ထာမ်ပလိက်:Featurebiography
အစာဖဝ်ချိုဝ် (၁၉၀၅ နဝ်ဝေမ်ပါ ၁၈ - ၁၉၈၄ မေ ၁၁)ဝွံ ဒှ်ညးမပံက်မတ် ကောန်ဂကူမန် စပ်ကဵု ပရေၚ်ဍုၚ်ကွာန် ကၠာအိုတ် ကြဴနူ မန်မကျအာဍုၚ်မန်ဟံသာဝတဳ ကုဗၟာတုဲ၊ ဒှ်မၞိဟ် မဟီု ယဝ်ရမန် ဟွံကၠောန် ပရေၚ်ဍုၚ်ကွာန်တၞဟ်ခြာမ္ဂး အခေါၚ်ဂကူမန် မံက်ဂတဝ်ကၠုၚ် ဟွံမာန် တုဲ ဒက်ပ္တန်ကၠုၚ် ဗော်ပရေၚ်ဍုၚ်မန် ကၠာအိုတ် ပ္ဍဲခေတ်ပစ္စုပ္ပန်ဏအ်ရ။ တုဲဗက်ဆဝ်မ္ၚိုဟ် ဂကူမန် ညံင်ဂွံၚုဟ်ကတဵု ပ္ဍဲပရေင်ဍုင်ကွာန်ရ၊၊
စိုပ်သၞာံ ၁၉၆၀ ဂဥုပ်ဗိုလ်နေဝၚ်း ကၠောန်သဘၚ်ရုဲမာဲဂှ် အစာဖဝ်ချိုဝ် ဒုၚ်ရုဲမာဲ ပ္ဍဲပွိုၚ်ဍုၚ်ရေဝ်တုဲ ကလိဂွံဇမၞးမာဲရ။ နာဲအံၚ်ထောန် ဂွံဒှ်အမာတ်ကီုတုဲ ဂွံဒှ်ဝန်ဇၞော်ကေၚ်ကာမန်ရ။ ၜိုန်ရ အစာဖဝ်ချိုဝ် ဟွံဂွံဒှ် ဝန်ဇၞော်ကေၚ်ကာဂကူမန်ကီုလေဝ် ပ္ဍဲသဳကၠဳတောၚ်ကြီး မကၠောန်ဗဒှ် ပ္ဍဲဂိတုဂျန် ၁၂ ညးဂွံအာတိုန်စိုပ်တုဲ ဂွံအခေါၚ်ဟီုအရေဝ် သွက်ဂကူမန်ရ။
သွက်ဂွံဗမံက်တိုန် တွဵုရးဍုၚ်မန် ကဵု တွဵုရးယခေၚ်ဂှ် အလဵုအသဳပံက် ကမ္မရှေန်ပၠန်ရ။ စိုပ်သၞာံ ၁၉၆၂ ဂိတုဇန်နဝါရဳ ၁၅ ဂှ် ပၞာန်နေဝၚ်း ကလေၚ်သီကေတ် အဝဵုဍုၚ်ပၠန်တုဲ နာဲအံၚ်ထောန် ဒးဒုၚ်ရပ်ရ။ အတိုၚ်အစဳအဇန် မဗၟံက်ပတိုန် ဍုၚ်မန် မၞုံကဵုအဝဵုဂှ်လေဝ် ကၠေအ်အာ အကြာပၠံၚ်သေနာတ်ရ။
ပ္ဍဲခေတ် ပၞာန်နေဝၚ်း မအုပ်ဓုပ်ဍုၚ်ဂှ် နူသၞာံ ၁၉၆၀ ဂှ် ညးဂွံဒုၚ်ခပတိုန် နဒဒှ်မၞိဟ်မကဵုကသပ်ဍုၚ်မွဲ ပ္ဍဲမၞိဟ် ၃၃ တၠဂှ်တုဲ ပ္ဍဲသၞာံ ၁၉၈၄ ဂှ် ဂွံဒုၚ်ကေတ် တဆိပ်ကြာဂုဏ်စရာဲကၟိန်ဍုၚ် (နိုၚ်ငံဂုဏ်ရည်ပထမအဆင့်)။