လျးဟံင်မန် (ညးတၠရမ္သာင်)

သၟာဒယှ်ေဒွက် ဒမြဟ် နာဲလျးဟံင်မန် (နာဲကျာန်ယျေတ်) သၟာဒယှ်ေဒွက် ဒမြဟ်
သၠးဂၠံဂဝ်	မောင်ကျန်ရစ် (1944-06-21) ဂျောန် ၂၁၊ ၁၉၄၄ ကွာန်ရောဂေါ
ဂကူ	Monမန်
ကောန်ဍုင်	Myanmarကောန်ဍုင်ဗၟာ
ကဆံင်ပညာ	A.G.T.I. (MP), Insein, 1966
ဘာ	(Associateship of Government Technical Institute - AGTI)
သၞာံချဳဓရာင်	၁၉၆၆ - ၂၀၀၄
ကောန်ကမၠောန်	ဌာနဝန်ဇၞော်ပရေင်သြိုင်ခၞံ
မဒယှ်တဴ	ညးတၠရမ္သာင်မန်
ဗော်	ဗော်ညဳသၟဟ်မန်
ချဳဓရာင်	ဗော်ဒဳမဵုကရေဇြဳအလုံရးမန်
အိန်ထံင်	မိခေန်သိင် (မိခင်စိန်)
ကောန်ဇာတ်	မိနန်ထဝ် ( (1969-02-03) ဖေဖဝ်ဝါရဳ ၃၊ ၁၉၆၉, A.G.T. I. Civil) မိမိဆာန် ( (1970-06-30) ဂျောန် ၃၀၊ ၁၉၇၀, B.A. IR) မိဆာန်မန် ( (1972-10-09) အံက်တဝ်ဗါ ၉၊ ၁၉၇၂, M.Sc, Agri.) မာံဗညာထဝ် ( (1974-05-18) မေ ၁၈၊ ၁၉၇၄, B.E. Civil.)
အံက်	နာဲအံင်င္ၚိုဲဇြေန် (အောင်ငွေဇင်) (အပါ) မိတေန်ကျာင် (သင်းကြိုင်) (မိ)
ဂယိုင်လမျီု	ပေါင်မသၟိင် (လစှ်ေအေန်ဂျေန်နဳယာ)

နာဲလျးဟံင်မန် (ယၟုတမ် နာဲကျာန်ယျေတ် - နိုင်ကျန်ရစ်) ဝွံ ဒှ် သၟာဒယှ်ေဒွက်မန် ယၟုမြဟ်တမ္ညဝ်မွဲတၠ၊ ပေါင်မသၟိင် လပါ်ကွတ်စက်။ တုဲပၠန် ကမၠောန်ပရေင်ဂကူမန် သွာင်လိက်ပတ်၊ ယေန်သၞာင်လေဝ် ယိုက်ဂၠေင်ကၠုင်လဝ် ဗွဲမဂၠိုင်ဂၠေင်ရ။ ကြဴနူ အခိင်မဒေါအ်ဇူ နူကမၠောန်သၟိင်တၠတုဲ ပ္ဍဲ သွာင်ပရေင်ဍုင်ကွာန်မန်လေဝ် လုပ်ချဳဓရာင်ကၠုင် ပ္ဍဲ ဒၞာဲအဓိကကီုရ။ ပ္ဍဲ အခိင် မဒက်ပ္တန် ဂကောံတွိင်တွိုက်မန်ခေတ်တၟိ"ဂကောံလျးဟံသာ" ဂှ် ပ္ဍဲ မၞိဟ်မဒက်ပတန် သီုဖအိုတ် ၜိုတ် ၁၈ တၠဂှ် ညး ဒှ် မၞိဟ်အဓိကမွဲတၠရ။ နာဲလျးဟံင်မန် နူ အခိင်မကလိဂွံ အာယုက် ၁၆ သၞာံ ဒယှ်ေဒွက် ဆဝ်မ္ၚုဟ်မာဲ သွက် ဗော်ပၠတရဴဍုင်မန် ပ္ဍဲ သၞာံ ၁၉၆၀ ရ။ ဒွက်ဂှ် ဒှ် ဒွက် ညးမဒယှ်ေလဝ် အလန်ကိုပ်ကၠာအိုတ်ရ။ ကြဴနူ ဒက်ပ္တန် ဂကောံလျးဟံသာတုဲကီု အခိင်ဗွဲကြဴဏအ်ကီု ဒယှ်ေကၠုင် ဒွက်မန် ဗွဲမဂၠိုင်ဂၠေင်တုဲ ပၞောဝ် ကုဒွက်သီုဖအိုတ်ဂှ် "ဒွက်ရးမည" ဂှ် ဒှ် ဒွက် ညး မဒးစိုတ်အိုတ် မြဴသာ်ဝွံ ညး ဟီုကဵု မိလောဲထဝ် နူ ဌာန်ပရိုင်ဗၠးၜးမန် ပ္ဍဲသၞာံ ၂၀၁၀ ဂှ်ရ။

