အစဳအဇန် လျးဂကူမန်
ဍုင် | မနဳလာ |
---|---|
ဒေသမဗလး | မုဟ်ဗမံက် |
ညးမဗလး | FEBC |
ဂလိုင်အလန် | ဇၟာပ်တ္ၚဲ နူဂယး ၅း၃၀-၆း၀၀၊ သဝ်တ္ၚဲ ၆း၀၀ - ၆း၃၀ ၃၁မဳတာ ၉၇၉၅Khz အခိင် |
တ္ၚဲမဗလးကၠာအိုတ် | ၄ ဂျူလာင် ၁၉၉၅ |
အရေဝ်ဘာသာ | မန် |
တၠ | FEBC |
ဝေပ်သာ် |
monradio |
အစဳအဇန် လျးဂကူမန် (ဝါ) ရေဒဳယော အေပ်အဳဘဳသဳ ဘာသာမန် (အၚ်္ဂလိက်: The Light of The Mon People or FEBC Mon ) ဝွံ ဒှ်အစဳအဇန် မဗလးရမ္သာင်မန် ပ္ဍဲလပှ်ကျာ ရေဒဳယော နကဵုဘာသာမန် သွက်ဂွံဟီုတွဟ် တဝှ်ဍောင်ဓရ်ဓမ္မခရေတ်ယာန် နူကဵု ဒေသမုဟ်ဗမံက် (Far East Broadcasting Company) မဖျေဟ်လဝ် ဒတန် ပ္ဍဲဍုင်ဇၞော်မနဳလာ၊ ရးနိဂီုဖလိပိန် မစကၠောန်ကၠုင် နူကဵု သၞာံ ၁၉၉၅ တေအ်ရ။ နကဵုအစဳအဇန် လျးဂကူမန်ဝွံ ပါဲနူ ကမၠောန်မဗလးရမ္သာင် ဇၟာပ်ပ်တ္ၚဲ ပွိုင် ၃၀ မိနေတ် နူဂယး သဝ်တ္ၚဲတုဲ ကမၠောန်မပတိတ်တြး လိက်ကၞပ် ကဝးဒွက် ရုပ်ဒမျိုင် မဆေင်ကဵု သာသနာခရေတ်ယာန်ဂှ်လေဝ် ကၠောန်ဒၟံင်ကီုတုဲ အစဳအဇန်လျးဂကူမန်ဝွံ ဒှ်ဒတန်အဓိက ဒၞာဲမမင်မဲ ဇၞော်မောဝ်ဒၟံင် လိက်ပတ်သာသနာခရေတ် ဘာသာမန်မွဲရ။ ညးမပတန်လဝ် ကိုပ်ကၠာအိုတ်ဂှ် ဒှ်အစာတၠ နာဲထောန်သိင် ဇာတိကွာန်ကၟာဝက် မဒှ်ကောန်ဍုင် ရးနိဂီုပံင်ကောံအမေရိကာန်ရ။
ဝင်အတိက် ကေုာံ ပရေင်ကမၠောန်[ပလေဝ်ဒါန် | ပလေဝ်ဒါန် တမ်ကၞက်]
ရုင်ဗလးရမ္သာင်မုဟ်ဗမံက် (Far East Broadcasting Company - FEBC) ဝွံ ကောန်ဂကူအမေရိကာန် ဒံက်တာရဝ်ဗာတ် ဗောမေန် (Dr. Robert Bowman) ကေုာံ (မေဿတာ ဂျိမ် ဗြောရ်ဂေရ် (Mr. Jim Broger) ညးသကအ်ရဲၜါဝွံ ဒှ်မၞိဟ် မပဒတန်လဝ်ကိုပ်ကၠာအိုတ်ရ။ ညးၜါဝွံ ရန်တၟအ် မိက်ဂွံ ပလံင်ဗစိုပ် ပရိုင်ကျာ်ဂမျိုင်ကျာ်ထာဝရ ကုကောန်မၞိဟ်တအ်တုဲ မိက်ဂွံ ကၠောန်ဗဒှ် ရုင်ဗလးရမ္သာင်မွဲ ပ္ဍဲရးဗမံက်ရ။ နူသၞာံ ၁၉၄၀တအ်ဂှ် ဗွဲကိုပ်ကၠာ ညးၜါဂှ် ရန်တၟအ်လဝ် သွက်ဂွံ ဒက်ပတန် ပ္ဍဲရးနိဂီုကြုက်ရ၊ ဆဂး ညးၜါဂှ် ဟွံကလိဂွံ အခေါင်တုဲ စိုပ်အာ ရးနိဂီုဖလိပိန်။ ပ္ဍဲဂိတုဂျူလာင် ၆၊ ၁၉၄၆ ဂှ် ဂျောမ် အာတ်မိက် သၟိင်တၠဖလိပိန် သွက်ဂွံ ခၞံဗဒှ် ဌာနဗလးရမ္သာင် (FEBC)တုဲ ခြာဟွံလအ် ပ္ဍဲအဝ်ဂေတ် ၂၆၊ ၁၉၄၆ ဂှ် နူကဵု ကောန်ဂရေတ်ဖလိပိန် ကဵုအခေါင်ဂရာန်ကုညးရ။ ကလိဂွံ အခေါင်ဂရာန်တုဲ ပ္ဍဲကဵု ဂိတုဂျောန် ၄၊ ၁၉၄၈ ဂှ် နကဵုဒွက် ဓမ္မခရေတ်ယာန် "All Hail the Pow'r of Jesus' Name" ဂှ် စဗလးရမ္သာင် လတူလပှ်ကျာ ကိုပ်ကၠာအိုတ်ရ။ စနူဂှ်တုဲ နကဵုဌာနဗလးရမ္သာင်မုဟ်ဗမံက်ဂှ် နကဵုအရေဝ်ဘာသာ ပ္ဍဲဒေသနာနာသာ် ဗလးကၠုင်ဒၟံင်ရ။ [၁]
အစဳအဇန် လျးဂကူမန်ဂှ် အစာတၠ နာဲထောန်သိင် ဇာတိကွာန်ကၟာဝက် ကောန်ဍုင် ရးနိဂီုပံင်ကောံအမေရိကာန် စပတန်လဝ် ဟီုဂွံရ။ အစာတၠ နာဲထောန်သိင်ဂှ် ကတဵုဒှ်မၞိဟ် ပ္ဍဲကွာန်ကၟာဝက် ၜိုန်ရဒှ်ကီုလေဝ် ကာလညးမကလိဂွံအာယုက် ၈ သၞာံဂှ် ညးတအ် ပြံင်အာမံင် ပ္ဍဲဍုင်မတ်မလီု နူဂှ် ပြံင်အာမံင် ပ္ဍဲဍုင်လ္ဂုင်ရ။ ညးဝွံ ၜိုန်ရ ဟီုအရေဝ်မန် ဂွံခိုဟ်ဟ်ကီုလေဝ် လိက်မန်ဂှ် ညးဟွံဂွံအခေါင်ဗတောန်တုဲ ကာလမဒှ် ဘဝကွးဘာတက္ကသိုလ် နကဵုဘာသာစိတ္တဗေဒ ပ္ဍဲတက္ကသိုလ်လ္ဂုင်ဂှ် အၚောပ်စိုတ် ကတဵုဒှ် မိက်ဂွံလေပ် လိက်မန်တုဲ ပြာပ်အာ ဇရေင်ဇြပ်သဘင်ဓရ်မန် ဗဒါဲကျာ်လ္ဂုင် ပ္ဍဲတ္ၚဲအဒိုက်တုဲ ဗတောန်လိက်မန်ရ။[၂] ပ္ဍဲသၞာံ ၁၉၈၈ ဂှ် ညးဒက်သ္ၚိကၟိန် ကုမိသ္ဇင်ထဝ် (Ruth Tun Thein) ကောန်ဂကူအမေရိကာန်တုဲ စိုပ်အာ ရးနိဂီုပံင်ကောံအမေရိကာန်တုဲ ပွိုင်ပန်သၞာံ ဆက်တိုန် တက္ကသိုလ်တန်မဟာ ပ္ဍဲဘာသာသၠပတ်သမ္မာ ရ။ ကြဴနူ ကလိဂွံမဟိမုမဟာ ဘာသာသၠပတ်တုဲ တၞဟ်နမိက်ဂွံ ကၠောန်ကမၠောန် မယိုက်ဒိုက်သာသနာတုဲ ညးစိုပ်အာ ဇရေင်ရုင်ဗလးရမ္သာင်မုဟ်ဗမံက်ရ။ ကာလဂှ် နူကဵုဌာနဗလးရမ္သာင်ဂှ်လေဝ် ညးတအ် ချပ်ဒၟံင် ဂၠာဲဒၟံင် မၞိဟ်မဟီုတွဟ် တဝှ်ဍောင်ဓရ်ဓမ္မ နကဵုဘာသာမန်မာန်ဂှ် ၜိုန်ရ ညးတအ်ဂၠာဲဒၟံင် ဂၠိုင်ကဵုသၞာံကီုလေဝ် ညးတအ် ဟွံဂွံဆဵုဏီရ။ လၟုဟ် မၞိဟ်မဟီုအရေဝ်မန် လေပ်လိက်မန် မတုဲလဝ် ဘာသၠပတ် မဟိမုမဟာ နူကဵု ရးနိဂီုအမေရိကာန်မွဲတၠ မကၠုင်စိုပ် ဇရေင်ညးတအ်ဂှ် ညးတအ် ဒှ်အမ်သဝ်စိုတ်အိုတ်ရ။ အစာထောန်သိင်ဂှ်လေဝ် နကဵု မရန်တၟအ် မိက်ဂွံကၠောန်ကမၠောန် ဗလးရမ္သာင်တုဲ မစိုပ်အာ ပ္ဍဲကဵု ဌာနဂှ်ဟွံသေင်ရ။ တုဲပၠန် အစာထောန်သိင် ညးချပ်စိုပ်အာ ပ္ဍဲအခိင်ညးဒှ်ဒၟံင် ဘဝကွးဘာတက္ကသိုလ်တေအ် ဗီုလဵု စိုတ်ညးဒှ် မိက်ဂွံလေပ်လိက်မန်ဂှ်လေဝ် ညးတီကေတ် ဟွံမာန်။ အရာဏအ် ဒှ်အရာကျာ်ဂမျိုင်မစၞောန်ပညုင်ကဵုရောင်ဂှ် ညးပတှ်ေကေတ်လဝ်ရ။ [၂] ပ္ဍဲအခိင်ဂှ် ညးသွက်ဂွံ ဆက်လ္ၚတ်အာ အရေဝ်ဘာသာမန်ဂှ် အဘိဓာန်အစာဟာလ္လဳဒေ မခၞံလဝ်ဂှ် ညးနွံပၟိက်ဒၟံင်ကွေဟ်ဟ်ဂှ် အစာဒံက်တာ နာဲပါန်လှလေဝ် ကၠုင်စိုပ် သ္ၚိညးကီုတုဲ ပၟိက်ညးဂှ် ရနုက်ဗပေင်ကဵုကီုရ။[၃]
