ဂိုဏ်ပဝါရဏာ ကအ်ဗိန် ဘာဇၞော်

ဂကောံဂိုဏ်ပဝါရဏာ ကအ်ဗိန် ဘာဇၞော် ဂှ် ဒှ်ဂကောံဘာလကျာ်ဂမၠိုင် မဒက်ပ္တန်လဝ် သွက်ဂွံပ ပဝါရဏာ မွဲစွံ မစေန်ဆက်ကၠုင် နူတမ် ဘာဇၞော် ကွာန်ကအ်ဗိန် ကုတၠဳပိုန်ဘာ ဝှ်သိက္ခာဇၞော်အိုတ်ဂှ် ဂွံဒုင်ယၟု ဘာအစာတၠဂိုဏ်ရ။ ဂကောံဂိုဏ်ပဝါရဏာဝွံ စပ္တန်လဝ် နူအခိင်လဵုရောဂှ် လိက်စၟတ်သမ္တီ ခိုင်ခိုင်ကၠိုက်ကၠိုက် ဟွံမဲရ။ အတိုင် ညးဗွဲကြဴတအ် မစၟတ်သမ္တီ လဴကၠုင်မ္ဂး အစာတၠဂိုဏ်ဏအ် ကိုပ်ကၠာအိုတ်ဂှ် စေန်ဆက်ကၠုင် နူလက်ထက် ကျာ်ဇၞော်အစာသဳလတေဇ ဇာတိကွာန်ကအ်ဗိန် နွံပိုန် ဘာဇၞော် ကွာန်ကအ်ဗိန်ရ။ အစာတၠဝွံ စဴအာသွဝ် ပ္ဍဲသက္ကရာဇ် ၁၃၀၇ ရ။ အခိင်လၟုဟ် ကျာ်ဇၞော်အစာ ကေတုမာလာ နွံပိုန် ဘာကွာန်ကအ်ပလိုင်၊ ပွိုင်ဍုင်ကျာ်မြဟ်ဂှ် ဒှ် အစာတၠဂအုပ်ဂိုဏ်တုဲ ဒှ်အစာတၠ မရနုက် ကု ၁၁ ရ။ ဂကောံဂိုဏ်ဝွံ သၞာံ ၂၀၂၃ ဂှ် သီုဖအိုတ် နွံ ၂၁ ဘာ။

အစာတၠဂိုဏ်ဂမၠိုင်

ကျာ်ဇၞော်အစာ သဳလတေဇသာမိ (- ၁၃၀၇)

ကျာ်ဇၞော်အစာညာဏဝံသထေရ် နွံပိုန် ဘာဇၞော်ဂှ် စဴအာသွဝ်တုဲ ကောန်ကွး ကျာ်ဇၞော်ဂှ် ကျာ်ဇၞော်အစာ သဳလတေဇသာမိ (ကျာ်ဇၞော်ဖျောဝ်) ဇာတိ ကွာန်ကအ်ဗိန် ဂွံဒှ် နွံပိုန်ဘာဇၞော်ရ။ ကျာ်ဇၞော်အစာညာဏဝံသထေရ်ဝွံ ဍိုက်ပေင်တဴ ကုဣဒ္ဓိဗလပညာတုဲ ဂွံဒုင်ပူဇဴ အလုံမွဲရးဒေသတၞင်သဳ (အခိင်လၟုဟ် တွဵုရးဍုင်ကရေင်၊ တွဵုရးဍုင်မတ် ကေုာံ ရးတၞင်သဳ)ရ။ စတမ်နူ ကျာ်ဇၞော်အစာတၠဏအ်တုဲ ဂကောံဂိုဏ်ပဝါရဏာ ရ။ ကျာ်ဇၞော်အစာ သဳလတေဇသာမိဂှ် ဒှ်မူလဘူတ အစာတၠ ဂအုပ်ဂိုဏ်ပဝါရဏာ ကအ်ဗိန် ဘာဇၞော် ရ။ ကျာ်ဇၞော်ဝွံ က္လိဂွံ အာယုက် ၆၇ သၞာံ ၄၇ ဝှ် စုတိစဴသွဝ် ပ္ဍဲသက္ကရာဇ် ၁၃၀၇ ရ။

ကျာ်ဇၞော်အစာ ဝါရလင်္ကာ (၁၃၀၇ - ၁၃၃၆)