အတ္ထုပ္ပတ္တိ

ဘဝသၟတ် ကေုာံ ပရေင်ပညာ

နာဲလျးဟံင်မန် ယၟုတမ်မူလ နာဲကျာန်ယျေတ် (ကျန်ရစ်) က္တဵုဒှ် မၞိဟ် ပ္ဍဲ ကွာန်ရောဂေါ ပ္ဍဲသၞာံ ၁၉၄၄ ဂိတုဂျောန် ၂၁ ဇရေင် မိမၜါ နာဲအံင်င္ၚိုဲဇြေန် (ဦးအောင်ငွေဇင်)၊ မိတေန်ကျာင် (ဒေါ်သင်းကြိုင်)။ မိညးဂှ် ဒှ် မၞိဟ်ဇာတိ ကွာန်ဖအံက်၊ အပါညးဂှ် ဒှ် မၞိဟ်ဇာတိ ကွာန်ရောဂေါ။ အပါနော် လပါ်မိညးဂှ် ဒှ် အစာဆေင် နာဲဖိုလ်သိင် (ဖိုးသိန်း)။ ပါရမဳဂဳတညးဂှ် စောန်ဆက်ကၠုင် နူ အပါနော်ဖိုလ်သိင် ဟီုဂွံရ။ မိမညး က္လိဂွံ သီုဖအိုတ် ကောန် ၇၊ ဆ ညး မွဲဓဝ်ဟေင် ဂျိုင်လမျီု သှ်ေဒၟံင်ရ။ ဟိုတ်ဂှ်ရ ညးတအ် ခုတ်ခဴကဵုလဝ်ယၟု န ဘာသာဗၟာ မောင်ကျန်ရစ် (မာံကျာန်ယျေတ်)။ အခိင် နာဲလျးဟံင်မန် မကလိဂွံ အာယုက် ၆ သၞာံ (၁၉၅၀) ဂှ် စမံင် ဘာတန်ကောန်င္ၚာ် ကွာန်ရောဂေါ။ ပ္ဍဲ ဘာတန်မူလဂှ် ဂွံအံင်ကေတ် တန်တတိယ ပ္ဍဲသၞာံ ၁၉၅၄။ တန်စတုတ္ထဂှ် တိုန်လဝ် ပ္ဍဲ ဘာတန်မူလ ကွာန်ဖအံက်၊ တန်ပဉ္စမ စဵု တန်သတ္တမဂှ် တိုန်လဝ် ဘာတန်ဒေါဝ် ကွာန်ကအ်ခမာ၊ တန်အဋ္ဌမ စဵု တန်ဒသမဂှ် တိုန်လဝ် ပ္ဍဲ ဘာတန်သမၠုင် (၁) ဍုင်မတ်မလီုတုဲ သၞာံ ၁၉၆၃ ဂှ် ဂွံအံင်ကေတ် တန်ဒသမ ရ။ နူဂှ် ဆက်တိုန် ဘာကွတ်တဲကွက်စက်အလဵုအသဳ (အင်စိင်) (Associateship of Government Technical Institute - AGTI) တုဲ သၞာံ ၁၉၆၆ ဂှ် အာစိုပ်ဒတုဲ က္လိဂွံ တဆိပ်ကြာ နူ ဘာဂှ်ရ။

ဂကောံသ္ၚိကၟိန်

နာဲလျးဟံင်မန် ဒက် ဘဝသ္ၚိကၟိန် ကုမိခေန်သိင် (မိခင်စိန်) ပ္ဍဲ သၞာံ ၁၉၆၈ ဂိတုမေ ၅၊ တုဲ ညးတအ် က္လိဂွံ ကောန်ပန်၊ ကောန်ဗြဴပိ မိနန်ထဝ် ( (1969-02-03) ဖေဖဝ်ဝါရဳ ၃၊ ၁၉၆၉၊ ဘာတုဲ A.G.T.I. (Civil)၊ မိမိဆာန် ( (1970-06-30) ဂျောန် ၃၀၊ ၁၉၇၀၊ ဘာတုဲ B.A. IR)၊ မိဆာန်မန် ( (1972-10-09) အံက်တဝ်ဗါ ၉၊ ၁၉၇၂၊ ဘာတုဲ M.Sc, Agri.)၊ ကောန်တြုဟ်မွဲ မာံဗညာထဝ် ( (1974-05-18) မေ ၁၈၊ ၁၉၇၄၊ ဘာတုဲ B.E. Civil) တုဲ မာံဗညာထဝ် ဂှ် သီု ဒှ် သၟာဂဳတ နကု ညးမတိင်တိုက်ကီု သီု ညးဒယှ်ေဒမြဟ်မွဲတၠကီုရ။