သၞာံ ၁၉၉၃ ဂိတုအံက်တဝ်ပါဂှ် သွက်ဂွံဗမံက်ရုပ်ရဴ ကမၠောန်ဗလးရမ္သာင်ဘာသာမန်ဂှ်တုဲ အစာနာဲထောန်သိင် တိတ်အာ ရးနိဂီုသေံရ။ ပ္ဍဲအခိင်ဂှ် ဒွက်ဓမ္မခရေတ်ယာန်မန် သွက်ဂွံဗလးဂှ်လေဝ် ဆမွဲပိုဒ်ကီု ဟွံမဲဏီ၊ တုဲပၠန် သွက်ဂွံတန်တဴအာ ပ္ဍဲရးနိဂီုသေံ ဗွဲမသၟေဟ်ရထမာန်ဂှ်လေဝ် အရေဝ်ဘာသာသေံဂှ်လေဝ် ဒးဗတောန်ကီုတုဲ သီုဖအိုတ် ဒးကေတ်အခိင် ပွိုင် ပိသၞာံတုဲ ပ္ဍဲကဵု ဂျူလာင် ၄၊ ၁၉၉၅ ဂှ် ဂွံဗလးရမ္သာင် နကဵုဘာသာမန် ပ္ဍဲရေဒဳယောမုဟ်ဗမံက်ကိုပ်ကၠာအိုတ်ရ။ ဗွဲကိုပ်ကၠာ ဂွံဗလး ပွိုင် ၁၅ မိနေတ် ရိုဟ်ဒဒှ်တ္ၚဲရ။ နူညးမထံင်သောတတအ် အာတ်မိက် ညံင်ဂွံဂလိုင်ကဵု အခိင်ကီု၊ ပတိုန်ထ္ၜး ကုဌာနရေဒဳယောတုဲ စတမ်နူ သၞာံ ၁၉၉၉ ဂိတုဒဳဇြေန်ပါဂှ် ဂွံဗလးရမ္သာင် ပွိုင် ၃၀ မိနေတ်ရ။[၃] ပါဲနူကဵု နကဵုရေဒဳယောတုဲ ဗွဲမဗဗွဲ ကဵုခေတ်ကာလ နကဵု ဝှုက်ၜေါက် တိုက်ရိုက်ကီု ပ္ဍဲဝေပ်သာ် (www.monradio.org) ဂှ်လေဝ် ဗလးကဵုဒၟံင် အစဳအဇန်ဒွက်၊ အစဳအဇန် ဗွဟ်လိက်သၠပတ် ကေုာံ အစဳအဇန် တဝှ်ဓရ်တအ်လေဝ် ဗလးကဵုဒၟံင်ကီုရ။ အစာနာဲထောန်သိင်ဝွံ ရန်တၟအ်ကဵု ညးသၟတ်တအ် ဂွံဆက်ယိုက်ဂၠေင်အာ အစဳအဇန်ဝွံတုဲ ပ္ဍဲဂိတုမာတ် ၇၊ သၞာံ ၂၀၂၀ ဂှ် ကမၠောန်အစဳအဇန်လျးဂကူမန်ဂှ် ညးပအပ်ကဵု အစာနာဲကြက်ဂကူ (အောင်မျိုးထွန်း) ဇာတိကွာန်ပ္ၚ နကဵုသဘင်ခန်ကၞာမွဲရ။ [၃]
ပရေင်ကမၠောန်ဂမၠိုင်[ပလေဝ်ဒါန် | ပလေဝ်ဒါန် တမ်ကၞက်]
အစဳအဇန်လျးဂကူမန်ဝွံ ပါဲနူ မဗလးရမ္သာင် နူရေဒဳယော၊ ဝှုက်ၜေါက်၊ ဝေပ်သာ်တုဲ လိက်သၠပတ်ဘာသာမန်၊ လိက်ဓမ္မခရေတ်ယာန်ဘာသာမန် တြေံဂမၠိုင်ကီု သီုကဵု ရုပ်ဒမျိုင်ဒွက် နကဵုအခိုက်ကွိင်ကွိုက်မန် နကဵုကွိင်ကွိုက်ဂတာပ်ခေတ်ဂမၠိုင်ဂှ် ကၠောန်ပတိတ် တြးဗစိုပ် ကုမှာဇန်တအ်ကီုရ။ ပါဲနူဂှ်တုဲ ရုပ်ဒမျိုင် ပရူနာဲယေသှု ဘာသာအင်္ဂလိက်ဂှ်လေဝ် ပၠုပ်စုတ် ရမ္သာင်မန်တုဲ တြးပ္တိတ်လဝ် နွံကီုရ။