ဝိဓူရ၊ဇာတ်
ဇာတ်ဝိဓုရ (၉)
သွက်သောတုဇန်တံညးဂမၠိုၚ် သ္ဂောံဒှ်ဗဟုသုတ ဂၠိုၚ်မိၚ်ဂၠိုၚ်ညာတ်အာ ပ္ဍဲပရေၚ်ဗောဓိသတ်ပိုဲ နူဘဝကၠာကၠာတေံညိ လဝ်စိုတ်တုဲ ပြကိုဟ် ( ဇာတ်ဝိဓူရ )ဝွံ ကျာ်ဇၞော်အ္စာစွောံ (ဝေါဆရာတော်) စဳရေၚ်ခၞံဗဒှ်လဝ်ရောၚ်။
နမော တဿ ဘဂဝတော အရဟတော သမ္မာသမ္ဗုဒ္ဓဿ
( ပဏမ )
ရာဇာဓိ ရာဇာ အဂ္ဂ မုနိန္ဒံ၊
'ဓမ္မဥ္စ သံဃံ နာမာမိဟံ။
သံခေပ ဝိဓရ ပကာရဏတ္ထံ၊'
ရဟတာညာဏံ ကရိဿာမဟံ။'
ရာဇာဓိရာဇာ၊ တၠဳဂှ်ဒ မစိုန်ဒှ်တဴသၟိၚ်မွဲ မပြဲနူသၟိၚ်ဂမၠိုၚ်။အဂ္ဂမုနိန္ဒံ၊ န်ကျာ်တြဲသၟိၚ်ခမဳမစိုန်ဒှ်တဴ ကၞောတ်ညးမပြဲ နူဒေဝတဴဂမၠိုၚ်ဂှ် ။ အဟံ၊ ၚ်အဲနွံပိုန်အစွောံ။ နမာမိ၊ ပ္ဍဲလ္ၚောဝ်ရအဴ။ ဓမ္မဥ္စ၊ န်ဓဝ်လောကုတ္တဵု ဒစိတ်ပြကာမဒ္ဂေတ်တဴ ကေုာံပရိယတ္တိပိဂှ်။ အဟံ၊ၚ်အဲ။ နာမာမိ၊ ပ္ဍဲလ္ၚောဝ်ရအဴ။ တဒနန္တရံ၊ ပ္ဍဲမသက်သၟိၚ်လ္ၚောဝ်ကျာ် လ္ၚောဝ်ဓဝ် လ္ၚောဝ်သၚ်တုဲဂှ်။ သံခပဝိဓူပကာရဏတ္တံ၊ န်ပြကိုဟ်သ္ကေံဇာတ် ဓိဓူရ ဗွဲလမၞန်ဂှ်။ ရဟတာညာဏံ၊ အယာံမာတ် မထေက်ကြိုက်ကဵုညာဏ်အဲဂှ်။ ကရိဿာမိအဟံ၊ ပ္ဍံအဲစဳရေၚ် ပ္ညဳပ္ညပ်လဝ်ညိအဴ။
တိဏ္ဏံ ဝိဟာရဘောဂါတံ၊
ကုလပုတ္တာနံ ဇနာနံ။
ဟံသာဝတဳ ပုရတ္ထာယ၊
ကရိဿမိ စရိဓရံ။
တိဏ္ဏံဝိဟာရဘောဂါဟံ−ၚ်အဲနွံပိုန်ဘာ အစွောံတုန်ဂှ်၊ ကုလပုတ္တာနံ−ကုမှာဇန်ကောန်ဂကူတံ မၞုံပၟိက်ကဵုဒတုဲမြမောဝ် ပ္ဍဲဒၠောံဗ္တောန်ကျာ်တြဲဂှ်လေဝ်ကီု၊ ဟံသာဝတဳ ပုရတ္ထာယ−တၞဟ်နဒတုဲမြမောဝ် ညးဍုၚ်ဟံသာဝတဳ သီုရးသ္အာၚ်ဂမၠိုၚ်လေဝ်ကီု၊ ဝိဓုရပကာရဏံ−န်သ္ကေံပြကိုဟ်ဝိဓုရဇာတ်ဗွဲခမၞန်ဂှ်၊ ကရိဿာမိအဟံ−ကြက်အဲ စဳရေၚ်ပ္ညဳပ္ညပ်လဝ်ညိအဴ ။
မူသၟိက်ဂး အဓိပ္ပါယ် ဂါထာဝွံတုန်ရော၊ အဲနွံပိုန်ဘာအစွောံ ဝေၚ်ထောံကၠေံဓဝ်လၞုဟ် ဟိုၚ်ပ္ၚုဟ်လဝ်ဓဝ်သဒ္ဓါ မေတ္တာ ကရုဏာ ပ္ဍဲဇန်ကောန်ဂကူ တၠဝါသနာတံညးဂမၠိုၚ် မၞုံပၟိက်ကုဒတုဲမြမောဝ် သၟိက်ဂွံပ္တန်လဝ်သာသနာ ဒၠောံဗ္တောန်ကျာ်တြဲဂှ်ဒှ်တုဲ သ္ကေံသုတ်ဇာတ် ဝိဓုရပဏ္ဍိတဗွဲခမၞန်ဂှ် ကြက်အဲစဳရေၚ် ပ္ညဳပ္ညပ်လဝ်ညိအဴ ။
နိဒါန်
ပဏ္ဍုသိ ယာသိ ဒုဗ္ဗလာတိ၊
ဣဒံ သတ္တာ ဇေတဝနေ ဝိဟာရန္တော၊
ပညာပါရမဳ အာရဗ္ဘ ကထေသိ။
နွံပ္ဍဲကာလမွဲတ္ၚဲ ကျာ်တြဲပိုဲမပဒတဴ ပ္ဍဲဘာဇေတဝန် ပဟိုတ်ကဵုပညာပါရမဳတုဲ ဂါထာမၞုံတံဍေံပဏ္ဍုသိယာသိဒုဗ္ဗလာဂှ် ကျာ်တြဲဂိုၚ်တွံရ၊ ခမဳတံညးဂမၠိုၚ် ကၠုၚ်ကောံမွဲဟာန် ပ္ဍဲဇြပ်သ္ဘၚ်ဓဝ်တုဲ သာ်ဝွံ က္တဵုဗဒှ်ဂလာန်ရ၊ “ယွံတၠဳပိုန်တံတၠဳမၞုံကုပိုန်ကျာ်တြဲ နာဲပိုဲဝွံဂှ် မပတၠပညာမဇၞော်လောန် မပတၠပညာ မကလိထောံကၠေံ ပညာညးရောၚ်၊ မပတၠပညာ မပြဟ်လောန် မပတၠပညာမသ္ကေက်လောန် မပတၠပညာ မပၠိုဟ်ကၠေံဝါဒညးရောၚ်၊ မပတၠပညာမလၞိန်ဗပိန်ကၠေံဝါဒညးရောၚ်၊ နပညာဇကုမဇိပ်ဂၠိပ်ဂှ် ဂွံဗပါ်ကၠေံမောဟ သမၠီုတံဂမၠိၚ်ဂှ်တုဲ ဂွံပ္တန်လဝ်ညး ပ္ဍဲသရဏဂမနပိ၊ သဳမသုန်တုဲ ဂွံဟံၚ်ဗစိုပ်သြၚ်ဇၞော်နိဗ္ဗာန် ကဵုသတ္တံညးဂမၠိုၚ်ပၠန်ရောၚ်၊ သြအသဝ်ကွေံသွံ” သာ်ဝွံ နခမဳဂမၠိုၚ်မဟီုထိုၚ်သးတဴပညာကျာ်ဒစာံသာ်တုဲ ဂ္ဇံတန်ဒၟံၚ်အိုတ်ရ။
ကျာ်ဂမျိုၚ်မတိတ်ကၠုၚ်နူဂန္ဓကုဋဳတိုန်လ္တူရာဇာပၞၚ် ဒက်ထွာဲဇမၞးတုဲ သၟာန်တိုန်ခမဳဂမၠိုၚ်ရ၊ “ဘိက္ခဝေ၊ ယွံခမဳတံညးဂမၠိုၚ် မလ္တက်လဝ်သ္ၚာ ပံၚ်သကူ မလ္ဂူစိုတ်ကဵုနိဗ္ဗာန် မတန်ဒၟံၚ်ပ္ဍဲဌာန်လ္ၚု မက္ဍိုက်ပေၚ်တဴကဵုဓုဝၚ်မၚ်မွဲလဝ်သာသနာ မစာ်စ္ဍးအာနူကိလေသ မဖေက်ဒညတဴပ္ဍဲဒုဟ်သံၚ်သာ မဂွံတိတ်ဗၠးအာ နဒဒိုက်ဘုံပိအိုဿီု မၞးတံညးဂမၠိုၚ် မကၠုၚ်ကောံ ကရောံမွဲဟာန်အိုတ်တုဲ မူဂလာန်မွဲ မၞးတံမက္တဵုဗဒှ်အိုတ်ဂှ်ရော”။
“ယွံတၠဳမၞုံကုပိုန် မစိုန်ဒှ်တဴသမ္ၚေဟ်ညာဏ် နူပိုဲဍိက်မသုၚ်ဒးဍာ်လစအနုတတ်တုဲဂှ် ဍာ်မဒှ်အကြာသြော်ကွာန် ပိုဲဍိက်မဟီုထိုၚ်သး ထေက်ကြိုက်ကဵုဂၠးလ္တာ်ဟာ၊ နူပိုဲဍိက်မစသတ်ကြေၚ်ဇမ္မုရှ်တုဲ သတ်အိက်အာ် ဂမ္တၚ်ပိုဲဍိက်ဟီုထိုၚ်သးထေက်ကြိုက်ကဵုဂၠးလ္တာ်ဟာ နူပိုဲဍိက်ဒလာဲလဝ်တၟံသိန္နရာတ် တၠလျးပန်သာ်တုဲ တၟံတိအပြောံဂှ် ပိုဲဍိက်သ္ဇက်ဟီုထိုၚ်သးသနွံဟာ၊ ယွံကျာ်တြဲဇမၞးမာ နူပိုဲဍိက်ဒလာဲလဝ်တိုၚ်ထဝ် သာသနာတၠဳမၞုံကုပိုန်တုဲ ညးသ္အာၚ်ဂှ် ပိုဲဍိက်သ္ဇက်ဟီုထိုၚ်သးရနွံပၠန်ဟာ ပိုဲဍိက်မဟီုထိုၚ်သးပညာသဗ္ဗညု တၠလျးတြဴရအဴ” ခမဳဂမၠိုၚ်ဂရး။
ယွံခမဳတံ ယြဴတၞံကြုက်မွဲဂှ် ပ္တိတ်ရိုဟ် ဗ္ဒဟ်က္ဍိုပ်ပ္တိုန်လမှဳတရံၚ်ကြက်တုဲ ဇမၞော်သမၠုၚ်ဗၞတ်တၟာတၞံတာဗၠာဲဂှ်ဒှ်တုဲ က္တဵုဗဒှ်သတ်က္ဍုဟ်ညေံညံဒၟံၚ်မ္ဂး မၞးတံမဟီုထိုၚ်သးဂှ် မူအသဝ်သၞုံရော၊ ယြဴတၞံကြုက်မွဲ နူသွတ်တ် မၞတ်တၟာဒစုန်ဒုန် သၠုၚ်ပန်ဟတ် သီုပ္ကဴသတ်မဍုဟ်ဍေဟ်ညေံညံဒၟံၚ်ဂှ် မၞးတံသ္ဂောံထိုၚ်သးတဴဂှ် မဒှ်အသဝ်ရော”။
“ယွံခမဳတံ ယြဴသတ်ဆုမွဲဂှ် ကြံၚ်ဍုဟ်တုဲ မပ္ကၚ်ရၚ်လဝ်ရှ် မကြောံတဍာတ်မ္ဂး မၞးတံမဟီုထိုၚ်သးတဴရှ် မူအသဝ်သၞုံရော၊ သတ်နူၜတ်တ် မၞုံသတ်မပ္ကၚ်ရၚ်လဝ်ရှ် ညံၚ်ဗ္တဝ်သာဲမလေပ်ဗ္ဒာဲဖျိုက်ကဵုဂၠးလတာ်ညးဂှ် မၞးတံဂွံဟီုထိုၚ်သးဂှ် မဒှ်အသဝ်ရောၚ်၊ ပ္ကဴကြက်စၠန် ဂဒအ်ကြံၚ်ဍုဟ်ပေၚ်လး ပလးထာၚ် ပြာၚ်ထိုက်တုဲ ပ္ကၚ်ရၚ်လဝ်မြမောဝ် မဗ္ၜူကဵုစိုတ် ထိုၚ်သာဲအဒါဲဂှ်မ္ဂး မၞးတံမဟီုထိုၚ်သးတဴဂှ် မူအသဝ်သၞုံရော၊ ယြဴပ္ကဴကြက်စၠန်မွဲဂှ် ကၠာနူဂဒအ်ပ္ကဴဟွံကြံၚ်ဍုဟ်ဏီ ပၠးထာၚ်ပြာၚ်ထိုက် နရိုက်သၞေၚ် ပ္ကၚ်ရၚ်လဝ်မြမောဝ် အမြာဲဗ္ၜူကဵုစိုတ် ထိုၚ်သာဲ အဒဲါဒှ်မ္ဂး မၞးတံမဟီုထိုၚ်သးတဴဂှ် မဂွံဒှ်အသဝ်ရောၚ်၊ ညံၚ်သာ်ဂှ်ကီုရ လၟုဟ်အဲမဒှ်ကျာ်ဂြၚ်တီဓဝ် ပ္ကဝ်ပၞာန်မာ ဂဒအ်ပညာအဲကြံၚ် ဍုဟ်ပေၚ်အလေံဒၟံၚ်တုဲ မၞးတံ မဟီုထိုၚ်သးတဴဂှ် မုအသဝ်သၞုံရော၊ ဂၚေၚ်ဘဴသံၚ်သာ ကာလပါရမဳအဲၜတ် ဂဒအ်ပညာပါရမဳအဲဟွံကြံၚ်ဍုဟ်ဏီဂှ် အဲဂွံပ္ကၚ်ရၚ်လဝ်ပညာတုဲ ဂံါဒလောံဗ္တောန်ဗ္ၜူကၠေံစိုတ်သတ္တံဂမၠိုၚ်ဂှ် ဂပ်ဝ်ထိုၚ်သး ဂပ်ဝ်သ္ပအသဝ်ရောၚ်”။
“ယွံခမဳတံ ကာလအဲမဒှ် ဝိဓုရ ပဏ္ဍိတတေံဂှ် မပတၠပညာ မဂွံတွံဓဝ် ဒလောံဗ္တောန် ဝေတ်ကၠေံကလော် ပုဏ္ဏက မဗ္ၜူဒၟံၚ်နဓဝ်ရာဂစရိုတ် ပ္ဍဲလတူက္ဍိုပ်တၟံ ကာဠာဂိရိဂှ် မဂပ်ဝ်သ္ပအသဝ်ရောၚ်”ဂးတုဲ ကျာ်တြဲကၞပ်သ္ၚံဒၟံၚ်ရ၊ မူဟိုတ်ရော ကျာ်တြဲမသ္ၚံဒၟံၚ် မဟွံတွံဓဝ်ကဵုခမဳတံဂှ်သ္ဂးရော၊ ယဝ်ညးသ္ဂးမ္ဂး မဒှ်ကၞတ်စိုတ်ညးရောၚ် ဂလာန်ဂှ် မဒှ်တဆိပ်စိုတ်ညးရောၚ်၊ ဂလာန်မပြဲဂှ် ညးမဂွံမိၚ် ဂွံဂိုၚ်သမ္တီလဝ်တုဲ မဂွံဒှ်ဒတုဲမြမောဝ် ဍုၚ်သွဝ်ဗြီု နိဗ္ဗာန် ကဵုညးရောၚ်၊ ကျာ်တြဲလဝ်စိုတ်တုဲ မ္ဒးကၞပ်သ္ၚံဒၟံၚ်ရောၚ် မိဂ္ဂး။
ပ္ဍဲကာလဂှ် ခမဳတံညးဂမၠိုၚ် မအာတ်ပၚ်မှိၚ် ဇာတ်အတိက်တုဲ၊ အဋ္ဌၚ်္ဂိကေနမဓုရသရေန၊ နရမျာၚ်ကျာ်ဂမျိုၚ် မတုပ်တဴရဴရှ်ဗ္တဝ်သာဲ မက္ဍိုက်ပေၚ်တဴ ကေုာံအၚ်္ဂဒစာံသာ်ဂှ် ဇာတ်ဝိဓုရပဏ္ဍိတဂှ် ကျာ်တြဲတွံတိုန်ရ။
၁။ ခဏ်သၟိၚ်ပန် မၚ်သဳဥပုဟ်[ပလေဝ်ဒါန် | ပလေဝ်ဒါန် တမ်ကၞက်]
ဘိက္ခဝေ−ယွံခမဳတံ၊ အတဳတေ ပ္ဍဲကာလအတိက်တေံ၊ ကုရုရးဂးယၟု ဍုၚ်ဣန္ဒပတ္ထနာဂဵုမ္ဂးယၟု သၟိၚ်မပ္ကၚ်ရၚ်ဍုၚ်ဂှ် ဓနဥ္စယကောရဗျမ္ဂးယၟု၊ အမာတ်သၟိၚ်ဂှ် ဝိဓုရပဏ္ဍိတ မ္ဂးယၟု၊ အမာတ်ဂှ်လေဝ် နဓဝ်ဒစာံသာ် ဒလောံဗ္တောန်တဴညးရ၊ အမာတ်ဂှ် မၞုံဂလာန်ညံၚ်ရှ်ဗတဝ်သာ်ကီု မစိုန်ဒှ်တဴ ဓမ္မကထိုက်ရောၚ်၊ အိုတ်သၟိၚ်အလုံဂတာဇမ္ဗုဒိပ် မိၚ်ဓဝ်အမာတ်ဂှ်တုဲ ညံၚ်ရဴကွိၚ်ဥတေန မဗ္ၜူကဵုစိုတ်စိၚ်ဂမၠိုၚ်ဂှ်ကီု၊ နတဝှ်ဓဝ် ညံၚ်ရဴရှ်ဗ္တဝ်သာဲဂှ် ညံၚ်အယောၚ်အလာ တၠးစရာဲကျာ်ဂမၠိုၚ်ကီု တွံဓဝ် ဒလောံဗ္တောန် သၟိၚ်ဂမၠိုၚ်ရ၊ ကောန်သၟိၚ်ဂမၠိုၚ် ဂွံမိၚ်ကေတ် တဝှ်ဓဝ်တၠပညာတုဲဟေၚ် ကလေၚ်စဴကၟိန်ဍုၚ်ဇကုဟွံမာန် ဒၟံၚ်တဴပ္ဍဲဋ္ဌာန်ဂှ်ရ၊ ကောန်သၟိၚ်ဂမၠိုၚ်ကီု အိုဿီုမှာဇန်ဂမၠိုၚ်ကီု ကဵုဂိုၚ်ကေတဆ်ဒလောံဗတောန်ဇကုတုဲ နကဵုပိုန်ဟာန် ယဿပတ် မဇၞော်ဟေၚ် ဂွံတန်တဴဒၟံၚ် ပ္ဍဲဍုၚ်ဂှ်ရ။
သၟိၚ်အိန်၊ သၟိၚ်သွဝ်၊ သၟိၚ်နာ်၊ သၟိၚ်ကောရဗျ၊ ပ္ဍဲကာလဂှ် က္တဵုဒဒှ် သၟိၚ်ပန်ဝွံ နူအတိက်ကိုပ်ကၠာတေံဂှ် ဂပ်ဝ်သမ္တီကၠာရ။
ပ္ဍဲဍုၚ်ဗာရန္နသဳ သၟိၚ်ဂှ်တုန်လေဝ် နူကိုပ်ကၠာတေံဂှ် မဒှ်သဟာဲကေုာံရၚ်သ္ကံ မသၟဟ်န်တဴ ကြဴဝွံ ညာတ်ဒုဟ်ကာမဂုဏ် မသုန်ပြကာတုဲ တိတ်ဂြိုပ်ဟေမဝန် ပခမဳရသိ ဂွံဇျာန်အဘိညာန်ဗၠိုပ်တိ ကလာၚ်အကာသ စၞသတ်ဆု ရိုဟ်ဇုက် သတ်ဆု မပအဟာ စိုတ်ၚးဒၟံၚ် ညံၚ်ပညာရီု ညံၚ်ဂစေံဂြိုပ် မစသတ်ဆုစၞဖဲတုဲ ပ္ဍဲရှ်သတ်ဆုဂှ် ရဴအလဵုဟၟဲကီု၊ စသိုၚ်အရီုဓဝ်မေရုန်ဖဲတုဲ ပ္ဍဲဓဝ်မေထုန်ဂှ် ဒဵုကဵုတွဵုအယုက်မဟွံဂွံ ကလေၚ်ၚဳပၠန်ရ၊ ညံၚ်ၜိုပ်က္ၜၚ်ပါကၚ်ထဝ် မပဝ်အာစိုပ် လစရတ်တုဲ ဝေၚ်ဂြိုပ်ဗၞိပ်ဗၟက် စစၞဖဲလဲတုဲ ဒးပယာံသၟဝ်တ္ၚဲ ထောံကၠေံလစရတ် ပဝ်မှတ်ကလေၚ်စဴ တၟံထဝ်စိက္တက္ဍတ်တုဲ ရဴအလဵုမဟၟဲကီု လစရတ်ဂှ်ကီု ညံၚ်သာ်ဂှ်ကီုရ ရသိပန် စသိုၚ်အရီု သ္ၚိကၟိန်ဖဲလဲတုဲ ပ္ဍဲအရီုသ္ၚိကၟိန်ဂှ် ဟွံကလေၚ်ဗဟ်သၞာ အလဵုဟွံမွဲရ။
ရသိပန် မဒၟံၚ်တဴပ္ဍဲဂြိုပ်ဟေမဝန် စဒၟံၚ်သတ်ဆုစၞ လံလာဖါတုဲ ဟိုတ်နူဖနုၚ်ဖစး ရသိဂၚေၚ်ဒေသစရိတ်မစဴကၠုၚ်စိုပ် ပ္ဍဲဒေသအၚ်္ဂရး ဍုၚ်ကာလစမ္ပါဂှ်တုဲ လုပ်ဂေါစရသီုအိန်ရိယာပိုတ်ပန် မက္ဍိုက်ပေၚ်တဴ သမ္ၚေဟ်ပန် မတဴပ္ဍဲဍုၚ်ကာလစမ္ပါဂှ် မၞုံကဵုဂၠးသုစရိုတ် သ္ဂေဟ်ဒၟံၚ်နဓဝ်သဒ္ဓါ ညာတ်ရသိပန်တုဲ သမ္ၚေဟ်မွဲမွဲဂှ် ဂိုၚ်က္ညပ္တိုန်ပ္ဍဲသ္ၚိဇကုတုဲ မပဒကာဒါန် ဖါပ်ဗ္စလၟိုန်ကာလ ရိုဟ်ဟ်တ္ၚဲရ၊ ရသိပန်ဂှ် အနုမောဒနာကဵုဒါန်သဒ္ဓါ သမ္ၚေဟ်တံဂှ်တုဲ တိတ်ပဒတဴပ္ဍဲဥဒျာန်တေံရ။
ရသိပန် ဒးကလေၚ်စဴဒုၚ်ပိဏ္ဍပါတ်ပ္ဍဲသ္ၚိသမ္ၚေဟ်ဂှ်ကဵုပိုန်တုဲ ပ္ဍဲကာလဂှ် ဥတုဂမ္တဴ သၟိက်လၜိုဟ်ဇကုဂှ်ဒှ်တုဲ ရသိမွဲဂှ် တိုန်အာလၜိုဟ်ဇကု ပ္ဍဲသွဝ်တာဝတိံ ညာတ်ပိုန်ဟာန် လွဳမာန်ယဿပတ်သၟိၚ်အိန်ပြာသာဒ် ဝေဒယန္တဝ် သၠုၚ်ကၠံယောဇနာ ကၠုၚ်တိုန်လ္တူတိသမ္မထိုက် သီုလျးသ္ဍိုက်ဗစဳဒၟံၚ် ဂ္ညိတဴနပဇ္ဇရးတြၚ်ဂဒံၚ်ပံၚ်လုံ ဘုံပ္ဍာန်တရိုန်တာန်ဆာ အသဝ်ဗလှ်တၞာဲ ပုံဇဝ်တဝ်သၠး ထ္ၜခေဏာန် ဂစှ်ေသ္ဂေဟ်ကၟက်ရာဲ ပတ်ဒၟဇတာ်ၝောံကိုတ် ၜိုတ်လျတ်သွိၚ်ဒၟံၚ် သီုအရံၚ်အံၚ်သူ လျးရတ်ဒစိတ်သာ် ညံၚ်လျးမိန်သောမဂဵုလမးဒၟံၚ် ပ္ဍဲကာလဗ္တံဂှ်ကီု သီုဂၞကျာ်ပန်မတ္ၜန်တ္ၜောံဒၟံၚ် သီုကမၠောန်ၜါလှက် သ္အဳဂၠက်ဒၟံၚ် သီုလျးအံၚ်သူ လျးရုပ်သမ္ၚောဟ်ပိုန်ဗွဝ် နလျးရုပ်ပြီုရတ် လျးဇၞော်ပြီုရုပ်မဒှ်ဂအုပ်န် ဇန်ဂမၠိုၚ်ဂှ် ညာတ်ကေတ်တုဲ စဴဟီုပ္တီဒကာဇကုရ။
ရသိမွဲစှ်ေလၜိုဟ်ဇကု ပ္ဍဲဒေါဝ်ဍုၚ်နက္ကဘဴ ညာတ်လွဳမာန်သၟိၚ်နာ်မဂ္ညိဒၟံၚ်နထ္ၜိုၚ်ကၟာၚ်မြုပြလက်ရာန်ပြာသာဒ်ကၠတ်နန်မတ္ၜန်တ္ၜောဲတဴနရတ်ဒ္စိတ်ပြကာဂှ် ဂွံညာတ်ကေတ်တုဲ စဴဟီုဗ္စကဵုဒကုရ။
ရသိမွဲဂှ်အာလၜိုဟ်ဇကု ပ္ဍဲဂြိုပ်ကြိက်လစှ်ေဂြိုပ်ဟေမဝန်တေံဂှ် ညာတ်ဂြိုပ်ကြိက် မဒှ်လွဳမာန်သ္ပဝ်ဂှ် ဆုကြိက်ဟၟဲကဵုလဇ ဟၟဲကဵုခမှံက်သၟာဲသၟ ဟွံလဍိုဟ် ဟွံလဍေၚ် သ္တပ်သ္တေဝ်ဒၟံၚ်ညံၚ်လတှ်သြန် ညံၚ်ပၞာၚ်ဗ္ၜန်ကီု ဗက်ဗ္ဒဴကၠေံဂမ္တဴ ပ္ကၚ်ရၚ်လဝ်လၟုဟ် မၞုံသမၞိၚ်မတ္ၜုဟ်မိပ်တဴကာလ မဂ္တဴညံၚ်ရဴဒွက်လဳဗာညးလၜတ်လဝ်ဂှ်ကီုပြဟ်ဒတုံစှ်ေတိညံၚ်ကၟဝ်ဂတေဝ်ပး ညးမဂြောပ်လဝ်ဂှ်ကီု ရသိဂွံညာတ်တုဲ ဒဒှ်ဂှ်စဴဟီုပၟိၚ်သမ္ၚေဟ်မဒှ်ဒကာဇကုဂှ်ရ။
ရသိမွဲဂှ် အာလၜိုဟ်ဇကုပ္ဍဲလွဳမာန် သၟိၚ်ကောရဗျ ဒဒှ်ဥဒျာန် မတ္ၜန်တ္ၜောဲတဴကေုာံသစ္ဆုပ္ကဴဆုဂှ်ကီု သီုပ္ကဴတၞီ သီုပ္ကဴဍာ် ရာဇာဒတ္တဝါယောဓါတ် မပိုက်နၚ်ကျာ်ရဳရဳညှာညှာအလုံဥဒျာန် ကဵုလရုကလိုက်နၚ်မြမောဝ်တုဲ ၊ တီုဗးပ္ဍးတၟာဲကဵုအမြာဲ ဂန္ဓာရီုတုဲ တၞံဆုတံဂှ် ဒးကျာသွိၚ်ဒဟုဲဒၟံၚ်ရိုဟ်ကဵုရိုဟ် ကၞာၚ်ကဵုကၞာၚ် သၠကဵုသၠ ကၟဝ်ကဵုကၟဝ်၊ တၞုၚ်ဇဝ်ပ္ကဴယာံကျာပိုက် လလဴညံၚ်ရဴသၟာလှ်ေဇၞော်ခါညး မကွာ်ညံၚ်တခါဲကော ခါညးကွာ် ညန်တြဴဇၞော်ညံၚ်ရဴညးမကော် ဗဗဵုတဴဂှ်ကီုရ၊ ပ္ကဴဆုမပ္တံကှ်ေပြာန် ဓိတာန် ဇုက်ဂၞု အနာၚ်ပံက်ထာၚ်ရာၚ်သဘိုက် ဂရိုက်တဴပ္ကဴဍောၚ်ဒကောဝ်ဇဝ်တဝ်သၠ ကဏဗၜခၠၚ်လစး ထီုဗးလဝ်မြမောဝ်သ္ဂေဟ်အမြာဲ တမှာဲပ္ဍ:လလောၚ်တဴ သီုဒိုဟ်ပန် မတ္ၜန်တ္ၜောဲတဴကေုာံထိုၚ်သာဲအဒါဲ ညေံညံမှုဲ ဘိုၚ်တဴလ္တူဆုပရူဂန္ဓာရီုမှုဲထဥ လဒုကြီုဘဴ နဒြဝ်သၞေၚ် စက်စာန်တၞေၚ်ဂွါၚ် ဨတာၚ်စလာၚ်မှုဲတဴ ဂစေံဍေဝ်ကၠိုက်ဂဂီုမြာ် ကွဴဂြဴကြီုလဒိုဟ်လဒါဲ အကြီုဥဒျာန်အိုဿီုဂှ် ဂၠာဲဟီုဟမာန်ရ၊ ဣန္ဒပတ္ထနာဂဵုမ္ဂးယၟုဍုၚ်ဂှ် မက္ဍိုက်ပေၚ်တဴကေုာံဒဂ္ဂပန် မတွံဂး နဒဳ၊ ပၚ်္က၊ နဝ၊ ဂိရိ၊ ဣဝွံ မဒှ်သိဒ္ဓိဒဂ္ဂပန်ရ၊ ၜဳညန်လှာညန် ဂြိုပ်ညန်ဒဵုညန်၊ မတ္ၜန်တ္ၜောဲတဴ သီုကၠံမွဲဘာသာ ဂၠိုၚ်ကဵုတိုက်ဒြပ်အရဝ် အရာဖျာလဝါ အိန်သ္ဂီုရာၚ်ဆာဲတဴဗွဲမလောန်ဂှ် တၠရသိ ဂွံညာတ်ကေတ်တုဲ ဒဒှ်ဂှ် စဴဟီုပၟိၚ်ကဵုသမ္ၚေဟ်ဒကာဇကုရ။