ကမၠောန် ကောံ ကုကဆံင်

နူ သၞာံ ၁၉၆၆ ဂိတုဂျောန်ဂှ် စလုပ်ကၠောန် ကမၠောန်သၟိင် နဒဒှ် ပေါင်မသၟိင် လပါ်ကွတ်စက် ပ္ဍဲ ယန္တရားတပ်ခွဲ (တောင်)၊ မနွံ သၟဝ် ဌာနဝန်ဇၞော်ပရေင်သြိုင်ခၞံ (ပြင်သူ့ဆောက်လုပ်ရေးဝန်ကြီးဌာန) ဍုင်မတ်မလီု ရ။ ပ္ဍဲဌာနဂှ် ကေတ်လဝ် ကဆံင် လစှ်ေအေန်ဂျေန်နဳယျာ (ကွတ်စက်) (လက်ထောက်အင်ဂျင်နီယာ (စက်မှု)) ရ။ စိုပ် သၞာံ ၂၀၀၄ ဂှ် ပေင်အာယုက် ၆၀ စပေန်ဇြေန် ဒေါအ်ဇူ နူ ကမၠောန်ပေါင်မသၟိင်ရ။

ကမၠောန်ပါဲနူ ကမၠောန်သၟိင်တၠတုဲ ကမၠောန်ဇကုတၞဟ် မပ္တံ ကုဒဳစက်ထဲတိ၊ ကမၠောန်ကၠအ်ရဝ်ဗါ ကောံ ကုပ္တိတ် တၞံရဝ်ဗါတအ်လေဝ် ကၠောန်လဝ် နွံကီုရ။

ဂဳတ ကောံ ကုဂကောံလျးဟံသာ

သၞာံ ၁၉၆၀ အခိင်နာဲလျးဟံင်မန် မက္လိဂွံ အာယုက် ၁၆ သၞာံ သွက်ဂွံ ဆဝ်မ္ၚုဟ်မာဲ ကောန်ဂကူမန်တအ် ဂွံစုတ် မာဲ ကုဗော်ပၠတရဴဍုင်မန်ရ။ ဒွက်ဂှ် ဒှ် ဒွက် နာဲလျးဟံင်မန် မစဒယှ်ေဒွက်မန် အလန်ကိုပ်ကၠာအိုတ်ရ။ ဒွက်ဂှ် နာဲလျးဟံင်မန် ဒယှ်ေထ္ၜးကဵု

 

“

"အတိက်တေအ် ပိုယ်မန်ကၠာ မင်မဲဂကူပၠန်
ညးသၠဲဂၠးတိဓဇန် ပိုယ် ဗ္ကန်စွံလဝ်
သၟိင်ဟွံမဲကဵုဓဝ်ဗစာ စိုတ်ကၞုက်ကၞာဲနွံမှာ
စိုတ်ဓဇန်ဂှ် ပၞုက်လဝ်ကၠာ
ဍုင်မန်တိမန် ပိုယ်မန် က္လေင်ကၠောန်ရ ကဠာပိုယ်မန် ပ္တန်လဝ်သာ်ဗု
ယွံ ဂကူမန် ဂကောံဗော် ကၠောန်အာ သွက်မန် ဂွံညဳသာ"

”

