လေဝ်မန် (မိ)
| ရာမည မိလေဝ်မန် အစာကၞေဟ် | |
|---|---|
 | |
| သၠးဂၠံဂဝ် |
မိကြင်သန်း နဝ်ဝေမ်ဗါ ၁၁၊ ၁၉၅၀ ကွာန်ဝင်ဒုန် |
| ဂကူ |
 Monမန် |
| ကောန်ဍုင် |
 Myanmarရးနိဂီုဗၟာ |
| ကဆံင်ပညာ | B.A. Myanmar, Bachelor of Education (B.Ed.) |
| ဘာ | University of Mandalay |
| မဒယှ်တဴ | အစာၝောအ်ဇၞော် |
| ဌာန်ဇာတိ | ကွာန်ဝင်ဒုန် |
| အံက် |
|
| လာပ် |
|
ရာမည မိလေဝ်မန် နဒဒှ် ယၟုကၞေဟ်တုဲ ယၟုတမ်မူလဂှ် (ဒေါ်ကြင်သန်း လဆောဝ် ချူ ဒေါ်ကျင်သန်း (ခ)မိလေးမွန်) ဝွံ ဒှ် အစာဘာ တုဲပၠန် သီု ဒှ် အစာချူလိက် ဗွဲတၟေင် လိက်ဝတ္ထုဂမၠိုင်ရ။ အစာၝောအ် မိလေဝ်မန်ဝွံ နဒဒှ် ပေါင်မသၟိင်မွဲဂှ် ယိုက်ဂၠေင်လဝ် ကမၠောန်ဍုင် နဒဒှ် အစာဘာ နူ အစာဘာတန်မူလ စဵု စိုပ် နဒဒှ် အစာၝောအ်ဂအုပ်ဘာဇၞော် ဘာတန်သမၠုင် မွဲရ။[၁] ပါဲနူ ကမၠောန်အစာဘာ ကောံ ကုကမၠောန်ကၞေဟ်တုဲ ကမၠောန် ဇၞော်မောဝ် ဍုင်ကွာန် ပ္ဍဲ ဗွိုင်ပရေင်ဍုင်ကွာန်ကီု ပ္ဍဲ ဂကောံမှာဇန်ဂမၠိုင်ကီု လုပ်ကၠောန်ကၠုင် ဗွဲမ ဗဗွဲ ကုခေတ်ကာလ ဒေသ ဟွံပိုတ်သကုတ်ကီုရ။
ဘဝသၟတ် ကောံ ကုပရေင်ပညာ
[ပလေဝ်ဒါန် | ပလေဝ်ဒါန် တမ်ကၞက်]ရာမည မိလေဝ်မန် နဒဒှ် ယၟုကၞေဟ် ယၟု နူတမ် မိကျေန်တာန်၊ ဗွဲကြဴ နကုယၟု မိလေဝ်မန် ဂှ်ရ မၞိဟ်မတီဂၠိုင်ဝွံ ဒှ် ကောန် နာဲလှိုင် မိညိင်တေန် ဇာတိကွာန်ဝင်ဒုန် ပွိုင်ဍုင်မုဟ်ဍုင် က္တဵုဒှ် မၞိဟ် ပ္ဍဲ သၞာံ ၁၉၅၀ ဂိတုနဝ်ဝေမ်ပါ ၁၁ ရ။[၂][၃]
အခိင် မိလေဝ်မန် မစိုပ် အဝဲ မမံင်ဘာဂှ် ညး မံင်လဝ် ဘာတန်မူလမန်အလဵုအသဳ (အစိုးရမွန်မူလတန်းကျောင်း) ပ္ဍဲ ကွာန်ဝင်ဒုန်။ သၞာံ ၁၉၆၂ ဂှ် ဂွံ ပန်တန်၊ ပ္ဍဲ အခိင်ဂှ် ဒှ် ခေတ်ဖဆပလတုဲ ပ္ဍဲ အခိင် မ္ၚးအခိင်ဘာဂှ် ဗ္တောန်ကဵုဒၟံင် လိက်မန် မွဲတ္ၚဲ ပွိုင်မွဲနာဍဳကီုရ။ ဟိုတ်နူ မဒှ်အခိင်မ္ၚးဘာတုဲ ကွးဘာတအ် ဗွဲမဂၠိုင် ဟွံလုပ်ဗတောန် လိက်မန်အိုတ်ရ။ ဗွဲတၟေင် ကွးဘာမၞိဟ်တြုဟ်တအ်ဂှ် ဟွံလုပ်ဗတောန်ဂၠိုင်ရ။ နူ ဘာတန်မူလဂှ် ဂွံလေပ်အာ လိက်မန်ညိညဇြိုင်သာရ။ သၞာံ ၁၉၆၂ အခိင် မတိုန်ဒၟံင် ပန်တန်ဂှ် လုပ်ပြိုင် ချူလိက်ပတ်မန် ပ္ဍဲ ဍုင်မတ်မလီု မဒှ် သဘင် နူ ဌာနဝန်ဇၞော်ပရေင်ကေင်ကာမန် မကၠောန်ဗဒှ်လဝ်ဂှ်တုဲ ဂွံလာပ်ဒုတိယ၊ ဂွံဒုင်ပူဇဴ ညာဏ် လှုဲမွဲပသာဒကေဝ် (င္ၚုဟ်သြန် အခိင်ဂှ် မွဲကၠံဒကေဝ်ဂှ် ရာန်ဂွံ ထဝ် လျိုင်ၜါမး)။ မိလေဝ်မန် အံင် ပန်တန်၊[၁] သီုလုပ်သှ်လဝ် သွက် သကဝ်ဠာယှေပ် (လာပ်ထံက်ပင်ပညာ)ဂှ် ဂွံအံင်ကေတ်တုဲ ဂွံ သြန်အထံက်အပင် သွက်ပညာ မွဲဂိတု (၂၀) ဒကေဝ် ပွိုင်ပိသၞာံ သွက်တန်၊ ၅၊ ၆၊ ၇ ရ။[၄] ပညာတန်ဒေါဝ်၊ တန်သၠုင် ဂှ် တိုန်လဝ် ပ္ဍဲ ဘာတန်သမၠုင် စၟတ် (၁) ဍုင်မုဟ်ဍုင် ရ။ နူဂှ် ဆက်တိုန် တက္ကသိုလ်အင်ဝ န ဘာသာလိက်ဗၟာ သၞာံ ၁၉၇၂ ဂှ် ကလိဂွံ တဆိပ်ကြာ B.A.။ သၞာံ ၁၉၈၂ ဆက်တိုန် တက္ကသိုလ်ဇမ္ၚောဲလ္ဂုင် (University of Distance Education, Yangon အစဳအဇန် ပရေင်ပညာဇမ္ၚောဲ သွက် မဟိမု B.A. ပရေင်ပညာ (Bachelor of Education (B.Ed.) ရ။[၃][၅][၄] အခိင် မတိုန်ဒၟံင် တက္ကသိုလ်အင်ဝဂှ် လုပ်ချဳဓရာင် ပ္ဍဲ ဂကောံကွးဘာတက္ကသိုလ်မန်တုဲ စိုတ်ဓါတ်မဆာန်ဂကူ မဆာန်လိက်ပတ် ဇၞော်ဂေါဝ် မံက်ဂတဝ် ဂၠိုင်ကၠုင်ရ။[၁]
ဘဝအစာဘာ
[ပလေဝ်ဒါန် | ပလေဝ်ဒါန် တမ်ကၞက်]အကြာ သၞာံ ၁၉၇၃ - ၁၉၇၅ ဂှ် မိလေဝ်မန် လုပ်ကၠောန် နဒဒှ် အစာ ပ္ဍဲ ဘာဖက်ဆော ကွာန်ဝင်ဒုန်။[၄]
အကြာသၞာံ ၁၉၇၆ - ၁၉၇၉ ဂှ် မိလေဝ်မန် လုပ်ပ အစာ ပ္ဍဲ ဘာတန်မူလ ကွာန်ဝင်ဒုန်။
အကြာ သၞာံ ၁၉၈၀ - ၁၉၈၂ ဂှ် လုပ်ပ အစာ ဘာတန်ဒေါဝ် ဍုင်ဇြပ်ဗု ပ္ဍဲဘာအထက ဇြပ်ဗု။
အကြာ သၞာံ ၁၉၈၃ - ၁၉၉၉ ဂှ် နဒဒှ် အစာဘာတန်သၠုင် ပ္ဍဲ ဘာတန်သၠုင် ကွာန်အခေါန် (တံခေါင်တိုင်)။