ဒကာသမ္ၚေဟ်ပန်ဝွံ ဂွံမိၚ်ပရိုၚ်တုဲ နိကန္တိထၞေန်စိုတ်လၜေါ်အာတုဲ သမ္ၚေဟ်မွဂှ် စုတိနုဂှ် ကံကုသဵုမိန်သ္အာ်ဏာစွံပ္တန်လဝ် ပ္ဍဲပြာသာဒ်ဝေဒယန္တဝ် ဂွံဒှ်သၟိၚ်အိန်ရ၊ သမ္ၚေဟ်မွဲဂှ် အာဒှ်ပ္ဍဲလွဳမာန် ဂြိုပ်ကြိက်ဂှ် ဒှ်သၟိၚ်သ္ပဝ်ရ၊ သမ္ၚေဟ်မွဲဂှ် ကုသဵုကံမိန်သဘာ်ဏာ ပ္ဍဲဍုၚ်နက္ကဘဴ ဂွံဒှ်သၟိၚ်နာ်ရ၊ သမ္ၚေဟ်မွဲဂှ် ကုသဵုကံမိန်သဘာ်ဏာ စွံပ္တန်လဝ်ပ္ဍဲပြာသာဒ် ဍုၚ်ဣန္ဒပတ္ထနာဂဵု ဒှ်သၟိၚ်ဓနဥ္စယကောရဗျဂှ်ရ၊ သာ်ဝွံ က္တဵုဒဒှ်သၟိၚ်ပန် နူတံဘဝကိုပ်ကၠာတေံရ။
နွံကာလမွဲတ္ၚဲ သၟိၚ်ပန်ဂှ် ပြာပ်အာမၚ်သဳ ပ္ဍဲဇရေၚ်သြၚ်ကၟာလစ ဥဒျာန်သၟိၚ်ကောရဗျဂှ်ရ၊ သၟိၚ်ပိတေံ မူဟိုတ်မ္ဒးကၠုၚ်မၚ်သဳ ပ္ဍဲဇရေၚ်သြၚ်ဥဒျာန် သၟိၚ်ကောရဗျဂှ်တုန်ရော၊ ဟိုတ်ဝါသၞာအတိက် မဒှ်သဟာဲ ကာလမဒှ်သမ္ၚေဟ်တေံဂှ် ဟိုတ်မဂွံခဏံလဝ်ကုသဵု ပ္ဍဲဒေါဝ်ကသပ်ပိုန်သၟဟ်န်တုဲ၊ လၟုဟ်ဝွံကံကုသဵုအတိက်တေံ သ္ဂန်ကံတဲသဘာ်ဒတဲနၚ် မကဵုကၠုၚ်မၚ်သဳမွဲစွံ၊ ပ္ဍဲဥဒျာန်သၟိၚ်ဓနဥ္စယ ကောရဗျဝွံရောၚ်
ဣတိဝိသဇ္ဇနော−န်သွဟ်မြဴဝွံဂှ်၊ ညာတဗ္တော၊ စိုတ်ဂပ်ဝ်သမ္တီ။ မွဲနဲတုန် − ဝိဓရပဏ္ဍိတော၊ ဗောဓိသတ်တြုလၟောဝ်စိုတ်ကျာ် မပ္ကၚ်ရၚ်လဝ်ဂုန်ပညာ ဆပ္ဍဲဘုံမၞိဟ်ကီု မသ္ကဵုပြာကတ်ပညာဟသေၚ်၊ ဒဵုသၟိၚ်အိန်တၠသွဝ်ၜါ မစိုန်ဒှ်တဴ နာဲညးဒေဝတဴတံဂမၠိုၚ်ဂှ်လေဝ်ကီု၊ သၟိၚ်နာဲ သၟိၚ်သ္ပဝ်ဂှ်လေဝ်ကီု၊ ကဵုပြာကတ်ကဵုတီဂုန် ပညာဗောဓိသတ် ကဵုဒယဟ်ပြာကတ်အာကီုညိဂးတုဲ ပါရမဳဗောဓိသတ် သ္ဂန်ကံတဲသတဲနၚ်သၟိၚ်ပိတေံ မသကဵုကၠုၚ်မၚ်သဳ ပ္ဍဲဥဒျာန်သၟိၚ်ကောရဗျဝွံ မွဲစွံရောၚ်၊ ဟိုတ်မဒှ်ကညာနိမိတ်မတုဲတေံတုဲ မကၠုၚ်ညာတ်ရၚ်သ္ကံ မ္ဒးဆာန်ကၟိန်ရၚ်သ္ကံ ဓဝ်မေတ္တာ ကရုဏာ မပါတ်ပ္ဍဲဂၠးဟဒယရောၚ်။
မၚ်သဳတုဲ ပယာံသၟဝ်တ္ၚဲ သၟိၚ်အိန်တၠကၟိန်မြုတာဝတိံ တန်ဒၟံၚ်လ္တူသၞာမ္ၚဵုရ၊ အိုတ်ညးပိတေံ ဋ္ဌာန်မထေက်ကြိုက်ကဵုဇကုဂှ် ဗွဲလၟေၚ်ဂ္ဇံဒၟံၚ်အိုတ်ရ၊ သီုမေတ္တာကရုဏာ ဂလာန်ပ္တုန်ဖ္အာဟီုတဴကဵုရၚ်သ္ကံတုဲ ပ္ဍဲကာလဂှ် သာ်ဝွံ သၟိၚ်အိန်မဟီုတိုန်ရ။
“ယွံမၞးတံ ပိုဲညးပန် မၚ်သဳဥပုဟ်မွဲစွံဝွံဂှ် ညးဂှ်သဳလမပြဲလောန်ရော” သၟိၚ်အိန်သၟာန်။
ပ္ဍဲကာလဂှ် သာ်ဝွံ သၟိၚ်နာ်မွဲ မဟီုတိုန် “အဲမၚ်သဳလမပြဲလောန်ရ”သၟိၚ်နာ်ဂး၊ “မူဟိုတ်ရော ၜိုန်ညာတ်တဴသၟိၚ်သ္ပဝ်သတြုအဲ မသ္ကေတ်လမျီုအဲဂှ်ကီုလေဝ် အဲဟဂွံရိုဟ်စကဵုလမျီုအဲဟွံဖေက်ဂစိုတ် အဲဟွံက္တဵုဗဒှ်ဒေါသ နမေတ္တာစိုတ်အဲပ္တန်လဝ်တုဲ မအေၚ်ဒုၚ်တဴ ဟိုတ်ဂှ်ရ သဳလအဲမွဲ မပြဲလောန်မ္ဂးရောၚ်”
သၟိၚ်သပဝ်မိၚ်တုဲ “အဲမၚ်သဳလမပြဲလောန်ရောၚ်” သၟိၚ်သပဝ်ဂး၊ မူဟိုတ်ရော အဟာအဲမွဲဟွံဂွံ ၜိုန်အဲမဗျဵုထဝ်တဟၚ်လောန်ကီု သၟိၚ်နာဲစၞအဲ မၞုံကဵုရှ်ဂှ်လေဝ် ၜိုန်အဲမညာတ်ဒၟံၚ်ကီု အဲဟွံစဍေံ ဟိုတ်ဂှ်ရ သဳလအဲမွဲ မပြဲလောန် အဲမ္ဒးဂးရောၚ်”။
ပ္ဍဲချိုန်ခဏဂှ် သၟိၚ်အိန်သ္ဂးပၠန်ရ၊ “သဳလအဲမွဲ မပြဲလောန်ရောၚ်” မူဟိုတ်ရော၊ “အဲထောံကၠေံ ပြာသာဒ်ဝေဒယန္တေဝ်ဍုၚ်သွဝ်တာဝတိံတေံ၊ သီုဂၞကျာ်ပန်ကမၠောန်မွဲလှက်ကီု သီုဗွဝ်ပိုန်ဟာန် ယဿပတ်အဲဂမၠိုၚ်ဂှ် ကဵုအသူတိုန်ဂွံကေတ်ဏာကဵုအဲ ဟွံပဗၞတ်အဲလ္ၚတ်ဒၟံၚ် ဓဝ်ခန္တဳလဗိုန်ဒၟံၚ်ဓဝ်သဳလ ဟိုတ်ဂှ်ရ သဳလအဲမွဲ မပြဲလောန်သန် အဲမ္ဒးဂးရောၚ်”။
သၟိၚ်ကောရဗျ ဂးပၠန်တုန်၊ “သဳလအဲမွဲ မပြဲလောန်ရောၚ်” မူဟိုတ်ရော “ပဥ္စရဳအိုဿီု အဲမထောံလဝ်ဂၞကျာ်ပန် မံၚ်မသၟာလှ်ေစှ်တြဴလ္ၚီုကီု သီုသၟိၚ်ကၠံမွဲက္ဍိုၚ်ဗ္တာၚ် ကိစ္စရာဇာဝ်အိုဿီုဂှ် အဲထောံလဝ်တုဲ အဲမတိတ်ကၠုၚ်မၚ်သဳ ပ္ကီုလွဳဒုၚ်ဒၟံၚ် ဒဒိုက်ပ္ဍဲဂြိုပ်ဥဒျာန်ဝွံဂှ် ဟိုတ်ဂှ် အဲမွဲသဳလမပြဲလောန်ရ” သၟိၚ်ကောရဗျဂး။
“သီုညးပန် ဟီုထိုၚ်သးတဴ သဳလဇကုအိုတ်တုဲ၊ သၟိၚ်အိန် သၟိၚ်သ္ပဝ် သၟိၚ်နာ် သၟိၚ်ကောရဗျ ပ္ဍဲပိုဲညးပန် မဒှ်ဝါဒမ္ဒးဝွံဂှ် ညးတၠပညာမွဲမွဲ မသ္ဂောံပ္တုဲဝါဒဝွံညိရော”သၟိၚ်အိန်ဂး၊ “ဝိဓုရတၠပညာမ္ဂးဂှ် မၞုံတဴပ္ဍဲဍုၚ်အဲရ” သၟိၚ်ကောရဗျဂးတုဲ ကဵုအာနိမန်နၚ် ဝိဓုရတၠပညာရ။
ဗောဓိသတ်တြုံလၟောဝ်ကျာ် တွဳဗွိုၚ်ကေတ်ဂကောံမှာဇန်ဂမၠိုၚ်တုဲ တိတ်အာဂြိုပ်ဥဒျာန် ဇရေၚ်သၟိၚ်ပန်ဂှ်ရ၊ သၟိၚ်ပန်တံဂှ် ကဵုဂ္ညိဂ္ညာတ်လဝ်ပၞၚ်ဓဝ်တုဲ ဗောဓိသတ်တြုံလၟောဝ်ကျာ် ညံၚ်အယောၚ်အလာ တၠစရာဲကျာ်ဂမၠိုၚ်ကီု တိုန်ဒၟံၚ်လ္တူပၞၚ်ဂှ်တုဲ သၟာန်တိုန် က္တဵုဒဒှ်ဝါဒညးပန်ဂှ်ရ။
သၟိၚ်ပန်ဂှ် ဟီုကဵုဗောဓိသတ် တၠသ္ဂေဟ်ညာဏ်ရ၊ ညာဏ်ရောၚ် မူပမ္ဒးသၟာန်ဝါဒညးပန်ဂှ်ရော ယဝ်သ္ဂးမ္ဂး ပညာကဵုနွံကီုရ၊ က္တဵုဒဒှ်ဝါဒညးဟတီ ဟိုတ်ဍေံမ္ဂး ဂိုၚ်သှ်ဟွံဒးကီု၊ သေယထာပိ၊ မူတုပ်ပၟာရော၊ ဟတ္ထိအစာရိယောဝိယ၊ ညံၚ်ဂမာစိၚ်ဇၟူ ဒယှ်ကၠံၚ်သကိုပ် မဆိုက်မ္ဒက်တဴပ္ဍဲကွတ်စိၚ်ဂှ် ကဵုဒှ်ကီု၊ ဗဝ်မှောဝ်တၠဒယှ်ဂှ် ယဝ်ဟဂွံညာတ်လ္ဂာံဇၟူမ္ဂးဂှ် မဗိုက်ပးဒၞက်ဟွံဒးကီု ဂွံညာတ်လ္ဂာံဇၟူတုဲ မဂွံဗိုက်ပးဒၞက်မ္ဒးသၟဟ်ရထဂှ်ကီုရောၚ်၊ ညံၚ်သာ်ဂှ်ကီုရ ၊ ဗောဓိသတ်ညံၚ်ဇၟူတလဒယှ်ဂှ် ဝါဒသၟိၚ်ပန်မတွံဂး လ္ဂာံဇၟူဂှ် ယဝ်ဟွံညာတ် ဟွံတီတုဲ နဇကုပးဒၞက်ပညာဗိုတ်ဏာဟွံဒးရောၚ်၊ ဟိုတ်ဂှ်ရ မ္ဒးသၟာန်ဝါဒ သၟိၚ်ပန်ဂှ်ရောၚ်။
ညာဏ်ပုထုဇန်ဂှ် လဝ်ကၠာရ၊ ဒဵုသာရိပိုတ် ဒကိုပ်ပၞာန်ဓဝ် ကွးသ္တုံကျာ်ဂမၠိုၚ်ဂှ် မပတၠဨတဒဂ္ဂညာဏ် ၜိုန်ဒှ်ကီု ကျာ်ဟွံကဵုနဲသၟာန်မ္ဂးဂှ် သှ်ဟွံဒး၊ ကျာ်ကဵုနဲယျတုဲ မသှ်ဒးရောၚ်၊ ညံၚ်သာ်ဂှ်ကီုရ၊ ဗောဓိသတ် ညံၚ်သာရိပိုတ်မနွံ ဨတဒဂ္ဂညာဏ်ဂှ်ကီု၊ ဝါဒသၟိၚ်ပန် ညံၚ်နဲကျာ်ဂမျိုၚ် မကဵုသာရိပိုတ်တုဲ မဂွံသှ်သၟာန်ရောၚ်၊ ဗောဓိသတ် ဂွံတီဝါဒသၟိၚ်ပန်တုဲ မသှ်ဒးရောၚ်၊ ဟိုတ်ဂှ်ရ မ္ဒးသၟာန်ဝါဒသၟိၚ်ပန်ရောၚ်။
သၟိၚ်ပန်ဂှ် ဟီုပ္တီဗောဓိသတ်တုဲ ဗောဓိသတ် ကဵုညးခၞံဇၞောဝ်ပန်ရ၊ သၟိၚ်အိန်ဇၞောဝ်ထဝ် သၟိၚ်ကောရဗျဇၞောဝ်သြန်၊ သၟိၚ်သ္ပဝ်ဇၞောဝ်သၠာဲ၊ သၟိၚ်နာ်ဇၞောဝ်သၠုဲ ဇၞောဝ်ပန်ဂှ်တုဲ၊ တုဲကဵုပ္တိတ်လဝ်ပ္ဍဲတ္ၚဲတုဲ ဗောဓိသတ် သၟာန်ညးပန်ဂှ်ရ။
“ဇၞောဝ်တၠအဲတံဂှ် ပသာ်ဍေံမတၟေၚ်သမၞိၚ်ဇၞောဝ်တံဂှ် ပသာ်ဍေံမတၟေၚ်တုန်ရော”ဗောဓိသတ်သၟာန်။
“ယွံတၠပညာ ဇၞောဝ်ထဝ်သာ်တၞဟ် ဇၞောဝ်သြန်သာ်တၞဟ် ဇၞောဝ်သၠာ်သာ်တၞဟ် ဇၞောဝ်သၠုဲသာ်တၞဟ် သမၞိၚ်ဇၞောဝ်ပန်သာ်ဂှ်တုန် တုပ်သၟဟ်န်ဒှ်မွဲရ”သၟိၚ်ပန်ဂှ်ဂး။
“ယွံသၟိၚ်ပန်တံ ညံၚ်သာ်ဂှ်ကီုရ၊ ဂကူဇာတိတၠအဲတံဂှ် ဒှ်ပန်သာ်ကွေံရ၊ ခါမစၟတ်သဳလတၠအဲတံဂှ် မဒှ်မွဲရောၚ်၊ ညံၚ်ဇၞောဝ်ထဝ် ဇၞောဝ်သြန် ဇၞောဝ်သၠာ် ဇၞောဝ်သၠုဲဂှ်ကီုရ၊ သာ်ဇၞောဝ်ဂှ်ဒှ်တၞဟ်ကွေံရ၊ သမၞိၚ်ဇၞောဝ်ဂှ် မစဴဒှ်မွဲရောၚ်၊ ညံၚ်စက်ကွဳပန်မယိုက်လဝ်သ္ဇိုၚ်မွဲဂှ်ကီု၊ စက်ကွဳဂှ် မဒှ်ပန်ရောၚ်၊ ခါမယိုက်သ္ဇိုၚ်ဂှ် ဒှ်မွဲကီု၊ ဂကူဇာတိညးပန်ဂှ် တၞဟ်ကွေံရ၊ ခါစၟတ်သဳလမၞးတံဂှ် မဒှ်မွဲရောၚ်”။
မွဲနဲတုန် သိန္နေရုပဗ္ဗတံဝိယ၊ ညံၚ်ရဴတၟံသိန္နရာတ်မပ္ကၚ်ရၚ်လဝ် လျးပန်သာ်ဂှ်ကီု လျးသိန္နရာတ် မဒှ်ပန်သာ်ကွေံ ဇကုသိန္နရာတ်ဂှ် ရဴမဒှ်မွဲကီု ညံၚ်သာ်ဂှ်ကီုရ၊ ဇကုမၞးတံညးပန်ဂှ် ဒှ်ညံၚ်သိန္နရာတ်ပန်ဒိုဟ် သဳလညးပန်ဂှ် မဒှ်ညံၚ်ဇကုသိန္နရာတ်မွဲဂှ်ကီုရ။
မွဲသာ်တုန် ညံၚ်ဍာ်မဇွောဝ်တိတ် နူပါၚ်သတ်ပန်ဂှ်ကီု ဗၟံက်ဂှ် ဇွောဝ်တိတ်နူပါၚ်စိၚ်၊ သမၠုၚ်ကျာဂှ် ဇွောဝ်တိတ်နူပါၚ်ဥဿဘ၊ ပလိုတ်ဂှ် ဇွောဝ်တိတ်နူပါၚ်ဇာဒိသိုၚ်၊ သၟဝ်ကျာဂှ် ဇွောဝ်တိတ်နူပါၚ်ချေံ၊ ပါၚ်သတ်ပန်တံဂှ် မဒှ်ပန်ကွေံရ၊ ဍာ်ဂှ် ရဴမဒှ်မွဲကီု ညံၚ်သာ်ဂှ်ကီုရ၊ ဇကုမၞးတံညးပန်ဂှ် ဒှ်ပန်ကွေံရ၊ ဂုန်သဳလဂှ် မစဴဒှ်မွဲကီုရောၚ်၊ မြမောဝ်ပန် စၠန်အဂၠဴ သ္ၚဴဒေဝဒါ ဂကူဆုပန်ဂှ် ဒှ်ပန်ကွေံရ၊ ကာလမပ္ဍေန်ပၟတ် သၞပၞတ်ဂှ် ရဴမဒှ်မွဲကီု ညံၚ်သာ်ဂှ်ကီုရ၊ ဇကုမၞးတံညးပန်ဂှ် မဒှ်ဇာတိပန်ကွေံရ၊ သၞဓဝ်သဳလမၞးတံဂှ် မစဴဒှ်မွဲရောၚ်။
ညံၚ်သာ် ကောန်သၟိၚ်ပန် မတိတ်ဝေၚ်ဂြိုပ်တုဲ ရဴမညာတ်တၞံဗပုၚ်ဂှ်ကီု “ကာလကောန်သၟိၚ်မွဲမတိတ်ဂှ် ဂွံညာတ်ကေတ် ဗပုၚ်ပရှ်တၞးဂှ် ဗပုၚ်ဝွံ ညံၚ်ရဴဆုဖမ္ကဟ်ကီုသွံ” ကောန်သၟိၚ်ဂှ်ဂး။
ကောန်သၟိၚ်မွဲ တၞံမတိတ်ဝေပ်ပၠန်ဂှ် ဂွံညာတ်ကေတ် ဗပုၚ်ဒြိၚ် “ဗပုၚ်မ္ဂးဂှ် ညံၚ်ရဴဒြိၚ်ကီုသွံ” ကောန်သၟိၚ်ဂှ်ဂး။
ကာလကောန်သၟိၚ်မွဲ မတိတ်ညာ် ဗပုၚ်မရာၚ်တဴ “ဗပုၚ်မ္ဂးဝွံ ညံၚ်ဖျုန်ကၟဝ်ညံၚ်လဳဗာကီုရောၚ်သွံ” ကောန်သၟိၚ်ဂှ်ဂး။
ကာလကောန်သၟိၚ်မွဲ မတိတ်ပၠန်ဂှ် ဂွံညာတ်ဗပုၚ်သၟတ် သီုမသတ်တဴ “ဗပုၚ်မ္ဂးဝွံ ညံၚ်သၠဇြဲညးမကွက်တၠာဲလဝ်ကီုရောၚ်သွံ”ကောန်သၟိၚ်ဂှ်ဂး။
လညာတ်ကောန်သၟိၚ်ပန်ဂှ် မဒှ်ပန်သာ်ကွေံရ၊ တၞံဗပုၚ်ဂှ် ရဴမစဴဒှ်မွဲကီု ဇကုမၞးတံညးပန်ဂှ် ဒှ်ပန်ကွေံရ၊ သဳလမၞးမၞးတံညးပန်ဂှ် တုပ်သၟဟ်ဒှ်မွဲရ၊ ဣတိဝိသဇ္ဇနာ ၊ န်သၟာန်သွဟ်သာ်ဝွံ၊ ဝိသဇ္ဇေသိ၊ စိုန်ဗောဓိသတ် တြုံလၟောဝ်ကျာ် မသှ်ကဵုသၟိၚ်ပန် ပ္ဍဲကာလဂှ်ရောၚ်မိဂ္ဂး။
သၟိၚ်အိန်မာဃတၠသွဝ်ၜါဂှ် ဂွံမိၚ်ကေတ်သွဟ်ဗောဓိသတ်တုဲ အိုဟ်တၟိုဟ်တဴစိုတ်ဗွဲမလောန်ဂှ်ဒှ်တုဲ ယာတ်ကၞေဟ်ဒိပ်သာ်ယန် တဝှ်တဴ ကုသဵုမခၞံလဝ်ဂှ် သ္ပပူဇဴဗောဓိသတ်ရ၊ သၟိၚ်သ္ပဝ်ဖျေံက္ဍိုပ်ဇံသဝ်တုဲ ပ္ကဴထဝ်တၟာဲ မဒှ်တၟာဲ ကုသဵုကံမခၞံလဝ်ဂှ် သ္ပပူဇဴ ဗောဓိသတ်ရ၊ သၟိၚ်နာ်တုန် တၟက်ကံမဒှ်ၚုဟ်အနဂ္ဃရတ် ကသူတဲ ကုသဵုမခၞံဇိုန်ကဵုဂှ် သ္ပပူဇဴဗောဓိသတ်ရ၊ သၟိၚ်ကောရဗျတုန် ဂၠပၞတ်သဳဥဿဘလ္ၚီ ချေံသီုလျးထဝ်လ္ၚီ စိၚ်ဒြၚ်သီုလျးထဝ်လ္ၚီ ကွာန်ဇၞော်စှ်တြဴ သ္ပပူဇဴဗောဓိသတ်ရ။
သီုသၟိၚ်ပန် ပပူဇဴ ဗောဓိသတ် တြုံလၟောဝ်ကျာ်တၠပညာ သမ္ၚေဟ်ဂုန်ဂှ်တုဲ စဴအာကၟိန်ဍုၚ်ဋ္ဌာန်ဒၟံၚ်ဇကုအိုတ်ရ။
ပၞောဝ်သၟိၚ်ပန်ဂှ် သၟိၚ်အိန်မွဲ ပြဲလောန်နူသၟိၚ်ပိ၊ သၟိၚ်ကောရဗျ ပြဲလောန်နူသၟိၚ်ၜါ၊ သၟိၚ်သ္ပဝ် ပြဲလောန်နူသၟိၚ်နာ်ရ၊ လၟေၚ်ကုသဵုကံ အကုသဵုကံ မယုတ်မပြဲ မခၞံသတ္တံကွေံရ၊ တ္ၚဲအနိစ္စဓဝ် မကၠုၚ်စိုပ်သတ်ကွေံ ကာလဂှ်ရဴမစဴဒှ်ဇွမွဲကီု။
သေယထယပိ၊ မူပၟာမသတုပ်ရော၊ မတ္တိကံဝိယ−ညံၚ်ရဴတိကမၠေတ် မစိုပ်တဲလၟာန်ဂှ်ရ၊ တိကမၠေတ် မစိုပ်တဲလၟာန်တုဲ မခၞံဗဒှ်လဝ် နုၚ်ထၟာဲ နူထၟာဲညးမပညပ်ခုတ်ခဴစယၟုဍေံရ၊ ကာလနုၚ်ထၟာဲဂှ် မပါ်လီုအာကွေံ မ္ဒးစဴဒှ်ဗွဝ်တိဇမၞော်မွဲဂှ်ပၠန်ရ၊ သတ္တံဂမၠိုၚ် မပတၠခန္ဓမသုန်ဂှ် ညံၚ်တိကမၠေတ်ရ၊ ကံမစဳရေၚ်သတ်ဂှ် တုပ်သၟဟ်ညံၚ်ရဴ လၟာန်မခၞံလဝ် နုၚ်ထၟာဲမယုတ်မပြဲကွေံရ၊ တ္ၚဲရအနိစ္စဓဝ် မကၠုၚ်စိုပ်ကွေံမ္ဂး မ္ဒးစဴဒှ်ဇွသၟးမွဲရ။
ဗဟုပုပ္ဖံပထဝဳ ပတတိဝိယ၊ ညံၚ်ရဴဍောၚ်ပ္ကဴဂမၠိုၚ် ပၠးထာၚ်ပြာၚ်ဍောၚ်မောဝ်လှောဝ်ထၟာဲတဴ ဗွဲကြဴဇြလီုအာတုဲ ရဴမပြဟ်ဒတုံဒတုံစှ်ေပ္ဍဲတိသန္ဓရဳမွဲကီု သတ္တံညးဂမၠိုၚ် မတဴဒၟံၚ် ပ္ဍဲခရိုၚ်သံသာဝွံ ကာလဓဝ်ဇရာ ဗျာဓိ မာရဏ မဏာဗစိုပ်တုဲ မပြဟ်ဒတုံစှ်ေ မ္ဒးစိုပ်သုသာန်မွဲကီု သီုညးဖအိုတ်ရ။
ဗောဓိသတ် တၠကသပ်ညာဏ် မစၟိန်ပြမာန် သဳသန်မြိမြနလဝ်ပိုန်ဟာန် ပူဇဴသက္ကာသၟိၚ်ပန်တံဂှ် သွက်ဗောဓိသတ်ဟသေၚ်၊ သွက်မဂွံကဵုဒါန် ကုတမၠၚ်လအာတ် သွက်သတ္တံဂမၠိုၚ်ရောၚ်၊ သေယထာပိ၊ မူညံၚ်မသ္တုပ်ပၟာရော၊ တလာကံပရိတ္တံဝိယ၊ ရဴကၟာလစမသဳသန်ဒေပ်လဝ်ဍာ်ဂှ်ကီုရ၊ ကၟာမဒေပ်လဝ်ဍာ်ဂှ် သွက်ကၟာရသ္ဂးဟာ၊ သွက်ကၟာဟသေၚ် ဍာ်ဂှ်သွက်သတ်တၠကၟာရောၚ်၊ ဗောဓိသတ် ညံၚ်ကၟာလစဂှ်ရ၊ ပိုန်ဟာန်ညံၚ်ရဴဍာ် ပူဂဵုတမၠၚ်လအာတ်ဂှ် မဒှ်ညံၚ်ရဴသတ်တၠကၟာဂှ်ရ။
အထဝါ၊ မွဲနဲတုန်− ဗောဓိသတ် မဒေပ်လဝ်ဗွဝ်ပိုန်ဟာန်ဂှ် ညံၚ်တၞံဆု မဒေပ်လဝ်ပ္ကဴသတ်ဂှ်ရ၊ ပ္ကဴသစ္ဆုဂှ် မဒှ်သွက်တၞံဆုဂှ်ဟသေၚ် သွၚ်ထိုၚ်သာဲအဒဲါ သွက်သတ္တံဂမၠိုၚ် သွက်ဂစေံဂမၠိုၚ်ရောၚ်၊ ညံၚ်သာ်ဂှ်ကီုရ ဗောဓိသတ် မဒေပ်လဝ်ဓဝ်သဒ္ဓါ စာဂဒါနပါရမဳဂှ် သွက်ဇကုဟသေၚ် သွက်သတ္တံဂမၠိုၚ်ရောၚ်။
ဝရကိတ္တိ ဝိဓရဗဟူတော၊
ဂလဘန္တေသု တသိဓရောန သမ္မလမန္တိ။
မနိကိခတ္တိယဗြဟ္မကမ္ပိသရိ ပံသုဘူတော၊
ပူနသဂ္ဂဇစဇေ။ ။
ပသာ်အဓိပါယ် သ္ကေံဂါထာဝွံရော၊ ယြဴပူဂဵုမွဲ မပ္ကၚ်ရၚ်လဝ်ဓဝ်သဳလဂှ် သဳလမစိုန်သကီုတဴ ကေုာံ စရာဲကျာ်သြဳဟွံမေက် ဟွံဒၞောတ် ဟွံဗကဒွါန် ဟွံဒကုတ် ဟွံဒကန်စေန်ဆက်ဒၟံၚ်ညံၚ်ဒ္ၚောဝ် ထ္ၜောံသၠောံလဝ်လျးမ္ဒးသၞတ်ဂှ် ပူဂဵုတၠဓဝ်သဳလဂှ်ဝွံ ဒုၚ်ဒယှ် မပြဲရောၚ်၊ ဗရုဒယှ်တှ်ဂှ် ညံၚ်ဖံအလုံ ဗဵုညံၚ်ဂဂဵုတံသၞာံ ဗြဴလလောၚ်ကမြဴဒၟံၚ် ညံၚ်အသံဂၞဴမှာသၟိတ်ကီု၊ မပတၠပညာ မသာဓါနာံဗျာပ်အာ ဇၟာပ်ကွတ်စှ်ဒ္ဒာံသာ်၊ သုတ်ဇေန် ဇာတ်ဇေတ် မၚ်ဇေတ် မၚ်လာ ဇဂါဇေန် ဇဂါဆက်၊ ပုံကၞက်ညံၚ်ဗှ်သ္ဍဴ ညံၚ်ရဴဗ္တဳဂၞဴဂၚ်မပေၚ်က္ဍတ်ဒၟံၚ် ညံၚ်သၟန်နက်သတ်မပေၚ်က္ဍတ်ဒၟံၚ် ပ္ဍဲအကာသဂှ်ကီု ညံၚ်ရဴဂြိုပ်ဟေမဝန် မတ္ၜန်တ္ၜောဲတဴကေုာံသတ်ဆုပ္ကဴဂြိုပ်မသကိုဝ်ဇြိုပ်ပေၚ်တၟိုဟ်ဒၟံၚ်ဂှ်ကီုရ။