"အလုံကောန်ဂကူမန်မွဲ အခိင်အခါတေအ် စနူအဲ ဂွံကောန်တုဲတှ်ေ ဂွံလှိင် ကောန် ဂွံဂုဲ ခရေင်ကဵုကောန်ဂှ် ဒွက်မန် ဟွံမဲ။ ဒယှ်ေတှ်ေ မောင်ရွှေရည်(ယၟုဒွက်ဗၟာ)။ ချပ်ဂွံ အေ! အဲလေဝ် မၞိဟ်ဝါသၞာဒွက်တှ်ေ ဒွက်မန်ပိုယ် ဟွံမဲ။ ဒွက်မန် ဒးနွံထေက်ရောင် စိုတ်ဂှ် ဒှ်ကၠုင်" ပ္ဍဲ နာဲလျးဟံင်မန်ရ။ နူဂှ် နာဲလျးဟံင်မန် ဂွံဆဵု နာဲတာန်တေန်တုဲ နာဲတာန်တေန် ဟီုကဵုညး "ၝဟွံမဲဏီ ဂွံဒှ် ဖိုလ် သွက်ဂကူ ယဝ်ရကၠောန်တှ်ေ ဣဇှ်ဂှ် ဒှ် ကမၠောန်ပရေင်ဆာန်ဂကူရ။" ဒုင်သဇိုင် ကုဒြဟတ်စိုတ် နူ ဂလာန်ဂှ်တုဲ ချပ်ဂၞန်ရေင်သကအ်တုဲ သွက်ဂွံ ဒက်ပ္တန် ဂကောံတွိင်တွိုကိမန်ခေတ်တၟိဂှ် နူ သၞာံ ၁၉၇၃ ဂှ် စချဳဓရာင်ကၠုင်တုဲ စိုပ်သၞာံ ၁၉၇၄ ဂှ် ဂကောံလျးဟံသာ က္တဵုဒှ်ကၠုင်ရ။ ကပေါတ်တွိင်တွိုက် ဂတာပ်ခေတ်တအ် ပ္ဍဲ အခိင်ဂှ် ပ္ဍဲ ဍုင်မန်ဗၟာ ရာန်ဟွံဂွံ၊ ဒးရာန်ပၠုပ်နင် နူ ရးနိဂီုသေံဖအိုတ်ရ။ နကုသၟိင်တၠဗၟာတအ် ထ္ၜးဟိုတ် ဒဒှ်ရ ကပေါတ်တအ်ဂှ် ကေတ်ပၠုပ်နင် နူ ဂၠံင်ကမၠတ် ဂၠံင်မ္ၚးသၞောဝ်တုဲ သၞာံ ၁၉၇၆ ဂှ် ဒးဒုင်သီထောအ်ရ။

ကြဴနူ ဂကောံလျးဟံသာ က္တဵုဒှ်ကၠုင်တုဲ အလန်ကိုပ်ကၠာဂှ် သၟာဂဳတဂမၠိုင် ၜိုန်ရ စုတ်လဝ် ယၟုတမ်မူလ ဗတ်ဗၟာကီုလေဝ် ခမဳသင် ဗွဲမဂၠိုင် ဟီုဂး သၟာဂဳတမန် နယၟု ဗီုဗၟာဂှ် ဟွံဂပ်ဝ်ရောင်ဂး တုဲ သၠာဲခုတ် ယၟု ဘာသာမန်တုဲ က္လိဂွံ ယၟုမန် နာဲလျးဟံင်မန် ရ။

ကမၠောန်ပရေင်ကောန်ဂကူမန် ကောံ ကုပရေင်မၞိဟ်

• သၞာံ ၁၉၇၇ သွက်ဂွံကၠောန်ဗဒှ် တ္ၚဲဂကူမန် မရနုက်ကဵု ၃၀ ဝါ ပ္ဍဲ ပွိုင်တိုက်ဖအံက်ဂှ် ကေတ်လဝ်တာလျိုင် ဥက္ကဋ္ဌ ပ္ဍဲ သာပ်ကမ္မတဳလဟိင်စိုတ်။
• သၞာံ ၁၉၇၈ သွက်ဂွံကၠောန်ဗဒှ် တ္ၚဲဂကူမန် မရနုက်ကဵု ၃၁ ဝါ ပ္ဍဲ ပွိုင်တိုက်ဖအံက်ဂှ် ကေတ်လဝ်တာလျိုင် ညးအုပ်ကာနာနာ ပ္ဍဲ ကမ္မတဳမကၠောန်ဗဒှ် တ္ၚဲဂကူမန် ပ္ဍဲ ပွိုင်တိုက်ဖအံက်။
• သၞာံ ၁၉၇၈ စဵုကဵု သၞာံ ၁၉၈၈ လုကဴ ပွိုင် ၁၀ သၞာံပေင်ပေင် ကေတ်ကၠုင်လဝ် တာလျိုင် နဒဒှ် ဥက္ကဋ္ဌ ကမ္မတဳမကၠောန်ဗဒှ် တ္ၚဲဂကူမန် ပွိုင်တိုက်ဖအံက်။
• သၞာံ ၁၉၇၇ ဂှ် ဗ္တောန် လိက်မန် ကုကောန်ဂကောံ လျးဟံသာဂမၠိုင်။ ပ္ဍဲ သၞာံဂှ်ပၠန် ဗ္တောန်လိက်မန် ကုကွးဘာG.T.I မတ်မလီု။
• သၞာံ ၂၀၀၄ ဒဳဇြေမ္ဗာ ဂှ် လုပ်ယိုက်ဂၠေင် နဒဒှ် သကိုပ်စန်ဒက် ပ္ဍဲ ကမ္မတဳလိက်ပတ်ယေန်သၞာင်မန် ဍုင်မတ်မလီု။
• သၞာံ ၂၀၀၄ ယိုက်ဂၠေင်လဝ် တာလျိုင်ဥက္ကဋ္ဌ ပ္ဍဲ ကမ္မတဳမသြိုင်ဗဒှ် ဇြပ်ဇၞူမန် ပွိုင်တိုက်ဖအံက်။
• သၞာံ ၂၀၀၅ စဵု ကဵု ၂၀၂၃ ယိုက်ဂၠေင်လဝ် တာလျိုင်ဥက္ကဋ္ဌ ပ္ဍဲ ဂကောံညးမတဵုလွဳပတိတ် တၞံထၜိုတ်ရဝ်ဗဝ် တွဵုရးဍုင်မန်။
• သၞာံ ၂၀၁၄ ဇာန္နဝါရဳ ဂှ် လုပ်ယိုက်ဂၠေင် နဒဒှ် ဒု-ဥက္ကဋ္ဌ ပ္ဍဲ ကမ္မတဳလိက်ပတ်ယေန်သၞာင်မန် ဍုင်မတ်မလီု။
• သၞာံ ၂၀၁၇ ဇာန္နဝါရဳ ဂှ် လုပ်ယိုက်ဂၠေင် နဒဒှ် ဥက္ကဋ္ဌ ပ္ဍဲကမ္မတဳလိက်ပတ်ယေန်သၞာင်မန် ဍုင်မတ်မလီု။

