ဇြပ်သဘင်ဓရ်မန် မတ်မလီု
| ဇြပ်သဘင်ဓရ်မန် မတ်မလီု | |
|---|---|
 | |
| တင်ဂၞင် နာနာဂမၠိုင် | |
| ဗီုပြင်စမြိုင် | ရးပလိုတ် |
| ဌာန်ဒမံင် | ဗဒါဲသၠာတ်မာင်ဒါ |
| စသြိုင် | သၞာံသြိုင် (ဟွံတီ) ရာန်လဝ် နူ ၁၉၈၇ |
| င္ၚုဟ် | ၁၈ ကိုဋ် |
| တၠ | ကမ္မတဳထိင်ဒဝ်ဇြပ်မန် မတ်မလီု |
| တင်ဂၞင် သောဲသောဲဗြောဲဗြောဲ | |
| ကိရိယာ | တိုက် |
ဇြပ်သဘင်ဓရ်မန် မတ်မလီု (ဗၟာ: မော်လမြိုင် မွန်ဓမ္မာရုံ) ဂှ် နွံ ပ္ဍဲဗဒါဲသလာတ်မာင်ဒါ၊ ဍုင်မတ်မလီု။ ရန်တၟအ်ကဵု ကောန်ဂကူမန် ညးမပဒတဴ လတူဍုင်မတ်မလီုတအ် ဂွံကောံဓရီု၊ ဂွံကၠောန် ကမၠောန်မဆေင်ကဵု ဂကူမန် ဗွဲမဗၠးၜးတုဲ နူစ သၞာံ ၁၉၈၄ ဂှ် ဖျေဟ်လဝ် သ္ဂုတ်သွာတ် သွက်ဂွံရာန် သ္ၚိ (ဝါ) ဇြပ်သဘင်ဓရ်မန်မွဲရ။ စိုပ်သၞာံ ၁၉၈၇ ဂှ် ဂွံတီကေတ် သ္ၚိဇၞော်မွဲ (လၟုဟ် ဇြပ်သဘင်ဓရ်မန် မတ်မလီု) သွံဒၟံင် ၁၈ ကိုဋ်တုဲ နကဵု သြန် နူကောန်ဂကူမန်ဂမၠိုင်ဂှ် ရာန်ကေတ်လဝ် နူသၞာံ ၁၉၈၇ တေအ်ရ။ ဇြပ်သဘင်ဓရ်မန် မတ်မလီုဂှ် မင်မဲဒၟံင် နကဵု ကမ္မတီထိင်ဒဝ်ဇြပ်မန် ဍုင်မတ်မလီု ရ။
ဝင်[ပလေဝ်ဒါန် | ပလေဝ်ဒါန် တမ်ကၞက်]
စပ်ကဵု ပ္တန် ဇြပ်သဘင်ဓရ်မန် မတ်မလီုဂှ် စက္တဵုဒှ်ကၠုင် နူသၞာံ ၁၉၈၄ တေအ် ဟီုမာန်ရ။ သွက်ဂွံကၠောန် တ္ၚဲကောန်ဂကူမန် မရနုက်ကဵု ၃၈ လတူဍုင်မတ်မလီုတုဲ ပ္ဍဲကဵု တ္ၚဲအဒိုတ်မွဲတ္ၚဲဂှ် အစာနာဲထောန်သိင်၊ နာဲသက်လောန်၊ နိုင်မောင်စိန်၊ နိုင်အောင်ခန့်၊ နိုင်ချစ်ငွေ၊ နိုင်သိန်းဆွေ၊ နိုင်ရွှေချိန်၊ မင်းစိုးလင်၊ နိုင်သောင်းရှိန်တအ် ပကောံဓရီု ပ္ဍဲဇြပ်သဘင်ဓရ်ကျာ်သုက်ရ။ ဂကောံဂေါပက ကျာ်သုက်တအ်လေဝ် ညးတအ်ဟီု ပ္ဍဲဒၞာဲဂှ် ညးတအ် သွက်ဂွံ ကောံဓရီုနွံဒၟံင်တုဲ ညးကဵုဂၠာဲ ဒၞာဲတၞဟ်ရ။ ဟိုတ်ဂှ်ရ ဂကောံကၠောန်ဗဒှ် တ္ၚဲကောန်ဂကူမန်တအ်ဂှ် ဒးအာ ပကောံဓရီု ပ္ဍဲဇြပ်လ္ၚောဝ်ကျာ် လပါ်သၟဝ်ကျာတေအ်ရ။[၁]
