မန်ရာဇာ၊ နာဲ
| နာဲမန်ရာဇာ သၟာတဝ်စၞေဟ် သွက်အခေါင်ဂကူမန် | |
|---|---|
 | |
| သၠးဂၠံဂဝ် |
အဝ်ဂေတ် ၁၊ ၁၉၆၂ ကွာန်ပါင်ကၟာ၊ ပွိုင်ဍုင်မုဟ်ဍုင် |
| ဂကူ |
 Monမန် |
| ကောန်ဍုင် |
 Myanmarကောန်ဍုင်ဗၟာ |
| ကဆံင်ပညာ | B.A(Hons),M.A(Thesis) Burmese |
| ဘာ | တက္ကသိုလ်လ္ဂုင် |
| သၞာံချဳဓရာင် | ၁၉၈၄ - စဵုကဵုလၟုဟ် |
| ကောန်ကမၠောန် | အစာဘာ |
| ဂကောံ | ဂကောံဗတောန်လိက်ပတ်မန် ကေုာံ ယေန်သၞာင်ဗုဒ္ဓဘာသာ |
| မဒယှ်တဴ | တၠပညာ ကေုာံ က္ဍိုပ်သကိုပ် |
| ဗော် | ဗော်ညဳသၟဟ်မန် |
| Criminal penalty | ၁၉၈၉ မဒးဒုင်ထံင် နကဵုဒုဟ် မဆက်ဆောံ ဂကောံပၠန်ဂတး (ပုဒ်မ ၁၇/၁) |
| အိန်ထံင် | မိတာန်တာန်မျေအ် |
| ကောန်ဇာတ် |
|
| အံက် |
|
| စၟတ်တဲ | |
 | |
နာဲမန်ရာဇာ (နိုင်စိုးဝင်း) (သၠးဂဗ္ဘ ၁ အဝ်ဂေတ် ၁၉၆၂၊ ပါင်ကၟာ)ဝွံ ဒှ်အစာဘာတက္ကသိုလ်တြေံ၊ က္ဍိုပ်သကိုပ် သွက်အခေါင်ဂကူမန် ပ္ဍဲလပါ်လိက်ပတ် ပရေင်ဍုင်ကွာန်မွဲတၠရ။ ညးဝွံ နကဵုဒုဟ် မဆက်ဆောံ ဗော်ပရေင်ဍုင်ကွာန် မ္ၚးသၞောဝ် (ဗော်ဍုင်မန်တၟိ) တုဲ ပ္ဍဲသၞာံ ၁၉၈၉ ဂှ် ဒးဒုင်ရပ် ဖျေဟ်ထံင်၊ တိတ်နူထံင်တုဲ ဒက်ဘဝသ္ၚိကၟိန် ကုမိတာန်တာန်မျေအ် ဇာတိကွာန်ကၟာဝက်တုဲ ပဒတဴကၠုင် ပ္ဍဲကွာန်ကၟာဝက် (လၟုဟ် ဍုင်ကၟာဝက်) စဵုကဵု အခိင်လၟုဟ်ရ။ နာဲမန်ရာဇာဂှ် ဒှ်မၞိဟ်မဂယိုင်လမျီု နကဵုပညာမွဲတၠတုဲ ပံက်လဝ် ဂျူရှေန် သွက်ကွးဘာတန်ဒဿမ ပ္ဍဲသ္ၚိဇကုရ။ ဟိုတ်ဂှ်ရ ညးဝွံ သၟတ်မနွံ ပ္ဍဲဒေသဂှ် ကေင်ဒှ်လဝ် ကွးဘာညး ဂၠိုင်ဗွဲမလောန်ရ။ နာဲမန်ရာဇာဝွံ ဗွဲမဗဗွဲ ကုအခိင်အခါ ခေတ်ကာလ အခေါင်အရာဂှ် သွက်ဂကူမန် ဗွဲတၟေင်လပါ်လိက်မန် ဂွံကလေင်ဗျာပ်တြးအာ အကြာဂကူမန် ပ္ဍဲဂကောံဗတောန်လိက်ပတ်မန် ကေုာံယေန်သၞာင်ဗုဒ္ဓဘာသာကီု၊ ပ္ဍဲကဵု ကမၠောန်ဗတောန်လိက်မန် ပ္ဍဲဘာအလဵုအသဳဂမၠိုင်ကီု နကဵုကဆံင် အလုံဂကူမန်ဂှ် ရေင်တၠုင်ကၠုင်ဒၟံင်ရ။ ပါဲနူဂှ်တုဲ ဗွဲမဗဗွဲ ကုအကာဲအရာ အခေါင်ကၠောန် ပရေင်ဍုင်ကွာန် သွက်ဂကူမန်လေဝ် ရေင်တၠုင်ကၠောန်ကၠုင် ဟွံပိုတ်သကုတ် နူဘဝသၟတ် စဵုကဵု အခိင်လၟုဟ်ရ။
ပထမအဝဲ ကေုာံ ပရေင်ပညာ
[ပလေဝ်ဒါန် | ပလေဝ်ဒါန် တမ်ကၞက်]နာဲမန်ရာဇာ ညးဂမၠိုင် မကော်ဒၟံင် အစာရာဇာ၊ (ညးလ္ၚဵုကော်စ အစာသဵုဝေန်) ဝွံ ကတဵုဒှ်မၞိဟ် ပ္ဍဲကွာန်ပါင်ကၟာ ဇရေင်မိမၜါ နာဲမံင်ညိင် (နိုင်မောင်ငြိမ်း) မိကေန်ပါန် (မိကင်ပန်း) ပ္ဍဲကဵု ဂိတုအဝ်ဂေတ် ၁၊ ၁၉၆၂ ရ။ ပၞောဝ်ကဵု ကောန်ဇာတ် ဒစိတ်တၠဂှ် ညးဒှ်ကောန်ထဍဲ မရနုက်ကဵု ဒုတိယ။ အစာမန်ရာဇာဝွံ ဂွံအံင်ကေတ် တန်ဒဿမ နူကဵု ဘာတန်သမၠုင် (၂) ဍုင်မုဟ်ဍုင်တုဲ သၞာံ ၁၉၇၉ ဂှ် တိုန်ကဝ်လိက် တွဵုရးဍုင်မန်၊ သၞာံ ၁၉၈၁ ဂှ် တိုန်ကဝ်လိက်မတ်မလီုတုဲ ကလိဂွံ ဗြမဟိမုဘဳအေ။ သၞာံ ၁၉၈၄ ဂှ် ဆက်တိုန် တက္ကသိုလ်လ္ဂုင်တုဲ ဂွံအံင်ဇၞးကေတ် B.A(Hons),M.A(Thesis) Burmese ရ။
ကဆံင်ကမၠောန်
[ပလေဝ်ဒါန် | ပလေဝ်ဒါန် တမ်ကၞက်]နာဲမန်ရာဇာ ကလိဂွံဗြမဟိမု တန်မဟာ ပ္ဍဲသၞာံ ၁၉၈၄တုဲ လုပ်ပ အစာဘာ အခိင်ဒကုတ် ပ္ဍဲကဵု ကဝ်လိက်သၟာကမၠောန် လ္ဂုင် (Workers' College /လုပ်သားများကောလိပ်) နူဂှ် လုပ်ကၠောန် နဒဒှ် ဂျူတာ ပ္ဍဲကဵု တက္ကသိုလ်မတ်မလီုရ။ စိုပ်သၞာံ ၁၉၈၈ ပရေင်ကလိုက်ကမဵု ၈၈၈၈ ကတဵုဒှ်တုဲ ဘာတက္ကသိုလ်ဂမၠိုင်ကၟာတ်အာရ။ သၞာံ ၁၉၈၉ ဂှ် နကဵုဒုဟ် မဆက်ဆောံ ဂကောံမ္ၚးသၞောဝ် (ဗော်ဍုင်မ်တၟိ) ဒုဟ်ပိုဒ်ဇၞော် ၁၇/၁ ဂှ် ဒးဒုင်ရပ် ကုသၟိင်တၠအဝဵုပၞာန်တုဲ ဒးဒုင်ဖျေဟ်ထံင်တုဲ ကမၠောန်ဘဝအစာဘာတက္ကသိုလ်ဂှ်လေဝ် ဒးဒေါအ်အာကီုရ။