ကမၠောန်ပရေင်ဍုင်ကွာန်မန်

သၞာံ ၂၀၁၀ ဂိတုဨပြဳ ၇ အခိင်မဒက်ပ္တန် ဗော်ဒဳမဵုကရေဇြဳအလုံရးမန် ဂှ် နာဲလျးဟံင်မန် ပါလုပ် ပ္ဍဲ ဂကောံကေင်ကာဗဟဵုမွဲတၠတုဲ ပ္ဍဲ သဘင်မာဲ သၞာံ ၂၀၁၀ ဂှ် လုပ်ဒုင်ရုဲ မာဲ နစၞးဗော် ပ္ဍဲပွိုင်ဆန္ဒမာဲ ပွိုင်ဍုင်မတ်မလီု သွက်စၠတ်ဓဝ်တွဵုရးဍုင်မန်၊ သဘင်မာဲ သၞာံ ၂၀၁၅ ဂှ် လုပ်ပြိုင် ပ္ဍဲ ပွိုင်ဍုင်ဇြပ်ဗု သွက်စၠတ်ဓဝ်တွဵုရးဍုင်မန်ရ။ သၞာံ ၂၀၁၈ အခိင် ဗော်မန်ၜါ ဗော်ဒဳမဵုကရေဇြဳအလုံရးမန် ကောံ ကု ဗော်ကောန်ဂကူမန် ညံင်ဂွံပံင်ပ္ကောံ ဒှ် မွဲဗော်ဂှ် နာဲလျးဟံင်မန် နဒဒှ် သကိုပ်သကဂကောံပညဳပညပ် လပါ်ဗော်ဒဳမဵုကရေဇြဳအလုံရးမန်ဂှ် ရေင်တၠုင်လဝ်ကီုရ။ ဗော်မန်ၜါ ပံင်ပ္ကောံတုဲ ဒက်ပ္တန် ဗော်ညဳသၟဟ်မန်။ ပ္ဍဲဗော်ညဳသၟဟ်မန်ဂှ် နာဲလျးဟံင်မန် ယိုက်ဂၠေင်ဒၟံင် ပ္ဍဲ ဂကောံကေင်ကာဗဟဵုရ။