ပညာဝိဓုရ တၠပညာဂှ် ညံၚ်ကံဗန္ဓုလ မကလှၚ်ကၠေံကောန်သၟိၚ်လိစ္ဆာဝိမသုန်ကၠံ သီုခြပ်ပသဲတံဂှ် ခၠၚ်သာတ်အာညံၚ်သာ်ဂှ်ကီုရ၊ မပတၠပညာဇၟာပ်ပြကိုဟ်ကၞပ် ဟွံထဍိၚ်တလိၚ်ညာဏ်ဇၟာပ်သၟာန် ဟွံဒညဒေါဝ်ခမဳ ဗမၞးဟွံဒးဂွဂစိုၚ်မုက် ညံၚ်ကေသရာဇာဒိသိုၚ် မဒတဴသ္ဍိုတ်လ္ၚဵုဒၟံၚ်လ္တူတၟံမနောသိလ္လာတုဲ ရဴမဆာဲဒၟံၚ်ကီု ညံၚ်သၟိၚ်ကုသ မပတၠပညာ ဇကုမွဲမွဲစိၚ်လွိၚ်သၞာ်ရတ် ဂမ်အတ်ရမျာၚ်ကဵုပါၚ်ဇမၞးတုဲ ရဴမဗပေၚ်ပ္ကဝ်ကၠေံပၞာန် သၟိၚ်ထပှ် က္ဍိုၚ်ဗ္တာၚ်ကီု ညံၚ်သာ်ဂှ်ကီုရ၊ မပတၠပညာသြာဲဒၟံၚ် သွက်သတ်ဂှ် သှ်ပျးထ္ၜးကဵုသၟာန်ညးအိုဿီုရောၚ်၊ ကပ္ပရုပက္ခံ ဝိယသဳလခန္ဓော၊ မပတၠဓဝ်သဳလ ညံၚ်ဆုကဝ်လဗမြိုက် မဇိုန်ကဵုတသိုက်ဇန်မတ္ၜန်တ္ၜောဲတဴ ကေုာံရှ်တၞဟ်ဟ်သာ်ရဴမဒှ်ကီု၊ ညံၚ်သာ်ဂှ်ကီုရ၊ ခန္ဓသန္ထာန်မတွံဂး ကဝ်လဗမြိုက် ဓဝ်သဳလ မတွံဂး အနဂ္ဃရတ်မပြဲ ညံၚ်နဲဍောၚ်ပ္ကဴ မထီုဗးလဝ် အိန်ရဳသတ်တၠပိုန် မဇိုန်ကဵုတသိုက်လိုက် ပလိုက် မပြဲဂှ်ကီုရ၊ နူဗပါတ်ပါၚ် သဗ္ဗညုတညာဏ် ဒေသနာဓဝ်သဳလ မဗရုဲဖျေံမလၜိုဟ်ကဵုသန္ထာန်သတ္တံရောၚ်။
မနိဇောတရ ရတ္တောဝိယ၊ ညံၚ်ရဴ မၞိက်ရတ် မၞုံဗၞတ်ဒစာံတၠၚ် ဇမၠိၚ်ပန်သာံဒံၚ် လမၞၚ်လမၠးတၟာပဏိဟ်ကွဳ မဖဏဳပ္တိတ်တဴလျး မလျုၚ်ကဵုဍာ်လှိုက်မဗလးကဵုဒဒိုက် တဟၚ်သတ်တၠဝါသၞာတံအိုဿီုဂှ် ရဴဒှ်ကဵုညံၚ်သာ်ဂှ်ကီုရ၊ ပ္ဍဲကြုၚ်ခန္ဓသန္ထာန် မၞုံတဴကဵုဍာ်ကမၠိုက်ကိလေသ ဓဝ်အဝိဇ္ဇာမကၠိလၟေက်ဒၟံၚ် ပ္ဍဲသန္ထာန်သတ္တံဂှ် မၞိက်ရတ်ဓဝ်သဳလ မတွံဂး ဍာ်လစအသဝ် မဖ္ဍုန်လဝ်ပ္ဍဲသန္ထာန်သတ္တံတုဲ မဂွံလာၚ်စအးထီုဗးလဝ် ခန္ဓသန္ထာန်သတ္တံဂမၠိုၚ် ကၠာတုဲ ဗွဲကြဴမဗရုဲဖျေံဗြဲရတ် ဓမ္မဒေသနာပၠန်ရ၊ ကျာ်လဝ်စိုတ်တုဲ အပိုၚ်သဳလလက္ခန္ဓဂှ် ကျာ်တြဲမ္ဒးတွံလဝ်ကၠာရောၚ်မိဂ္ဂး ။
ကျာ်တြဲ သဗ္ဗညု ကောန်ဂၠု သၟိၚ်သိရိသုဒ္ဓေါဓန၊ တၞောဝ်ဒတောဝ်သြကာကလၟောဝ်သာကျဝၚ် သဳလက္ခန် မတုပ်တဴရဴဇၟောဝ်ဂၚ်မသုန် မတွံဂး ဂၚ်္ဂါ၊ ဇမ္မုနာ၊ အစိရဝတဳ၊ မဟဳ၊ သာရဘူဂှ် ရဴမဇွောဝ်အာကဵုမှာသၟိတ်ဇၞော်မွဲကီု ညံၚ်သာ်ဂှ်ကီုရ၊ အိုတ်ကဵုနိကာဲမသုန်တံဂှ် ရဴမဇွောဝ်အာကဵုသဳလက္ခန်မွဲကီု အိုတ်ကဵုလစဂမၠိုၚ် လစအနတတ်မွဲဂှ် မဒှ်ပဓါန်လစဂမၠိုၚ်ကီု အိုတ်ကဵုဂြိုပ်ဂမၠိုၚ် ဂြိုပ်ဟေမဝန်မွဲ ရဴမဒှ်ပဓါန်ဂြိုပ်ဂမၠိုၚ်ကီု ညံၚ်သာ်ဂှ်ကီုရ၊ ပၞောဝ်ပိဋကတ်ပိဂှ် သဳလက္ခန္ဓမွဲ မဒှ်ပဓါန်ညးရောၚ်၊ ပၞောဝ်သၟိၚ်ဂမၠိုၚ်ဂှ် နူပဋ္ဌမကဝ်တေံ သၟိၚ်မဟာသာနန္တမွဲ မဒှ်ပဓါန်ကၠာညးရောၚ်၊ ပၞောဝ်ပ္ကဴဂမၠိုၚ် ပ္ကဴဒကှ်မွဲ မဒှ်ပဓါန်ပ္ကဴကိုပ်ကၠာအိုတ်ရ၊ ပၞောဝ်သစ္ဆုဂမၠိုၚ် သတ်သြောံမွဲမဒှ်ပဓါန်သတ်ဆုကၠာရ၊ ပၞောဝ်ခန္ဓဂမၠိုၚ် သဳလက္ခန္ဓမွဲဂှ် မဒှ်ပဓါန်ကၠာရ။
သေယထာပိ၊ မူညံၚ်မသတုပ်ရော၊ ညံၚ်ပါန်ခဳ မဆိုက်ဗ္ဒက်ရ၊ ပ္ဍဲယာတ်မဂွုသ္အး မဗၠးဒုဟ် ကမိစောန်ပြံက်ဝှ်သရပ်ဖ္ဍဝ်လဝ်တုဲ၊ နဇာၚ်ၚု နဍာ်မှၚ် နမၚ်သေံ မတုပ်တဴညံၚ်ရဴကၠေၚ်ကြေက်ဂှ် မချူထၜိုန်စုတ်ရုပ် မကၟဲလှက်ကိုတ်ကီု ပါန်ခဳ ကာမဝစရကုသဵုတံဂှ် ယာတ်မတွံဂး ခန္ဓသန္ထာန် သတ်မကၠိုက်လ္ၚေၚ်ဒၟံၚ်ဂှ် နတိဝေါၚ်ဓဝ် သဳလမဖျူဖျောန်ဂဝုစအးလဝ်ကၠာတုဲ နဇာၚ်ၚု ကၠေၚ်ကြေက်မတွံဂး ပါရမဳ သဗ္ဗညုတညာဏ်ပညာ မဂၠာဲနၚ်တဝှ်ဓဝ် ဓမ္မဒေသနာ မကၟဲလှက်ကိုတ်ဂှ် မချူထၜိုန်လဝ်ရောၚ်မိဂ္ဂး။
၂။ ခဏ်ဂၞကျာ်သၟိၚ်နာ် အၚပ်စိုတ်ကတဵုဒှ်[ပလေဝ်ဒါန် | ပလေဝ်ဒါန် တမ်ကၞက်]
သၟိၚ်အိန် သၟိၚ်နာ် သၟိၚ်သ္ပဝ် သၟိၚ်ကောရဗျ သၟိၚ်ပန်တံဂှ်လေဝ်စဴအာဋ္ဌာန်ဇကုအိုတ်ရ၊ သၟိၚ်ဝရုဏ စဴစိုပ်ဂၞကျာ်ဝိမာလာဒေဝဳတုဲ ဂၞကျာ်ဟွံညာတ် မၞိက်မာလေဝ် ကၟက်ကအ်ဂှ်တုဲ သၟာန်တိုန်သၟိၚ်နာ်ဂှ်ရ။
“ယွံဂၞကျာ် ဝိဓုရတၠပညာ မဒှ်ကောန်ဗမၞးစနဂှ် ပိုဲဂွံမိၚ်တဝှ်ဓဝ် ဣတေံညံၚ်ရှ်ဗ္ကဝ်သာဲဂှ်ဒှ်ကီုဒှ်တုဲ မာလေဝ်ကၟက်ကအ်အဲဂှ် အဲသ္ပပူဇဴကၠေံ ဓဝ်ဣတေံရၝောံ၊ ယာံဆအဲမွဲ သ္ပပူဇဴဓဝ်ဣတေံဟသေၚ် သၟိၚ်အိန်သ္ပပူဇဴယာတ်ဒိပ်မပြဲ၊ သၟိၚ်သ္ပဝ်ပပူဇဴထဝ်တမၠာဲ၊ သၟိၚ်ကောရဗျသ္ပပူဇဴကွာန်ဇၞော်စှ်တြဴဂၠဴလေဝ်လ္ၚီ ကွဳသီုချေံလေဝ်လ္ၚီ စိၚ်ဒြၚ်လေတ်မွဲဟေၚ်၊ ယွံဂၞကျာ် ဝိဓရပဏ္ဍိတဂှ် ညံၚ်ရဴကျာ်ဂမျိုၚ် မက္တဵုဒှ်လၟုဟ်ကီု အလုံဂတာဇမ္ဗုဒိပ် သၟိၚ်ကၠံမွဲက္ဍိုၚ်ဗ္တာၚ် ဂွံမိၚ်ကေတ်တဝှ်ဓဝ်ဣတေံတုဲ ညံၚ်ရဴစိၚ်ဇၟူ မဂွံမိၚ်ကွိၚ်ထၞသၟိၚ်ဥဒိုန်တုဲ ရဴမကြံသလှောဝ်ဗ္ၜူအာကီု သၟိၚ်အလုံဂတာဇမ္ဗုဒိပ် ဂွံမိၚ်ကေတ်တဝှ်ဓဝ်ဣတေံတုဲ ကလေၚ်စဴဍုၚ်ဇကုဟမာန် မဒၟံၚ်တဴဇရေၚ် ဣတေံအိုတ်ရောၚ်၊ ရှ်ဓဝ်ဣတေံ မတုပ်တဴရဴ ရှ်ဗ္ကဝ်သာဲရောၚ်”သၟိၚ်နာ်ဂှ်ဂး ။
ဂၞကျာ်ဂွံမိၚ်ပရိုၚ်တကြီုတဝှ်ဓဝ်တၠပညာဂှ်တုဲ အၚပ်သၟိက်ဂွံပၚ်မှိၚ်ဗောဓိသတ်တုဲ သာ်ဝွံ ဂၞကျာ်ချပ်ရ၊ “အာက္ညနၚ် တၠပညာ အဲကလၚ်ပၚ်မှိၚ်ဓဝ်ညိမ္ဂးတုန်လေဝ် သ္ဇိုၚ်ကလိဂွံသန်သွံ၊ အဲသ္ပလွေဟ်ညးယဲတုဲ အၚပ်သၟိက်ဂွံစဖျုန်ဂြိုဟ်ဝိဓုရညိ အဲဂတုဲ အဲမဂွံမိၚ်ဓဝ်တၠပညာသၟဟ်ရထမာန်ရောၚ်” ချပ်တုဲ လုပ်အာပ္ဍဲဂၠံၚ်သ္တိက်တုဲ “အဲယဲအာ” ဂးကဵုကမၠောန်တံဂှ်တုဲ ဂလီုယာတ် တိက်သ္တၚ်ဒၟံၚ်ပ္ဍဲဒေန်ကျာ်သြဳဂှ်ရ။
သၟိၚ်နာ်တုန် ဒုၚ်အသဳကၠဳညးတုဲ ဂၠာဲရံၚ်ဂၞကျာ်ဟွံညာတ်တုဲ ဒဒှ်မယဲအာဂှ် ဗြဴကမၠောန်တံဂှ်ဂး ။
သၟိၚ်မိၚ်တုဲ လုပ်အာဇွိတ်သပေါတ်တုဲ သၟိၚ်သၟာန်ဂၞကျာ်ရ၊ “ယွံတၠသ္ၚိ အၚပ်အဲဂှ် သၟိက်ဂွံစဖျုန်ဂြိုဟ်ဝိဓုရရ၊ ဗဗွဲဓဝ်ဂှ်တုဲ အဲမယဲအာရောၚ်၊ ယာံရသ္ဂောံစဖျုန်ဂြိုဟ်ဝိဓုရဂှ် မဂွံဂျိုၚ်လမျီုရ၊ ယာံရဟွံဂွံစဖျုန်ဂြိုဟ်ဝိဓုရဂှ်မ္ဂး အဲသ္ဒးပကာဂစိုတ်ရ၊”ဂၞကျာ်ဂး ။
“ယွံဂၞကျာ် ဖျုန်ဂြိုဟ်ဝိဓုရမ္ဂးဂှ် သ္ဇိုၚ်သန်သွံ၊ ညံၚ်ပူဂဵုသၟိက်ဂွံစဂိတုတ္ၚဲကီု ညံၚ်ပူဂဵုသၟိက်ဂွံဒြၚ်ဗ္တာဲကီု ညံၚ်ပူဂဵုသၟိက်ဂွံဆဳၚုယ် သော်ကၞုဟ်ဂှ်ကီုသွံ”ဂးတုဲ သၟိၚ်နာဲ မဒးစံၚ်တူတဴ ညံၚ်ကၞုဲမအာစိုပ်ကန္တာ ညံၚ်ဗတာဲမအာစိုပ်မှာသၟိတ် ညံၚ်ကမတိုန်တဴလတူသြၚ်တုဲ ရဴမအိုတ်အာကသပ်ဂှ်ကီု ပ္ဍဲကာလဂှ် ကောန်ဗြဴသၟိၚ်နာ်မွဲ ဣရန္ဓတဳမ္ဂးယၟု သီုမကျိုၚ်ကျဝ်ဗြံက်ဗြ ကၠုၚ်သဳကၠဳ သၟိၚ်မရ၊ သၟိၚ်နာ်မဟီုတိုန်ကဵုဣရန္ဓတဳရ။
“ယွံကောန်ဗြဴ ဂၞကျာ်မစိုန်ဒှ်တဴမနော်ဂှ် အၚပ်က္တဵုဒှ်သၟိက်ဂွံစဖျုန်ဂြိုဟ် ဝိဓုရ ဗဗွဲဓဝ် ဣၚုဟ်ဂး မှုဲဗလးကဵုဒဒိုက်မိမှုဲညိ ဟဂွံဟာကောန်ဗြဴ” “ယွံကောန်ဗြဴ တၠကုသဵုရုပ် ယြဴတြုံမွဲ မၞုံကဵုဣဓိတၠအနုဘဴ မသ္ကတ်ကဵုဖျုန်ဂြိုဟ် ဝိဓုရပဏ္ဍိတ ယဝ်သ္ဂောံဗဗွဲဓဝ်ဂှ် ယဲဂၞကျာ်ဗၠးရ၊ တြုံဂှ် ဒှ်တၠသ္ၚိမိရကောန်”
ဣရန္ဓတဳ သီုကဵုမတ္ၜူမာဲတဴ နအရီုကိလေသဂှ် ဂွံမိၚ်ကေတ်ဂလာန် သၟိၚ်မဇကုတုဲ သီုကဵုမအိုဟ်တၟိုဟ်တဴစိုတ် ညံၚ်ပူဂဵုဒိုက်ဂတ် မကလိဂွံနိဓိကီုဒှ်တုဲ “သဇိုၚ်အဲရ”ဂးတုဲ ဍေံပြာပ်လုပ်အာကဵုမိဍေံရ။
ဍေံပ္တီမိဍေံတုဲ ပြာပ်စဴအာပြာသာဒ် ကျိုၚ်ကျဝ်ဂ္ညိဂ္ညာတ်ကေတ်အပေါတ်ဂ္ညိမပြဲပြဲ မပ္တံလစိန်သီုလကံက်ဒြၚ်ဗံက် လၜက်သၞေက်ထဝ် ပ္ကဴထဝ်တုဲ စရာဲရုပ် ညံၚ်ကဝ်လဗဗြိုက်မ္ဒးကၞာတ် ညံၚ်ပြာသာဒ် မ္ဒးသၞတ်အ္စာဝဍ္ဎကဳ ဗဳသ္ကဝ် မသောန်ဗဂေါဝ်လဝ်ဂှ်ကီု လျးရုပ်ပြီုရတ် လျးရတ်ပြီုရုပ် ထေက်ကြိုက်ဒၟံၚ် ညံၚ်ကၞုသ်ၚ ကဵုဍာ်တှ် ညံၚ်သွာကဵုဂိတုအသဝ် ညံၚ်သၟိၚ်မြာ်ထဝ် ကဵုက္ဍိုပ်တၟံထဝ်ကီု၊ ထေက်ကြိုက်လောန်သန် ပ္ဍဲကာလဗတံဂှ် တိတ်အာတုဲ ပ္ဍဲလစဂြိုပ်ဟေမဝန် မညန်ကဵုသြၚ်မှာသၟိတ် ပ္ဍဲတၟံကာလဂိရိ မၞုံသမၠုၚ်တြဴစှော်ယောဇနာ ဍေံအာကေတ်နၚ်ပ္ကဴ အလုံဂြိုပ်ဟေမဝန် ဒက်ဖဍာန်တၟာဲတုဲ လ္တူသၞာပ္ကဴသၠိုက်ဒၟံၚ် ညံၚ်တၞုၚ်မာဲလဴ မဒွံကျာသန်ဇျာတုဲ ရဴမလဝိၚ်ဒၟံၚ်ကီု ဣရန္ဓတဳ သီုအရီုဓဝ်ရာဂမထ္ၜူဒၟံၚ်ဂှ်ဒှ်တုဲ ဇိုၚ်တက်သ္ၚေဝ်တဲကွာဲလှ်ေ ပါၚ်ဂတေဝ်ဒယှ်ေ ရှ်ရမျာၚ်ညံၚ်ဗီုကြဝိတ်ထဝ် ပ္ဍဲပယာံသန်ဇျာသၟဝ်တ္ၚဲ ဗျံသၞေၚ် ဖျေၚ်သၟဴတုဲ ညံၚ်မဂြဴတာၚ်ဖအဝ်ဒၟံၚ် ပ္ဍဲဂြိုပ်စံပလံဂှ်ကီု၊ ကိံရါယန္တိ၊ ပသာ်ဒွက်ဒယှ်ေဍေံဂှ်ရော။
ကေဂန္ဓဗ္ဗေ ရက္ခသေန နာဂေဟိ၊
ကိံပုရိသော စမ္ဗနုသေကေ ပဏ္ဍိတေ။
သဗ္ဗကာမ ဒဒေဒိဃရရတ္တံ၊
သတ္တမေ ဘဝိဿတိ။
အဓိပါယ်မာ၊ “ယွံမၞးတံ မူရဴတၠဣဓိ တၠပညာမွဲ ကလော် ဂန္ဓဝ် ခဏှောဝ် နာဂါ မသ္ကေတ်ကဵုဂွံဖျုန်ဂြိုဟ် ဝိဓုရ ဗဗွဲဓဝ် သ္ဂောံဗလးကဵု ဂနပ်မိအဲဂှ် မဒှ်တၠသ္ၚိအဲရ၊” မိဂ္ဂးအဓိပါယ်။
ပုဏ္ဏက ကလာၚ်ကၠုၚ်လ္တူအကာသ ညာတ်ရုပ်မိၚ်ပါၚ်ဣရန္ဓထဳမဒယှ်ေဂှ် ညံၚ်ပၞာန်မဂြေန်လဝ်ကၟုယ်ရ၊ ညံၚ်ကွိၚ်ပဥ္စသိက္ခမဂြေန်လဝ် က္တောဝ်ဒေဝတဴဂမၠိုၚ်ရ၊ ညံၚ်ကွိၚ်ဥဒိုန် မဂြေန်လဝ်က္တောဝ်စိၚ်ဂမၠိုၚ်ရ၊ ပုဏ္ဏက မိၚ်ပါၚ်ရမျာၚ် ဣရန္ဓထဳတုဲ ပြာပ်ဆိုက်ညန်ကၠုၚ်တုဲ သာ်ဝွံ ပုဏ္ဏကဂး။
“ယွံဒေံဗြဴ ဖျုန်ဂြိုဟ်ဝိဓုရဂှ် ဗဗွဲဓဝ်ဂှ် အဲသကေတ်ကဵုဗွဲဓဝ်ရ၊ သဇိုၚ်အဲရ၊ ဒေံဗြဴလ္ပဂၠာဲညးသ္အာၚ်ရ၊ အဲဟေၚ်မဒှ်တၠသ္ၚိဒေံဗြဴဂှ် ဒေံဗြဴသမ္တီရ”ပုဏ္ဏကဂး ။
“ဒှ်ရသာ်ဂှ် ညံၚ်အဲကဵုတၠအဲ စှ်ေအာပ္တီမအဲကၠာရ” ဣရန္ဓထဳဂး။
ပုဏ္ဏက သၟိက်သ္ဂန်ကအ်တဲ ဣရန္ဓထဳ ဟကဵုသ္ဂန်ကအ်တဲဍေံ မူဟိုတ်ရော ဖေက်ဓဝ်ဟိရိသြတ္တပ္ပလီုအာ ဟိုတ်ဂှ်ရ ဣရန္ဓထဳ ဟကဵုသ္ဂန်ကအ်တဲရောၚ်၊ ဣရန္ဓထဳ သီုပုဏ္ဏက စှ်ေအာစိုပ်သၟိၚ်နာ်တုဲ သာ်ဝွံ ပုဏ္ဏက ဂးကဵုသၟိၚ်နာ်ရ။
“ယွံကောန်တၠ စိၚ်ကၠံ ချေံကၠံ၊ ကြက်ဒြပ်ကၠံ၊ အဲဍိက် ယိုက်အယောၚ် အမာဲရအဴ” သၟိၚ်နာ်မိၚ်တုဲ သာ်ဝွံသ္ဂးပၠန်ရ။
“ဒှ်ရသာ်ဂှ် အဲသၟာန်ဂၞကျာ်အဲညိကၠာ”ဂးတုဲ သၟိၚ်နာ်အာဟီုကဵုဂၞကျာ်ရ။
“ယွံဂၞကျာ် မၚ်ဗၠာဲမွဲ ပုဏ္ဏကဂးယၟု ဍေံမဒှ် ကၟိန်သၟိၚ်ဗဳသြဴ စိၚ်ကၠံ ချေံကၠံ၊ ကွဳကၠံ၊ ဍေံယိုက်အယောၚ်ကောန်ပိုဲတုဲ ဖျုန်ဂြိုဟ်ဝိဓုရရလေဝ် ဍေံသကေတ်ကဵုဗဗွဲဓဝ်မာန်ဂှ် စိုတ်ဂၞကျာ်မဒှ်ရော” ဗတ်ဒြပ်ဍေံဟၟြကဵုဒှ်ကီု ဖျုန်ဂြိုဟ် ဝိဓုရ ဗဗွဲဓဝ်ဍေံသကေတ်ကဵုဂွံမ္ဂး ကောန်ဗြဴပိုဲဇိုန်ကဵုဍေံရ။
မိၚ်ဂလာန်ဂၞကျာ်တုဲ သၟိၚ်နာ်ဟီုကဵု ပုဏ္ဏကရ၊ “ယွံမၚ်ဗၠာဲ ဖျုန်ဂြိုဟ် ဝိဓုရ တၠပညာ မသကေတ်ကဵုဂွံကွေံဂှ် ကောန်ဗြဴပိုဲ ဇိုန်ကဵုပဍိက်ကမၠောန်မံၚ်မ မသမ္တီရ”
“ယွံသၟိၚ်ဇၞော် ဂွံတီဝိဓုရ တၠပညာပၠန်ဂှ် သ္ဇိုၚ်သန်တဴ သၟိၚ်ဇၞော်ဟိုပ္ညုၚ်ထ္ၜးကဵုအဲသတီကဵုအဲဍိက်ညိအဴ”
“ယွံမၚ်ဗၠာဲ ပ္ဍဲဍုၚ်ဣန္ဒပတ္တနာဂဵုဂှ် အမာတ် ဝိဓုရပဏ္ဍိတဂးယၟု၊ မဒှ်အစာသၟိၚ်ကောရဗျ ညးဂှ် မဒှ်တၠပညာရ၊ သၟိၚ်ကောရဗျဂှ် လုဟ်ကဵုပးဝေၚ်ပးဂှ် ဒှ်က္ဍၚ်သန်ရ”သၟိၚ်နာ်ဂး။
ပုဏ္ဏကမိၚ်တုဲ ဍေံပဒေါံချေံသိန္ဓဴ တိုန်က္ဍိုက်ကေတ်တုဲ ကလာၚ်အာလ္တူအကာသရ၊ ပ္ဍဲကာလဂှ် သာ်ဝွံ ဍေံမချပ် “အဲသ္အာကေတ်ဖျုန်ဂြိုဟ်ဝိဓုရဝွံ တၠအဲ ကြိုက်စိုတ်ဟကြိုက်စိုတ်ဟတီ အဲသ္ဒးအာ သၟာန်ညိကၠာ”ဍေံဂးတုဲ ဍေံစဴအာကဵု သၟိၚ်ဗဳသြဴရ၊ ဍေံလေဝ်အာစိုပ်သၟိၚ်ဗဳသြဴလေဝ် ပ္တုဲဂဗုတ် ကောန်ဒေဝတဴ တသိုၚ်လွဳမာန် ဒၞာဲကောန်ဒေဝတဴ မဂွံဇၞးဂှ် ဍေံအာဂ္ဇံဒၟံၚ်တုဲ ဍေံဟီုတိုန်ကဵုတၠဍေံရ။
“ယွံသၟိၚ်ဇၞော် ဒၟံၚ်သ္ၚိသၟိၚ်နာ် ဝရုဏတေံဂှ် ဍုၚ်ဂှ်ဘောဂဝတဳဂးယၟု၊ ကၟာၚ်ဍုၚ်ဂှ် မတၟုဲတဴနထဝ်သက်က်ရောၚ်၊ ပြာသာဒ်နန်ကၠတ် အိန်ဆံၚ် တာၚ်ဆံၚ် သီုအရံၚ်လျးမၞိက်ရတ် လစေံလမေံ လစံက်ဒၟံၚ် ညံၚ်ဂြိုပ်ဟေမဝန် မတ္ၜန်တ္ၜောဲတဴ ကေုာံပ္ကဴထဝ် မဆိုက်ညန်ကဵုဝဿန္တကာလဥတု ညံၚ်ရဴလွဳမာန် တာဝတိံ ညံၚ်ဂြိုပ်နန္ဒာဝိုန်ကီု ဂၞကျာ် မပတၠစရာဲရုပ် ညံၚ်ကဝ်လဗဗြိုက် မ္ဒးကၞာတ် ညံၚ်ပြာသာဒ်မ္ဒးသၞောတ် အစာဝဍ္ဎကဳ ဗဳသ္ကဝ် မလေပ်သောန် ဗဂေါဝ်လဝ်တုဲ ရဴမဒှ် အသောဲမတ်ဇန်ဂမၠိုၚ်ကီု ဣရန္ဓထဳ မဒှ်ကောန်ဗြဴသ္ဍိုက် မပတၠစရာဲရုပ်ညံၚ်လျးဇုက်လလဳကီုမဒှ်ရ”
မူဟိုတ် ပုဏ္ဏက မဟီုထိုၚ်သး ဍုၚ်နာ်သီုဂၞကျာ်ဂှ်ရော သၟိက်ဂွံဂြေန်လဝ်စိုတ် သၟိၚ်ဗဳသြဴတုဲ မ္ဒးဟီုထိုၚ်သး ဍုၚ်နာ်သီုဂၞကျာ်ဂှ်ရောၚ်၊ ညံၚ်ဇုက်လာံထာ မဒက်ဂြေန်လဝ်ဒယိုၚ် အတှ်ဂှ်ကီု ယာံလာံထာမဒကုတ်အာဂးကီုရ၊ ဒယိုၚ်အတှ်ေအဒေါံသမိုၚ်ဒတုံစှ်ေသမြပ်ရ၊ သၟိၚ်ဗဳသြဴ ညံၚ်ရဴဒယိုၚ်အတှ်ရ၊ ဍုၚ်နာ် သီုဂၞကျာ် မတုပ်တဴ ရဴဇုက်လာံထာရ၊ ညံၚ်သၟိၚ်စက္ကဝဝ် မကလိဂွံ စက္ကရတ်ရ၊ ယာံဂွံကီု သီုရတ်ထပှ်ဂှ် ဗွဲသွာမကလိဂွံရ၊ အၚပ်ဂၞကျာ် သၟိက်ဂွံစဖျုန်ဂြိုဟ် ဝိဓုရ တၠပညာမဗဗွဲဓဝ်ဣၚုဟ်မ္ဂးရ၊ အရာညးမသ္ကေတ်ကဵုဖျုန်ဂြိုဟ်ဂှ်မ္ဂး ကောန်ဗြဴမပတၠစရာဲရုပ် ညံၚ်ကောန်ဒေဝတဴဗြဴသွဝ်တာဝတိံ သကဵုပကမၠောန်ညးဂှ် ဒဵုကဵုတွဵုအယုက်ရ၊ ဣၚုဟ်မ္ဂးဂှ် ယာံတြအဲမကြိုက်စိုတ်ဂှ် အဲသ္အာကေတ် ဖျုန်ဂြိုဟ်ဝိဓုရ တၠပညာရ၊ ယာံတၠအဲ ဟွံကြိုက်စိုတ်မ္ဂး အဲဟွံအာရဍေံဂး။
ပ္ဍဲကာလဂှ် သၟိၚ်ဗဳသြဴ မပ္တုဲဂဗုတ် ဒေဝတဴမဂွံဇၞးဂှ် “ဂဗုတ်တုဲရ ဗှ်ေသ္အာရ ဗှ်ေသ္အာရ” သၟိၚ်ဗဳသြဴဂး၊ မာတ်သၟိၚ်ဗဳသြဴမဟီုကဵုဒေဝတဴမပတုဲဂှ် မအာရမ္ဂးဂှ် ဍေံဟီုဒေဝတဴ မဒှ်ဍိက်ဇၞော်တၠဍေံဂှ်ရ၊ မၞးသမ္တီလဝ်ညိ တၠအဲဂးအာရ ဂးတုဲ ဟွံကဵုအာဂးပၠန် ဍေံဟီုတုဲ တိုန်က္ဍိုက်ချေံ ကလာၚ်အာရ။