ကမၠောန်ကောန်ဂကူ
[ပလေဝ်ဒါန် | ပလေဝ်ဒါန် တမ်ကၞက်]နာဲမန်ရာဇာဝွံ နူကဵု ဘဝကွးဘာတက္ကသိုလ်ဂှ် ချဳဓရာင်ကၠုင် ပ္ဍဲကမ္မတဳလိက်ပတ်ယေန်သၞာင်မန်တုဲ လုပ်ကၠောန်ကၠုင် ပ္ဍဲအရာ မပ္တိတ် မဂ္ဂဇြေန်မန်၊ လိက်လၟေင်ပရိုင်ၜိုပ်ထဝ် (ရွှေဟင်္သာစာစဉ်) တအ်ဂှ် ကေတ်ကၠုင်လဝ်တာလျိုင် ဒၞာဲအဓိက ဗီုကဵု ညးအုပ်ကာနာနာတအ်ရ။ နာဲမန်ရာဇာ ဗၠးတိတ် နူထံင်တုဲ ပ္ဍဲအခိင် ဂကောံဒဳမဝ်ကရေသဳကောန်ဂကူမန်ဂှ်လေဝ် ချဳဓရာင်ကၠုင် ဒၞာဲအဓိကကီုရ။ ဂကောံဒဳမဝ်ကရေသဳကောန်ဂကူမန်ဂှ် ဒးဒုင်ပလီုတုဲ ကာလဒက်ပ္တန် ဂကောံဗတောန်လိက်ပတ်မန် ကေုာံ ယေန်သၞာင်ဗုဒ္ဓဘာသာဂှ်လေဝ် ကေတ်ကၠုင်တာလျိုင် ဒၞာဲအဓိက စဵုကဵု အခိင်လၟုဟ်ရ။ တုဲပၠန် ပ္ဍဲကဵု ကမ္မတဳမကၠောန်ဗဒှ် တ္ၚဲကောန်ဂကူမန် ဗဟဵုတအ်ကီု ပ္ဍဲဒၞာဲတာလျိုင်အဓိကဂှ် ယိုက်ဂၠေင်ကၠုင်ဒၟံင် ရိုဟ်ဒဒှ်သၞာံရ။
ဗော်ပရေင်ဍုင်ကွာန်
[ပလေဝ်ဒါန် | ပလေဝ်ဒါန် တမ်ကၞက်]ပ္ဍဲကာလ ဒက်ပတန် ဗော်ဒဳမဝ်ကရေသဳမန် (MDP) ဂှ် နဒဒှ် ဖက်ဆောညးအုပ်ကာ (၂) ယိုက်ဂၠေင်လဝ်ရ။ သၞာံ ၂၀၁၄ ဂိတုဇာန်နဝါရဳ ၂၆ ဗော်ဒဳမဝ်ကရေသဳမန် ကဵု ဗော်ဒဳမဵုကရေဇြဳအလုံဒေသရးမန် ပံင်တောဲတုဲ ဒက်ပ္တန်ပတိုန် ဗော်ကောန်ဂကူမန်ဂှ်လေဝ် ကေတ်ကၠုင်တာလျိုင် ဒၞာဲအဓိကကီုရ။ ဗော်ကောန်ဂကူမန်ဂှ် ၜိုန်ရ ဟီု မဒှ်ဗော်ၜါ မပံင်ကောံတုဲ မဒက်လဝ်ကီုလေဝ် ပရေင်ပံင်ကောံဂှ် ဟွံအံင်ဇၞး၊ ဆမၞိဟ်ညိညဟေင် ဒှ်ပံင်တုဲ ဗော်မန် မလုပ်ပြိုင်ရုဲမာဲဂှ် ဆက်ဒှ်ဒၟံင် ၜါဗော်ဖိုဟ်ရ။ ဗော်ပရေင်ဍုင်ကွာန်မန် ညံင်ဂွံဒှ် မွဲဗော်ဂှ် တၠပညာ၊ ခမဳသင်၊ ညးဍုင်ကွာန် ဂကောံမှာဇန်တအ် ပံင်ကောံတုဲ ဒက်ပ္တန်လဝ် ဒြဟတ်ရာမညရ။ ပ္ဍဲကဵု ဒြဟတ်ရာမညဂှ် နာဲမန်ရာဇာ ချဳဓရာင်ကၠုင် ဒၞာဲအဓိက သီုစိုတ် သီုစရိုတ်ရ။ နကဵုဂကောံဒြဟတ်ရာမည ပညဳပညပ်ကၠုင် ညံင်ဂွံဒှ်မွဲဗော်ဂှ် ဟိုတ်နူဟွံလောဲသွာတုဲ ညးဍုင်ကွာန်မန်တအ် ကဵုဒြဟတ်ဓရိုဟ် ညံင်ဂွံဒက်ပတန် ဗော်တၞဟ်တၟိမွဲ နကဵုယၟု ဗော်သ္ပစၞးကောန်ဂကူမန် ရ။ ပ္ဍဲအခိင် ဗော်ဍုင်မန်တၟိ ထပက်စၟတ်တဲ ဓဝ်ၜိုဟ်လလံတုဲ ဗော်ပရေင်ဍုင်ကွာန်ပိဗော်၊ ဗော်ဍုင်မန်တၟိ၊ ဗော်ဒဳမဵုကရေဇြဳအလုံရးမန်၊ ဗော်ကောန်ဂကူမန် ကေုာံ ဗော်သ္ပစၞးကောန်ဂကူမန် က္ဍိုက်ပ်တုဲ ပ္ဍဲသၞာံ ၂၀၁၈ ဂိတုမေ ၅၊ ၆၊ ၇ ပွိုင်ပိတ္ၚဲ ကၠောန်ပေါဲသဳကၠဳ ပရေင်ဍုင်ကွာန်မန် အလုံဂကူမန် လတူဍုင်ရေဝ်ရ။ နကဵုသွဟ် ပေါဲသဳကၠဳဂှ် တုပ်အာစိုတ် ရေင်သကအ် ဗော်ပရေင်ဍုင်ကွာန်မန်ၜါဂှ်ကီု ဗော်သ္ပစၞးဂကူမန် (နကဵု ညးဍုင်ကွာန်တအ် မစၟတ်သမ္တီ၊ နကဵုသၞောဝ် ဟွံဂွံဒှ်ဒတန်) ဂှ် ပံင်ကောံတုဲ ဒက်ပ္တန်ပတိုန် ဗော်ညဳသၟဟ်မန် ရ။ ပ္ဍဲဗော်ညဳသၟဟ်မန်ဂှ် နာဲမန်ရာဇာ ယိုက်ဂၠေင်ဒၟံင် နဒဒှ်ကေင်ကာဗဟဵု (CEC) မွဲတၠရ။
သွက်သဘင်မာဲ သၞာံ ၂၀၂၀ ဂှ် နကဵုဗဟဵု ဗော်ညဳသၟဟ်မန် ရုဲစှ်လဝ်ညး နဒဒှ် အလံင်အမာတ် စၠတ်ထဝ် တွဵုရး (၂) ရ။
ဆက်ဗှ်
[ပလေဝ်ဒါန် | ပလေဝ်ဒါန် တမ်ကၞက်]ပြကိုဟ်
[ပလေဝ်ဒါန် | ပလေဝ်ဒါန် တမ်ကၞက်]- လွှတ်တော်ကိုယ်စားလှယ်လောင်း ကိုယ်ရေးမှတ်တမ်းအကျဉ်းချုပ် (၂၀၂၀)