အနုသုခုမ

ဒွက် နာဲလျးဟံင်မန် မဒယှ်ေလဝ်ဂမၠိုင် (တင်စၟတ် ဒွက်တၞဟ် သှ်ေဒၟံင် နွံမာန်ရ)။

ဂၞန်	ယၟုဒွက်	တင်စၟတ်
၁	လျးပညာ	ပ္တိတ်လဝ် ပ္ဍဲ ကဝး လျးဟံသာ အလန်ပထမ သၞာံ ၈ ဖေဖဝ်ဝါရဳ ၁၉၇၇
၂	တွဵုရးဍုင်မန်	ပ္တိတ်လဝ် ပ္ဍဲကဝး လျးဟံသာ အလန်ပထမ သၞာံ ၈ ဖေဖဝ်ဝါရဳ ၁၉၇၇
၃	ညဳသာညိမန်	ပ္တိတ်လဝ် ပ္ဍဲကဝး လျးဟံသာ အလန်ပထမ သၞာံ ၈ ဖေဖဝ်ဝါရဳ ၁၉၇၇
၄	ကဝါဲဂြိုပ်	ပ္တိတ်လဝ် ပ္ဍဲကဝး လျးဟံသာ အလန်ဒုတိယ သၞာံ ၉ သေပ်တေပ္ဗါ ၁၉၇၈
၅	ရးမည	ပ္တိတ်လဝ် ပ္ဍဲကဝး လျးဟံသာ အလန်ဒုတိယ သၞာံ ၉ သေပ်တေပ္ဗါ ၁၉၇၈
၆	သွက်သဟာဲ ပ္ဍဲကၠအ်တာဲဝါ	ပ္တိတ်လဝ် ပ္ဍဲကဝး လျးဟံသာ အလန်ဒုတိယ သၞာံ ၉ သေပ်တေပ္ဗါ ၁၉၇၈
၇	မိတ်ဒါန်အတိက် ဝိုတ်ဟွံမာန်	ပ္တိတ်လဝ် ပ္ဍဲကဝး လျးဟံသာ အလန်ဒုတိယ သၞာံ ၉ သေပ်တေပ္ဗါ ၁၉၇၈
၈	မိတ်ဒါန်ပိုယ်ညးၜါ	ပ္တိတ်လဝ် ပ္ဍဲကဝး လျးဟံသာ အလန်တတိယ သၞာံ ၆ အဝ်ဂေတ် ၁၉၈၀
၉	အဃောဆာန်ဒးသြာဲ	ပ္တိတ်လဝ် ပ္ဍဲကဝး လျးဟံသာ အလန်တတိယ သၞာံ ၆ အဝ်ဂေတ် ၁၉၈၀
၁၀	အကြီုတိဍာ်ဍုင်မန်တမၠာ	ပ္တိတ်လဝ် ပ္ဍဲကဝး လျးဟံသာ အလန်တတိယ သၞာံ ၆ အဝ်ဂေတ် ၁၉၈၀
၁၁	ရးမည (ကလေင်ဒယှ်ေ)	ပ္တိတ်လဝ် ပ္ဍဲကဝး လျးဟံသာ အလန်တတိယ သၞာံ ၆ အဝ်ဂေတ် ၁၉၈၀
၁၂	စေတနာသရာဲမန်	ပ္တိတ်လဝ် ပ္ဍဲကဝး လျးဟံသာ အလန်စတုတ္ထ သၞာံ ၁၆ အံက်တဝ်ဗါ ၁၉၈၁
၁၃	သၠးအခေါင်ညိယာဲဆာန်	ပ္တိတ်လဝ် ပ္ဍဲကဝး လျးဟံသာ အလန်စတုတ္ထ သၞာံ ၁၆ အံက်တဝ်ဗါ ၁၉၈၁
၁၄	လျးသာသနာ	ပ္တိတ်လဝ် ပ္ဍဲကဝး လျးဟံသာ အလန်စတုတ္ထ သၞာံ ၁၆ အံက်တဝ်ဗါ ၁၉၈၁
၁၅	ဂဳတမန်	ပ္တိတ်လဝ် ပ္ဍဲကဝး လျးဟံသာ အလန်ပဉ္စမ သၞာံ ၁၆ အံက်တဝ်ဗါ ၁၉၈၁
၁၆	ဆာန်မိမွဲသ္ၚောဲရောမာန်	ပ္တိတ်လဝ် ပ္ဍဲကဝး လျးဟံသာ အလန်ပဉ္စမ သၞာံ ၁၆ အံက်တဝ်ဗါ ၁၉၈၁
၁၇	တရဴစးပါ်ဂၠံင် ဟွံဂံင်ဇူရ	ပ္တိတ်လဝ် ပ္ဍဲကဝး လျးဟံသာ အလန်ပဉ္စမ သၞာံ ၁၆ အံက်တဝ်ဗါ ၁၉၈၁