ကာလဂှ် သာ်တွံ ပုဏ္ဏကချပ်၊ “သၟိၚ်ကောရဗျဝွံဂှ် ပိုန်ဟာန်ဒြပ်ဣတေံဂၠိုၚ်က္ဍၚ်သန် လုဟ်ကဵုပဝေၚ်ပး သန်ဒြပ် အပြောံ ယဝ်ရအဲသဏာဂှ် ဣတေံ ဟွံဝေၚ်ကဵုအဲဟတီ မၞိက်ဂကူဝိပူပဝ်မတဴ ပ္ဍဲလစှ်ေဂၞဴတၟံဂြိုပ် ဟေမဝန်တေံဂှ် အဲသ္အာကေတ်နၚ်ထ္ၜးတုဲ သၟိၚ်တေံ မ္ဒးဝေၚ်ကဵုအဲရောၚ်၊ အဲဇၞးသၟိၚ်တေံတုဲ အဲမသ္ဂောံ တၠပညာရောၚ်၊ ဍေံချပ်တုဲ ဍေံအာကေတ်မၞိက်ဂှ်ရ၊ ကုမ္ဘန်မွဲလှက်မၚ်မွဲ ဒၟံၚ်မၞိဟ်ဂှ် ယာံဍေံမၠာ်မွဲဂှ် ကုမ္ဘန်ကလာၚ်အာဒဵုစက္ကဝါရ၊ ဍေံဂိုၚ်ကေတ်မၞိက်ဂှ်တုဲ ကလာၚ်စဴဍုၚ် ဣန္ဒပတ္တနာဂဵု သၟိၚ်ကောရဗျ ဂကောံသၟိၚ်ကၠံမွဲ ဒၟံၚ်တဴပ္ဍဲဇြပ်သဘၚ်ဓဝ်ဂှ် ပုဏ္ဏကကၠုၚ်စိုပ်ဍေံဟီုတိုန်ရ။
“ညးဂှ်မသ္ဂံၚ်ဝေၚ်ပးကဵုအဲရော ညးဂှ်သၟိက်ဂွံမၞိဟ် အနဂ္ဃရတ်မပြဲရော၊ ညးဂှ်မဇၞးအဲနွံရော”ဍေံဂး၊ လဟီုဍေံဝွံဂံၚ်သ္ကာတ်လောန်သန် သၟိၚ်မိၚ်တုဲ ညံၚ်ကရာၚ်ဇမ္ကေက် မကြာၚ်ကတောဝ်ညးကီုဒှ်တုဲ သၟိၚ်သၟာန်တိုန်ဍေံရ။
“ယွံမၚ်ဗၠာဲ မူယၟုရော၊ ဍုၚ်ကွာန်မ မူဒၞာဲမတဴရော” မိၚ်သၟိၚ်သၟာန်တုဲ သာ်ဝွံဍေံဂး
“ယၟုအဲ မၚ်ဗၠာဲကစ္စာဲ ကလောအဲမတဴပ္ဍဲဍုၚ်ဗန္ဓရး ဍုၚ်ကာလစမ္ပါဂးယၟု၊ ဟိုတ်မသၟိက်ဝေၚ်ပးအဲမ္ဒးကၠုၚ်စိုပ်ဌာနဝွံရောၚ်”ဍေံဂး။
“မသၟိက်ဝေၚ်ပးမ္ဂးဂှ် မူဒြေပ်မပြဲမွဲ မၞးမနၚ်ကီုရော” “မၞိက်မနောဟရ မဇိုန်ကဵုပၟိက်စိုတ်ညးအိုဿီုဂှ်ကီု၊ ချေံကလာၚ်အဲဝွံကီု နွံအဲသလံၚ်ရ”ဍေံဂး ။
ကျာ်ဂမျိုၚ်ပၞာၚ်တိုၚ် လောကဓါတ် ဨကရာတ် သၟိၚ်ခမဳ မပတၠလျးတြဴသာ် ဂ္ညိဒၟံၚ်ကေုာံလက်သန်ဇၞော်ပိစှော်ၜါလက်သန်သၟတ်ဒစာံစှော် မက္ဍိုက်ပေၚ်တဴအသဳတိဗျန်ဒေါဟလခဏ် မရနုက်ကုၜါဂှ် သြံက်လဝ်အလာံဇမၞးတုဲ ရဴမဂ္ညိဒၟံၚ်ကီု၊ သေယျထာပိနာမ၊ မူညံၚ်မတုပ်ရော။
စန္ဒိမာရာဇာ ပုဗ္ဗဒိသံ၊ ဥဂ္ဂဟေတွာ ပစ္ဆိမဒိသံ၊ သြဟရန္တဝိယ၊ ညံၚ်ရဴသၟိၚ်ဂိတု တၠတဆိပ်ဗ္တာဲ နာဲစိၚ်ဥရာဝိုန် ဂါံတိုန်ဗွဲဒိုဟ်ဗၟံက် လောကဓါတ် သီုစမြိုၚ် လျးသာ်သြန် မၞုံစက်အဝေါန် ပန်စှော်ဒစိတ်ယောဇနာ သီုမသ္အဳဗဂါဒၟံၚ် သၟန်သၞံၚ်နက်သတ်ဂမၠိုၚ် စိုပ်အပိုၚ် ဂၠးအကာသတုဲ ရဴမဆုယ်မှတ် စဴဒိုဟ်ပလိုတ်ကီု ညံၚ်သာ်ဂှ်ကီုရ၊ အိုတ်ကဵု ပညာကျာ်ဂမျိုၚ် မှတ်စဴ ဒနဳလောဟဏခဏ်ဖ္အိုတ်ရ၊ ညံၚ်ဆုသၟာဲသၟဇွဂၞိၚ်ဂမၠိုၚ် နူကၞတ်ကြုၚ်ရဴမမှတ်စှ်ေအာတမ်ကြုၚ်ဂှ်ကီုရ၊ ညံၚ်ရဴဍာ်ကြုၚ်ဂမၠိုၚ် မပ္ၚောံစှ်ေအာမှာသၟိတ်မွဲဖ္အိုတ်ရ၊ ညံၚ်ကာလသန်ဇျာသၟဝ်တ္ၚဲ သတ္တံဂမၠိုၚ် မမှတ်စဴဌာန်ဓနဳအိုတ်ရ၊ ညံၚ်သာ်ဂှ်ကီုရ၊ အိုတ်ကဵုစတုပါတ် တၠပညာတံဂမၠိုၚ်ဂှ် မှတ်စဴဒေါဟလခဏ်အိုတ်ရမိဂ္ဂး ။
၃။ ခဏ်ထ္ၜးဂုန်ချေံကဵုဂုန်မၞိဟ်[ပလေဝ်ဒါန် | ပလေဝ်ဒါန် တမ်ကၞက်]
သာ်ဝွံ သၟိၚ်ဟီု “ယွံမၚ်ဗၠာဲကစ္စာဲ ပသာ်ဂုန်ချေံ မမၞုံဂှ်ရော၊ မစိဂလိုၚ်ဒြပ်မၞုံ သလံၚ်ကဵုအဲဝွံရော”သၟိၚ်ဂး ။
“ယွံမရာတ် လ္ၚီလှက်ကဵုနွံကီု မူသ္တုပ်ချေံအဲမွဲဝွံရော၊ မၞိက်ရတ်အဲဝွံမွဲဂှ် အိုတ်အလုံပိုန်ဟာန်မရာတ်ဂမၠိုၚ်ဂှ် မူသ္တုပ်မၞိက်ရတ်အဲဝွံမွဲရော၊ ဂုန်ချေံအဲဂှ် မရာတ်ဗဵုစံရ” ဍေံဂးတုဲ တိုန်က္ဍိုက်ကေတ်ချေံ လ္တူကၟာၚ်ဍုၚ်ဂှ် ဍေံဗ္ဒဴအရ၊ ကအ်ကဵုကအ်ချေံထပ်ဒၟံၚ် ညံၚ်ချေံမွဲလှက်ကိုတ်ကီု မဒှ် မွဲသာ်တုန် မာဲသုတ်ဗ္ကေတ်ဒက်ဂၞဴ ဗ္ဒဴပ္ဍဲကၟာၚ်ဍုၚ် ညံၚ်အလာဝက စက်ပၟိက်ပၟတ် ညးဒတုဲဗ္တံကီု ဇကုမၞိဟ်ကဵုချေံ ညးဟွံညာတ် ဆမာဲသုတ် မဗကေတ်ဒၟံၚ်ဂှ်ညးမညာတ်ရ။
မွဲသာ်တုန် ဆၚ်စှ်ေနူချေံတုဲ ခါဍေံဍေံဗက်ဏာပ္ဍဲကၟာဒကှ်ဂှ် လိုန်သၠဒကှ်ဂှ်ရ၊ လိုန်သၠဒကှ်ဂှ်ဟွံစာ် ဇိုၚ်ချေံဟွံစှ်ေဍာ် ကော်နၚ်ချေံဂှ်တုဲ ဍေံပၠးဂတာတဲချေံဂှ် စၠာဲတိုန်သီုဇိုၚ်ပန် လ္တူဂတာတဲတုန်ဒတူစူဒၟံၚ်ရ၊ ဗက်ချေံပ္ဍဲဍာ်ချေံဂှ် ကွာ်စၚ်ကြံ ကၠုၚ်အာဇိုၚ်ညိဟွံတဍေက် ညံၚ်ဍာ်လလ္တူသၠကြဴမတဆေဝ်အာကီု ဆဂှ်ဟသေၚ်တုန်၊ ဂုန်ချေံၜါစှော်ပန်သာ် နွံတဴဏီ အဲဗဗဵုမရာတ်ဟွံမာန်ရ၊ အဲဟီုမရာတ်ကလၚ်ပၚ်မှိၚ်ရ၊ မက္ခဓါန− ဟွံဂွံရုန်ကၟဝ်၊ ပုဂ္ဂဝါန−ဟဂွံဒဴဂဟး၊ ဝေက−မိၚ်အသံညး ဟဂွံလကိုတ်စိုတ်၊ မဏ္ဍလံ−ခံဇကုညးမတဴ လတူစး မကဵုစှ်ေကေတ်လွဟ် ဟကဵုဒတုံ၊ ရာဇဝဿံ− ဗ္တဟကဵုဒွံတိ၊ ပေါကောသံ−လုပ်အာပ္ဍဲပၞာန်ညးဟွံညာတ် ကၟာတ်ညံၚ်ဂစေံပဝ် ဂၠာဲလၟာ်ဇိုၚ်ဟွံဒး၊ ဇဝန−လအာပြဟ် ညံၚ်ဇဝန ပါကဟၚ် မပဝ်ပြိုၚ်ကဵုသၟိၚ်တ္ၚဲ၊ ရာဇာကုဏ္ဍ−တၠဒးလွဟ်ဒဴဒဵုဗၠး၊ ရာဇာဝံသ−ကၠောံဍာ်ဗ္တဟကဵုတဍေက်၊ ဥတ္တမဝေတိယျ−တၠက္ဍိုက်ချေံ စၞပြဲဟဂွံဒုၚ်စ၊ ဥတ္တမဇေယျ−ဗဒဴရေတ်လ္တူကၟာၚ်ဍုၚ် ညံၚ်ချေံမွဲလှက်ကိုတ်၊ ပါဒ−ဇိုန်လိုန်သၠသကှ်ဟွံစာ်၊ ဝါဏိ−စၠာဲတိုန်လ္တူဂတာတဲဒၟံၚ် စူတဴသာ်ဝွံ ဂုန်ချေံအဲရ။
“ဂုန်မၞိက်အဲတုန် ထဝ်ရုပ်ဒၚောဝ် သၟိက်ညာတ်ရုပ်တြုံ သီုရုပ်ဗြဴ ကျိုၚ်ဟာန်ဒၟံၚ် ဆဂှ်ဟသေၚ်တုန် ဒၚောဝ်မၞိက်ညာတ်ရုပ်ခဏှောဝ် ညာတ်ရုပ်သပဝ် သီုကဵုလွဳမာန် ဍေံတံ မရာတ်ဗဵုရ၊ ပၞာန်စိၚ် ပၞာန်ချေံ ပၞာန်တိုက် ပၞာန်ကွဳ တေတေံ ပၞာန်ပန်ကၞိပ် မရာတ်ဗဵုရ”။
“တေံဍုၚ်ဇၞော်စှ်တြဴ သီုထ္ၜိုၚ်ကၟာၚ်မြုပြလက်ရာန်သၠတြၚ် ဣန္ဒနဳလာ သ္ၚိဇွာကပလောကရ၊ လ္တူကၟာန်ဍုၚ်စေံနက်ဒၟံၚ်ဂှ် မရာတ်ဗဵုရ”။
“ဂစေံကၟဲပြကာ မဗြုတမှိၚ်တမှဴဒၟံၚ် ညံကွဳၚ်သဒ္ဒါရီု ဒြီုဒြီုသြဳသြဳ ပ္ဍဲဒေါဝ်ဍုၚ်ဂှ် မရာတ်ဗဵုရ”။
“ဍုၚ်တံဂှ် မတ္ၜန်တ္ၜောဲတဴ ကေုာံသ္ၚိနန်ပြာသာဒ်ရတ် ကၠတ်ဇၞာၚ်သဗာန်သွတ် ကောန်ၚာ်သၟဝ် ဂမၠိုၚ်မဝေၚ်ဂြိုၚ်တဴ ပ္ဍဲဗ္တဳထဝ်သြန်ဂှ် မရာတ်ဗဵုရ”။
“ဗျာဇၞော်ဗျာဍောတ် မပေၚ်တဴ နအပေါတ်ဗၞိက်မဂၠိုၚ်ကဵုသာ်ဂှ် မရာတ်ဗဵုရ”။
“တၠကွတ်လ္ၚတ် ပါၚ်မုက် ပါန်ခဳ ဗဳသ္ကဝ် ဓဇဲ ချူပေါတ် ဗုတ်သောန် ပ္ကီုတဴကလောန် ပ္ဍဲဍုၚ်ဇၞော်တေံဂှ် မရာတ်ဗဵုရ”။
“သ္ဘၚ်ဇၞော် အလှ်ေဒယှ်ေသွိၚ် ကွိၚ်ကွိုက် စံၚ်ဒြဝ်တၠောတ်လေံ ၚာဲသဓရဲဗသာ သီုဗါတ်စၞာံဗါတ်ကေဲ ဗါတ်သၠာ် ဂၠိုၚ်ကဵုသာ် ဖံမံၚ်ဗြုအဓဵု ဖံသိၚ်္ဃိုရ် ဖံအလုံဖဵု ဖံစိၚ် ဖံဖဝ်ဟဝ် ဖံဇတိုၚ် မန်ဒိုၚ်ပုက်တလုက် မုက်ပန် ဗြုဇရန်ဇရာတဴဂှ် မရာတ်ဗဵုရ”။
“ပေါဲလက်ပၠုဲလေံလက်ဗန် ဂဒံၚ်ဂဒါၚ်ဝိုၚ်စက်ဇုက်စၞာံကဆိၚ် လၟေၚ်ဍေံတံ မဝေၚ်တဴဂှ် မရာတ်ဗဵုရ”။
“ဂြိုပ်ဇၞော်ဟေမဝန် မတ္ၜန်တ္ၜောဲတဴ ကေုာံသတ်ဇိုၚ်ၜါ သတ်ဇိုၚ်ပန် တ်တၠသၞေၚ် ဖျေၚ်စၟဴ ဂြဴလဒက်သ္အဝ်ဒၟံၚ်အကြာဇီု သီုကဵုဆောသဝှက် လဳ တ္ၜန်ဗၟက် ပလှ်ေတဴဂှ် မရာတ်ဗဵုရ”။
“ကြုၚ်ဇၞော်သၟတ်အိုဿီု သြီုသြီု မဇွောဝ်စှ်ေအာဍာ်လ္ပဟ်ဒးကျာ ဂတာဇီု ကကၞု ကလၞန် ကြၚ် ကလဗၚ် ဂကူကဂၠိုၚ်သာ် သီုကဵုစုံပွါ မၜိၚ်သာၚ်သောဝ်မှောဝ်ဇာ လမေံလမန် မတ္ၜန်တ္ၜောဲတဴဂှ် မရာတ်ဗဵုရ”။
“တ္ကံပန် ၜဳမှာသၟိတ်ထပှ် စက်ဂိတုစက်တ္ၚဲ မကွာ်ဂၠောဲအာလၟေၚ်ဝိထ္ထဳ မဖနဳပ္တိတ်လျး မလှန်ပျးကဵုတ္ကံပန်အသၟဝ်ဂှ် မဒှ်ဍုၚ်အသူ မရာတ်ဗဵုရ”။
“ကၟိန်ဍုၚ်သွဝ် မဂ္ညိဒၟံၚ်သီုလျးရတ်ဒစိတ်ပြကာ ပြာသာဒ်ဝေဒယန္တဝ် မဂ္ညိတဴသီုပတ်ဇြးတရၚ်ဒၟံၚ် ဖံလုံ ဖံဖ္ဍာန် တရိုန်တာန်ဆာ အဆဝ်ဗလှ် ပုံဇဝ်တဝ်သၠ ထ္ၜခေဏာန် ကဏဂစှ်ေသ္ဂေဟ်ကၟက်ရာဲပတ်ဒၟ ဇတာ်ၝောံၜိုတ်လယတ်သွိၚ်ဒၟံၚ် ပြာသာဒ် ဇၞော်သၠုၚ်ကၠံယောဇနာ ပြာသာဒ်သၟတ် မွဲလှက် ဂၞကျာ်ပန် ကမၠောန်မွဲကိုတ် မဂ္ညိဒၟံၚ်သီုလျးရုပ် လျးရတ် မကျိုၚ်ဗ္ၜူကၠေံစိုတ်ညးဂှ် မရာတ်ဗဵုရ”။
“တဝ်စရှ်ဂြိုပ်ပန်မတွံဂး နန္ဒာဝိုန်၊ စိတ္တလတာဝိုန်၊ ပရုဿတာဝိုန်၊ မိဿတာဝိုန်ဂှ် ဆုမၞုံကဵုဂကူ တၞ မတၞဟ်ဟ် မသၟဟ်န် ဗျိၚ်ဒရိၚ်ဒၟံၚ် ရိုဟ်ကဵုရိုဟ် ကၞာၚ်ကဵုကၞာၚ် သၠကဵုသၠ ကၟဝ်ကဵုကၟဝ် တၞုၚ်ဇောဝ်ပ္ကဴလဝ် လစေံ လမန် မတ္ၜန်တ္ၜောဲတဴတေံဂှ် မရာတ်ဗဵုရ”။
“လျးမၞိက်အဲ ဗဗဵုမရာတ်တုန် လျးကမုစှ်သာ်၊လျးသာ်သၠုဲစှ်သာ်၊ လျးဇုက်မိတ်စှ်ပန်သာ်၊ လျးသာ်ထဝ်စှ်သာ်၊ လျးသြန်စှ်သာ်၊ လျးဒမျိုၚ်တြဴသာ်၊ လျးဥပ္ပဵုလမ်စံက်တြဴသာ်၊ လျးမၞိက်အဲသာ်ဝွံ မရာတ်ဗဵုရ”။
( ဂါထာအထိုၚ်သးမၞိက်တုန်)
မနိယသဝရံ ဇောတိဝန္နံ ဓနဟာရံ၊
မနိသြလာရံ ဒဠာဟဏံ ယသဿိဏံ၊
ပဘာသတိ ဝိဓူဝမန္တလိက္ခေ ။
ယသဝရံ၊ ဍေံမစၚ်ဗၜၚ်တဴ၊ ဇောတိဝန္နံ၊ ဍေံမၞုံတဴကဵုလျး၊ ဓနဟာရံ−ဍေံမရၚ်တၠုၚ်ကဵုဒြပ်အိုဿီု၊ မနိ၊ၚ်မၞိက်ရတ်ဂှ်၊ သြလာရံ−ဍေံမပြဲလောန်၊ ဒဠမာနံ− ဍေံမဂဵုတဴနလျး၊ ယသဿိနံ−ဍေံမၞုံတဴကုတွဳဝါရမဂၠိုၚ် မနိ၊ၚ်မၞိက်ဂှ်၊ အန္တလိက္ခေ−ပ္ဍဲအမှဲအကာသ၊ ဝိဇူဣဝ−ညံၚ်ရဴဇုက်လလဳကီု၊ ပဘာသတိ−ပ္ဍံဍေံပျးတဴရ။
ကျာ်တြဲနာဲညးလောကဓါတ် ဨကရာတ် သၟိၚ်ခမဳမစိုန်ဒှ်တဴ ကလောသၟိၚ်တ္ၚဲ မပ္ကၚ်ရၚ်လဝ်ပရိယတ္တိပိ၊ မနိခဏ္ဍ၊ မရနုက်ကုပိ ညံၚ်ပါဒလက်သန် မလိုန်ဂလက်လဝ်တဆိပ်ဂၠးဂတာဇိုၚ် ပ္ဍဲတၟံဗိုတ်တမြံၚ်ကီု မဒှ်ရ။
၄။ ခဏ်ဝေၚ်ပး[ပလေဝ်ဒါန် | ပလေဝ်ဒါန် တမ်ကၞက်]
“ယွံမရာတ် မၞိက်အဲထ္ၜးဗဗဵုကုမရာတ်အိုတ်တုဲရ၊ အဲသဝေၚ်ကဵုမရာတ်မ္ဂး မၞိက်ဝွံ အဲသလံၚ်ရ၊ မူဒြပ်မရာတ်မတုပ်ကဵုဒြပ်အဲ၊ မရာတ်ဂွံလံၚ်ကဵုအဲဂှ်ရော”။
“ယွံမၚ်ဗၠာဲကစ္စာဲ အ္စာအဲ ဇကုအဲ ဂၞကျာ်အဲ က္ဍိုၚ်ဗ္တာၚ်အဲ ဆဂွံ အဲဟွံလံၚ်ကုမရ၊ အလုံပိုန်ဟာန်အဲ မသ္အာၚ်နူဂှ် အဲသလံၚ်ကဵုမဖအိုတ်ရ”။
ဂွံရဍေံဂးတုဲ သၟိၚ်ကဵုတိတ်လးသၞာဂ္ဇံတုဲ သီုကောန်သၟိၚ်ကၠံမွဲက္ဍိုၚ်ဗ္တာၚ် သီုပုဏ္ဏက မဂ္ဇံဒၟံၚ်လၟေၚ်တုဲ မဝေၚ်တဴရ၊ လ္တူဂတဵုပး သြန်မၞုံလမၠး ၜါစှော်ပန်ဂှ် ပတိကေန်လက်ပေတ် မၞုံဗၞတ်စှ်လ္ပုဟ် ဇမၠိၚ်ဒစာံလ္ပုဟ် ပန်ကလၚ်ဂှ် ဒှ်စှ်ဒစာံလ္ပုဟ်ရ၊ သာံယျေ မသုန်စွံလဝ်တုဲ ပုဏ္ဏကဟီုတိုန်ရ။
“ယွံမရာတ် အဲဝေၚ်ကဵုမရာတ် လ္ပကယာန်ထောံညိ”။
“ယွံၝ−ၝရုဲကၠာဟာ ၊ ကဵုအဲရုဲသတ်ပးကၠာဟာ”
“မရာတ်မကေၚ်ဝေၚ်ဂှ် မရာတ်တီစိုတ်ဍေံ မရာတ်ရုဲကၠာရ”ဍေံဂး၊ သၟိၚ်တဴသေံၜါ ဍေံသေံၜါရ၊ ရုဲတုဲ သၟိၚ်ဂး၊ “ၝထောံကၠာရ” “မရာတ်တၠပိုန်ထောံကၠာ”ဍေံဂး ။
သၟိၚ်ဝေၚ်ပးပယတ်တေံ မဂွံဇၞးဂှ် သာ်ဝွံ သၟိၚ်ပတ္တနာရ၊ “ယွံဒေဝတဴ ဒဒှ်ပၟၚ်က္ဍိုၚ်ဗ္တာၚ် လေပ်အဲမှာရာအာဂှ် ဒဂူသၞေဝ်အဲညိ ကဵုအဲဂွံဇၞးမပြဲညိ” သာ်ဝွံ သၟိၚ်မရာဒနာတုဲ သၟိၚ်ထောံပ္တိုန်ရ၊ ခါမဒတိုန်ဂှ် သေံကာလမဒတုံ ဍေံပရံကၠေံဒှ်အာသာံ သၟိၚ်ညာတ်သၟိၚ်ခံကေတ်မွဲဝါ သၟိၚ်ထောံပ္တိုန် ဒှ်အာသာံ သၟိၚ်ခံကေတ်ကီု ပုဏ္ဏကညာတ်တုဲ ဍေံချပ်၊ “ကလောမဖှ်ညံၚ်အဲဝွံ သၟိၚ်ဝေၚ်ပကဵုအဲဝွံ ခံကၠေံသတ်ပးဗွဲပရဟ်ဝွံဂှ် သိက်ဒှ်ရော ဟိုတ်နွံမွဲမွဲရ” ဍေံဂးတုဲ၊ ဍေံမၠာဲမွဲဗွဲလ္တူညာတ်ဒေဝတဴ ပၟၚ်က္ဍိုၚ်ဗ္တာၚ်ရ၊ ဒေဝတဴညာတ်ဍေံဖေက်ဒဇပ်ဇတဝ်တဴတုဲ ကလာၚ်အာဒဵုဇိုၚ်စက္ကဝါရ။
ဍေံတီဒေဝတဴ စ္ဍးအာတုဲ ဍေံအဓိဌာန် “ဇၟာပ်ကြုၚ် မၞုံတဴကဵုတ္ၚံက်ဖအိုတ်ရ၊ ဇၟာပ်ဂြိုပ် မၞုံတဴကဵုဇမ္ကဟ်ဖအိုတ်ရ၊ ဇၟာပ်မာတုဂါံ စိုပ်ဋ္ဌာန်လ္ၚုတုဲ ဍေံပတုဲ သရာံပါပ်ဖအိုတ်ရ၊ လဟီုအဲဝွံ ယာံဒှ်စၟတ်မ္ဂး ကဵုအဲဂွံဇၞးသၟိၚ်ဝွံညိ၊”သာ်ဝွံ ဍေံမတွံစၟတ်တုဲ ဍေံဝေၚ်ရ၊ သၟိၚ်မဂွံခံပြဟ်ဂှ် ဟိုတ်နူဒေဝတဴ ပၟၚ်က္ဍိုၚ်ဗ္တာၚ်မရီုရောၚ်၊ ဒေဝတဴဟွံမွဲတုဲ တြဴဝွံ ထောံပ္တိုန်သၟိၚ်ခံဟွံဂတာပ် ဒတုံစှ်ေအာဒှ်သာံၜါရ၊ တုဲ သၟိၚ်ကျအာပုဏ္ဏကရ။
“ဇိတံမေ−ဇိတံမေ၊ အဲဇၞး−အဲဇၞး ”ဍေံဂးတုဲ၊ ဍေံတက်ကၞက်တုဲ ဍေံကြီုတဴရ၊ အလုံဂတာဖမ္ဗုဒိပ်ဖအိုတ်ရ၊ သၟိၚ်ကျအာတုဲ သၟိၚ်စံၚ်တူ ဒေၚ်ဗျောံတဴရ၊ ပုဏ္ဏက ညာတ်သၟိၚ်မစံၚ်တူဂှ်တုဲ သာ်ဝွံဍေံဟီု၊ “မရာတ်လ္ပစံၚ်တူရ၊ သဘဴညးမဝေၚ်မ္ဂးဂှ် မလေပ်ကျဇၞးဖအိုတ်ရ၊ လၟေၚ်ဒၟံၚ်မလံၚ်လဝ်ဂှ် မရာတ်ကဵုရ”။
“ယွံမၚ်ဗၠာဲ စိၚ် ချေံ ဂၠဴဥဿမပြဲ ထဝ်သြန်သၞေက်မၞိက်ဒြပ်ရတ်မပြဲပြဲတံဂှ် ဒၞာဲမကြိုက်စိုတ်ဒးဂၞပ်ဂှ် မၚ်ဗၠာဲကေတ်ဏာရ” မူဟိုတ်သၟိၚ်မကဵုအခေါၚ်ကဵုဍေံပြဟ်ရော ဍေံဇကုမွဲကီု ဒြပ်သၟိၚ်ဖအိုတ်ဂှ် ဍေံကေတ်ဏာမာန်ဟာ၊ ဂၠဴဥဿဘချေံတံဂှ် ဆဗၞတ်မွဲၜါဍေံမကေတ်ဏာမာန်ရ၊ သာ်ဝွံသၟိၚ်ချပ်တုဲ မကဵုအခေါၚ်ကဵုဍေံပြဟ်ရောၚ်၊ သွဟ်သာ်ဝွံ ဂပ်ဝ်သမ္တီ။
“ယွံမရာတ် ဒြပ်သဲမလံၚ်ကဵုမရာတ်ဂှ် ဒှ်ဒြပ်မပြဲလောန်ရောၚ်၊ စိၚ်ချေံပိုန်ဟာန်မရာတ်မကဵုအဲဂှ် ဟွံမိက်ကေတ်ရ၊ ဝိဓုရ တၠပညာ မတွံဂး ဒြပ်ရတ်မရာတ်မပြဲဂှ် ကဵုကုအဲရ”။
“ယွံမၚ်ဗၠာဲ တၠပညာ မကဵုမပဒြပ် မဝေၚ်ပးမ္ဂးဂှ် ကြိုက်ကဵုလဟီုသသေၚ်သွံ၊ အစာအဲ ဇကုအဲ ဂၞကျာ်အဲ က္ဍိုၚ်ဗ္တာၚ်အဲပန်သာ်ဝွံ အဲဟွံလံၚ်ကဵုမ အဲမဟီုလဝ်ဟသေၚ်ဟာ၊ တၠပညာမပြဲနူအဲတုန် အယသၟိက်ကဵုကုမၞုံကီုဟာ၊ ရတ်စက္ကဝါထပှ်ပြကာလေဝ် ဟတုပ်ကဵုတၠပညာဏီ ညးမ္ဂးရတ်ထပှ်ပြကာဂှ်ရော၊ စက္ကရတ် မၞိက်ရတ် ဗြဴရတ် စိၚ်ရတ် ချေံရတ် ဂဟပ္ပတိရတ် ပရိနာယကရတ် ဣဝွံ ရတ်ထပှ်ပြာကာရ”။
“တၠပညာမပြဲလောန် နူစက္ကရတ်မ္ဂးဂှ် ပသာ်ရော၊ သၟိၚ်စက္ကဝဝ် ယာံအဒေါဝ်မှာသၟိတ်မ္ဂး ဍာ်ဖါဲအာဖအိုတ် ရတ်ဒစိတ်သာ် မ္ဒးကွာဲသၟိၚ်စက္ကဝဝ် ပသဗာန်ရတ်ရ၊ ဂှ်ရတ်မလကဝ်ဂှ် စက္ကရတ် မကွာဲသၟိၚ်စက္ကဝဝ်ဒှ်ရ၊ ရတ်လောကုတ္တဵုတုန် ကိစ္စစက္ကရတ် မကွာဲကဵုဒှ်ဂှ် ဟွံသၟဟ်ရထ ဟွံမွဲသက်က်ရ၊ တၠပညာသာ်ဂှ် ဟသေၚ်ယြဴပူဂဵုမွဲ ကွာ်ဗက်ဒ္ဂေတ်တၠပညာမ္ဂး ပ္ဍဲမှာသၟိတ်သံၚ်သာ ကဵုဒ္ဂေတ်အာတဴကီုရ၊ ရတ်လောကဳ လောကုတ္တဵု တၠပညာ ဇိုန်ကဵုမာန်ရောၚ်ဟသေၚ်ဟာ၊ ဟိုတ်ဂှ်ရ တၠပညမပြဲနူစက္ကရတ် အဲမ္ဒးဂးရောၚ်”။