ကျာ်ဇၞော်အ္စာဝါရလင်္ကာ ဇာတိကွာန်ခယျးမ္ၚး ဘာၜဳ ပွိုင်ဍုင်ဘာအင်ဂှ် ဒှ်ကျာ်ဇၞော်အ္စာတၠဂအုပ်ဂိုဏ် မရနုက်ကဵုၜါရ။ ကျာ်ဇၞော်အ္စာတၠဝွံ ဍိုက်ပေင်တဴဓုရၜါ စဳကၠးတဴ ပ္ဍဲပရေင်ဝိနယ် ပရေင်လောကဝတ်ဓမ္မဝတ်တုဲ ပ္ဍဲအာယုက်(၄၃)သၞာံ (၂၃)ဝှ် ဒှ်အာစာတၠဂအုပ်ဂိုဏ်ပဝါရဏာကအ်ဗိန်ဘာဇၞော်ရ။ ကျာ်ဇၞော်ဝွံ ဒှ်အ္စာတၠဂအုပ်ဂိုဏ်(၄၂)သၞာံတုဲ ပ္ဍဲ ၁၃၃၆-သၞာံ ကလိဂွံအာယုက် (၈၅)သၞာံ (၆၅)ဝှ်ဂှ် စုတိစဴအာသွဝ်ရောင်။

ကျာ်ဇၞော်အစာ ဝါရိန္ဒထေရ် (၁၃၃၆ - ၁၃၃၉)

ကျာ်ဇၞော်အ္စာဝါရိန္ဒထေရ် ဇာတိကွာန်ခယျးပ္ဍဲ ဘာဒုန်၊ ကွာန်ကအ်ယက္ခ ပွိုင်ဍုင်ဘာအင် ဒှ်အ္စာတၠဂအုပ်ဂိုဏ်ပဝါရဏာ ကအ်ဗိန်ရ။ ဒှ်အ္စာတၠဂအုပ်ဂိုဏ် ပန်သၞာံတုဲ ကျာ်ဇၞော်အ္စာတၠဝွံ ၁၃၃၉ သၞာံ ကလိဂွံအာယုက် (၈၀)သၞာံ၊ (၆၀)ဝှ် စုတိစဴအာသွဝ်ရ။

ကျာ်ဇၞော်အစာ ဥတ္တမရမ္ဘထေရ် (၁၃၃၉ - ၁၃၄၈)

ကျာ်ဇၞော်အ္စာဥတ္တမရမ္ဘထေရ် ဇာတိကွာန်ကအ်ပလိုင်၊ ပွိုင်ဍုင်ကျာ်မြဟ် ဒှ်အ္စာတၠဂအုပ်ဂိုဏ်ပဝါရဏာ ကအ်ဗိန်ရ။ ဒှ်အ္စာတၠဂအုပ်ဂိုဏ် ဒ္စိတ်သၞာံတုဲ ကျာ်ဇၞော်အ္စာတၠဘာကအ်ပလိုင်ဝွံ ၁၃၄၈ သၞာံ ကလိဂွံအာယုက် (၈၁)သၞာံ၊ (၆၂)ဝှ် စုတိစဴအာသွဝ်ရ။

ကျာ်ဇၞော်အစာ ပုပ္ဖရမ္မထေရ် (၁၃၄၈ - ၁၃၅၈)

ကျာ်ဇၞော်အ္စာပုပ္ဖရမ္မထေရ် ဇာတိကွာန်ခယျးမ္ရး၊ ပွိုင်ဍုင်ဘာအင် ဘာ-ကွာန်ကျာ်ဇၞော် ဒှ်အ္စာတၠဂအုပ်ဂိုဏ်ပဝါရဏာ ကအ်ဗိန်ရ။ ဒှ်အ္စာတၠဂအုပ်ဂိုဏ် စှ်သၞာံတုဲ ကျာ်ဇၞော်အ္စာတၠဘာကျာ်ဇၞော်ဝွံ ၁၃၅၈ သၞာံ ကလိဂွံအာယုက် (၉၁)သၞာံ၊ (၇၁)ဝှ် စုတိစဴအာသွဝ်ရ။

ကျာ်ဇၞော်အစာ ညာဏထေရ် (၁၃၅၈ - ၁၃၆၅)

ကျာ်ဇၞော်အ္စာညာဏထေရ် ဇာတိကွာန်ရုတ္တံင်၊ ပွိုင်ရေဝ် ဘာ- ကွာန်ခအံင်ကြေဟ် ဒှ်အ္စာတၠဂအုပ်ဂိုဏ်ပဝါရဏာ ကအ်ဗိန်ရ။ ဒှ်အ္စာတၠဂအုပ်ဂိုဏ် ထပှ်သၞာံတုဲ ကျာ်ဇၞော်အ္စာတၠ ဘာခအံင်ကြေဟ်ဝွံ ၁၃၆၅ သၞာံ ကလိဂွံအာယုက် (၉၃)သၞာံ၊ (၇၃)ဝှ် စုတိစဴအာသွဝ်ရ။