ပ္ဍဲအခိင်ဂှ် ကောံဓရီု ပရေင်ကမၠောန် တ္ၚဲကောန်ဂကူမန်ဂှ်လေဝ် ဒှ်ကမၠောန် မကဵု အန္တရာယ် ကုပရေင်ဂီုကၠီု ဍုင်ဂးတုဲ ထံင်ပရိုင်တအ် ဗက်ဍံင်ဒၟံင် လက်ကြဴ က္ဍိုပ်သကိုပ်မန် တအ်ဏအ် လၟိုန်ရ။ ဟိုတ်ဂှ်ရ သွက်ဂွံ ကောံဓရီုဂှ် သ္ၚိလဵုမွဲလေဝ် ဟွံဂံင်ကဵုကၠောန် ပ္ဍဲသ္ၚိညးတအ်တုဲ ဒးအာကၠောန် အကြာ ဘာလကျာ်၊ အကြာဇြပ်၊ ဟွံသေင်မ္ဂး အကြာအရှာမ်ကျာ်တအ်ရ။ မဒုင်သဇိုင် ကုဟိုတ်တအ်ဏအ်တုဲ နကဵု ဂကောံမန်ဏအ် နွံပၟိက်ကၠုင် ဒၞာဲဒတန်ဗၠးၜးမွဲရ။ ပ္ဍဲတ္ၚဲ မချပ်ဂၞန် သွက်ဂွံကၠောန် တ္ၚဲကောန်ဂကူမန် မရနုက်ကဵု ၃၈ ဝါဂှ်ရ ညးတအ် တုပ်စိုတ် ရေင်သကအ် သွက်ဂွံ ရာန်သ္ၚိမွဲရ။ ကမၠောန်မရာန်သ္ၚိဂှ် ကဵုလဝ် တာလျိုင် ကုနိုင်ရွှေချိန်ရ။[၁]
သၞာံ ၁၉၈၀တအ်ဂှ် ဒှ်ခေတ်တၠအဝဵုနေဝေန် (မဆလ) တုဲ ကၟာတ်လဒဵုလဝ် အခေါင်ချဳဓရာင် ပရေင်ပ္ကောံမၞိဟ် ဗွဲတၟေင် မဆေင်ကဵု ပရေင်ဍုင်ကွာန် ဗွဲမတေင်ဂြတ်ရ။ ပ္ဍဲအခိင်ဂှ် ညံင်ရဴ ပရေင်ဍုင်ကွာန် မဍန်ဂြက်ကီု ပရေင်ပိုန်ဒြပ် ကေုာံ ပရေင်ပ္ကောံမၞိဟ်တအ်လေဝ် ဝါတ်ဂါတ် ဍန်ဂြတ် ဗွဲမလောန်ကီုရ။ ရာန်တုဲရ ယဝ်ရ ဒးဒှ်သၠေဟ်ပၟာ စပ်ကဵုပရေင်ဍုင်ကွာန်မ္ဂး မၞိဟ်မအာဂတတအ်ဂှ် ဒးဒုင်ရပ် ဖျေဟ်ထံင်၊ သ္ၚိ/ဒတန်ဂှ်လေဝ် ဒးဒုင်သီမာန်ဏီရ။ ဟိုတ်ဂှ်ရ မၞိဟ်မအာဂတ ပၠတရဴ ကိစ္စရာန်ဇြပ်သဘင်ဓရ်တအ်ဂှ် အန္တရာယ် ဇၞော်ဇၞော် ဒးဆဵုဂဗမာန်ဒၟံင်ရ။[၂]
ဇြပ်သဘင်ဓရ်မန် မတ်မလီုလၟုဟ်ဂှ် ကိုပ်ကၠာတေအ် ဒှ်လဝ် သ္ၚိ ဂကောံသ္ၚိကၟိန် ဒေါ်နှင်းလှ၊ ဒေါ်စောသင်း ကဵု ဒေါ်ဖွားတအ်ရ။ သ္ၚိဂှ် ဇၞော်တုဲ ကၠအ်သၠဲကွေဟ်ရ။ အခိင် ဒေါ်နှင်းလှ မပဒတဴလဝ် ပ္ဍဲသ္ၚိဂှ်မ္ဂး ညးပလဝ် ဒၞာဲမလွဳလွတ် မင်မဲ ကောန်ကမၠင်ဂမၠိုင်၊ ကၠဵုကမၠင်ဂမၠိုင် (ကၠဵု မပြးဒၟံင် အကြာဍုင်ကွာန် မဟွံမဲ ကုတၠ)တအ်ရ။[၃]