“တၠပညာ မပြဲနူမၞိက်ရတ်မ္ဂးဂှ် ပသၟးရော၊ သၟိၚ်စက္ကဝဝ် ကွာ်အာတြဴမ္ဂး စိၚ်ချေံ ဗဵုလဗး သၟိၚ်စက္ကဝဝ်ဂၠိုၚ်သန် ယာံအာပ္ဍဲဍာ် ဍာ်ကၠိကၠိုက်အာ မပဂွံသုၚ်ဍာ်ညိရောဂးတုဲ မၞိက်ရတ်ဂှ် ဖျေံတလိုပ်လဝ်ပ္ဍဲဍာ်မ္ဂး နကြဳဇှ်မၞိက်ဂှ်တုဲ ဍေံကၠိကၠိုက်ဒၟံၚ်ရ၊ မ္ဒးသ္ဇုၚ်ကေဝ်အာတုဲ သီုဗဵုဂမၠိုၚ် ဂွံသုၚ်ဂွံဟုံဗၠးတဟၚ်အိုတ်ရ၊ ဂှ်ဂုန်မၞိက်ဂှ် သ္ဍိုက်မကၠိကၠိုက် သာမညဂှ် မလလျုၚ်ကဵုဒှ်ရောၚ်၊ သန္ထာန်သတ္တံဂမၠိုၚ် မကၠိုက်လ္ၚေၚ်ဒၟံၚ် နဓဝ်သရာံပါပ်ဂှ် သကဵုမၞိက်ရတ်ဂှ် လျုၚ်စအးကဵုမ္ဂး မၞိက်ရတ်ဂှ် လျုၚ်စအးကဵုဟွံမာန်ဟေၚ် တၠပညာသာ်ဂှ် ဟသေၚ်တုန် သန္ထာန်သတ္တံဂမၠိုၚ် မကၠိုက်လ္ၚေၚ်ဒၟံၚ်နဓဝ်သရာံပါပ် ဟိုတ်နူအဝိဇ္ဇာဂှ် မလျုၚ်ကဵုဒှ် သၟဟ်ရထဟေၚ် ဟိုတ်ဂှ်ရ တၠပညာ မပြဲနူမၞိက်ရတ်အဲမ္ဒးဂးရောၚ်၊ ဣဝွံတုန် ဂုန်တၠပညာ မပြဲနူမၞိက်ရတ်ရ”။
“ပသာ်ဂုန်စိၚ်ရတ် ချေံရတ်တံဂှ်ပၠန်တုန်ရော၊ ယြဴဋ္ဌာန်မွဲ သၟိၚ်စက္ကဝဝ် သၟိက်အာမ္ဂး က္ဍိုက်ကေတ်စိၚ်ရတ် ချေံရတ်တုဲ ကလာၚ်အာ မှာသၟိတ်တ္ကံပန် တိုန်အာဒဵုစတုမရာတ်ပန် ဆဂှ် စိၚ်ရတ် ချေံရတ် မဏာဗစိုပ်ကဵုမာန်ရ၊ ဂတနူဂှ် ဏာဗစိုပ်ကဵုဟမာန် ကြဳဇှ်စက္ကဝဝ်နွံတုဲ မဂွံအာမာန်ရောၚ်၊ တၠပညာသာ်ဂှ်ဟသေၚ်တုန် ယြဴပူဂဵုမွဲ နိဿဲကဵုတၠပညာတုဲ ဂွံဂိုၚ်ကေတ်လၟေတ်ုလောံဗ္တောံ တၠပညာမ္ဂး သွဝ်တြဴဘုံ ဗြီုစှ်တြဴဋ္ဌာန် ဒဵုကဵုနိဗ္ဗာန် ကၞတ်တသိုက် မဏာဗစိုပ်ကဵုမဂွံအာစိုပ်ရောၚ်၊ ဟိုတ်ဂှ်ရ တၠပညာမပြဲနူစိၚ်ရတ် ချေံရတ်ဂှ် အဲမ္ဒးဂးရောၚ်”။
“တၠပညာ မပြဲနူဗြဴရတ်မ္ဂးဂှ် မသၟးရော၊ ကာလဥတုလၟုဟ်ဂှ် ဗြဴရတ်သဂီုကဵုညးဒှ်ရ၊ ကာလဥတုဂမ္တဴဂှ် ဗြဴရတ်လၜိုဟ်ကဵုညးဒှ် ဆဝွံဂှ် မဒှ်ဂုန်ဗြဴရတ်ရ၊ လၟုဟ်လောကန္တနရက်ဂှ် ပြာပ်အာဇရေၚ် ဗြဴရတ်ဂှ်တုဲ ဗြဴရတ်ဂှ်သဂှ်ကဵုဟမာန်ကီု ဂမ္တဴပၟတ်ဂှ်လေဝ် ဗြဴရတ်လၜိုဟ်ကဵုဟမာန်ကီု တၠပညာဂှ် ဟသေၚ်တုန် ပူဂဵုသမၠီု တၠသရာံပါပ် မပြာပ်အာဇရေၚ်တၠပညာမ္ဂး လၟုဟ်လောကုတ္တဵုလၜိုဟ်ကဵုဒှ်နူဓဝ်မေတ္တာ ကရုဏာ မစှ်ေအာပ္ဍဲသန္ထာန်သတ္တံဂှ် ဂမ္တဴပၟတ်နရက် မ္ဒးတၜိုဟ်အာရေၚ်မိဂ္ဂး၊ ဟိုတ်ဂှ်ရ တၠပညာ မပြဲနူဗြဴရတ် အဲမ္ဒးဂးရောၚ်”။
“ပသာ်တၠပညာမပြဲ နူဂဟပ္ပတိရတ်ဂှ်တုန်ရော၊ ယာံဂဟပ္ပတိရတ် မသၟိက်ဂွံရတ်ဂှ် ဒၞာဲမလွိၚ်ဏာတဲဂှ် ရတ်မ္ဒးဂတဝ်တိုန်ရ၊ ဂှ်ပိုန်ဟာန် ဂဟပ္ပတိရတ်ဂှ် ဆမွဲဘဝဂှ်ကီု မဇိုန်ကဵုဒှ်ရောၚ်၊ ဘဝဂတဇိုန်ကဵုဟဒှ်၊ တၠပညာသာ်ဂှ်ဟသေၚ်တုဲ ဒ္ဂေတ်တၠပညာ ယဝ်ရဂွံဒ္ဂေတ်ဗက်မ္ဂး ဒဵုကဵုစိုပ်နိဗ္ဗာန်တသိုက်ပိုန်ဟာန်တံဂှ် မဟဂွံဟုတ်အာသက်က်ဟေၚ်၊ ဟိုတ်ဂှ်ရ တၠပညာ မပြဲလောန်နူဂဟပ္ပတိရတ် အဲမ္ဒးဂးရောၚ်”။
တၠပညာ မပြဲနူပရိနာယကရတ်မ္ဂးဂှ် မသၟးရော၊ ပရိနာယကရတ်ဂှ် လၟေၚ်ပၞာန်ပန်ကၞိပ် ပၞာန်စိၚ် ချေံ တိုက် ကွဳ ညးဂၟံၚ်သ္ဇၚ်ဝေၚ်သ္တုံဇွိဂတကြဴ ဝုတ်ဒိုဟ်စက္ကဝဝ် အပ္ဍဲမ္ၚးသတြုစက္ကဝဝ် မဗက်ဗ္ဒဴကၠေံအိုတ် ဆဝွံ မဒှ်ဂုန်ပရိနာယကရတ်ရ၊ ဒုဟ်သရာံပါပ်မတဴပ္ဍဲသန္ထာန်စက္ကဝဝ် အပါဲပန်မတွံဂး သတြုစက္ကဝဝ်ဂှ် ပရိနာယကရတ်ဂှ် ဗက်ဗ္ဒဴစ္ဍးကၠေံဟွံမာန်ဟေၚ် တၠပညာသာ်ဂှ်ဟသေၚ်တုန်၊ ညးမနိဿဲကဵုတၠပညာမ္ဂး အပါဲပန် မတွံဂး သတြုဂှ်လေဝ် ဂွံဗက်ဗ္ဒဴကၠေံတုဲ တသိုက်ဘုံပိအိုဿီု တၠပညာမဇိုန်ကဵုမာန်ရောၚ်၊ ဟိုတ်ဂှ်ရ တၠပညာမပြဲနူပရိနာယကရတ် အဲမ္ဒးဂးရောၚ်၊ ဣဝွရ တၠပညာမပြဲလောန်နူရတ်ထပှ်ပြကာရ။
မိၚ်လဟီုသၟိၚ်တုဲ သာ်ဝွံ ပုဏ္ဏက မဟီုတိုန်တုန်၊ “ယွံမရာတ် မရာတ်ကျအဲတုဲ မရာတ်ကယာန်ခၠေဝ်ထောံပၠန်ဟာ”
“ယွံမၚ်ဗၠာဲ ဂလာန်စၟတ်အဲမဟီုရောၚ်”သၟိၚ်ဂး၊ ကျာ်တြဲဇၞးမာ မစိုန်ဒှ်တဴအစာဗြီု မစိုန်ဒှ်တဴနာဲညးလောကဓါတ် ဨကရာတ်သၟိၚ်ခမဳ မၞုံကဵုကြဳဇှ် ဣဓိပါတ်ပန် မတုခဏ္ဍ မရနုက်ကုပန်ဂှ် ညံၚ်အတှ်ထဝ် မပ္တန်လဝ် စိုတ်တုဲရမိဂ္ဂး ။
ကွတ်ပးဝွံ မူနူမက္တဵုဒှ်ရော ယဝ်သ္ဂးမ္ဂး မက္တဵုဒှ်နူဣသိ မူဏိတံရောၚ်၊ ရသိမူဏိတံ မူဟိုတ်မ္ဒးစဳရေၚ်လဝ်သ္ဂးရော သၟိက်ထ္ၜးသၞာံဂိတုတ္ၚဲရောၚ် စရက်တၞောဝ်စှ်ၜါဂှ် စှ်ၜါဂိတုသၟိက်ထ္ၜးသတ်ပးပိစှော်ပိဂှ်မွဲဂိတု ပိစှော်တ္ၚဲ သၟိက်ထ္ၜးလက်ပေတ်ၜါမထောံဂှ် ဒှ်ဂိတုကဵုတ္ၚဲ သၟိက်ထ္ၜးသတ် ညးမတက်ညးမတပ်လဝ်ဂှ် နက်သတ် မသုန်အိုတ်အာ မိက်ထ္ၜးဂတဵုပးဂှ် စက္ကဝါသၟိက်ထ္ၜးသတ်ပးဂမၠိုၚ် မစဴသ္ၚိဂှ် တြဴစှော်ထပှ်သာံယျေဂှ် သက္ကရာဇ်မဂၠိုၚ်ကဵုသၞာံ မိက်ထ္ၜးမထောံလဝ် ပေတ်မဂၠိုၚ်အာတုဲ သတ်မအိုတ်အာဂှ် ဨကရာတ်သတ်တၠပိုန်က္တဵုဒှ်တုဲ မဂွံဂတေက် သက္ကရာတ် မအိုတ်အာရ၊ မိက်ထ္ၜးသတ္တံရောၚ်၊ ဟိုတ်က္တဵုဒဒဟ်သာ်ဝွံ ရသိမူဏိတံ မစဳရေၚ်လဝ်သတ်ပးဝွံရောၚ်မိဂ္ဂး ။
လၟေၚ်ကုသဵုကံ အတိက်မဇိုန်ကဵုပိုန်ဟာန် မပေၚ်တၟိုဟ်ဒၟံၚ် ညံၚ်သတ်ပး ညးမရေၚ်လဝ်ဂှ်ရ၊ ကာလအကုသဵုကံ မဂွံအခေါၚ်ကွေံ ပိုန်ဟာန်သီုဖ္အိုတ်ဂှ် စ္ဍးဒဴယုတ်လ္ၚတ်အာအိုတ်သ္အး ညံၚ်သတ်ပးမစိုပ်မုဟ်ဂတဵု မအိုတ်အာဂှ်ကီုရ၊ ပိုန်ဟာန်ဘုံပိဝွံ ညံၚ်ရုပ်ဂၠံၚ်မတ်ဗြဲ ပ္ဍဲအကာသ ညံၚ်ရုပ်မတဴပ္ဍဲဒၚောဝ်ရ၊ ညံၚ်ရုပ်မတဴပ္ဍဲဗ္ဒၚ်ကီုရ၊ တသိုက်ပိုန်ဟာန်ဘုံပိဝွံ ဍေံဟွံဗိုန်ဂၠိ ကဵုသတ္တံသက်က်ရ၊ ကောန်ဂကူဝါသၞာတံ ဂွံတီသာ်ဝွံတုဲ ဒါန်ဂှ် သဳလဂှ် မၚ်မွဲဘာဝနာဂှ် ပၟဝ်တုဲ ကဵုရာဒၞာမိက်ပိုန်လောကုတ္တဵုညံၚ်ဗီုအတှ်တၟံ မဗိုန်မသက္ကုကသဳဂှ် ဣၚုဟ်ကျာ်တြဲလဝ်စိုတ်တုဲ ဒေသိတံ−စိုန်မတွံပၟိၚ်လဝ်ရောၚ်မိဂ္ဂး ။
အက္ခရခဏ်ဝွံ မူညံၚ်မသတုပ်ရော၊ ညံၚ်ပ္ကဴဂြိုပ်ဟေမဝန်ဂမၠိုၚ် မဂၠိုၚ်မဂတအာကဵုဒိုဟ်ဒတိုန်တ္ၚဲဖ္အိုတ်ရ၊ ညံၚ်ပွါဆဒ္ဒန်လ္ၚီ မဒ္ဂေတ်ဗက်အာသၟိၚ်ဆဒ္ဒန်မွဲကီုဖအိုတ်ရ၊ ညံၚ်တၞုၚ်မာဲလဴသၟတ်မဒ္ဂေတ်ဗက်အာကျာသန်ဇျာဖအိုတ်ရ၊ ညံၚ်သွးဂမၠိုၚ် မဒ္ဂေတ်ဗက်အာဂကောံဇၟောဝ်ဖအိုတ်ရ၊ ညံၚ်သာ်ဂှ်ကီုရတုဲ ဍောၚ်ဓဝ်သဒ္ဓါတၠပညာတံဂမၠိုၚ် မဒ္ဂေတ်ဗက်အာဇၟောဝ်အက္ခရခဏ်ဖအိုတ်ရမိဂ္ဂး ။
သာ်ဝွံပုဏ္ဏကဂး၊ “မရာတ်ကျအဲတုဲ မရာတ်ကယာန်ခၠေဝ်ထောံကၠေံပၠန်ဟာ” “ယွံမၚ်ဗၠာဲ ဂလာန်စၟတ်အဲမဟီုရောၚ်၊ အဲဟွံကယာန်ထောံမၚ်ဗၠာဲရ”သၟိၚ်ဂး ။
“ဒှ်ရသာ်ဂှ် အာဒုၚ်စဳရေၚ်တၠပညာရ”ဂးတုဲ သၟိၚ်ဇၞော် သီုသၟိၚ်ဂမၠိုၚ် သီုပုဏ္ဏကဗွဲမပြဟ်အာစိုပ်ဇြပ်သဘၚ်ဓဝ်ရ၊ တၠပညာညာတ်သၟိၚ်မကၠုၚ်စိုပ်ဗက် ဆၚ်စှ်ေနူပၞၚ်ဓဝ်တုဲလ္ၚောဝ်သၟိၚ်ရ၊ ပုဏ္ဏကညာတ်တုဲ သာ်ဝွံဍေံချပ်တဴရ၊ “တၠပညာဝွံလ္ၚောဝ်သၟိၚ်တုဲ ဒှ်ဍိက်သၟိၚ်ရ၊ ဒှ်အဲဂွံဇၞးရ”ဍေံဂးတုဲ သာ်ဝွံဍေံဟီုတိုန်ရ။
“ယွံတၠပညာ ဒယှ်တှ်တၠအဲဂှ် အလုံဇမ္မုဒိပ်ဝွံ လလောၚ်တြးအာအိုတ်ရ၊ ပရိုၚ်တၠပညာဂှ် ပိုဲဂွံမိၚ်ရ၊ ဇကုတၠပညာဂှ် ပိုဲဟွံညာတ်မွဲလှ်ေ ဂုန်မဝေၚ်ပးဝွံဂှ် လၟုဟ်ပိုဲဂွံညာတ်တၠပညာရ၊ သဘဴတၠပညာဂှ် လမျီုကဵုအိုတ်အာကဵုဓဝ်သစ္စ တဝှ်စၟတ်ဂှ် ဟွံကဵုလီုရော၊ ညံၚ်ဒြာဲထဝ်မဂိုဟ်သော်ဗ္တ ညံၚ်ၜိုပ်ထဝ်မဂိုဟ်သၠသၞေၚ် ညံၚ်ပူဂဵုမဂိုဟ်ခ္ဍောၚ်မတ်ၜါကီု၊ ဂိုဟ်ဓဝ်သစ္စသဳလဝါဒဳလောန်ရောၚ်၊ ဝါဒပိုဲမဒှ်ဝါဒ မကၠုၚ်စိုပ်တၠပညာဝွံဂှ် သစ္စတၠပညာပိုဲ သ္ဂောံတီရ”။
“ယွံတၠပညာ တၠပညာဂှ် ကလောသၟိၚ်သ္ဂးဟာ မတုပ်ကဵုသၟိၚ်သ္ဂးဟာ၊ မလောန်နူသၟိၚ်သ္ဂးဟာ၊ မဒှ်ဍိက်သၟိၚ်သ္ဂးဟာ၊ ဆမဒှ်စၟတ်တၠပညာ ဟီုကဵုပိုဲဂွံတီညိ”။
ဗောဓိသတ် တြုံလၟောဝ်ကျာ်မိၚ်တုဲ သာ်ဝွံ မဟီုတုန်ရ၊ “ယွံမၚ်ဗၠာဲကစ္စာဲ သ္ဘဴဍိက်မ္ဂးဂှ် တိတ်ဒှ်ပန်သာ်ဏီ၊ ကောန်ဍိက်မွဲ၊ ဍိက်စၞးမွဲ၊ ဍိခစမွဲ၊ ဍိက်ဂၠုယ်မွဲ၊ ဝွံဍိက်ပန်သာ်မဒှ်ရ၊ ပၞောဝ်ဍိက်ပန်သာ်ဂှ် အဲမဒှ်ကောန်ဍိက်သၟိၚ်ရ၊ ဆလၟုဟ် မဒှ်ကောန်ဍိက်သၟိၚ်ဝွံဟသေၚ် နမတဴပ္ဍဲဂၠံဂဝ်မိတေံ မဒှ်ဒၟံၚ်ဍိက်သၟိၚ်ဝွံရ၊ ကာလဗောဓိသတ်တြုံလၟောဝ်ကျာ် မဟီုတဴသာ်ဝွံဂှ် ပါရမဳစှ်မက္ဍိုက်ပေၚ်ဟေၚ်ရ။
ကာလမဒှ်သုဒ္ဓသၟိၚ်တေံကဵုဒါန်တုဲ ဗၞတ်မွဲလ္ဂာံကီု ကလေၚ်တိတ်အာကဵုအဟံပုရိသာတ်ဂှ် ပါရမဳမက္ဍိုက်ပေၚ်ရ၊ ကာလမဒှ်မဟောသဓဂှ် ဗ္ဒုၚ်သၞာ်တယောဝ်ကံကဵုသၟိၚ်စောရဏိဂှ် ကာလဂှ် ပါရမဳစှ် မက္ဍိုကပေၚ်ကီုဟေၚ် ညံၚ်ကၠဵုဂြိုပ်မဗ္ဒကဵုတၞံဆုတုဲ မဒုၚ်လွပ်ကၠရ၊ တၠပညာ ဗ္ဒကဵုသစ္စပန်တုဲ မဒုၚ်လွပ်ပုဏ္ဏကရ၊ ပုဏ္ဏကမိၚ်လဟီုဗောဓိသတ်တုဲ တက်ကၞက်ပိဝါ “အဲဇၞး−အဲဇၞးဍေံဂးတုဲ အလုံဂတာဇမ္ဗုဒိပ်ဂွံမိၚ်အိုတ်ရ၊ “နူကၠၚ်ကျကွတ်တဲတုဲရ၊ လၟုဟ်ကျကွတ်ပါၚ်ပၠန်တုန် ဒှ်အာၜါဝါရ၊ ဇကုတၠပညာ မရာတ်ကဵုအဲညိ အဲသ္အာရ” တၠပညာ ဟွံၚဳမုက်ပိုဲ မဒှ်တၠဂုန်ဇကု ဟွံဂိုဟ် ပိုဲမဒဒှ်ေ နူအဓါန်မလံ သၟိၚ်ပမတ်တုဲ သၟိၚ်သ္ဂးရ။
“ယွံမၚ်ဗၠာဲကစ္စာဲ တၠပညာမဒှ်ကလောပိုဲ ပိုဲမဖျေံစိုတ်ရ၊ လၟုဟ်ပိုဲညးတေမၚ်ရောၚ်၊ တၠပညာမ္ဂးဂှ် ဇကုတၠပညာ တၠပညာတီရ၊ ဒၞာဲမအာ ကေတ်ဏာဂွံရ”သၟိၚ်ဂး။
ဗောဓိသတ်ပၠန်တုန် ဟိုတ်ဟွံမိက်ကဵုသစ္စလီု မတိတ်ဟီုဂလာန် စၟတ်ရောၚ်၊ သေယျထာပိ−မူညံၚ်ပၟာမတုပ်ရော၊ သုရိယောစန္ဒောဝိယ−ရဴသၟိၚ်ဂိတုတ္ၚဲကီု သၟိၚ်ဂိတုသၟိၚ်တ္ၚဲ နဓမ္မတာ ခၞံဂၠံအကာသ နိစ္စကာလ မပျးတဴမတ်သတ္တံဂမၠိုၚ်၊ ကာလမဒွံဘဲရာဟု မရပ်ကေတ်ဂှ် ရဴဝွံ သၟိၚ်ဂိတုတ္ၚဲချပ် သီုလွဳမာန်အဲ ဒုၚ်ရပ်သ္ဒးဟာ၊ ထောံကၠေံလွဳမာန်တုဲ သဒုၚ်ရပ်ရာဟု သ္ဂးဟာ၊ နူကဵုကတ်မတန် မပျးကၠုၚ်ဒၟံၚ်မတ်ဇန်တံဂှ် ဟွံဂွံထောံလွဳမာန်ရောၚ်၊ ပ္ဍဲမ္ဒးဒဒိုက် မဂွံထောံကၠေံလွဳမာန်တုဲ မဒုၚ်ရပ်လွဝ်ရာဟုမ္ဂး ဒှ်ဟွံထေက်ကြိုက် မဒှ်ဂရိုဟ်ဇန်တံဂမၠိုၚ်ရဂးတုဲ သီုလွဳမာန်ဂှ် ရဴမဒုၚ်လွဝ်ရာဟုဂှ်ကီု၊ ဨဝမေဝ−ညံၚ်သာ်ဂှ်ကီုရ၊ ဝိဓုရတၠပညာ ကာလလောကဓဝ် မတွံဂး ရာဟုမကၠုၚ်ဒွံမ္ဂး သီုကဵုဓဝ်သစ္စမဒုၚ်လွဝ် လောကဓဝ်ဟာ၊ ထောံကၠေံဓဝ်သစ္စတုဲ မဒုၚ်လွဝ်လောကဓဝ်ဟာ၊ ဂတးချပ်တုဲ လမျီုလေပ်မြာ ဂွံပယတ်ကီု၊ သစ္စမ္ဂးဂှ် သ္ဇိုၚ်သ္ဂောံပတၠသန် ရဴဝွံဗ္စာရဏာတုဲ သီုကဵုဓဝ်သစ္စမဒုၚ်သွဝ်လောကဓဝ်ရောၚ် မိဂ္ဂး ။
သၟိၚ်ပၟတ်ကဵု ဗောဓိသတ်တုဲ ဗွဲကြဴဒးသ္ၚောံတဴပၠန်ရောၚ်၊ ပွမွဲပဟွံဒး မသ္ၚောံကြဴဂှ် စၚ်ခြၚ်နပညာညိ၊ ညံၚ်ဇၟူအလြအစောံ ဟွံပ္တေဟ်ဇိုၚ်ပန်တုဲ နလ္ပဟ်ဖျောန်ဏာဂတ စံၜတ်တုဲ မကွာ်ဂး ဇၟူဂှ် ဟွံသလိုၚ် ဟွံတဆူရောၚ်၊ ညံၚ်သာ်ဂှ်ကီုရ၊ ဓဝ်ပညာဏာဂတ စံၜတ်မွဲတုဲ ဟွံဒးသ္ၚောံကြဴရမိဂ္ဂး ။
၅။ ခဏ်သ္ၚိကၟိန်[ပလေဝ်ဒါန် | ပလေဝ်ဒါန် တမ်ကၞက်]
သၟိၚ်ဟီုကဵုပုဏ္ဏက ကေတ်ဏာရဂးတုဲ၊ သၟိၚ်ချပ်တိုန်ပၠန်ရ၊ “လၟုဟ်ဝွံ တၠပညာအာကၠေံတုဲ ဓဝ်တၠပညာပိုဲသၟိက်မိၚ်ပၠန်ဂှ်ဟဂွံရ၊ ကၠာတၠပညာ မဟဂွံသာဲအာနူပိုဲဏီဂှ် ပိုဲအာပၚ်မှိၚ်ဓဝ်ပတုဲရ”သာ်ဝွံ သၟိၚ်ဟီုရ။
“ယွံတၠပညာ ပ္ဍဲပၞၚ်ဓဝ်ဂှ် တန်ဒၟံၚ်တုဲ သၟာန်မပဒတဴ ပ္ဍဲသ္ၚိကၟိန်ဂှ်ရ၊ ပိုဲသၟာန်တၠပညာညိ”သၟိၚ်ဂးတုဲ တၠပညာတိုန်ဒၟံၚ်လ္တူပၞၚ်တုဲ သၟိၚ်သၟာန်ရ။
“ယွံတၠပညာ ခရှ်မတဴပ္ဍဲသ္ၚိကၟိန် မဟွံဒးစံၚ်တူပ္ဍဲပရိုက်ဂှ် ပသၟးရော၊ မဂွံသၚ်ရိုဟ်ညးမသက္ကုပရိုက်ဒဒိုက်ဂှ် ပသၟးရော၊ ဟမိက်ဒိုက် ပ္ဍဲလိုက်ဝွံ ပသာ်ဂပ်ဝ် မဂွံဒ္ဂေတ်ရော၊ တဝှ်စၟတ် မဂွံဒှ်ဂတမတ်ဂှ် ပသၟးရော၊ နူလိုက်မအာပလိုက် မဟွံဒးစံၚ်တူဂှ် ပသၟးရော”၊ သာ်ဝွံ သၟိၚ်သၟာန်တုဲ ဗောဓိသတ်သဟ်ကဵုရ။
“ယွံမရာတ်သၟိၚ်မပြဲ မဟမိက်စံၚ်တူပ္ဍဲပရိုက်မ္ဂးဂှ် သမ္ဘာညးဂပ်ဝ်ဝေၚ်သၟတ်ညိ၊ မဂွံသၚ်ရိုဟ်ညးမ္ဂးဂှ် ဓဝ်သၚ်္ဂဟရ၊ သၚ်္ဂဟမ္ဂးဂှ် ဒှပန်သာ်တုဲ ဝတ္ထုသၚ်္ဂဟ၊ ဝါစာသၚ်္ဂဟ၊ စရိယာသၚ်္ဂဟ၊ ဓမ္မသၚ်္ဂဟ ဣဝွံ သၚ်္ဂဟပန်သာ်ရ၊ ဝတ္ထုသၚ်္ဂဟမ္ဂးဂှ် ကာလဂွံစၞမိပ်ဂှ် မွဲဇကုလ္ပညိ၊ သၚ်ရိုဟ်မိမကောန်သမ္ဘာ သၚ်ရိုဟ်ခမဳဗမၞး တမၠၚ်လအာတ်ညိ၊ ဝါစာသၚ်္ဂဟမ္ဂးဂှ် နဂလာန်မဒှ်သာယျေန်ပ္ဍဲကတောဝ်ညးဂှ် ဂပ်ဝ်ဟီုပၠာံဗဇးညးညိ၊ စရိယာသၚ်္ဂဟမ္ဂးဂှ် ကဵုဂြၚ်စိုတ်ညးညိ၊ ညးၚဳပၟိက်ကဵုဇကုဂှ် ဂပ်ဝ်ကဵုညိ၊ လ္ပတာတဲဖ္အာတဴဒ္ဂေတ်မပြဲညိ၊ ဓမ္မသၚ်္ဂဟမ္ဂးဂှ် သဘဴဓဝ်ဂပ်ဝ်သၚ်ရိုဟ်ညးညိ ပရံစၞဗဗွဲဓဝ်ညိ၊ သၞောဝ်ဂၠံၚ်ဗဗွဲဓဝ် ဂပ်ဝ်ဒ္ဂေတ်ဗက်ညိ၊ ဣဝွံ သၚ်္ဂဟပန်သာ်ရ”။
“ဟမိက်ဒိုက် ပ္ဍဲလိုက်မ္ဂးဂှ် ဓဝ်လၞုဟ်လ္ပဒေပ်ဍေံ ဓဝ်တမ္ၚူဂှ် မှတ်ဒေပ်လဝ်ညိ၊ သၟိက်တဴပ္ဍဲတဝှ်သစ္စဂှ် သဳလ မှတ်မၚ်မွဲ ဂလာန်မုသာ လ္ပဟီုညိ၊ မဟမိက်စံၚ်တူပ္ဍဲလိုက်ပရိုက်မ္ဂးဂှ် ပညာမဒှ်ကုသဵုစိုတ်ဂှ် ပ္တန်လဝ်ပ္ဍဲသန္ထာန်ညိ”ရဴဝွံ ဗောဓိသတ်တွံကဵုသၟိၚ်ရ၊ ဂလာန်ဒလောံဗ္တောန်ဗွဲမဂၠိုၚ် ဗောဓိသတ်တွံကဵုသၟိၚ်တုဲ စှ်ေကၠုၚ်နူပၞၚ်ဓဝ် လ္ၚောဝ်ပ္တီသၟိၚ်တုဲ တန်ဒၟံၚ်ရ၊ ကာလဂှ် ညးမပူဇဴ ကုဗောဓိသတ်ဟတီကဵုဗၞတ်တွဵုရ။
ဃရဝါသခဏ်ဝွံ ကောန်ဂၠု သၟိၚ်သိရိသုဒ္ဓေါဓန၊ တၞောဝ်ဒတောဝ် သာ်ကျာဝၚ် မၞုံကဵုအခၠၚ်လျးတြဴ သၞေံသၞဴတနသၞာ် မဂ္ဂညာန်ပညာ တတ်ဗ္ဒောံပ္ကဝ်ကၠေံ မၞာန်မာမသုန်တန် ဃရဝါသခဏ်မရနုက်ကုမသုန် ညံၚ်အိန်တက္ခဳမၞိက် မဖ္ဍုန်ဂလက်လဝ်တၟံသိန္ဒရာတ်ကီု၊ ဃရဝါသခဏ် စိုန်တုဲ တုဲဆဝွံရ။
အိုတ်စိုတ်တၠပညာတံညးဂမၠိုၚ် မဒ္ဂေတ်ဗက်အာဃရဝါသခဏ်ဂှ် ညံၚ်ဗြဲမဒ္ဂေတ်ဗက်အာကျာကီု ညံၚ်ကောန်က္ၜၚ်ဂမၠိုၚ်မဒ္ဂေတ်ဗက်အာသ္ကိုပ်က္ၜၚ်ကီု ညံၚ်သာ်ဂှ်ကီု၊ အိုတ်ကဵုစေတနာတၠပညာတံညးဂမၠိုၚ် မဒ္ဂေတ်ဗက်အာ ဃရဝါသခဏ်အိုတ်ရမိဂ္ဂး။