ကျာ်ဇၞော်အစာ ဝဏ္ဏထေရ် (၁၃၆၅ - ၁၃၇၇)

ကျာ်ဇၞော်အ္စာဝဏ္ဏထေရ် ဇာတိကွာန်ကအ်ပံက်၊ ပွိုင်ဍုင်ကအ်ကြိက် ဘာထဝ်-ကွာန်ကအ်ပံက် ဒှ်အ္စာတၠဂအုပ်ဂိုဏ်ပဝါရဏာ ကအ်ဗိန်ရ။ ဒှ်အ္စာတၠဂအုပ်ဂိုဏ် စှ်ၜါသၞာံတုဲ ကျာ်ဇၞော်အ္စာတၠဘာကအ်ပံက်ဝွံ ၁၃၇၇ သၞာံ ကလိဂွံအာယုက် (၉၅)သၞာံ၊ (၇၁)ဝှ် စုတိစဴအာသွဝ်ရ။

ကျာ်ဇၞော်အစာ ဝေပုလ္လထေရ် (၁၃၇၇ - ၁၃၇၈)

ကျာ်ဇၞော်အ္စာဝေပုလ္လထေရ် ဇာတိကွာန်ကအ်ယက္ခ၊ ပွိုင်ဘာအင် ဘာဒုန် ကွာန်ကအ်ယက္ခ ဒှ်အ္စာတၠဂအုပ်ဂိုဏ်ပဝါရဏာ ကအ်ဗိန်ရ။ ဒှ်အ္စာတၠဂအုပ်ဂိုဏ် ၜါသၞာံတုဲ ကျာ်ဇၞော်အ္စာတၠဘာဒုန်ဝွံ ၁၃၇၈ သၞာံ ကလိဂွံအာယုက် (၉၀)သၞာံ၊ (၇၀)ဝှ် စုတိစဴအာသွဝ်ရ။

ကျာ်ဇၞော်အစာ ရာဝိန္ဒထေရ် (၁၃၇၈ - ၁၃၈၁)

ကျာ်ဇၞော်အ္စာရာဝိန္ဒထေရ် ဇာတိကွာန်ခယျးပ္ဍဲ၊ ပွိုင်ဍုင်ဘာအင် ဘာမန်-ကွာန်ခယျးပ္ဍဲ ဒှ်အ္စာတၠဂအုပ်ဂိုဏ်ပဝါရဏာ ကအ်ဗိန်ရ။ ဒှ်အ္စာတၠဂအုပ်ဂိုဏ် စှ်ပန်သၞာံတုဲ ကျာ်ဇၞော်အ္စာတၠဘာမန်ဝွံ ၁၃၈၁ သၞာံ ကလိဂွံအာယုက် (၈၁)သၞာံ၊ (၆၂)ဝှ် စုတိစဴအာသွဝ်ရ။

ကျာ်ဇၞော်အစာ ဝဏ္ဏကထေရ် (၁၃၈၁ - ၁၃၈၄)

ကျာ်ဇၞော်အ္စာဝဏ္ဏကထေရ် ဇာတိကွာန်ကအ်ဗိန်၊ ပွိုင်ကအ်ကြိက် ဘာဇၞော်၊ ကွာန်ကအ်ဗိန် ဒှ်အ္စာတၠဂအုပ်ဂိုဏ်ပဝါရဏာ ကအ်ဗိန်ရ။ ဒှ်အ္စာတၠဂအုပ်ဂိုဏ် ပန်သၞာံတုဲ ကျာ်ဇၞော်အ္စာတၠကအ်ဗိန်ဝွံ ၁၃၈၄ သၞာံ ကလိဂွံအာယုက် (၈၃)သၞာံ၊ (၆၃)ဝှ် စုတိစဴအာသွဝ်ရ။

ကျာ်ဇၞော်အစာ ကေတုမာလာထေရ် (၁၃၈၄ - လၟုဟ်)

ကျာ်ဇၞော်အ္စာကေတုမာလာထေရ် ဇာတိကွာန်ကအ်ပလိုင်၊ ပွိုင်ဍုင်ကျာ်မြဟ် ဘာ-ကွာန်ကအ်ပလိုင် နဒဒှ်အ္စာတၠဂအုပ်ဂိုဏ်ပဝါရဏာ ကအ်ဗိန် ဘာဇၞော် အခိင်ပစ္စုပ္ပန်လၟုဟ် ကလိဂွံအာယုက် (၈၁) သၞာံ၊ (၆၁)ဝှ်ဂှ် ထိင်ဒဝ်မင်မွဲအာ ပရေင်ကမၠောန်ဂကောံဂိုဏ်ပဝါရဏာ ကအ်ဗိန် ဘာဇၞော် အတိုင်ဒေသနာကျာ်ရောင်။