ကိုဟန်ထွန်း ညးမပဒတဴ ဗဒါဲသ္ၚိဇၞော်ဂှ် ရန်တၟအ် မိက်ဂွံကၠောန် မဝ်တေဝ် (motel)တုဲ ဗာန်အာတ်ရာန်ကေတ် သ္ၚိဂှ် နကဵု င္ၚုဟ် ၁၈ ကိုဋ်၊ တုဲပၠန် သွက် ဒေါ်နှင်းလှ ဂွံမံင်ဂှ် ညးသြိုင်ကဵု သ္ၚိတိုက်တၟိမွဲမ ပ္ဍဲဒကဴကၠအ်ဂှ်ရ။ နကဵု ကိုဟန်ထွန်းဂှ် ကၠုင်ချပ် စကဵု နာဲသောင်းရှိန် သွက်ဂွံရာန် မွဲစွံရ။[၃]
နာဲသောင်းရှိန် ဂွံတီကေတ် ဒဒှ်ရ သ္ၚိဇၞော် ဒေါ်နှင်းလှ မသွံဒၟံင်တုဲ လဴကဵု ညးတာလျိုင်တအ်တုဲ ဗွဲမပြဟ် ကောံရေင်သကအ် ပ္ဍဲ သ္ၚိ နိုင်မောင်စိန်။ ပ္ဍဲကောံဓရီုဂှ် အစာထောန်သိင် (အစာထဝ်သောန်) လေဝ် တိုန်စိုပ်ကီုရ။ နူကဵု ကောံဓရီုဂှ် ဖျေဟ်သ္ဂုတ်သွာတ် သွက်ဂွံရာန်ကေတ် သ္ၚိဇၞော် ဒေါ်နှင်းလှ ဂှ်ရ။ ညံင် ဒေါ်နှင်း ဂွံသွံကဵု ဂကောံမန်ဂှ် နိုင်စောင် (နာဲရာဇာ) တၠစက်ဍာ်ကမြံင် (ရေခဲစက်) ဗိုင်ဟီုကဵု ဒေါ်နှင်း ရ။ သွက်ဂွံကဵု ခရမ်ဂှ် မွဲတဲဓဝ် ဗက်ဒုင်ဒါန်သြန်ရ။ အခိင်ဂှ် ကိုဟန်ထွန်း လေဝ် ညးကဵုလဝ် ခရမ်တုဲရ။ နကဵု ဂကောံမန် ဟီုကဵု ကိုဟန်ထွန်း င္ၚုဟ်ခရမ် မလီုဂတိပါင်ဂှ် ကဵုညး ကၠအ် လပါ်လက်ကြဴသ္ၚိဂှ်ကီုလေဝ် နကဵု ကိုဟန်ထွန်း ဟွံကေတ်၊ စၞးဂှ် ညးကေတ် လှုဲ ၆၀၀၀၀ ဒကေဝ် (ဒတုံဒၟံင် င္ၚုဟ်ထဝ် ၁၅ ဒကေဝ်)ရ။[၃]
သွက်သြန် မသှ်ေဒၟံင်တအ်ဂှ် ဇၟာပ် တ္ၚဲအဒိုတ် မဒှ်တ္ၚဲကၟာတ်ကမၠောန်၊ အစာနာဲထောန်သိင်၊ နာဲရွှေချိန်၊ နာဲပါန်အံင်၊ နာဲသက်လောန်၊ ဒံက်တာမေန်သဵုလေန်တအ် ဗက်အာဒုင်ဒါန် အကြာသ္ၚိသေဋ္ဌဳမန် မနွံ ပ္ဍဲပွိုင်ဍုင်ဇြပ်ဗု၊ မုဟ်ဍုင်တအ်တုဲ ပ္ဍဲပွိုင် ၆ ဂိတုဂှ် သြန်ပြေအာရ။[၃] ဇြပ်သဘင်ဓရ်မန် မတ်မလီုဂှ် နကဵု သြန်ကောန်ဂကူမန်တအ်ဂှ် ရာန်ကေတ်လဝ် နူကဵု ဒေါ်နှင်းလှ၊ ဒေါ်စောသင်း၊ ဒေါ်ဖွား ပ္ဍဲသၞာံ ၁၉၈၇ ရ။[၂] ချုက်လိက်ကသုက် နဒဒှ် မသၠးကဵု ဒါန်ဂှ် ပ္ဍဲသၞာံ ၁၉၈၉ ဂိတုဂျောန် ၆။[၄]