အကြာသၞာံ ၁၉၉၉ - ၂၀၀၂ ဂှ် နဒဒှ် ဂအုပ်ဘာ ဘာတန်ဒေါဝ် ကွာန်ရုတ္တံင်။
အကြာ သၞာံ ၂၀၀၂ - ၂၀၀၄ ဂှ် နဒဒှ် ဂအုပ်ဘာ ဘာတန်ဒေါဝ် ဘာကျာ်က္ၜင် (သင်္ဘောဦး) ဍုင်မုဟ်ဍုင်။
အကြာ သၞာံ ၂၀၀၄ - ၂၀၁၀ နဒဒှ် ဂအုပ်ဘာ တန်သၠုင် ဘာတန်သၠုင် စၟတ်(၂) ဍုင်ဇြပ်ဗု၊ တုဲ ဒေါအ်ဇူ နူ တာလျိုင် စပေန်ဇြေန်ရ။[၃]
ကမၠောန်ဒတုဲဖိုလ်ဂကူ ဒတုဲဖိုလ်ဍုင်
[ပလေဝ်ဒါန် | ပလေဝ်ဒါန် တမ်ကၞက်]ပါဲနူ ကမၠောန်အစာဘာ ကောံ ကုကမၠောန်မချူလိက်ဂမၠိုင်တုဲ ကမၠောန်ဒတုဲဖိုလ်ဂကူမန် ကောံ ကုကမၠောန်ဒတုဲဖိုလ်ဍုင်ကွာန်တအ်လေဝ် လုပ်ယိုက်ဂၠေင်လဝ် နွံနာနာသာ် ဗွဲမဗဗွဲ ကုအခိင်အခါ အခေတ်ကာလ ကောံ ကုဒၞာဲ အဆက်ဆက်ကီုရ။ ဥပမာ နဒဒှ် ဥက္ကဋ္ဌ ဂကောံမိစဴဗု (အစောန်စရာဲညးဗြဴမန်) ပွိုင်ဍုင်မုဟ်ဍုင်။ ပ္ဍဲ ဗော်ဒဳမဝ်ကရေသဳမန် ဂှ် နဒဒှ် သကိုပ်စရာဲညးဗြဴ ပွိုင်ဍုင်မုဟ်ဍုင်၊ ပ္ဍဲ ဂကောံဖောအ်ဗြေဝ်ဒေသရးမန် ဂှ် နဒဒှ် ဒု-ဥက္ကဋ္ဌ။[၃] သဘင်မာဲ သၞာံ ၂၀၁၅ ဂှ် မိလေဝ်မန် လုပ်ဒုင်ရုဲ မာဲ စၞး ဗော်ဒဳမဝ်ကရေသဳမန် သွက် စၠတ်ဓရ်ညးဍုင်ကွာန် ပ္ဍဲ ပွိုင်ဆန္ဒမာဲ ပွိုင်ဍုင်မုဟ်ဍုင် (စၟတ် ၁)ကီုရ။ ဆဂး ဟွံဇၞး မာဲ။[၆]
ဘဝအစာကၞေဟ်
[ပလေဝ်ဒါန် | ပလေဝ်ဒါန် တမ်ကၞက်]ကြဴနူ ဘာတက္ကသိုလ်တုဲ မိလေဝ်မန် အင္ၚောပ်စိုတ် မိက်ဂွံဒှ် အစာချူလိက်ရ။ ဗွဲကိုပ်ကၠာ စချူ လိက်ဝတ္ထု န ဘာသာဗၟာ ရ။ သၞာံ ၁၉၇၅ ဂှ် ဒုင်သဇိုင် ကုတက္ကသိုလ်အင်ဝတုဲ ချူဝတ္ထု န ဘာသာဗၟာ "မျိုးချစ်သူမို့" ကဵုပလံင်ဏာ ဂွံပါလုပ်ကၠုင် ပ္ဍဲ လိက်မဂ္ဂဇြေန်ရ။ ညးမအာဂတပၠတရဴ ပရေင်ကမၠောန်ဂကူ ပ္ဍဲ ကွာန်ဝင်ဒုန် ဗညာကောန်ကၠင် (ညးဂမၠိုင် ကော်စ အစာသေတ်) ဟီု ကုမိလေဝ်မန် ဗတ်ဗၟာဂှ် မၞိဟ် ချူဂၠိုင်ဒၟံင်၊ ချု ဗတ်မန်တှ်ေ ခိုဟ် ဂးတုဲ စနူဂှ်တုဲ မိလေဝ်မန် စချူကၠုင် ဝတ္ထု န ဘာသာမန်ရ။ ဝတ္ထု