၁၈	အကြီုရာဇာဓိရာဇ်	ပ္တိတ်လဝ် ပ္ဍဲကဝး လျးဟံသာ အလန်ပဉ္စမ သၞာံ ၁၆ အံက်တဝ်ဗါ ၁၉၈၁
၁၉	သၞပိုယ်ဘိင်ဗု	ပ္တိတ်လဝ် ပ္ဍဲကဝး လျးဟံသာ အလန်ဆဋ္ဌမ သၞာံ ၁၄ ဂျောန် ၁၉၈၆
၂၀	ဍောင်လ္ၚဵုရာင် ဍောင်လ္ၚဵုပြဟ်	ပ္တိတ်လဝ် ပ္ဍဲကဝး လျးဟံသာ အလန်ဆဋ္ဌမ သၞာံ ၁၄ ဂျောန် ၁၉၈၆
၂၁	သ္ၚောဲသ္ၚောဲပါဲ	ပ္တိတ်လဝ် ပ္ဍဲကဝး လျးဟံသာ အလန်သတ္တမ သၞာံ ၁၅ ဂျောန် ၁၉၈၆
၂၂	ဗှ်သၞာကွေံရ	ပ္တိတ်လဝ် ပ္ဍဲကဝး လျးဟံသာ အလန်သတ္တမ သၞာံ ၁၅ ဂျောန် ၁၉၈၆
၂၃	ပ္ဍဲဂၠံသြိုဟ်ယာဲ မိက်ဂွံဗ္ဒါဲ	ပ္တိတ်လဝ် ပ္ဍဲကဝး လျးဟံသာ အလန်သတ္တမ သၞာံ ၁၅ ဂျောန် ၁၉၈၆
၂၄	သၞာံတၟိစိုတ်တၟိ	ပ္တိတ်လဝ် ပ္ဍဲကဝး လျးဟံသာ အလန်အဋ္ဌမ သၞာံ ၁၀ ဖေဖဝ်ဝါရဳ ၁၉၈၈
၂၅	ဆက်လှ်ေညိမိရာမည	ပ္တိတ်လဝ် ပ္ဍဲကဝး လျးဟံသာ အလန်အဋ္ဌမ သၞာံ ၁၀ ဖေဖဝ်ဝါရဳ ၁၉၈၈
၂၆	ကၞာတ်ၜဴ	ပ္တိတ်လဝ် ပ္ဍဲကဝး လျးဟံသာ အလန်နဝမ သၞာံ ၂၂ အဝ်ဂေတ် ၁၉၉၀
၂၇	ပိုယ်ပလိုတ်ဍေံဟာ မင်ဍေံပၠိုတ်ဟာ	ပ္တိတ်လဝ် ပ္ဍဲကဝး ပိုဲပလိုတ်ဍေံဟာ သၞာံ ၈၈/၈၉
၂၈	သၟိင်သိဓတ်	ပ္တိတ်လဝ် ပ္ဍဲကဝး ပိုဲပလိုတ်ဍေံဟာ သၞာံ ၈၈/၈၉
၂၉	သွက်အ္စာ	ပ္တိတ်လဝ် ပ္ဍဲကဝး ပိုဲပလိုတ်ဍေံဟာ သၞာံ ၈၈/၈၉
၃၀	လ္ပဒုင်ဍိက်	ပ္တိတ်လဝ် ပ္ဍဲကဝး လျးဟံသာ အလန်နဝမ၊ ၂၂ အဝ်ဂေတ် ၁၉၉၀
၃၁	ရးမည	ပ္တိတ်လဝ် ပ္ဍဲကဝး လျးဟံသာ အလန်နဝမ၊ ၂၂ အဝ်ဂေတ် ၁၉၉၀
၃၂	သၟိင်နာဲဗြဴဗညာထဴ	ပ္တိတ်လဝ် ပ္ဍဲကဝး လျးဟံသာ အလန်နဝမ သၞာံ ၂၂ အဝ်ဂေတ် ၁၉၉၀
၃၃	မှာသၟိတ်	ပ္တိတ်လဝ် ပ္ဍဲကဝး လျးဟံသာ အလန်နဝမ သၞာံ ၂၂ အဝ်ဂေတ် ၁၉၉၀
၃၄	သဉ္ဇာ	ပ္တိတ်လဝ် ပ္ဍဲကဝး လျးဟံသာ အလန်နဝမ သၞာံ ၂၂ အဝ်ဂေတ် ၁၉၉၀
၃၅	ကျာ်တၟအ်-ကျာ်ဇြာ	ဒွက်ဓါတုဝင် ကျာ်ဍုင်မန် သၞာံ ၁၉၉၁
၃၆	ကျာ်ရောဂေါ	ဒွက်ဓါတုဝင် ကျာ်ဍုင်မန် သၞာံ ၁၉၉၁
၃၇	ကျိုက်တမော့မြတ်ရှင်ဆံင်တော်	မွန်ဒေသဓါတ်တော်မွေတော်သမိုင်း သၞာံ ၁၉၉၁