၆။ ခဏ်လက္ခဏ[ပလေဝ်ဒါန် | ပလေဝ်ဒါန် တမ်ကၞက်]
မၚ်ဗၠာဲကစ္စာဲ ဟီုကဵုဗောဓိသတ် “တၠအဲမဒှ်တၠပညာစၟတ်ဨကန္တရ၊ ယွံတၠပညာ တရဴပိုဲသ္အာမသ္ၚောဲလောန်သန် ညံၚ်ပိုဲသ္အာရ”ဍေံဂး ။
ဗောဓိသတ်ဟီုကဵုမၚ်ဗၠာဲကစ္စာဲရ၊ “ယွံမၚ်ဗၠာဲကစ္စာဲ ဆဗၞတ်ပိတ္ၚဲဒိုအ်ကဵုအဲညိကၠာ၊ အဲဒၠောံဗ္တောန်ကောန်သမ္ဘာတွဳဝါရဂမၠိုၚ်ညိကၠာ” မၚ်ဗၠာဲမိၚ်တုဲ သာ်ဝွံဍေံချပ်ရ၊ တၠပညာဝွံ ညးမၞုံတဴကဵုသစ္စဝါဒဳရောၚ်၊ တၠဂုန်အဲရောၚ်။
“ယွံတၠပညာ တၠအဲ ဒိုအ်ဒၟံၚ်ၜါပိတ္ၚဲတုဲ ဒၠောံဗ္တောန်ကောန်သမ္ဘာ တွဳဝါရမ္ဂးဂှ် ဒိုအ်ရအ်ကဵုအခေါၚ်ရ”မၚ်ဗၠာဲဂး၊ “ဒှ်ရသာ်ဂှ် ညံၚ်ဇူဒိုအ် ပ္ဍဲသ္ၚိပိုဲတေံရ”ဗောဓိသတ်ဂး။
ဗောဓိသတ်ကဵုမၚ်ဗၠာဲကစ္စာဲ စဴအာသ္ၚိဗောဓိသတ်ရ၊ ပြာသာဒ်ဗောဓိသတ်ပိ ပြာသာဒ်မွဲမွဲဂှ် ထပှ်ဘုံ သီုကမၠောန်မသုန်ကၠံ သီုသၟာကွိၚ်ကွိုက်ဒယှ်ေလှ်ေ ဗောဓိသတ်ဇိုန်ကဵုတိၚ်တက်သ္ဍိုက်စိုတ်မၚ်ဗၠာဲကစ္စာဲ ညံၚ်ဒေဝတဴဗြဴအဆေဝ်သွဝ် သၟာကွိၚ်မတိၚ်တက်သ္ဍိုက်စိုတ် သၟိၚ်အိန်နာဲညးဒေဝတဴဂှ်ကီု သီုဘောဇိုန်အဟာရမပြဲပြဲ ညံၚ်ပုၚ်သုဓါဘုတ် မဒှ်ပြဘိုက်ဒေဝတဴဂှ်ကီု တရိုပ်ကဵုစိုတ်မၚ်ဗၠာဲကစ္စာဲရ၊ တုဲဗောဓိသတ်ပြာပ်အာဇရေၚ်မဇကုတုဲ လၟေၚ်မပကန်ဖျန်ဂှ် ဟီုပ္တီမဇကုတုဲ ကော်နၚ်ဗော်သွးဇကုအိုဿီုရ။
သမ္ဘာလ္ၚီကောန်လ္ၚီ ဂအှ်လ္ၚီ သီုညးဂမၠိုၚ်ကၠုၚ်စိုပ်ဇရေၚ်ဗောဓိသတ်အိုတ်တုဲ ယာန်ဖံကဵုသြိုဟ်အိုဿီု ဗြဲမတ်ပေၚ်တၟိုဟ်ဒၟံၚ်ဂဍောၚ်မတ်ၜါ ပြဟ်စှ်ေဒၟံၚ်ဟွံခြာသ္ဂုတ်ဂှ်ဒှ်တုဲ ဍေံတံယာံတဴကဵုဗောဓိသတ်အိုတ်ရ၊ ပ္ဍဲကာလဂှ် ညးဂမၠိုၚ်ညံၚ်ဂြိုပ်ဓိတာန် လၟုဟ်ဝွံကျာဝေရံၚ်ဗရာတ်တုဲ ရဴမလောတ်လးလောတၟောဝ်ဒၟံၚ်ဂှ်ကီု ညံၚ်ရဴဂြိုပ်ထဝ်ဒွံကျာ မေလံၚ်ဇမ္ကာတ်တုဲ ရဴမတၟဝ်ဒၟံၚ်ကီု ညံၚ်သာ်ဂှ်ကီုရ၊ သီုညးဖအိုတ်ဂှ် လောတ်လောဒၟံၚ်တံဇိုၚ်ဗောဓိသတ်အိုတ်ရ။
ဗောဓိသတ်တုန် ကော်နၚ်ကောန်ဇၞော် ဓမ္မပါလ မိန်လဝ်တုဲ ဆုၚ်က္ဍိုပ်ဗ္ဂူဗြဲမတ်ယာံတဴကဵုကောန်ရ၊ မူဟိုတ်ဗောဓိသတ်မ္ဒးယာံကဵုကောန်ဂှ်ရော၊ ဟိုတ်ဒှ်ကောန် ကာမာဝစရမဟဂွံသၞာ်ရတ် မဂ္ဂညာန်ဏီတုဲ မိတ်တတ်ကြေဝ်ဒကုတ်ကၠေံ ဓဝ်ဒေါသမာန ဟဂွံဏီ ဟိုတ်ဂှ်ရ မ္ဒးယာံတဴရောၚ်၊ ဟိုတ်ဂှ်ရ တၠပညာဂမၠိုၚ် ဇူဒၟံၚ်ပ္ဍဲတမၞက်သံသာဝွံဂှ် လၞီပရံပရာ ပရိုက်ဒဒိုက်ရိုဟ်ဟမာန်ရ၊ တီတုဲဒါန်သဳလဘာဝနာ ပၟဝ်ဂလိုၚ်လဝ်ကုသဵုစိုတ်ပ္ဍဲသန္ထာန်တုဲ သ္ဂောံတိတ်ဗၠးအာနူခရိုၚ်သံၚ်သာတုဲ ဍုၚ်ဇၞော်နိဗ္ဗာန် မသ္ဂုတ်ကၠေံဒဒိုက်အိုဿီဂှ် မသ္ဂောံအာစိုပ်ရောၚ်၊ ဣၚုဟ်ကျာ်တြဲလဝ်စိုတ်တုဲ ဒေသိတံဟဂဝါ−စိုန်ကျာ်တြဲ မတွံလဝ်ရောၚ်မိဂ္ဂး ။
၇။ ခဏ်ရာဇဝသတဳ[ပလေဝ်ဒါန် | ပလေဝ်ဒါန် တမ်ကၞက်]
ကောန်သမ္ဘာ ကလောဂမၠိုၚ်ဂး၊ “ဂတဝွံ ပိုဲဟွံညာတ်တၠပညာရသွံ”ဂးတုဲ မယာံတဴကဵုဗောဓိသတ်အိုတ်ရ၊ ဗောဓိသတ်ဟီုပၠာံဗဇးစ္ ဍးကၠေံလ္ၚီယွာံဍေံတံတုဲ ဂလာန်သာ်ဝွံ မ္ဂးဟီုဒၠောံဗ္တောန်ဍေံတံရ။
“ယွံဓမ္မပါလ မၞးတံလ္ပစံၚ်တူရ၊ ဇူသမၞိၚ်သံသာဝွံ မမိက်ကုသတ်မွဲ မဂွံဗၠးနူလၞီစံၚ်တူဂှ်ဟၟဲရ၊ ခန္ဓသန္ထာန်သတ္တံဂမၠိုၚ်ဝွံဂှ် ဍေံမဒှ်သဘာအနိစ္စရောၚ် ဟသေၚ် ဍေံမ္ဒးသြာဲဂမ်စိုတ် ဟသေၚ် မ္ဒးသြာဲဂမျိုၚ်ဂှ် မဒှ်ဓမ္မတာသတ္တံဂမၠိုၚ်ဝွံရောၚ်”
“ယွံဓမ္မပါလ ဓမ္မဝတ် ရာဇာဝတ် လောကဝတ်တံဂှ် ကောန်အဲ ဓမ္မပါလ မှတ်သမ္တီလဝ်ညိ၊ လၟေၚ်ရာဇာဝတ် လောကဝတ်ဂှ် ကောန်အဲဓမ္မပါလ မှတ်သမ္တီလဝ်ညိ၊ လၟေၚ်ရာဇာဝတ် ဟီုပၟိၚ်လဝ်ကုကောန်အဲညိ”
“ယွံကောန် အဲဟၟဲတုဲ ဇကုတၠအဲဂှ် မဒှ်စၞးဇကုအဲရကောန်၊ ညံၚ်တၞံဆု ၝောံဍေံဂှ် ဗျုဗျသၟာဲသၟအာတုဲ ဗၠိုၚ်ဆုဂှ် ရဴမထပ်တိုန်ဒၞာဲဂှ်ကီု ညံၚ်ဆုသာရခန္ဓမတဴပ္ဍဲဂြိုပ်မညုသာရဂှ် တၞဟ်နၝောံဂှ် ဗျုဗျသၟာဲသၟအာတုဲ ဗၠိုၚ်ဗၠဂှ် ရဴမတိုန်ထပ်ဒၞာဲဂှ်ကီု ဨကရာတ်ဟၟဲတုဲ ဥပ္ပရာဇာ ရဴမဂွံဒၞာဲဂှ်ကီု ညံၚ်သာ်ဂှ်ကီုရ၊ အဲဟွံမွဲတုဲ ဒၞာဲဂှ် မ္ဒးသှ်သၟာန်သၟိၚ်ရ၊ ကောန်ခါမအာစိုပ်သၟိၚ်ဂှ် သၟိၚ်ကော်မသကဵုဒၟံၚ်မွဲသၞာဂှ် လ္ပဒၟံၚ်ညိကောန် အဲမဒှ်ကောန်ဍိက် တၠအဲရောၚ် ဂးကဵုသၟိၚ်တုဲ ဒၞာဲဋ္ဌာန်မ္ဒးဂှ် ဂ္ဇံဒၟံၚ်တုဲ သှ်သၟာန် သၟိၚ်ရကောန်၊ အိုတ်မၞးတံညးဂမၠိုၚ် မခစသၟိၚ်ဂှ် ဂလာန်အဲမၞးတံသမ္တီကဵုဗိုန်ညိ”
“ခစသမိၚ်ဂှ် ဂုန်မွဲမွဲကဵုပြာကတ်ပ္ဍဲသၟိၚ်ညိ၊ မဟစဳကၠး မသဒိုဟ်ဒီုဂှ် လ္ပကဵုဒှ်ညိ၊ လ္ပယိုက်ဇၞော်မာန် ပ္ဍဲသၟိၚ်ညိ၊ ညံၚ်ပၠုယ်မအာပ်လျးပၟတ်ဂှ် ကဵုဒှ်ညိ၊ သ္ဍဴသုစရိုဟ် ဗဂဵုဒၟံၚ်လၟိုန်ညိ၊ ပတိပတ်ထၟိက်ကဵုနွံညိ၊ ဓဝ်ပညာသှ်ပ္တဴပ္ကၚ်ရၚ်လဝ်ညိ၊ ဒဒှ်ပညာဇကုနွံဂှ် ကဵုညးဂွံတီညိ၊ ခစသၟိၚ်စိုတ်ညံၚ်သၠဒကှ်ထဝ်ဂှ် ကဵုဒှ်ညိ၊ သ္ဇိုၚ်သၟိၚ်အလဝ်ဇကုဂှ် သၟိၚ်သၟာန်ကဵုညှိန်စၟတ်ညိ၊ ဇၟာပ်စရၚ်ရာဇာဝတ်အိုဿီုကဵုလေပ်တီဇဳညိ၊ ဗ္တံကီုတ္ၚဲကီု ကိစ္စသၟိၚ်ကၠုၚ်စိုပ်မ္ဂး လ္ပဟိုတ်မာဲညိ”
“တရဴမွဲညးမတွံၚးဂ္ညိဂ္ညာတ်လဝ်သွက်သၟိၚ်ဂှ် သၟိၚ်ဟွံဂွံကွာ်ဏီဂှ် လ္ပကွာ်ကၠာသၟိၚ်ညိ၊ ယာတ်မွဲသၟိၚ်ကေၚ်ဗိုက် လ္ပဗိုက်ညိ၊ ပ္ကဴသၟိၚ်ကေၚ်ဝက်ဂှ် လ္ပဝက်ညိ၊ မြမောဝ်မွဲ သၟိၚ်ကေၚ်ဟုံဂှ် လ္ပဟုံညိ၊ ဒွက်မွဲသၟိၚ်ကေၚ်ဒယှ်ေဂှ် လ္ပဒယှ်ေညိ၊ ဂလာန်ညးဆက်အာ မဟဂွံတီကၞတ်ဂှ် လ္ပဟီုကဵုသၟိၚ်ညိ”
ဂကောံအမာတ် ဂကောံဂၞကျာ် ခါသၟိၚ်မဝေၚ်ဂြိုၚ်တဴဂှ် သၟိၚ်ကော်ဇကုသ္ကဵုဝေၚ်ဂှ် မၚ်မွဲအိန်ရဳညိ၊ လ္ပပံက်ပါၚ်ပြဟ်ညိ၊ လ္ပယိုက်ဇၞောဝ်မာန်ညိ၊ ပညာကြံၚ်ဍုဟ်ကဵုဒှ်ညိ”
“ဂကောံသမ္ဘာသၟိၚ် ဋ္ဌာန်လမ္ၚုလ္ပဒၟံၚ်ညိ၊ ဒြပ်တိုက်ဖလူသၟိၚ်ကဵုဒေပ်လဝ် လ္ပရပ်စပ်ညိ၊ သုၚ်ဗ္ၜူဒၟံၚ်ဒဝိုၚ်လ္ပပညိ၊ သတ်ဇိုၚ်ၜါ သတ်ဇိုၚ်ပန် သၟိၚ်ဗလးစၞး ဇကုသၟိၚ်မ္ဂး လ္ပပရိုက်ညိ၊ ဒေန်သၟိၚ်လ္ပသ္တိက်ညိ၊ ဒၞာဲသၟိၚ်ဒၟံၚ်ဂှ် လ္ပဂ္ဇံညိ၊ ခါမသဳကၠဳသၟိၚ် မသ္ၚောဲလောန် မညောန်လောန် မဒ္ဂူကဵုမုက်သၟိၚ် လက္ကရဴသၟိၚ်လ္ပဒၟံၚ်ညိ၊ မဒဒှ်ေကဵုသၟိၚ် အမာတ်မဇၞော်သွတ်သၟဟ်ကဵုသၟိၚ်တုဲ ပ္တေဟ်ဒၟံၚ်ဇကုလ္ပပညိ”
“အဲအ္စာရောၚ်ဂးတုဲ ပတှ်ေဒၟံၚ်ဇကု လ္ပပညိ၊ ညံၚ်တၞုၚ်မာဲလဴတ္ၜတ်တ် မစးဒုၚ်ဒၟံၚ်ကျာဂှ် လ္ပကဵုဒှ်ညိ။ တၞိန်တရၚ်အဲ ဂွံအဝဵုရဂးတုဲ ဟွံဒညမတိတ်လုပ် ညံၚ်စိုတ်ဇကုဂှ် လ္ပပညိ၊ ကောန်သၟိၚ်တွဳဝါရသၟိၚ် ကၠေဝ်မ်ဟမ္ဂး ဂုန်ကီု ဒုဟ်ကီု လ္ပဂၠာဲဟီုညိ၊ သၟိၚ်ရံၚ်မုက်ဇကုမ္ဂး မုက်ကဵုဂေါဝ်ဒၟံၚ်ညိ၊ ညံၚ်ဍောၚ်ဒကှ် မညာတ်အရံၚ်အံၚ်သူလျးတ္ၚဲမမြဟ်ဒၟံၚ်ဂှ် ကဵုဒှ်ညိ”
“သရာဲညးဂၟံၚ် ဂမာစိၚ်ချေံတံဂှ် သၟိၚ်ကဵုကၠေဝ်မက်လာပ်သ္ကာမ္ဂး နကျာပါၚ်လ္ပဟီုပလီုကၠေံညိ၊ ညံၚ်တ္ၚမ္ၚောပ်ခိုၚ်တဴဂှ် လ္ပကဵုဒှ်ညိ၊ ညံၚ်က္ၜၚ်မဗက်ဗွဲဗလောဲကျာဂှ် ကဵုဒှ်ညိ၊ ညံၚ်တ္ၚဲမတိုန်ပ္ဍဲစရၚ်သၟိၚ်ဂှ် ကဵုဒှ်ညိ၊ ရပ်စပ်ဒြပ်တၠတုဲ ဆေဝ်ဗၠေတ်ဒၟံၚ် လ္ပပညိ၊ မဟွံစးညး နပါၚ်မပစုတ်လိက်မခဏံလွဟ် လ္ပပညိ၊ ကဵုတ္ၚအ်လွဳက္ဍၚ်ညိ၊ ဓဝ်သတိသှ်ပတဴလၟိုန်ညိ၊ ဓဝ်ပညာသှ်ပတဴလၟိုန်ညိ၊ သာ်ဝွံ ပဋိပတ် မခစသၟိၚ်ရကောန်”သာ်ဝွံ ဗောဓိသတ်ဒၠောံဗ္တောန်ကောန်ဂၠု ဓမ္မပါလရ။
ကျာ်သဗ္ဗညု စလံၚ်ညးနာဲ လောကဓါတ် ဨကရာတ်ဇၞးဒိုဟ်စှ် မဒတဲဖျဴသတ် မထ္ၜးကဵုဂၠံၚ်နိဗ္ဗာန် မၞုံကဵုသာဓါရဏညာဏ်တြဴ ရာဇာသတိ မရနုက်ကုတြဴဂှ် ညံၚ်ပၞာၚ်တိုၚ် မၞိက်မစဳပျးလဝ်ရောၚ်မိဂ္ဂး၊ အိုတ်ကဵုပဋိပတ်တၠပညာတံညးဂမၠိုၚ်ဂှ် မ္ဒးပ္ၚောံစဴရာဇာသတိ ခဏ္ဍဖအိုတ်ရမိဂ္ဂး ။
၈။ ခဏ်သာဓုနရ[ပလေဝ်ဒါန် | ပလေဝ်ဒါန် တမ်ကၞက်]
ဗောဓိသတ် တြုံလၟောဝ်ကျာ် လုကဴပိတ္ၚဲ ဒလောံဗ္တောန် မပ္တံကောန်သမ္ဘာတုဲ ဗလိုပ်ဖုံဂ္ညိဂ္ညာတ်တုဲ ပ္ၚောံတိုန်အာကဵုသၟိၚ်ရ၊ ကောန်သမ္ဘာ သီုကလောဂမၠိုၚ် သီုကဵုဗြဲမတ်ဇၟောဝ်ဍာ်ရမတ် မပေၚ်ဒၟံၚ်ဂဍောၚ်မတ်ၜါ ဗက်တိုန်အာဗောဓိသတ် ညံၚ်သၟိၚ်ပဒေသရးဂမၠိုၚ် မဗက်ကြဴသၟိၚ်စက္ကဝဝ်ဂှ်ကီု အိုဿီုကလောဂမၠိုၚ် ဗက်တိုန်အာ ကလောဗောဓိသတ်အိုတ်ရ၊ လ္ၚောဝ်သၟိၚ်တုဲ သာ်ဝွံ ဗောဓိသတ်မ္တီသၟိၚ်ရ။
“ယွံဘုမ္မိပါလ၊ တၠတိဇၞော်မပြဲ ကောန်သမ္ဘာကလောဲအဲဍိက်ညးဂမၠိုၚ်ဂှ် ဍေံတံမဒှ်ကောန်ဍိက်တၠအဲရ၊ အဲဍိက်ဒၠောံဗ္တောန် ဍေံတံတုဲအိုတ်ရအဴ၊ ဍေံတံမဒှ်ကောန်ဍိက်တၠဂုန်ဂှ် သွက်ဍေံတံဂွံဒုၚ်ကာတၠဂုန်ဂှ် တၠဂုန်မၚ်မွဲဒ္ဂူသၞောဝ်ဍေံတံညိအဴ၊ ဒြပ်ကသပ်ဍေံတံ ညံၚ်ဟဂွံလေၚ် သာပ်ပ်ဟုတ်အာဂှ် တၠဂုန် ဒ္ဂူသၞောဝ်မၚ်မွဲညိအဴ၊ အဲဟွံသ္ၚဳမုက်တၠဂုန်မ္ဂးဂှ် ဟိုတ်အဲဍိက် သ္ၚဳကဵုဓဝ်သစ္စတုဲ အဲဍိက်မ္ဒးလုတ်အာတၠဂုန်ရောၚ်အဴ၊ အဲဍိက်လော်ပ္ဍဲတိဂှ် မ္ဒးခ္ဍဵုပ္ဍဲတိပၠန်ရ၊ အဲဍိက်လုတ်ပ္ဍဲတၠတိဂှ် အဲဍိက်ကလံတၠအဲရအဴ၊ အဲဍိက် သ္ဒးဗက်အာမၚ်ဗၠာဲကစ္စာဲရအဴ”ဗောဓိသတ်ဂး။
သၟိၚ်မိၚ်တုဲ သာ်ဝွံသၟိၚ်သ္ဂးရ၊ “ယွံတၠပညာ လ္ပအာရ၊ မူသ္ပကဵုဍေံဇကုမွဲရော အဲသ္ကဵုဂစိုတ်ကၠေံဍေံ ဟွံကဵုညးတီရ”သၟိၚ်ဂး။
ဗောဓိသတ်ဟီုကဵုသၟိၚ်ပၠန်ရ၊ “ယွံမရာတ် တၠဂုန်လ္ပဟီုသာ်ဂှ်ညိ မဂစိုတ်ညးမ္ဂးဂှ် လဝ်ကဵုဒှ်ရ၊ ဆကသပ်ဂှ် လ္ပချပ်ညိ၊ ဟိုတ်တၠဂုန် မသ္ဍိုက်အဲဍိက် မပ္တုဲသရာံပါပ် မပ္တုံအပါဲကဵုဇကုဂှ် လ္ပပညိ၊ မွဲကာလတၠဂုန်မသ္ဍိုက်အဲဂှ် စှ်ေဝေၚ်သရာံပါပ်ညိ၊ မူမရာတ် မကဵုဇကုအဲကဵုမၚ်ဗၠာဲဂှ် မရာတ်ဟဂွံပပရိုက်ကဵုမၚ်ဗၠာဲဂှ် ဒှ်မရာတ်မကဵုလမျီုကဵုဇကုအဲရ” နဂလာန်သာ်ဝွံ ဗောဓိသတ်ဟီု ဆဳဒဝ်ကၠေံသၟိၚ်တုဲ ဗောဓိသတ်ဟီုကဵုဂၞကျာ်ရ၊ ဟီုကဵုကမၠောန်ဂမၠိုၚ်ပၠန်ရ။
“ယွံမၞးတံဒၟံၚ် အဲသ္အာရ၊ အိုတ်ဒါန် သဳလဘာဝနာ မၞးတံပ္တုဲ မၞးတံပမဝ်ဂလိုၚ်ညိ၊ ပ္ဍဲရတ်ပိ မိမဒကိုပ်တ မၞးတံကၠောန်ၜိုတ် လ္ပဟိုတ်မာဲညိ၊ သရာံပပါပ်စှ်ေဝေၚ်ညိ၊ ဓဝ်ကုသဵုမၞးတံမှတ်မ္တုဲညိ” သာ်ဝွံ ဗောဓိသတ်ဟီုဒၠောံဗ္တောန်ညးဂမၠိုၚ်တုဲ ဍေံတံယာံတဴကဵုဗောဓိသတ်ဗွဲမလောန်ရ၊ ဗောဓိသတ်ကလေၚ်စှ်ေအာနူသ္ၚိသၟိၚ်တုဲ ဍေံတံညးဂမၠိုၚ် ယာံဗက်စှ်ေအာဗောဓိသတ်ရ။
ဗောဓိသတ်စိုပ်သ္ၚိတုဲ အိုဿီုကောန်သမ္ဘာတွဳဝါရ ဍိက်သ္ကံဗော်သွးဂမၠိုၚ် ကၠုၚ်ဗိုၚ်တွဳသ္အဳဗဂါဒၟံၚ် ဗောဓိသတ်ဂှ် ညံၚ်သၟန်သၞံၚ်နက်သတ်ဂမၠိုၚ် မဗိုၚ်ဒၟံၚ်သၟိၚ်ဂိတုဂှ်ကီု၊ ညံၚ်ဂၠံမတ်ဗြဲဂမၠိုၚ် မဗိုၚ်ဒၟံၚ်စက္ကဝါကီု ကောန်ဂၠုဗောဓိသတ် ဓမ္မပါလတုန်လေဝ် ယာံတဴကဵုဗောဓိသတ် ဗွဲမလောန်ရ။
“တာတဝိတာ−ယွံမအံက်ကျာ်ဂန် မအံက်မွဲ မဒှ်ဇြဲသဓုံပိုဲ မအံက်မွဲ မဒှ်တ္ကံဗ္ဒးပိုဲဍိက်ရောၚ်၊ ညံၚ်ဆုသဓုံ မဒွံဒးကျာ်ဇမ္ကာတ် တၟိုၚ်အာကဵုပိုဲဍိက်တုဲ ပိုဲသ္ဇက်ဇူဗ္ဒဟၟဲရအဴ၊ ဂတနူဝွံ မူကာပိုဲဍိက်သ္ဂောံညာတ်တၠဂုန်ညိပၠန်ရောအဴ၊ ဂတဝွံ မူကာလ မသ္ဂောံမိၚ်ပါၚ်တၠဂုန်ဂှ်ညိပၠန်ရောအဴ၊ ပိုဲဍိက်သ္ဂောံညာတ်တၠဂုန်ဂှ်ဟၟဲရ၊ ပိုဲဍိက်ဂွံမိၚ်ပါၚ်တၠဂုန်ပၠန်ဂှ်ဟၟဲရ”ဂးတုဲ ဍေံတံယာံတဴအိုတ်ရ။
ဗောဓိသတ်ဟီုဒလောံဗတောန်ဍေံတံတုဲ “မၞးတံဒၟံၚ်ရ လ္ပစံၚ်တူရ၊ အဲသ္အာကဵုမၚ်ဗၠာဲကိစ္စာဲရ”ဂးတုဲ ဗောဓိသတ်က္တဵုအာကၠေံရ၊ စိုပ်မၚ်ဗၠာဲကစ္စာဲတုဲ သာ်ဝွံ ဗောဓိသတ်ဂး။
“ယွံမၚ်ဗၠာဲ အဲဒလောံဗ္တောန်ကောန်သမ္ဘာ တွဳဝါရအဲဂမၠိုၚ်တုဲရ၊ အဲကလံပူဇဴတုဲရ၊ ဂၞကျာ်အမာတ်ဒဴဗညာ ကောန်သၟိၚ် ကမၠောန်မံၚ်မသၟိၚ်ကီု သီုညးဍုၚ်ဂမၠိုၚ် သီုသၟိၚ်ကၠံမွဲက္ဍိုၚ်ဗတာၚ်ဂှ်လေဝ် အဲဒလောံဗတောန်အိုတ်တုဲရ၊ ဆဝွံ မၚ်ဗၠာဲဒးဒၞာဲမၚ်ဗၠာဲသ္အာဂွံရ” မၚ်ဗၠာဲကစ္စာဲမိၚ်တုဲ ရဴဝွံသ္ဂးရ။
“ယွံတၠပညာ ဒှ်ရသာ်ဂှ် ညံၚ်သ္အာရ၊ ဒၟံၚ်ဍုၚ်ပိုဲဂှ် သ္ၚောဲသန်၊ တၠပညာအာတုဲ သ္ဂောံကလေၚ်ပၠန်ဂှ်ဟၟဲရ၊ ဒၞာဲမသၟိက်ညာတ်တုဲဂှ် ရံၚ်ဗဵုလဝ်ပတုဲရ၊ တၠပညာ လ္ပဒညကဵုအဲရ၊ တၠပညာ ရပ်ဗတချေံအဲကဵုဗိုန် အဲသ္အာရ ဍေံဂး” ဗောဓိသတ်မိၚ်တုဲ ကြီုကဵုမၚ်ဗၠာဲရ။
“ယွံမၚ်ဗၠာဲကစ္စာဲ အဲဒညဒၟံၚ်မ္ဂးဂှ် လ္ပဟီုညိရ၊ သ္ဘဴမၞိက်ဒညဖေက်ဂစိုတ် ဂိုဟ်လမျီုမ္ဂးဂှ် နူသွတ်တ် မ္ဒးပ္တုဲလဝ်သရာံပါပ်ဂှ် ချိုတ်တုဲ စှ်ေဒးနရက်၊ ဟိုတ်ဂှ်တုဲ ညးမ္ဒးဖေက်ဂစိုတ်အိုတ်ရောၚ်။ အဲသာ်ဂှ်ဟသေၚ် နူသွတ်တ် မဂွံခၞံဗဒှ်လဝ်ကုသဵု ဂွံမၚ်မွဲလဝ်ဓဝ်သစ္စဗိုန်ဒၟံၚ်တုဲ မူဒှ်အဲမဖေက်ဒညကဵုဂစိုတ် နွံတုန်ရော”ဂးတုဲ ဗောဓိသတ်သ္အာၚ်ၚ်ဂှ် ဟွံဒညရ၊ ဟိရိအဲသလီုအာတုဲ ဒေဝတဴဂြိုပ်တံညာတ်အာတုဲ ဝိဓုရ တၠပညာဂှ် သာ်ဝွံ မဒှ်ရောၚ်ဟာဂးတုဲ ကရဴကၠေံကဵုအဲရသွံ သာ်ဝွံ ဗောဓိသတ်ချပ်တုဲ ဗောဓိသတ် ဗၞုဟ်ပါရမဳစှ်ရ။
“ယွံပါရမဳစှ် ကဵုအဲဂွံကလေၚ်ဇရေၚ်ကောန်သမ္ဘာ ကဵုအဲဂွံညာတ် ကလောတွဳဝါရ သီုပြဘာတ်ပိညိ အဲသ္ပသဇိုၚ်မၞးပါရမဳစှ်ရ၊ ဟိရိသြတ္တပ္ပသဳလအဲဂှ် မၞးတံညးစှ် မဒှ်ကောဂမာအဲရ၊ ထ္ၜလဘာ် ဒ္ဂူသၞောဝ်ကဵုအဲညိ” သာ်ဝွံ ဗောဓိသတ် ရာဒနာ ပအဓိဋ္ဌာန်တုဲ လဗိုန်ဇကုရ၊ တဲၜါဂှ်ရပ်ဗတချေံ ဇိုၚ်ၜါဂှ် လိုန်လဝ်ဇိုၚ်ချေံၜါတုဲ ဗောဓိသတ်သ္ဂးရ။
“ယွံမၚ်ဗၠာဲကစ္စာဲ အဲရပ်ဗတချေံ ဗိုန်တုဲရ၊ မသ္အာဂှ် အာဂွံရ” ပုဏ္ဏကမိၚ်တုဲ ဍေံက္ဍိုက်ကေတ်ချေံ ကလာၚ်အာလ္တူအကာသရ၊ ကျာ်တြဲနာဲညးဘုံပိ မဂ္ညိဒၟံၚ်သီုအရံၚ်အံၚ်သူ လျးတြဴမဝေတ်တဴ ဇန်သပ္ပရိုဟ်ဗဗွဲဓဝ် မပ္ကၚ်ရၚ်လဝ်ဒြပ်အရဳ ထပှ်ပြကာ အန္တရာဲခဏ် မရနုက်ကုထပှ်ဂှ် ညံၚ်ပၞာၚ်တိုၚ်ထဝ် မဟပၠိုတ်အာ နလျးမထီုစဳပျးလဝ်ရောၚ်မိဂ္ဂး ။