ညးမအာဂတပၠတရဴ ကိစ္စကမၠောန် မရာန် ဇြပ်သဘင်ဓရ်မန် မတ်မလီု ဂှ်
- နိုင်ထွန်းသိန်း
- နိုင်မောင်စိန်း
- နိုင်သက်လွင်
- နိုင်သိန်းဆွေ
- နိင်ရွှေချိန်
- နိုင်ပန်းအောင်
- နိုင်သောင်းရှိန်
- ဒေါက်တာမင်းစိုးလင်း
မၞိဟ်မထပက်လဝ် စၟတ်တဲ ပ္ဍဲလိက်ကသုက် ရာန်ဇြပ်သဘင်ဓရ်မန်
နဒဒှ် ညးမရာန်
- နိုင်ထွန်းသိန်း
- နိုင်မောင်စိန်
- နိုင်ပန်အောင်
- နိုင်သိန်းဆွေ
- နိုင်သောင်းရှိန်
- နိုင်ငွေသိန်း(ဇ္နူ)
- နိုင်ပန်းစိန်
- ဒေါက်တာမင်းနွယ်စိုး
မၞိဟ် နဒဒှ် သက်သဳ
- နိုင်ရွှေချိန်
- နိုင်ဟန်ထွန်း
ဥက္ကဋ္ဌ ကမ္မတဳထိင်ဒဝ် ဇြပ်မန် မတ်မလီု[ပလေဝ်ဒါန် | ပလေဝ်ဒါန် တမ်ကၞက်]
- နိုင်မောင်စိန်း
- နိုင်ထွန်းအုန်း
- နိုင်သက်လွင်
- နိုင်သောင်းရှိန်(နာဲသရက်) လၟုဟ်
နိဿဲ[ပလေဝ်ဒါန် | ပလေဝ်ဒါန် တမ်ကၞက်]
- ↑ ၁.၀ ၁.၁ ရှိန်, နိုင်သောင်း (January 9, 2021). " မော်လမြိုင်မြို့ မွန်ဓမ္မာရုံ. Open.
- ↑ ၂.၀ ၂.၁ ရှိန်, နိုင်သောင်း (December 26, 2021). " မော်လမြိုင်မြို့ မွန်ဓမ္မာရုံ. Open.
- ↑ ၃.၀ ၃.၁ ၃.၂ ၃.၃ ရှိန်, နိုင်သောင်း (January 3, 2021). " မော်လမြိုင်မြို့ မွန်ဓမ္မာရုံ. Open.
- ↑ အခေတ်မန်၊ ပရိုင်။ "" ရုဲစှ်ဒက်ပတန် ကမ္မတဳထိင်ဒဝ်မင်မွဲဇြပ်သ္ဘင်ဓရ်မန် (ဍုင်မတ်မလီု) တၟိ တုဲဒှ်အာ"၊ Men3 News၊ November 13, 2022။
- ↑ ရှိန်, နိုင်သောင်း (December 3, 2021). " မော်လမြိုင်မြို့ မွန်ဓမ္မာရုံ. Open.