကၠောန်ဏောၚ်တှ်ေ ညးလဵုမှစထ္ၜးရုပ်ရဴပြံၚ်သၠာဲကၠောန်ကၠုၚ်ရော၊ တုဲပၠန် လိက်ပတ်ပိုဲမန်ပိုဲညံၚ်ဂွံဂတာပ်အခေတ်လ္တူလပှ်ကျာဂှ်လေဝ် သၞောဝ်ယူနဳခတ် Unicode ဂှ်လေဝ်ဒးပြံၚ်သၠာဲသုၚ်စောဲအိုတ်ညိ၊ သၟန်ပါၚ်ဟီုမံၚ်သၠၚ်ပ္တိုန်ၚုဟ်မးလိက်ပတ်လ္တူလပှ်ကျာသၟးတုဲ ကောန်ဍေၚ်လိက်သၞောဝ်ဂၠးတိUnicodeဂှ်ဟွံစကာသုၚ်စောဲဏောၚ်တှ်ေ သၠုၚ်ပ္တိုန်ၚုဟ်မးလိက်ပတ်ဇကုနကဵုမအရေဝ်သၟးရတုဲ ကမၠောန်ဇေတ်ဇေတ်ညံၚ်ဂွံဂတာပ်အခေတ်ရပ်ဂွံဆဵုကၠးဂှ်ဟွံမွယ်ဟွံမံက်တိုန်ကၠုၚ်ဂတးမုက်တ္ၚဲဏံရ။
(လာပ်ဗဇဴဟွံမွယ်တှ်ေ ကမၠောန်ဂှ်ဍာ်ဇမၠိၚ်ဟွံမွယ်ရ၊) ။