ကောန်သမ္ဘာ တွဳဝါရဂမၠိုၚ် ပလံၚ်ဏာဗောဓိသတ် ဆတံတရဴတုဲ ဒတဴဒိုအ်ဒၟံၚ်အိုတ်ရ၊ ဒဒှ်ဍေံမဗ္ဒေံက္ဍိုက်ချေံလတူကၞတ်ပြာသာဒ်ထပှ်ဘုံဂှ် ညးဂမၠိုၚ်ဟွံတီ ဍေံကလာၚ်အာရ၊ ပ္ဍဲမကလာၚ်အာဂှ် ပုဏ္ဏက သာ်ဝွံမချပ်၊ “အဲဟွံမိက်အာသ္ၚောဲရ၊ ပ္ဍဲဂြိုပ်ဟေမဝန်အဲဗ္ဒဴဏာချေံတုဲ လယတ်စုတ်ဒြၚ်တၟံ ကဵုချိုတ်အာတုဲ ဆဖျုန်ဂြိုဟ် အဲကေတ်ဖျေံဏာ ဗလးကဵုအၚပ်ဂၞကျာ် ဝိမာလဒေဝဳတုဲ အဲဂွံဣရန္ဓတဳသီုကုသဵုရုပ် ကဵုဖျံဏာဍေံ”ချပ်တုဲ၊ ဍေံဗ္ဒဴဒြေပ်ဏာချေံဍေံ အကြာဂြိုပ်ဟေမဝန်ပိလတုန်ရ။
ပါရမဳစှ် ညံၚ်စမြိုၚ် မဗက်ဗ္ဒဴဏာဂတကီု “ယွံမၞးတံ ဆုဒြၚ်တၟံတံဟိုဲ မၞးတံစှ်ေပါဲဖရာဲဇကုဗောဓိသတ် ကျာ်တြုံတၠပါရမဳ မကၠုၚ်ရ၊ ညံၚ်ရဴမကော်ဂးကီု တၞံဆုဒြၚ်တၟံတံဂှ် ဗၞတ်မွဲမွဲဟတ် မရှာဲတိတ်အာ နူဇကု ဗောဓိသတ်လၟောဝ်ကျာ်ရ”။
ပုဏ္ဏက ကေတ်ဏာကၠေံဗောဓိသတ် ညးဂမၠိုၚ်ဟွံညာတ်တုဲ အိုတ်ညးဂမၠိုၚ် ယာံလောန်ကၟဝ်တဴကဵုဗောဓိသတ်ပ္ဍဲကာလဂှ်ရ၊ မူညံၚ်မတုပ်ပၟာရော၊ အိုတ်တၞံဆု အလုံဂြိုပ်ဟေမဝန်ဂှ် ဒွံဒးကျာဝေရံၚ် ဗရာတ်တုဲ ရဴမဒေါံတၟဝ်ကဝ်ဏးတဴကီု ညံၚ်သာ်ဂှ်ကီုရ၊ အိုတ်ကဵုကောန်ဇမၞော်သမ္ဘာလ္ၚီ ဍိက်ဗြဴထပှ်ကၠံ ညးဒိုက်ညးလွေဟ် သမ္ၚေဟ်သေဋ္ဌဳ ဗမၞး ညးဂၟံၚ် သီုဖအိုတ် ယာံလောတ်တၟဝ်ဒၟံၚ်အိုတ်ရ၊ ဍေံတံယာံတိုန်အာကဵုသၟိၚ်ရ၊ သၟိၚ်ညာတ်ဍေံတံညးဂမၠိုၚ်မယာံသ္ၚိတ်သမ္ၚဝ်ဒၟံၚ် ညံၚ်အသံဂၞဴမှာသၟိတ်ဗြုဂမြံဒၟံၚ်ရဴဗြု အသံကျာလေဝ်ကဝ် မဂအိက်တမ်ညဝ်ဒၟံၚ်ဂှ် သၟိၚ်ညာတ်တုဲ သၟိၚ်သ္ဂးရ။
“ပမၞးတံမ္ဒးယာံရော” “ယွာံတၠတိဇၞော်မၚ်ဗၠာဲကစ္စာဲဂှ် မၞိဟ်ဟသေၚ်အဴ ကလော်ဍေံမပလွေဟ် ဗမၞးရောၚ်အဴ၊ ဍေံဂွံဏာတၠပညာတုဲ ဍေံဏာဂစိုတ်စဖျုန်ဂြိုဟ်ရောၚ်အဴ၊ တၠပညာမဒှ်စ္ၜုဲစ္ၜော်ပိုဲရောၚ်၊ တၠပညာမဒှ်သ္ကံဗ္ဒးပိုဲ မဇိုန်ကဵုသွဝ်ဗြီု နိဗ္ဗာန်ကဵုပိုဲညးဂမၠိုၚ်ရောၚ်၊ တၠပညာမဒှ်လမျီုပိုဲရောၚ် တၠပညာဟွံမွဲ ဟွံစိုပ်ပိုဲတုဲ မူဖဵုပိုဲဍိက်ဒၟံၚ်သ္ပရော၊ ဆထပှ်တ္ၚဲလောန် တၠပညာဟွံစိုပ်ပိုဲညးဂမၠိုၚ်တုဲ ပ္ကောံနၚ်ဗွဝ်အှော်မဂၠိုၚ် ဗဝ်ပၟတ် ဂခြကဵုဇကုတုဲ ဆၚ်လုပ်ပ္ဍဲပၟတ် ဂစိုတ်ဇကုရအဴ”ညးဂမၠိုၚ်ဂး ။
ပ္ဍဲညးဂမၠိုၚ် က္တဵဒှ်လၞီ ယွာံမလောန် ပ္ဍဲဗောဓိသတ်ဂှ် သာ်ဝွံ ညးစောဒနာ လာလမဒှ်ကျာ်တုဲ မပ ပရိနိဗ္ဗာန်ဂှ် မူပညးဟွံဂစိုတ်ဇကုရော၊ ကာလမဒှ်ဝိဓုရ ပုဏ္ဏက မဂွံဏာဂှ် မူပညးဂမၠိုၚ်မဂစိုတ်ဇကုရော၊ မူပၟာမတုပ်ရော၊ ညံၚ်ပူဂဵုမအာစိုတ် အယုက်ကၠံသၞာံတုဲ သၟိၚ်ဂစိုတ် မကေတ်ဏာဂှ် ရဴသ္ဍိုက်ညး မအောန်အာကီု ညံၚ်ပူဂဵု မအာစိုပ်အယုက်စှ်တြဴသၞာံ ဃောကွိုန်ပိုန်ဟာန် ဒယှ်တှ်ဂှ် သၟိၚ်ဂစိုတ်ဒမြိုဟ် မကေတ်ဏာဂှ် ပူဂဵုဂှ် ရဴမသ္ဍိုက်ညး၊ ညးမဂိုဟ်မဂၠိုၚ်ရောၚ်၊ ညံၚ်မိကဵုမ မသ္ဍိုက်အောန်အာကီုရ၊ ကောန်သၟတ်ဂှ် ရဴမဒှ်သ္ဍိုက်မိကဵုမ မဂၠိုၚ်ဂှ်ကီု ညံၚ်သာ်ဂှ်ကီုရ၊ ဝိဓုရတၠပညာဝွံဂှ် မဒှ်ညံၚ်ကောန်သၟတ်ရ၊ သ္ဍိုက်ညးက္ဍၚ်သန် သွဟ်သာ်ဝွံ ဂပ်ဝ်သမ္တီ။
သၟိၚ်ဟီုပၠာံဗဇးဇိုတ်ဍာ်ရမတ် ဍေံတံညးဂမၠိုၚ်တုဲ သာ်ဝွံသၟိၚ်ဂးကဵုဍေံတရ၊ “ယွံမၞးတံညးဂမၠိုၚ် မၞးတံလ္ပဒိုက်စိုတ်ရ၊ တၠပညာဝွံ တၠပါရမဳရောၚ်၊ နွံတဴကဵုသစ္စဝါဒဳရောၚ်၊ ဓဝ်မပြတတၠပညာတွံကဵုမၚ်ဗၠာဲတုဲ ညံၚ်ထိုၚ်သာဲအဒါ မဂွံအမြာဲဍောၚ်ပ္ကဴတုဲ ရဴမလှောၚ်ဗ္ၜူတဴကီု ညံၚ်သာ်ဂှ်ကီုရ၊ နရှ်ဓဝ်ပညာဂှ် တွံဖျုၚ်ဗ္ၜူကၠေံစိုတ်မၚ်ဗၠာဲတုဲ ကၞိပ်ဍေံဒးဖျေံတမ်ဇိုၚ်တၠပညာပၠန်ရ၊ မိၚ်ဓဝ်တုဲ စိုတ်ဍေံမ္ဒးသ္ဇုၚ်အာတုဲ ညံၚ်ကောန်ဍိက် ဗ္ဒးဗက်အာ ကြဴတၠဂှ် ဍေံမ္ဒးဗက်တဴကြဴတၠပညာပၠန်ရ၊ ဍေံဒးပလံၚ်ဖျဴနၚ်တၠပညာပၠန်ရ၊ တၠပညာ သ္ဂောံစိုပ်ပိုဲပြဟ်ကီုဂှ် မၞးတံလ္ပဒိုက်စိုတ်ရ” သာ်တွံ သၟိၚ်ဟီုပၠာံဗဇး လဒံသမ္ၚံက်ကၠေံစိုတ်ညးဂမၠိုၚ်တုဲ သၟိၚ်ဗက်ဖျဴဏာညးဂမၠိုၚ်အိုတ်ရ။
ပုဏ္ဏက ဍေံကေတ်ပ္တိုန်ဏာတၠပညာ လ္တူက္ဍိုပ်တၟံကာလာဂိရိတုဲ ဍေံက္တဵုဗဒှ်ရုပ်ကလော်ဇၞော်မွဲဂှ် ဂၞေဟ်ၜါသကာဒၟံၚ် ဗၞတ်တၟာတၞံတာဗၠာဲ ကလော်ဂှ် ရပ်ကေတ်ဇကုတၠပညာတုဲ ဍေံပၠောပ်လဝ်အကြာဂၞေဟ်လ္တူသၟဝ် စွံလဝ်ညံၚ်ၚာဲဖလေက်ကၠေံကီု ဍေံပဂှ်လေဝ် ဗောဓိသတ်ဟွံဖေက်တုဲ ဍေံက္တဵုဗဒှ် ရုပ်ဇာဒိသိုၚ် ဒြေပ်ဒဟဵုကၠုၚ် ညံၚ်မကိတ်ဂိုၚ်ဒရေပ်ဏာကီု ဍေံပတုဲ ဍေံက္တဵုဗဒှ်ရုပ်စိၚ်ဒြၚ်မွဲ မဒြေပ်ဒဟဵုကၠုၚ်ညံၚ်မတ္ၚဵုဖလေက်ကၠေံကီု ဍေံပတုဲ ဍေံက္တဵုဗဒှ်ရုပ်ဇြုံဇာတ် ဗၞတ်တၟာသၟူသၞာတုဲ ပူပၠဳဇကုဗောဓိသတ်တုဲ တိုန်ယိုက်ဒၟံၚ်ဒၞံက်လ္တူက္ဍိုပ် ဍေံမပနပွမဂၠိုၚ်ကဵုသာ် ၜိုန်ဍေံမပတဴကီု ဗောဓိသတ်ဟွံချိုတ်ဟေၚ်၊ ဍေံက္တဵုဗဒှ်ကျာဇမ္ကာတ်တုဲ ကဵုပိုက်သလှေက်ကၠေံ ဗောဓိသတ်ရ။
ယာံဗၞတ် သော်ဇကုဗောဓိသတ်ညဳကီု ဟွံချဳအာဟေၚ် နူတၟံကာလာဂိရိဂှ် ဍေံသောဝ်ဖျေံဗောဓိသတ်ရ၊ ညံၚ်တောဝ်ကြိက်ပဝ်စှ်ေဂၚ်ဒၟံၚ် တၞံဆုဂှ်ကီု ဗောဓိသတ် ဟွံဒွံပရိုက်သက်က်ဟေၚ် ဟွံဒတုံတိဍေံဗိုတ်ပ္တိုန်လ္တူက္ဍိုပ်တၟံ ပၠန်ဂှ်လေဝ် ညံၚ်ညးမဗိုတ်ပ္တိုန်လ္တူက္ဍိုပ်တၟံဂှ်လေဝ် ညံၚ်ညးမဗိုတ်ပ္တိုန်လ္တူဖုန်သ္ဍဳကီု ဗောဓိသတ်ဟွံဒှ်ပရိုက်ဟေၚ် နပွမဂၠိုၚ်ကဵုသာ် ဍေံမပကဵုဗောဓိသတ်ဟွံဒှ်ပရိုက်ဂှ် မူဟိုတ်ရော ဍေံဂှ် ဟိုတ်လောဘ ဒေါသရောၚ်၊ ဗောဓိသတ်ဂှ် နမေတ္တာ ဗယာပ်ဏာဒၟံၚ်ပ္ဍဲဍေံတုဲ ဍေံပရိုက်ဟွံမာန်ရောၚ်။
ဗောဓိသတ်ဟွံချိုတ်တုဲ ပ္ဍဲဗပါ်တၟံဍေဴတဖဝ် ပ္တုံဖျေံ ဗောဓိသတ် မဒတုံစှ်ေအာဂှ် ပါရမဳစှ် ခံမိန်လဝ်ဗောဓိသတ် ညံၚ်မိမိန်ၝဲဂမာ မမိနထ္ၜလဝ်ကီုတုဲ ဍေံစှ်ေကေတ် ဂိုၚ်ပ္တိုန်နၚ်ဗောဓိသတ်သမ္ၚေဟ်ဂုန်ပၠန်ရ၊ ဍေံၚဳမုက္ခဝါ ဗောဓိသတ်ဍိုပ်ဍဴဒၟံၚ်ညံၚ်ဍောၚ်သွာ မညာတ်တၠကွဳစက်သြန်ကီု ဍေံသွက်ကေတ်ဇိုၚ်ၜါတုဲ ဍေံဒဟုဲဖျေံဏာ ဗက်ညံၚ်က်ဗဝ်မှောဝ်ကီု သီုဇကုဗောဓိသတ် ဂေတ်ဒဟုဲဒၟံၚ်ဇကုဗောဓိသတ်ဂှ် ဂေတတဴရ။
စိုတ်ဗောဓိသတ်တုန် မသက္ကုကသဳဟေၚ် ညံၚ်တၞံဆုမတဝ်ဒၟံၚ်မုက်ကျာရ၊ ကၞာၚ်သၠရောၚ်မချဳ လမှဳတၞံဆုဂှ် မဟွံဂွံချဳကီု ဇကုဗောဓိသတ်ဂှ် ညံၚ်ကၞာၚ်ဆုမချဳရ၊ စိုတ်ဗောဓိသတ်တုန် ညံၚ်လမှဳတၞံဆု မသက္ကုကသဳဂှ်ကီုဟေၚ်၊ မာတ်ဗောဓိသတ် မဟွံချိုတ်အာ ဍေံသွက်ကေတ်ဇိုၚ်ၜါတုဲ ဍေံဟနိပ်သောဝ်ဖျေံဏာ ဗွဲသၟဝ်ဗပါ်တၟံ မၞုံဗၞတ်လယိုဟ်စှ်ယောဇနာ ဍေံမသောဝ်ဖျေံနာဂှ် ညံၚ်တောဝ်ချဵုပွန်ဒွံဒကျာ မကလာၚ်အာ စပ်ဒၟံၚ်ပ္ဍဲဂၠးဗ္ဒၚ်သ္ၚိဂှ်ကီု ညံၚ်သာ်ဂှ်ကီုရ၊ ဇကုဗောဓိသတ် အာဍုန်ဒၟံၚ် ဂါပ်ဆုဟေၚ်တုဲ ဍေံဇလိၚ်ပ္တိတ်တဲ ဍေံသွက်ကေတ်ဇိုၚ်ၜါတုဲ ဍေံဂိုၚ်ပ္တိုန်ဏာဗောဓိသတ်ပၠန်ရ။
ဍေံသ္ၚဳရံၚ်မုက် ဗောဓိသတ် ညံၚ်ဍောၚ်ဒကှ်သြန်မရာၚ်ဒၟံၚ် ပ္ဍဲလစသြန်ကီုတုဲ ဍေံဇလိၚ်ပ္တိတ်တဲ စှ်ေဂြဲသွက်ကေတ်ဇိုၚ်ၜါ ပ္ဍဲဗပါ်တၟံမၞုံဗၞတ်လယိုဟ် တြဴစှော်ယောဇနာ ဍေံသောဝ်ဖျေံဏာပၠန် ဗောဓိသတ်ကလာၚ်စှ်ေ တန်ဒၟံၚ် ပ္ဍဲတာန်ဆိပ် ဇုက်ဆုညမၚ်သရေၚ်ဇုက် ၜဳညးမဒဟုဲ ဝေၚ်ဂှ်ကီု တုဲနဣဓိဍေံ ဇလိၚ်ပ္တိတ်တဲ ဂိုၚ်ဂြဲသွက်ပ္တိုန် သ္ၚဳရံၚ်မုက် ဗောဓိသတ်တုဲ ညံၚ်ဒ္ၚောဝ်ဗိုတ်ကသူတဲ ဒေဝတဴကီု ဇကုဗောဓိသတ်ဍေံ သွက်တလာဲဒၟံၚ် ညံၚ်ပ္ကဴမၠဵုဇၟန်မသွက်လဝ် ပ္ဍဲဘဲကီု မာတ်ဗောဓိသတ် ဟွံချိုတ်တုဲဂှ် သာ်ဝွံ ဍေံမချပ်၊ “အဲသောဝ်ဖျေံ ပ္ဍဲဗပါ်တၟံမဂၠိုၚ်ဝါတုဲဂှ်လေဝ် ဟွံချိုတ် မွဲဝါဝွံ အဲလပိုက်ဂစိုတ် ပ္ဍဲက္ဍိုပ်တၟံဝွံရ”ဍေံဂး။
ဗောဓိသတ်မိၚ်တုဲ သာ်ဝွံ ဟီုတိုန်ရ၊ “ယွံမၚ်ဗၠာဲ အဲသ္ၚဳမွဲရုပ်သာ်မုက္ခဝါနာဲဂှ် ဒှ်ဒၟံၚ်ထၟိက်ရောၚ်သွံ၊ မူပစိုတ်မဂွံဂြိုဟ်စာဂလိုၚ်ဝွံရော၊ မူဟိုတ်မၚ်ဗၠာဲမ္ဒးဂစိုတ်အဲရော၊ မူယၟုမၚ်ဗၠာဲကွေံရော”
“ယွံတၠပညာ ယၟဲအဲပုဏ္ဏက အဲမဒှ်ကၟိန်သၟိၚ်ဗဳသြဴရ၊ တၠအဲကြဳဇှ်နာဲကလော်ဂမၠိုၚ်ရောၚ်၊ တၠပညာ မိၚ်တဴပရိုၚ်ကီုရ”
“ယွံမၚ်ဗၠာဲ အဲဝွံသတြုဟၟဲ ပ္ဍဲညးညိသွံ၊ အဲမဂွံတွံဓဝ်ဇိုန်ကဵုတသိုက်သွဝ်ဗြီု နိဗ္ဗာန်ကဵုညးရောၚ်သွံ မသၟိက်ဂစိုတ်အဲဂှ် မူပၟိက်မရော”
“ယွံတၠပညာ အဲသၟိက်ဂစိုတ်တၠပညာဂှ် ပၟိက်အဲသ္အာၚ်ဟၟဲရ၊ ဂၞကျာ်ဝိမာလာဒေဝဳ သမ္ဘာသၟိၚ်နာ်ဝရုဏဂှ် အၚပ်သၟိက်ဂွံဖျုန်ဂြိုဟ်တၠပညာဗဗွဲဓဝ် အဲသကေတ်ကဵုဂွံမ္ဂး ကောန်ဗြဴမွဲ ဣရန္ဓတဳဂှ်မပတၠရုပ် ညံၚ်ကောန်ဒေဝတဴဗြဴတာဝတိၚ်ဂှ် သကဵုဒှ်ဍိက်ကမၠောန်အဲမွဲအယုက်ရ၊ ဣၚုဟ်မ္ဂး ဟိုတ်ဂှ်ရ အဲမ္ဒးပလွဳဂစိုတ်ကၠေံတၠအဲရောၚ်” မိၚ်ဂလာန်ဍေံတုဲ သာ်ဝွံ ဗောဓိသတ်ချပ်ရ။
“သၟိၚ်နာ်တိုန်မၚ်သဳ ညးပန်ဂှ် ဒှ်ဝိဝါဒ ဟိုတ်နူဓဝ်သဳလ ကၠုၚ်ဒုၚ်အစဳရေၚ်အဲ မိၚ်တဝှ်ဓဝ်အဲတုဲ သီုညးပန်သ္ပပူဇဴတုဲ သီုညးပန်စဴအာဋ္ဌာန်ဒၟံၚ်ဇကုရ၊ ဂၞကျာ်ဝိမာလဒေဝဳ သၟာန်သၟိၚ်နာ်တုဲ သၟိၚ်နာ်ဟီုကဵုပရိုၚ်အဲ ဂွံမိၚ်ကေတ်တုဲ ဂၞပ်သၟိက်ဂွံကလၚ်ပၚ်မှိၚ်ဓဝ်တဲရောၚ် မတန်ဒၟံၚ်ရ” ဗောဓိသတ်ချပ်တုဲ ဟီုကဵုပုဏ္ဏကရ။
“ယွံမၚ်ဗၠာဲ ကလော်တံဂှ် ဓဝ်သတိလုတ်အာ ဟိုတ်သတိလုတ်ဂှ်တုဲ မ္ဒးဒှ်လလေၚ်ဂၠိုၚ်သန်ရ၊ မၚ်ဗၠာဲလေဝ် လေပ်ဓဝ်သတိ ဝိုတ်အာကီုရ”
“ယွံတၠပညာ သတိအဲဟွံလုတ်ရ၊ သၟိၚ်နာ်ဝရုဏ ဟီုကဵုယၟုတၠအဲ ဝိဓုရ မဒှ်အမာတ်သၟိၚ်ဓနဥ္စယကောရဗျ ဣၚုဟ်မ္ဂး အတိုၚ်သၟိၚ်နာ် မဟီုကဵုအဲ အဲသမ္တီလဝ်ဗိုန်ဒၟံၚ်ရ၊ ဇကုတၠအဲမဒှ်သက်သဳရ၊ ညံၚ်ပါၚ်သၟိၚ်နာ်ဂှ် အဲသမ္တီလဝ် ဟွံဆောတ်သက်က်ရ”
“ယွံမၚ်ဗၠာဲ မမိက်ဂစိုတ်အဲဂှ် မသ္ဂောံဂစိုတ်ရ၊ မဓုရ ဓမ္မမ္ဂးဂှ် ဓဝ်မတုပ်တဴ ရဴရှ်ဗ္တဝ်သာ်ဂှ်နွံတဴ အဲဟွံဂွံတွံကဵုညးမွဲလှ်ေဏီ အဲဂိုဟ်က္ဍၚ်သန် မၚ်ဗၠာဲပၚ်မှိၚ်ဓဝ်အဲညိကၠာ အဲတွံကဵုဓဝ် ကုမၚ်ဗၠာဲတုဲ မၚ်ဗၠာဲဂစိုတ်အဲဂွမရ၊ မၚ်ဗၠာဲဖျေံစွံလဝ်အဲညိကၠာ” ဗောဓိသတ်ဂး။
ဍေံမိၚ်တုဲ ဍေံဖျေံစွံလဝ်ဗောဓိသတ်ရ၊ ယာံဍေံမိၚ်လဟီုဗောဓိသတ်ဗက် မူဟိုတ်ဍေံမဂွံဍိုန်စိုတ်ရော၊ ဟိုတ်ဗောဓိသတ် မဂစံလဝ်သစ္စတုဲ ဒၞာဲဂလာန်မွဲမဟီုဂှ် မဒှ်သိတ်ရောၚ်၊ ဍေံမဍိုန်စိုတ် မ္ဒးဖျေံပြဟ်ရောၚ်၊ ယြဴပူဂဵုမွဲ ဟွံဂၜံလဝ်ဓဝ်သစ္စတုဲ ဒၞာဲဒၞာဲမဟီုကဵုညးဂှ် ပါၚ်ထောၚ်ကံကဵုသ္ကဟ်အာကီု၊ ညးဟွံကေတ်စ ဟွံပဗက်ဟေၚ်၊ ယထာကုသရာသိမှိ အာကောတိတခိဏ္ဍကောဝိယ၊ ညံၚ်ကၞက်ညးမတက်လဝ် ပ္ဍဲသ္ကာဂှ်ကီုရ၊ ဂလာန်ဂှ် တဆေဝ်အာတဍေက်ပ္ဍဲစိုတ်ညး ညံၚ်ဍာဲဗြဲ မဗ္ဂူလ္တူသၠဒကှ် မတဆေဝ်အာ မဟွံစပ်ကဵုသလဒကှ်ဂှ်ကီု တီဒဵုဝွံတုဲ ဓဝ်သစ္စဂှ် မဟတ်ပတၠအိုတ်ညိ။
သာ်ဝွံ ပုဏ္ဏကမဟီု၊ “ယွံတၠပညာ ဓဝ်သပ္ပရိုဟ် ပန်သာ်မ္ဂးဂှ် တၠအဲတွံကဵုအဲကလၚ်ပၚ်မှိၚ်ညိ” ဍေံဂး။
“ယွံမၚ်ဗၠာဲ အဲမကၠိခ္ဍက်သန် ဓဝ်မပြဲလောန်ရောၚ်၊ ကဵုအဲတွံသာ်ဝွံ ဟွံဆာဲညိသွံ၊ အဲဂွံဟုံဗလိုပ်သ္အးဇ္ၚးညိတုဲ ဓဝ်မပြဲဂှ် မဂပ်ဝ်တွံရောၚ်သွံ” ဗောဓိသတ်ဂး။
မူဟိုတ်ဗောဓိသတ် မ္ဒးပါန်လမျီုကဵုပုဏ္ဏကရော၊ ယဝ်သ္ဂးမ္ဂး ဒဴဂရိုဟ်ဇန်တံတုဲ မ္ဒးပါန်လမျီုရောၚ်၊ ပသာ်ဂရိုဟ်ဇန်တံဂှ်ရော ဝိဓုရ တၠပညာ ဂွံပ္တုဲကၠေံဝါဒ သၟိၚ်အိန် သၟိၚ်နာ် သၟိၚ်သ္ပဝ် ဆိုက်ဗ္ဒက် ပ္ဍဲဓဝ်လေဝ်ဂး ဒုၚ်ပူဇဴညးလေဝ်ဂး ဆဇကုညိဗလးနူတဲ ပုဏ္ဏကသွံ သာ်ဝွံ ဗယိညးကၠုၚ်ရ၊ သၟိၚ်ဒဴဗယိညးတုဲ ဗောဓိသတ် မ္ဒးပါန်လမျီုရောၚ်။
ဝါမွဲနဲတုန် သာ်ဝွံ ဗောဓိသတ်ချပ် − ယာံလမျီုအဲသၞာံကုသဵု မပ္တံဒါန်သဳလဘာဝနာ အဲဂွံပတုဲ အဲဂွံတရံၚ် လဍုဟ်ပါရမဳအဲ ပါရမဳစှ် အဲသ္ဂောံကြံၚ်က္ဍုဟ်အာ မွဲနဲတုန် ပုဏ္ဏကဝွံ ယာံဍေံဂစိုတ်ရကၠေံအဲ မသက္ကုဒုဟ်ရောၚ်၊ သၟိၚ်အိန်တီတုဲ သၟိၚ်အိန် ဂစိုတ်ကၠေံဍေံ ဒဵုက္ဍိုပ်ထပှ်စရောန် မ္ဒးကြကောတ်အာရသွံ ချပ်တုဲ မ္ဒးပါန်လမျီုရောၚ်၊ မွဲနဲတုန် အဲချိုတ်တုဲ ပုဏ္ဏက ကေတ်ဖျေံဏာဖျုန်ဂြိုဟ်အဲ ကဵုသၟိၚ်နာ်ဂၞကျာ်ဝိမာလာဒေဝဳ ညာတ်အၚပ်အဲ သၟိက်ပၚ်မှိၚ်ဓဝ်ရောၚ်သွံ၊ မဂစိုတ်ကၠေံတၠပညာဝွံ ဒုဟ်ဇၞော်ရောၚ်ဂးတုဲ ဂၞကျာ်ဝိမာလာဒေဝဳ သီုဓဝ်အစံၚ်တူမ္ဒးပကာဂစိုတ်ချိုတ်တုဲ မ္ဒးအာအပါဲရသွံ၊ သၟိၚ်နာ်မ္ဒးဖ္အောဝ်ဏာပုဏ္ဏကဂှ်တုန်လေဝ် ချိုတ်စှ်ေဒးအပါဲကီု ဟိုတ်နူ ဒဒိုက်သတ္တံဂမၠိုၚ်တုဲ ဗောဓိသတ်မ္ဒးပါန်လမျီုရောၚ်၊ ဣတိဝိသဇ္ဇနဝိသဇ္ဇေသိ၊ လၟေၚ်သွဟ်မရဴဝွံ ဂပ်ဝ်သမ္တီရ။
နဲပွမဂၠိုၚ်ကဵုသာ် ဍေံမပကဵုဗောဓိသတ် ဟွံဒှ်ပရိုက်ဂှ် မူဟိုတ်ရော ပုဏ္ဏက စကာကလော်ဂမၠိုၚ် ကဵုအာတုက်နၚ်ဍာ် လစအနုတတ်ကၠံနုၚ် ဍေံဗလိုပ်ဖုံဗောဓိသတ်တုဲ နယာတ်ဒိပ် မြမောဝ်ဒိပ် ပ္ကဴဒိပ် ဘောဇိုန်ဒိပ် ဍေံတရိုၚ်ဗ္စဗောဓိသတ်တုဲ သာ်ဝွံ ဗောဓိသတ်ချပ် တ္ၚဲဝွံ ဓဝ်မပြဲမတွံဂး ဖျုန်ဂြိုဟ်ဂှ် အဲဂွံတွံကဵုဍေံတုဲ အဲဂွံဗၠးနူဘဲဂစိုတ်ဟေၚ်ရ၊ နဣဓိဍေံ က္တဵုဗဒှ်ပၞၚ် ဍေံဂ္ညိဂ္ညာတ်လဝ်တုဲ ဍေံစကာကလော်ဂမၠိုၚ် ကဵုအာကေတ်နၚ်ပ္ကဴအလုံဂြိုပ်ဟေမတန်တုဲ ဂ္ညိဂ္ညာတ်ပၞၚ်ရ၊ ဓုပ်သ္ဍဴပ္ကဴမြမောဝ် ထီုဗးပ္ဍးတၟာဲဒၟံၚ်တုဲ ဍေံနိမန်ပ္တိုန်ဗောဓိသတ် လ္တူပၞၚ်ဂှ်ရ၊ ဗောဓိသတ် ညံၚ်တၠးစရာဲကျာ်ဂမၠိုၚ်ကီု တွံကဵုဓဝ်ကုပုဏ္ဏကရ။
“ယွံမၚ်ဗၠာဲ ဓဝ်ပန်သာ် ပၚ်မှိၚ်သမ္တီကဵုဗိုန်ညိ၊ ညးဓဝ်ပန်သာ်ဂှ်ရောမ္ဂးဂှ်−−