န ဘာသာမန် ကိုပ်ကၠာအိုတ်ဂှ် ဒှ် ဝတ္ထု မနွံယၟု "ပကဴမၠဵုမွဲဍောင် ရာင်ထောင် သွက်ဂကူ" ရ။ ဝတ္ထုဏအ်ဂှ် ညး ချူတုဲ ပလံင်ဏာ သဘင်ပြိုင်လိက်ပတ်မန် တ္ၚဲကောန်ဂကူမန် သၞာံ ၁၃၃၇ ဍုင်လ္ဂုင်တုဲ ကလိဂွံ လာပ်တတိယ။ စနူဂှ်တုဲ ချူကၠုင် လိက်ဝတ္ထုဂမၠိုင်တုဲ လုပ်ပြိုင်ကၠုင် ပ္ဍဲ တ္ၚဲကောန်ဂကူမန် ကဵု တ္ၚဲတွဵုရးဍုင်မန် အဆက်ဆက် သီုဖအိုတ် ဂွံအာ လၟိဟ်လာပ် ၂၄ လာပ်ရ။ စိုပ် သၞာံ တ္ၚဲကောန်ဂကူမန် သဘင်ရတုထဝ်ဂှ် ဂွံမိင်ဒး ဂလာန် နာဲသိုက် မဟီု "မၞိဟ်ဇၞော်ဇၞော်တအ်သၟး ကေတ်ဒၟံင်လာပ်တှ်ေ ကဵု ကောန်င္ၚာ်တအ် ကေတ်စကီု" တုဲ ဖျေဟ်ထောအ်စိုတ် အဲလေဝ် အာယုက်ဇၞော် ကေတ်ဒၟံင်လာပ် ဇၟာပ်ဇၟာပ်သၞာံရတှ်ေ အဲ ဒးပါဲကဵု ညးသၟတ်တအ် ထေက်ရ ဂးတုဲ စနူဂှ်တုဲ ဟွံဆက် လုပ်ပြိုင်ရ။[၇] သၞာံ ၂၀၂၄ တ္ၚဲဂကူမန် မရနုက်ကဵု ၇၇ ဝါ မကၠောန်ဗဒှ် ပ္ဍဲ ရးနိဂီုမလေသျှာ ဂှ် နကု မိလေဝ်မန် လုပ်ပြိုင် ဝတ္ထု နကုယၟု "လမျီုဂကူဂှ် နွံပ္ဍဲသ္ကေမ်တဲပိုယ်" တုဲ ကလိဂွံ လာပ်ပထမ ရ။[၈]
နကု မိလေဝ်မန်ဂှ် စဵုစိုပ် သၞာံ ၂၀၂၄ ဂှ်မ္ဂး ချူလဝ် လိက်ဝတ္ထု န ဘာသာမန်ကီု သီု ဘာသာဗၟာ နွံ ၜိုတ် ၈၀ ပိုဒ်တုဲ လိက်ပရေင်ဂှ် နွံၜိုတ် ၄၀ ပိုဒ်ရ။[၉]
မိလေဝ်မန် ဂွံဒုင်ဖျေဟ် လာပ်လိက်ပတ် လိက်ပရေင်ခိုဟ်အိုတ် သၞာံ ၂၀၂၃ နူ ဂကောံအစာကၞေဟ်မန် ပ္ဍဲ တ္ၚဲအစာကဝိမန် သၞာံ ၂၀၂၄ (မရနုက်ကဵု ၈ ဝါ)ရ။[၁၀]
လိက်ကၞပ်
[ပလေဝ်ဒါန် | ပလေဝ်ဒါန် တမ်ကၞက်]နကု ဂကောံအစာကၞေဟ်မန် ရုဲစှ်ကေတ် ဝတ္ထု ဗတ်မန်သၟး သီုဖအိုတ် ၈ ပိုဒ် (နွံ မုက်လိက် ၁၇၇) တုဲ တက်ပ္တိတ်လဝ် လိက်ဝတ္ထုဇမၠေအ်ပံင်ကောံ ပ္ဍဲ သၞာံ ၂၀၂၂၊ ကၠောန် သဘင်ဆက်မိတ်လိက်ကၞပ် ပ္ဍဲ ဍုင်မတ်မလီု သၞာံ ၂၀၂၂ ဂိတုသေတ္တေမ္ပါ ၁။[၁]
