ဨကစ္စသဿတဒိဋ္ဌိ ဝါဒဒုတိယ
ဨကစ္စသဿတဒိဋ္ဌိ ဝါဒဒုတိယ
ကွေတ်လ္ၚဵုဗိုန် ဟိုတ်မရနုက်ကဵုၜါ
၄၅။ ပ္ဍဲဝါဒဒုတိယတုန် တြနာဲခမဳဗဗၞးဂမၠိုၚ် မၞုံကဵုကွေတ် လ္ၚဵုဗိုန်၊ လ္ၚဵုဟွံဗိုန်ဂှ် သ္ပဟိုတ်ကဵုမုရဴမွဲတုဲ နိဿယ်ဗဒဲါကေတ်ကဵုမုရဴမွဲတုဲ အတ္တကီု လောကကီု လ္ၚဵုဗိုန်တဴရ၊ လ္ၚဵုဟွံဗိုန်တဴရ ရဴဝွံ ပညပ်တဴအိုတ်ဂှ်ရော
ယွံခမဳတအ် ဒေဝတဴဂမၠိုၚ် မၞုံယၟုခိဍ္ဍာပဒေါသိတ (လီုလာ်ဟိုတ်နူမိပ်မြဟ်) ဂှ် နွံတဴအိုတ်ရ။ ဒေဝတဴဂမၠိုၚ်ဂှ် ဗွဲမလအ်လလောန် ပဒတဴ သီုမမိပ်မြဟ်လဟိၚ်လဟာဲ အဳဂြိုၚ်ကတိုၚ်ကၟဟ်အိုတ်တုဲ ဟိုတ်မဝိုတ်အာသတိ (သွက်ဂွံစသုၚ်)ရ စုတိချိုတ်အာ နူဘဝဒေဝတဴတအ်ဂှ် အိုတ်ရ။
၄၆။ ယွံခမဳတအ် ဟိုတ်မြဴသာ်ဝွံ နွံတဴဏီရ၊ သတ်မမိက်ကဵုမွဲမွဲဂှ် စုတိချိုတ်ကၠုၚ်နူဘုံ (သွဝ်)ဂှ်တုဲ ကၠုၚ်စိုပ်ဘုံ (မၞိဟ်) ဝွံမ္ဂး နူအဝေါၚ်ဘဝခရှ် လုပ်အာအဝေါၚ်ဘဝခမဳရသိတုဲမ္ဂး သ္ပဟိုတ်ကဵု ပွမပတိတ်ဇြဟတ် ဗွဲမသကာတ်မြဟ်တုဲ သ္ပဟိုတ်ကဵု ပွမပတိတ်ဇြဟတ် ဗွဲမဗိုန်ဗတ်တုဲ သ္ပဟိုတ်ကဵု ပွမပတိတ်ဇြဟတ် ဂၠိုၚ်ဂၠိုၚ်ကဵုဝါတုဲ သ္ပဟိုတ်ကဵု ပွမဟွံဟိုတ်မာဲတုဲ သ္ပဟိုတ်ကဵု ပွမသ္ပပၠုပ်စိုတ် ဗွဲမဒးရးတုဲ ကလိဂွံစိုတ်တန်ကြန် မၞုံသဘဴသာ်ဝွံရ၊ စိုတ်ဂှ် တန်ကြန်သာ်ဂှ်မ္ဂး ဗှ်ဗၞဟ် ဘဝ(ဒေဝတဴ) မကေၚ်ပဒတဴ ပ္ဍဲကိုပ်ကၠာမာန်ရ၊ လောန်နူဂှ် ဗှ်ဗၞဟ်ဟွံမာန်ရ၊ ညးဂှ် သ္ဂးတဴ ရဴသာ်ဝွံရ -
"ယြဴတြနာဲဒေဝတဴဂမၠိုၚ် ခဍ္ဍာပဒေါသိကာ ဟွံသေၚ်အိုတ်ရ၊ ဒေဝတဴဂမၠိုၚ်ဂှ် ဗွဲမလအ်လောန် ဟွံပဒတဴ သီုမမိပ်မြဟ်လဟိၚ်လဟာဲ အီဂြိုၚ်ကတိုၚ်ကၟဟ်အိုတ်တုဲ ဟိုတ်မဟွံဝိုတ်သတိ (သွက်ဂွံစသုၚ်)ဂှ်ရ ဟွံစုတိချိုတ် နူဘဝဒေဝတဴဂှ်အိုတ်ရ၊ (ဟွံမွဲကဵုပွမကတဵုဒှ်တုဲ) ဗိုန်ဂၠိအိုတ်ရ၊ (ဟွံမွဲကဵုပွမချိုတ်တုဲ) ဗိုန်ဇၟအ်အိုတ်ရ၊ (တန်ဒၟံၚ် လၟိုန်ထာဝရတုဲ) တန်တဴလၟိုန်အိုတ်ရ၊ ဟွံမွဲကဵုသဘဴပွမပၠန်ဂတးအိုတ်ရ၊ (ဟိုတ်ဂှ်ရ) ဗွဲမတုပ်သၟဟ်ကဵု အရာမဗိုန် ကြက်တန်တဴ အတိုၚ်တန်တဴလၟိုန်အိုတ်ရ၊ ပိုဲညးဂမၠိုၚ် မဒှ်ခိဍ္ဍာပဒေါသိကဂှ်တုန် ဗွဲမလအ်လလောန် ပဒတဴသီုမမိပ်မြဟ်လဟိၚ်လဟာဲအီဂြိုၚ် ကတိုၚ်ကၟဟ်အိုတ်တုဲ ဟိုတ်မဝိုတ်အာသတိ (သွက်ဂွံစသုၚ်) ဂှ်ရ စုတိချိုတ်အာနူဘဝဒေဝတဴဂှ် အိုတ်ရ၊ (မၞုံကဵုပွမကတဵုဒှ်တုဲ) ဟွံဗိုန်ဂၠိအိုတ်ရ၊ (မၞုံကဵုပွမချိုတ်တုဲ) ဟွံဗိုန်ဇၟအ်အိုတ်ရ၊ အာယုက်ဂၠေံအိုတ်ရ၊ မၞုံကဵုသဘဴ ပွမဒးချိုတ်အိုတ်ရ၊ (ဟိုတ်ဂှ်ရ) ကၠုၚ်စိုပ်ဘုံ (မၞိဟ်)ဝွံ အိုတ်ရ" ရဴဝွံ သ္ဂးတဴရ။
ယွံခမဳတအ် ဣဝွံဂှ် ဟိုတ်ဒုတိယရောၚ်၊ သ္ပဟိုတ်ကဵုဟိုတ်ဂှ်တုဲ နိဿယ်ဗဒဲါကေတ် ကဵုဟိုတ်ဂှ်တုဲ ခမဳဗဗၞးဂမၠိုၚ်လ္ၚဵု မၞုံကဵုကွေတ် လ္ၚဵုဗိုန် လ္ၚဵုဟွံဗိုန်ဂှ် အတ္တကီု လောကကီု လ္ၚဵုဗိုန်တဴရ၊ လ္ၚဵုဟွံဗိုန်တဴရ ရဴဝွံပညပ်တဴအိုတ်ရ။