၃၈	တေဇာလျှံဖြိုးကျိုက်ရိုးဂိုး	မွန်ဒေသဓါတ်တော်မွေတော်သမိုင်း သၞာံ ၁၉၉၁
၃၉	တ္ၚဲပ္တန်ဍုင်ဟံသာဝတဳ	ကဝး တ္ၚဲဂကူမန် သဘင်ရတုထဝ် (တ္ၚဲပ္တန်ဍုင်ဟံသာဝတဳ)၊ ဇာန္နဝါရဳ ၁၉၉၇
၄၀	ပ္ၚံက်ဏအ်	ကဝး တ္ၚဲဂကူမန် သဘင်ရတုထဝ် (တ္ၚဲပ္တန်ဍုင်ဟံသာဝတဳ)၊ ဇာန္နဝါရဳ ၁၉၉၇
၄၁	သာသနာ ၂၅၀၀	ဒယှ်ေလဝ် ပ္ဍဲ သၞာံ ၂၈ ဂျောန် ၂၀၀၅
၄၂	မန်ကဵုဒှ်မန်	ကဝး ဒွက်ရုဲမာဲ AMDP
၄၃	ဇုတ်သ္ကဲဟွံပြဲနူဇုတ်ဇၞော်	ကဝး ဒွက်ရုဲမာဲ AMDP
၄၄	ဘာကျာ်သြဳမန် (တံင်ပရင်)	ကဝး ဘာကျာ်သြဳမန် (တံင်ပရင်)၊ ၂၄ ဇာန္နဝါရဳ ၂၀၁၇
၄၅	မၞိဟ်ကွာ်လတူအကး	ပ္တိတ်လဝ် ပ္ဍဲကဝး လျးဟံသာ အလန်ဒသမ သၞာံ ၉ ဒဳဇြေမ္ဗာ ၂၀၁၇
၄၆	ကၠာဟွံစ္ဍးအာ	ပ္တိတ်လဝ် ပ္ဍဲကဝး လျးဟံသာ အလန်ဒသမ သၞာံ ၉ ဒဳဇြေမ္ဗာ ၂၀၁၇
၄၇	ဍိုက်ပေင်ပညာ ဂံင်သ္ကာပ္ဍဲဝိုင်	ပ္တိတ်လဝ် ပ္ဍဲကဝး လျးဟံသာ အလန်ဒသမ သၞာံ ၉ ဒဳဇြေမ္ဗာ ၂၀၁၇
၄၈	သာသနာဂွံတန်	ကဝး အနေင်ဘာဒဵု၊ ၁၇ ဖေဖဝ်ဝါရဳ ၂၀၁၈
၄၉	လ္ပယှအ်စိုတ်	ကဝး အနေဘာဒဵု၊ ၁၇ ဖေဖဝ်ဝါရဳ ၂၀၁၈
၅၀	ဇွသင်ဒါလာန်	ကဝး ဒါလာန်+သၞေဟ်ခြေင်၊ ၁၆ ဇာန္နဝါရဳ ၂၀၁၉
၅၁	မွဲဘာကုသဵုၜါ	ကဝး ဒါလာန်+သၞေဟ်ခြေင်၊ ၁၆ ဇာန္နဝါရဳ ၂၀၁၉
၅၂	ရာမညသာသနာမန်	မနုဃံင်သရာဲ
၅၃	ဆာန်ဇကုဍာံမ္ဂး ဒးဆာန်ကုသဵု	မနုဃံင်သရာဲ
၅၄	ဒါနပါရမဳ	ကဝး ပါရမဳစှ်
၅၅	နိက္ခမပါရမဳ	ကဝး ပါရမဳစှ်
၅၆	ပရိနိဗ္ဗာန်	ကဝး ပါရမဳစှ်
၅၇	ကံပိုဲ ပိုဲဖန်	ကဝး ဒွက်ရုဲမာဲ MUP
၅၈	ဒို့ကြမ္မာ ဒိုးဖန်တီး	ကဝး ဒွက်ရုဲမာဲ MUP
၅၉	ဟာဲကောန်ဗ္တောန်ပညာ	ဒွက်ပရေင်ပညာ၊ ၂၀၂၂
၆၀	ကြဳဇှ်ဂုဏ်	ဒွက်ကျာ်ဇၞော်ဝင်က

ဗီုရုပ်ဂမၠိုင်

• 
  နာဲလျးဟံင်မန် ဒယှ်ေဒၟံင်ဒွက် လတူစင် တ္ၚဲကောန်ဂကူမန်
• 
  နာဲလျးဟံင်မန် ဒယှ်ေဒၟံင်ဒွက်
• 
  ဗီုရုပ် မာံဗညာထဝ် မဒှ်ကောန်ဗၠာဲ နာဲလျးဟံင်မန် မကလိဂွံ လာပ်ပထမ အလုံကၟိန်ဍုင်ဗၟာ
• 
  ဗီုဂကောံသ္ၚိကၟိန် နာဲလျးဟံင်မန်