နကု ကွးဘာတြေံ မာံစန္ဒ နူ ဍုင်ဇြပ်ဗု ဂိုတ်ဂစာန်တုဲ တက်ပ္တိတ်လဝ် လိက်ဝတ္ထုဇမၠေအ်ပံင်ကောံ နကု ဘာသာမန်၊ ဗၟာ သီုဖအိုတ် နွံမုက်လိက် ၃၉၄ မုက် ပ္ဍဲ သၞာံ ၂၀၂၄၊ ကၠောန် သဘင်ဆက်မိတ်လိက်ကၞပ် ပ္ဍဲ ဍုင်မတ်မလီု သၞာံ ၂၀၂၄ ဂိတုဖေဖဝ်ဝါရဳ ၂၂။[၁]
နိဿဲ
[ပလေဝ်ဒါန် | ပလေဝ်ဒါန် တမ်ကၞက်]- ↑ ၁.၀ ၁.၁ ၁.၂ ၁.၃ ၁.၄ ရာမည, မိလေဝ်မန် (ဖေဖဝ်ဝါရဳ ၂၃၊ ၂၀၂၄). " လိက်ဘိက် ပေါဲဆက်မိတ်လိက်ကၞပ်. “သံဖြူဇရပ်မြို့ အ.ထ.က(၂) ကျောင်းအုပ်ဆရာမကြီး(ငြိမ်း) ဒေါ်ကြင်သန်း ရာမညမိလေးမွန်၏ ဝတ္ထုတိုစုစည်းမှု (မွန်/မြန်မာ နှစ်ဘာသာ) စာအုပ် မိတ်ဆက်ပွဲအခမ်းအနားသို့ ကြွရောက်ပေးရန် ခင်မင်ရင်နှီးစွာ ဖိတ်ကြားအပ်ပါသည်”
- ↑ "MNP မုဒုံမြို့နယ် ပြည်သူ့လွှတ်တော်ကိုယ်စားလှယ်လောင်း မိလေးမွန် (အင်တာဗျူး)". မိလေဝ်မန် (Interview). Interviewed by ချစ်မင်းထွန်း. September 6, 2015. Retrieved March 11, 2024.
- ↑ ၃.၀ ၃.၁ ၃.၂ ၃.၃ အတ္ထုပ္ပတ္တိ မိလေဝ်မန်၊ လိက်တၞး မလုပ်ပြိုင် သဘင်မာဲ သၞာံ ၂၀၁၅.
- ↑ ၄.၀ ၄.၁ ၄.၂ (2022) ကလေင်ဆဵုမွဲဝါပၠန်မ္ဂး ကေုာံ ဝတ္ထုဂမၠိုင်, ၁၇၆-၁၇၇။
- ↑ Han Tin (2004-03-31). Seminar on EDUCATION IN MYANMAR.
- ↑ ပြည်သူ့လွှတ်တော်ကိုယ်စားလှယ်လောင်း တစ်ဦးချင်းစိ၏ ဆန္ဒမာဲရရှိမှုအခြေအနေ (၂၀၁၅ ခုနှစ်၊ အထွေထွေရွေးကောက်ပွဲ).
- ↑ ရာမည, မိလေဝ်မန် (ဖေဖဝ်ဝါရဳ ၂၂၊ ၂၀၂၄). " လဟီု မိလေဝ်မန် ပ္ဍဲ ပေါဲဆက်မိတ်လိက်ကၞပ်.
- ↑ ရာမည, မိလေဝ်မန် (ဖေဖဝ်ဝါရဳ ၂၃၊ ၂၀၂၄). " စရင် ညးမက္လိဂွံလာဘ်ဂမၠိုင် စၟတ်သမ္တီ တ္ၚဲဂကူမန် မရနုက်ကဵု (၇၇)ဝါ ဘာရာမဟိတေသဳ (ဗြာတ်ပေတ်) ကၟိန်ဍုင်မလေဝ်ယှာ.
- ↑ ရာမည, မိလေဝ်မန် (ဖေဖဝ်ဝါရဳ ၂၂၊ ၂၀၂၄). " လဟီု မိလေဝ်မန် ပ္ဍဲ ပေါဲဆက်မိတ်လိက်ကၞပ်.
- ↑ ရာမည, မိလေဝ်မန် (ဖေဖဝ်ဝါရဳ ၁၆၊ ၂၀၂၄). " လာဘ်လိက်ပတ်အစာကၞေဟ်မန် ကဏ္ဍလိက်ပရေင် သၞာံ ၂၀၂၃.