(၁) ညးပလဝ်ဂုန်ကဵုဇကုတုဲ မှတ်ဂြၚ်ဂုန်ညးညိ။
(၂) နတဲတမၞေက် လ္ပစံၚ်ပတူဂြိုပ်ညိ။
(၃) ဂလာန်မာတုဂါံ လ္ပပ္တေဟ်ပြဟ်ညိ။
(၄) မိတ်ထၟိက်လ္ပပလီစိုတ်ညိ။ ဣဝွံ ဓဝ်ပန်သာ်”ရ။
“ယွံမၚ်ဗၠာဲ ကလၚ်ပၚ်မှိၚ်ရ”
(၁)၊ ညးမပလဝ်ဂုန်ကဵုဇကုတုဲ ဂြၚ်ဂုန်ညးမ္ဂးဂှ် ဂုန်ညးပ္တုဲလဝ်ပ္ဍဲဇကုကၠာဂှ် တၟာဗၞတ်ညိညစပုၚ်သုၚ်ဍာ်ညးတုဲ တၟာအနုကီု ဗၞတ်တၟာချာကီုဒှ်ကီု တၟာသဳန္နရာတ်ဟေၚ် စွံလဝ်စိုတ်ကဵုဂုန်ညးတုဲ မှတ်ခၠေဝ်ပၠနဂုန်ညးညိ။
(၂)၊ နတဲတမၞေက် လ္ပစံၚ်ပ္တူဂြိုပ်ညိမ္ဂးဂှ် မ္ဒးဇူဒီုသ္ၚိညးတုဲ ဟိုတ်ဒၟာနူစပုၚ်သုၚ်ဍာ်ညးတုဲ လ္ပဂြိုဟ်ကဵုညးညိ၊ ယာံသ္ဒးဂြိုဟ်ကဵုညးတံဂှ်ရ ယဝ်သဒှ်မ္ဂး ဒှ်မဂြိုဟ်ကဵုမိတ်စှ်ပြကာရ၊ ပ္ဍဲလိုက်လေဝ်ဒှ်လေၚ် ပ္ဍဲပလိုက်လေဝ် မ္ဒးစှ်ေစိန်ဂၠက်ဒၟံၚ်ပ္ဍဲအပါဲရ။
(၃)၊ မိတ်ထၟိက် လ္ပပလီုကၠေံစိုတ်ညိမ္ဂးဂှ် ပ္ဍဲမိကဵုမ အ္စဥပဇျာဲ ညးမတွံဓဝ်ကဵုဇကုညးတံဝွံ မဒှ်မိတ်ထၟိက်ရ၊ ပ္ဍဲညးတံဝွံ ယာံသ္ဒးဂြိုဟ်မ္ဂးဂှ် ဒှ်မဂြိုဟ်ကဵုမိတ်စှ်ပြကာရ၊ ပ္ဍဲလိုက်လေဝ်ဒှ်လေၚ်ဇၞော် ပ္ဍဲပလိုက်လေဝ် မ္ဒးစှ်ေစိန်ဒၟံၚ်ပ္ဍဲနရက်ရ။
(၄)၊ ဂလာန်မာတုဂါံ လ္ပပတှ်ေပြဟ်ညိမ္ဂးဂှ် ပတှ်ေဂလာန်မာတုဂါံတုဲ မ္ဒးပ္တုဲလမျီုညး မ္ဒးပ္တုဲသရာံပါပ်ဂှ် ပ္ဍဲလိုက်လေဝ်ဒှ်လေၚ် ပ္ဍဲပလိုက်လေဝ်ဒှ်လေၚ်ကီုရ။
“ဣဝွံ ဓဝ်သပ္ပရိုဟ်ပန်သာ် မၚ်ဗၠာဲဂိုၚ်သမ္တီလဝ်ရ”
သာ်ဝွံ ဗောဓိသတ်တွံကဵုဓဝ် မဓုရဓမ္မရ၊ ပုဏ္ဏကဂွံမိၚ်တဝှ်ဓဝ်ဗောဓိသတ်တုဲ ၜိုန်ဍေံမတူဒၟံၚ် နဓဝ်ရာဂဒေါ သမာနဂှ် ညံၚ်ကၠေၚ်မွဲခရော် ညးမထၞဟ်လဝ်လ္တူက္ဍိုပ်ဖဴဂှ် နစၠန်ဂေါသိတ ညးထၞဟ်စိုတ်မွဲထၞဟ်မ္ဂး ရဴကၠေၚ်လေဝ်ၜိုဟ် ပၟတ်လေဝ်ပၠိုတ်အာကီု ညံၚ်ဂျိနာ် မဒွံဒးပၟန်သၟိၚ်သ္ပဝ်တုဲ ရဴမဟောံပၠိုတ်အာကီု ညံၚ်စိၚ်ဇၟူ မမိၚ်ထၞသၟိၚ်ဥဒိုန်ကီု၊ ပုဏ္ဏကမဒဇိပ်ဒၟံၚ် နဓဝ်ရာဂ ဒေါသ မာနဂှ် မိၚ်တဝှ်ဓဝ်ဗောဓိသတ်တုဲ ပ္ဍဲခဏဂှ် ကဏိတ်ဗ္ဒောံပ္ကၚ်ကၠေံ ဓဝ်ရောဂ ဒေါသ မာနတုဲ ဆၚ်တိတ်နူခရိုၚ် ရုပ်ဣနန္ဓတဳတုဲ ကသပ်မဂြိုဟ်ကဵုဗောဓိသတ်ဂှ် မအိုတ်အာရ။
“ဓဝ်ပန်သာ် တၠပညာမတွံကဵုအဲဝွံဂှ် ဒးအဲဖအိုတ်ရ၊ ဒှ်အဲဟွံဂြၚ်ဂုန်ညးကွေံရ ဒှ်အဲမဂြိုဟ်ကဵုမိတ်စှ်ပြကာကွေံရောၚ်၊ ယွံတၠပညာ ၜိုန်အဲဟွံဒဒှ်ေကဵုတၠပညာမွဲလှ်ေကီုလေဝ် ဂုန်တၠပညာမပ္တုဲလဝ် ပ္ဍဲအဲဂၠိုၚ်သန် ပ္ဍဲသ္ၚိတၠအဲ ပိတ္ၚဲမကဵုအဲဒၟံၚ်တဴဂှ် ပုၚ်ဍာ် ဘောဇိုန်မပြဲပြဲ တၠအဲ တရိုပ်ဗ္စအဲ ကမၠောန်တၠအဲမသုန်ကၠံ သီုကဵုသၟာကွိၚ်ကွိုက် ဒယှ်ေလှ်ေတံ တၠအဲသကဵုကၠောန်ၜိုတ်ကုအဲ ဂးမိတ်ထၟိက်ဂှ်လေဝ် တၠအဲဒှ်ရ၊ ဂးအ္စာဂှ်လေဝ် တၠအဲဒှ်ရ၊ တၠအဲမဒှ်တၠဂုန် အဲစၟတ်ကွေံရောၚ်သွံ ဗတ်အဲဟွံဂွံဣရန္ဓတဳဂှ်လေဝ်တုဲရ၊ လၟုဟ်အယသ္ဇက်ကၠာတ်ဓဝ်တၠအဲဟွံမွဲရ၊ လမျီုတၠအဲ အဲကၠာတ်ဓဝ်တၠအဲရ၊ အဲဗလးတၠအဲရ၊ တၠအဲစဴဍုၚ်တၠအဲရ”ပုဏ္ဏကဂး။
ပုဏ္ဏကဝွံ မူဟိုတ်ဍေံမိၚ်ဓဝ်ဗောဓိသတ်တုဲ မဂွံလုပ်စိုပ်ပြဟ်ဂှ်ရော ဟိုတ်နူဝါသနာအနာဂတ်ဂတ ဍေံဂွံဒှ်ကောဆန်ဒက်ချေံ ခဏ္ဍိဥ မပလံၚ်ပ္တိတ်ကျာ်တုဲ ကြဴတဲဂွံဒှ်ခမဳ ဂွံဒှ်အရှန်ပၠန် ဟိုတ်ဂ်ှရ ဍေံမိၚ်တွံဓဝ်ဗောဓိသတ်တုဲ ဍေံမဂွံလုပ်စိုတ်ပြဟ်ရောၚ်၊ ကောန်ဂၠု သၟိၚ်သိရိသုဒ္ဓေါဓန မပတၠဨတဒဂ္ဂညာန် မစိုန်ဒှ်တဴ ပၞာၚ်တိုၚ်ညး ဘုံပိ မဂ္ညိဒၟံၚ် ကေုာံစက်ၜါ ဇရာလ္ၚီ ရုပ်ကၠံဒစာံ မပတၠအလာံလျးတြဴသာ် မဂွံဟံၚ်ပြာ်သတ်ပုထုဇန် ဇမၞးဗ္တဳဂၚ်ဂမၠိုၚ်၊ သာဓု − ခဏ်မရနုက်ကဵုဒစာံဂှ် စိုန်မတွံပျးလဝ်ကဵုရောၚ်မိဂ္ဂး ။
၉။ ခဏ်ကာဠာဂိရိ[ပလေဝ်ဒါန် | ပလေဝ်ဒါန် တမ်ကၞက်]
“ယွံမၚ်ဗၠာဲ မရဗလးအဲဂှ် အဲဟွံစဴဍုၚ်အဲဏီရ၊ ဍုၚ်နက္ကဘဴဂှ် အဲသၟိက်ညာတ်ကၠာ၊ ၝကေတ်ဖျေံဏာအဲညိကၠာ၊ ဒတုဲမြမောဝ် ခါံသဳၝလေဝ်ဒှ် ဒတုဲမြမောဝ်ၝလေဝ်ဒှ် သမ္ဘာလေဝ်ၝသ္ဂောံရ၊ ဟိုတ်ဂှ်ရ အဲသၟိက်စှ်ေဍုၚ်နာ်ရောၚ်”ဗောဓိသတ်ဂး။
“ယွံတၠပညာ စက်ဂိတုလေဝ်ၜါ စက်တ္ၚဲလေဝ်ဟွံဒှ်ၜါ တၠအဲစှ်ေအာဍုၚ်နာ်မ္ဂးဂှ် သၟိၚ်နာ်သ္ဂောံတၠအဲတုဲ မသ္ကေတ်ဖျုန်ဂြိုဟ်တၠအဲရောၚ်၊ မူပတၠအဲ မသၟိက်စှ်ေအာပဍုၚ်နာ်ဂှ်ဏီရော”
“ယွံမၚ်ဗၠာဲဌာန်ဍုၚ်နာ် မဒှ်သတြုအဲရောၚ်မ္ဂးဂှ် အဲတီရ၊ မသ္ကေတ်လမျီုအဲရောၚ်မ္ဂးဂှ်လေဝ် အဲတီရ၊ တွဵုအယုက်အဲဝွံ သရာံပါပ်အဲ မ္ဒးပ္တုဲလဝ်ဂှ်ဟမွဲရ၊ ဟိုတ်ဂှ်ရ သတြုအဲ ကဵုဒှ်ကီု ယာံရညာတ်အဲမ္ဂး ဓမ္မတာဂှ် မ္ဒးဒှ်အာမိတ်ကီု” ဗောဓိသတ်ဂး
“တၠအဲသၟိက်ဂွံစှ်ေညာတ် ဍုၚ်နာ်မ္ဂးဂှ် ဍုၚ်နာ်တုပ်ဒၟံၚ်ညံၚ်ဍုၚ်သွဝ် စတုမရာတ်တေံကီုရ”ပုဏ္ဏကဂး။
“လၟုဟ်တၠအဲ သၟိက်စှ်ေဍုၚ်နာ်ရောၚ်မ္ဂးဂှ် ညံၚ်တိုန်က္ဍိုက်ချေံသ္အာရ” ဍေံဂး၊ ဍေံက္ဍိုက်ချေံဂတ ဗောဓိသတ်က္ဍိုက်ချေံကြဴတုဲ ဍေံဖျေံဏာဗောဓိသတ်ရ။
မူဟိုတ်ပုဏ္ဏကမက္ဍိုက်ဂတဗောဓိသတ်ဂှ်ရော၊ တ္ၚဲရသၟိၚ်နာ်စိုတ်ဟွံဍိုန် ပ္ဍဲဗောဓိသတ်ဂှ် ဍေံဂိုၚ်ဗ္ဒိုအ်လဝ်ချေံ ဍေံချပ်တုဲ ဍေံမက္ဍိုက်ဂတရောၚ်၊ ဗောဓိသတ်ကီု ပုဏ္ဏက က္ဍိုက်မွဲချေံစှ်ေအာဍုၚ်အာနာ်တုဲ ဗောဓိသတ်တုန် သီုစိုတ်မမိပ် စှ်ေနူချေံတုဲ ဂ္ဇံဒၟံၚ်ရ။
သၟိၚ်နာ်ဝရုဏညာတ်တုဲ ဟီုကဵုပုဏ္ဏကရ၊ “ယွံလေဝ်မၚ်ဗၠာဲ ဖျုန်ဂြိုဟ်ဝိဓုရ မသ္ကေတ်ကဵုရောၚ်မ္ဂးတုဲ မတိုန်အာနူပိုဲရ၊ လၟုဟ်ဝွံ ဇကုဝိဓုရရောၚ်မကေတ်နၚ်ဂှ် ဒတုဲစိုတ်မစိုပ်ဒတုဲသ္ဂးဟာ”
“ယွံသၟိၚ်ဇၞော် မစိုန်ဒှ်တဴခါံသဳအဲ၊ အဲမဖျေံနၚ်တၠပညာဝွံဂှ် အဲသၟိက်ဖျိုက်တၠအဲရောၚ်၊ ယဝ်အဲသ္ဒးဂစိုတ်ကၠေံတၠပညာဝွံမ္ဂး တၠအဲလေဝ်သလေၚ် ဂၞကျာ်ဍေဝ်သလေၚ်ရ၊ သ္ဒးစှ်ေစိန်ဂၠက်ဒၟံၚ်ပ္ဍဲနရက်တေံအိုတ်ရ၊ မူဟိုတ်ရောယဝ်သ္ဂး ဗွဲကြဴမသ္ဂောံညံၚ်ဝိဓုရတၠပညာဝွံပၠန်ဂှ် သ္ဇိုၚ်သန်သ္ဂောံညာတ် မၞိက်ဂတ သိန္နရာတ် သ္ဂောံညာတ်ဂှ် ဟွံသ္ဇိုၚ်က္ဍၚ် သ္ဂောံညာတ် တၠပညာမ္ဂးဂှ် သ္ဇိုၚ်လောန်က္ဍၚ်သန်၊ ယဝ်ရ တၠအဲသ္ဂောံဒဒှ်ေကုတၠပညာဝွံမ္ဂး ဓဝ်မပြဲဂှ်လေဝ် တၠအဲဂွံမိၚ် ဟိုတ်ဂှ်ရ အဲမ္ဒးဖျေံနၚ် တၠပညာဝွံမရောၚ်”သာ်ဝွံ ပုဏ္ဏကဂးရ။
၁၀။ ခဏ်ဗောဓိသတ် တွံဓဝ်ပ္ဍဲဍုၚ်နာ်[ပလေဝ်ဒါန် | ပလေဝ်ဒါန် တမ်ကၞက်]
ပ္ဍဲကာလဂှ် သၟိၚ်နာ်ဟီုကဵုဗောဓိသတ်ရ၊ “ယွံတၠပညာ တၠအဲမကၠုၚ်စိုပ်ဌာန်ပိုဲဝွံ မူဟိုတ်ဟွံလ္ၚောဝ်အယရော၊ ဟသေၚ်ဖေက်ဂစိုတ်ဟာ၊ ဟသေၚ်လကိုတ်စိုတ်တုဲ မဝိဝိၚ်အာဟာ၊ ပွမယိုက်သၟိပ်တဲ မလ္ၚောဝ် မဖ္ဍိုန်ကၠေံစိုတ်ညးညိ၊ မရာန်လမျီုဇကုဂှ် ဆဂှ်ညိကီုပဟွံဒှ်ညိသွံ၊ သမၠီုညးဇမ္ဗုဒိပ်လဝ်မွဲစွံ သမၠီုဝိဓုရလဝ်မွဲစွံတုဲ ပၞောဝ်သမၠီုၜါစွံဂှ် သမၠီု ဝိဓုရ လောန်က္ဍၚ်သန်သွံ”သၟိၚ်နာ်ဂး။
“ယွံတၠအဲသၟိၚ်နာ် အဲဟွံဖေက်တၠအဲရ၊ ဂစိုတ်လေဝ်အဲဟွံဖေက်ရ၊ မၞိဟ်ဂစိုတ်ဂှ်လေဝ် ဟွံလ္ၚောဝ်ဗာဇ္ဇခါတ်၊ ဗာဇ္ဇာခါတ်ဂှ်လေဝ် ဟွံလ္ၚောဝ်မၞိဟ်ဂစိုတ် သဘဴမလ္ၚောဝ်ရၚ်သ္ကံဂှ် လ္ၚောဝ်ဒှ်ပန်သာ်ဏီ−−−
(၁)၊ မသ္ဍိုက်လေဝ်လ္ၚောဝ်ကီု။
(၂)၊ ဇၞော်သွဝ် သၟဟ်မဒှ်ကၠဵု သၚ်ဃာတ်ဂှ်လေဝ် လ္ၚောဝ်ကီု။
(၃)၊ စပိုန်ဟာန်ညးဂှ်လ္ၚောဝ်ကီု။
(၄)၊ ဖေက်ညးဂှ်လ္ၚောဝ်ကီု။ ဣဝွံ လ္ၚောဝ်ပန်သာ်ရ၊ လၟုဟ်ဝွံတုန်လေဝ် မသ္ဍိုက်တၠအဲဂှ်လေဝ်ဟွံသ္ဍိုက်၊ မဇၞော်သွတ်သၟတ်ကဵုကၠဵုသၚ်ဃာတ်ဂှ်လေဝ် အဲဟွံဒှ်၊ ပိုန်ဟာန် တၠအဲဂှ်လေဝ် အဲဟွံဒဂနပ်၊ ဂစိုတ်ဂှ်လေဝ် အဲဟွံဖေက်၊ ဟိုတ်ဂှ်ရ အဲဟွံလ္ၚောဝ်တၠအဲရောၚ်”
“ယွံတၠပညာ လ္ၚောဝ်ပန်သာ်ဝွံ၊ သာ်ဝွံ တၠပညာမဟီုဂှ် ဒှ်စၟတ်ကွေံရ” တုဲ ဗောဓိသတ်သၟာန်တိုန် သၟိၚ်နာ်ပၠန်ရ။
“ယွံသၟိၚ်နာ် လွဳမာန်ပိုန်ဟာန်တၠအဲဂှ် မဇိပ်ဂၠိပ်လောန်က္ဍၚ်သန်သွံ၊ ပသာ်တၠအြ မကလိဂွံရော၊ မူနူမက္တဵုဒှ်ဂှ်ရော၊ မၞိဟ်မကဵုဟာ၊ ဒေဝတဴမကဵုဟာ၊ ညးဂှ်မကဵုတၠအဲရော၊ က္တဵုဒှ်ဗတ် ဇကုရဟာ၊ ကုသဵုမဇိုန်ကဵုဟာ၊ တၠအဲသၟိၚ်နာ် ဟီုကဵုအဲ သ္ဂောံမိၚ်ညိ”
“ယွံတၠပညာ ကၠုၚ်နူဓဝ်သုစရိုတ်အဲတုဲ အဲမကလိဂွံရောၚ်”သၟိၚ်နာ်ဂး။
“ယွံသၟိၚ်နာ် ပသာ်က္တဵုဒှ် နူစရိုတ်ဂှ်ရော၊ တၠအဲဟီုကဵုအဲဂွံတီညိ”ဗောဓိသတ်ဂး။
“ယွံတၠပညာ ကာလပိုဲမတဴ ပ္ဍဲဍုၚ်မၞိဟ်တေံဂှ် အဲကဵုသမ္ဘာအဲ မပတၠသုစရိုတ် ညံၚ်လစသွာတြဴစှော်ပန် မဗလးကဵုတဟၚ်ကုညးကီု တမၠၚ်လအာတ် ကၠုၚ်စိုပ်ပိုဲမ္ဂး သီုမအိုဟ်တၟိုဟ်တဴစိုတ် ပိုဲဂွံကဵုလဝ်ဒါန်ခမဳဗမၞး မကၠုၚ်စိုပ်ပိုဲတံဂှ် ပ္ကဴမြမောဝ်သၞာသ္တိက် ပုၚ်ကွာၚ်ယာဂု ကာလပိုဲမတဴပ္ဍဲဍုၚ်စမ္ပါဂှ် ပိုဲဂွံပ္တုဲလဝ်ဒါန်တုဲ ပိုဲမကၠုၚ်ကလိဂွံပိုန်ဟာန်တံဝွံရောၚ်၊ နူပိုဲမပ္တေဟ်အ္စာပိုဲ ရသိတေံတုဲ ပိုဲမပ္တုဲကၠုၚ်ဒၟံၚ်ဒါန်ဟွံသ္ဂုတ်တုဲ ပိုန်ဟာန် ယဿပတ်ပိုဲ ညံၚ်သွဝ်တာတတိၚ်ဝွံဂှ် ပိုဲကၠုၚ်ကလိဂွံလၟုဟ်ဝွံရောၚ်”သၟိၚ်နာ်ဂး။
ဗောဓိသတ်မိၚ်တုဲ သ္ဂးပၠန်ရ၊ “ယွံသၟိၚ်နာ် ဟိုတ်တၠအဲဂွံပ္တုဲလဝ်ဓဝ္သုစရိုတ် ထၟိက်ဂှ်တုဲ သုစရိုတ်ဂှ် ဇိုန်ကဵုပိုန်ဟာန် ယဿပတ်တုဲရဟသေၚ်ဟာ၊ လၟုဟ်ဝွံပၠန်တုန်လေဝ် တၠအဲလ္ပဟိုတ်မာဲညိ၊ ဒုစရိုတ်ဂှ် လ္ပက္တဵုဗဒှ်ညိ၊ စိုတ်မဒြိုဟ်သ္ကာတ်ဂှ် လ္ပက္တဵုဗဒှ်ညိ၊ ဓဝ်ကုသဵုဂှ် မဟတ်ပၟဝ်ဂလိုၚ်လဝ်ညိ”ဗောဓိသတ်ဂး။
သၟိၚ်နာ်မိၚ်တုဲ သ္ဂးပၠန်ရ၊ “ယွံတၠပညာ ပ္ဍဲဍုၚ်ပိုဲဝွံ ညးမဒုၚ်ဒါန်ပိုဲ ခမဳဗမၞးဟၟဲ၊ ပသာ်ပိုဲသ္ဂောံပ္တုဲကုသဵုညိသ္ဒးရော”။
“ယွံသၟိၚ်နာ် ဒါန်ရဟဂွံကဵုဂှ် သဳလဂှ် တၠအဲမၚ်မွဲညိ၊ ပ္ဍဲကောန်သမ္ဘာဍိက်သ္ကံဒဒှ်ေဒယှ်တံဂှ် ဒေါသလ္ပက္တဵုဗဒှ်ညိ၊ စိုတ်မဒြိုဟ်သ္ကာတ်ဂှ် လ္ပဒေပ်လဝ်ညိ၊ ဂလာန်သ္ကာတ်မြဟ်သ္ကေဝ်ကတောဝ်ညးဂှ်လေဝ် လ္ပဟီုညိ၊ မှတ်အေၚ်သ္တေဟ်ညိ၊ ဓဝ်ခန္တဳလအေၚ်မ္ဂးဝွံဂှ် အနိဿံသဖဵုရိုဟ်ဟမာန်ရ၊ ညံၚ်ဗ္တဳဂၞဴဂၚ် မဟတီကဵုလၟိဟ်ဂှ်ရ၊ ညံၚ်တၞံဆု ဂြိုပ်ဟေမဝန် မဟွံတီလၟိဟ်တွဵုဂှ်ကီုရ၊ ဖဵုသုစရိုတ် မဂွံမၚ်မွဲလဝ် နဓဝ်လအေၚ်ဂှ် ဒၞာဲအမှတ်စိုတ်ဇကု မရာဒနာမိက်ဂှ် ညံၚ်ညးမမိန်ဏာ ဇိုန်ကဵုဟေၚ် မကလိဂွံ ဟွံဆောတ်ရ” ဗောဓိသတ်ဂး။
သၟိၚ်နာ်မိၚ်တုဲသ္ဂးပၠန်ရ၊ “ယွံတၠပညာ တၠပညာဂွံစှ်ေစိုပ်ကၠုၚ်ဌာန်ပိုဲဝွံ ပိုဲဂွံမိၚ်တဝှ်ဓဝ်တၠပညာ မိပ်စိုတက္ဍၚ်သန်ရ၊ ယွံတၠပညာ မသာ်ပုဏ္ဏက မဂွံနၚ်တၠပညာဝွံရော၊ ကၠတ်နၚ်ဟာ မိန်နၚ်သ္ဂးဟာ ဝေၚ်ပးဇၞးတုဲ မဂွံနၚ်သ္ဂးဟာ” သၟိၚ်နာ်သၟာန်။
“ယွံတၠအဲသၟိၚ်နာ် သၟိၚ်နာဲပိုဲဝေၚ်ပး ကျအာမၚ်ဗၠာဲဝွံ သၟိၚ်နာဲပိုဲဇိုန်ကဵုဇကုအဲ ဗဗွဲဓဝ်ရောၚ်” သၟိၚ်နာ်ဂွံမိၚ်တုဲ မိပ်စိုတ်ဗွဲမလောန်ဂှ်ဒှ်တုဲ ဒတဲကေတ်တလပညာပၠောပ်ဏာကဵုဂၞကျာ် ဝိမာလာဒေဝဳရ။
“ယွံဂၞကျာ် ဟိုတ်နူပူဂဵုဝွံ အၚပ်ဂၞကျာ် သၟိက်ဂွံစဖျုန်ဂြိုဟ်ဗဗွဲဓဝ်ဂှ် ဗလးဂၞပ်ဂၞကျာ်ရ၊ အာဂတပအၚ်္ကရော၊ ပူဂဵုမစောန်ဒှ်တဴ ကလောသၟိၚ်တ္ၚဲ ညးဇမ္ဗုဒိပ်ဂှ် ကၠုၚ်စိုပ်ရ၊ တၠပညာဝွံ နွံကဵုဓဝ်မပြဲက္ဍၚ်သန် လၟုဟ်ကၠုၚ်စိုပ်ပိုဲရ၊ ဂၞကျာ်က္တဵုပၚ်မှိၚ်ဓဝ်ရ” ဂၞကျာ်က္တဵုနူသၞာမပြဲတုဲ နသ္ပာတဲညံၚ်ဍောၚ်ဒကှ်သြန်ဂှ် သီုကဵုမဂ္ညိဒၟံၚ် သီုအရံၚ်သၞေံဂှ် ပၚ်ပ္တိုန်ယဵုလဝ်ကၞေၚ်တုဲ လ္ၚောဝ်အာတ်ပၚ်မှိၚ်ဓဝ်တလပညာရ၊ အတိုၚ်က္တဵုဒဒှ် ပုဏ္ဏက မဂွံနၚ်ဗောဓိသတ်ဂှ် ဂၞကျာ်သၟာန်တလပညာရ။
“ယွံတၠပညာ ပသာ်ဟိုတ်မွဲတုဲ ပုဏ္ဏက မဂွံနၚ်တလပညာရော၊ အတိုၚ်ဒဒှ် ပုဏ္ဏကမဂွံနၚ်ဂှ် ဗောဓိသတ်ဟီုကဵုဂနကျာ်ရ” ဂၞကျာ်မိၚ်တုဲ မိပ်စိုတ်ဗွဲမလောန်ရ၊ ဍာ်မြမောဝ်ကၠံနုၚ် ကဵုအာကေတ်နၚ်တုဲ ဖုံဗလိုပ်ဗောဓိသတ်တုဲ ယာတ်ဒိပ် မြမောဝ်ဒိပ် ပ္ကဴဒိပ် ဘောဇိုန်ဒိပ် မပြဲပြဲတံဂှ် တရိုပ်ဗ္စဗောဓိသတ်တုဲ တၠးစရာ ဗောဓိသတ် ညံၚ်အယောၚ်အလာ ကျာ်ဂမျိုၚ်ကီု တိုန်လ္တူပၞၚ်တုဲ တွံဓဝ်ကဵုဂၞကျာ်ဝိမာလာဒေဝဳရ၊ ဓဝ်မသာဓာ ကုနာ်ဂမၠိုၚ်ဂှ် ဗောဓိသတ် တွံကဵုဂၞကျာ်ရ၊ တွံဓဝ်တုဲ သာ်ဝွံ ဗောဓိသတ်မဟီုကဵုဂၞကျာ်ရ။
“ယွံဂၞကျာ် လၟုဟ်ဝဳဳံ ဇကုအဲမဒှ်လွဵု သ္ကေံတဲဂၞကျာ်တုဲရ၊ ဒှ်ပွေၚ်ဂၞကျာ်ရ၊ ဂၞပ်သၟိက်ဂွံဖျုန်ဂြိုဟ်အဲဂှ်လေဝ် အဲသၠးကဵုဂၞကျာ်ရ”ဗောဓိသတ်ဂး။
ကာလ ပုဏ္ဏက သၟိက်ဂွံဖျုန်ဂြိုဟ်ဂှ် မူဟိုတ်ဗောဓိသတ် ဟွံကဵုရော၊ လၟုဟ်ပုဏ္ဏကဗလးကၠေံတုဲ မူဟိုတ်မကဵုဖျုန်ဂြိုဟ် ကုဂၞကျာ်ပၠန်၊ ကဵုပုဏ္ဏကတေံ မဒှ်ဒါန်ဟွံသေၚ် မူဟိုတ်ရော ဍေံမသ္ကေတ်အနိၚ်အတက်ရောၚ်၊ ဗောဓိသတ်ချပ် လၟုဟ်ဝွံ နစိုတ်သဒ္ဓါ မဂွံကဵုဂှ် မဒှ်ဒါန်မပြဲရောၚ်၊ ဗောဓိသတ်လဝ်စိုတ်တုဲ ဗောဓိသတ် မကဵုကုဂၞကျာ်ရောၚ်။
မွဲနဲတုန် သာ်ဝွံ ဗောဓိသတ်မဟီုကဵုသၟိၚ်နာ်ရ၊ “ယွံမရာတ် ကၠာတေံ အဲမတွံဓဝ်ကုမရာတ်တံညးပန်ဂှ် မၞိက်အနဂ္ဃရတ် မရာတ်သ္ပပူဇဴအဲတုဲရ၊ သၟိၚ်အိန်ယာတ်ဒိပ် မသ္ပပူဇဴအဲ၊ သၟိၚ်သ္ပဝ်ပ္ကဴထဝ်သ္ပပူဇဴအဲ၊ သၟိၚ်ကောရဗျ ဂၠဴလ္ၚီ ကွဳလ္ၚီ ချေံလ္ၚီ စိၚ်ကီု လ္ၚးထဝ်လ္ၚီု သီုကွာန်ဇၞော်စှ်တြဴ သၟိၚ်ပပူဇဴအဲတုဲရ၊ လၟုဟ်အၚပ်ဂၞကျာ် သၟိက်စဖျုန်ဂြိုဟ်အဲမ္ဂးဂှ် ဖျုန်ဂြိုဟ်အဲဝွံ အဲသၠးကဵုပပူဇဴဂၞကျာ်ရ။
ဂၞကျာ်မိၚ်တုဲ သ္ဂးရ၊ “”ယွံတလပညာ အဲသၟိက်ဂွံဖျုန်ဂြိုဟ်တလပညာဟသေၚ် ဓဝ်တၠပညာ မတုပ်တဴရဴဖျုန်ဂြိုဟ်ဂှ်ရောၚ်၊ ပိုဲသၟိက်ဂွံမိၚ်ဓဝ် လၟုဟ်ပိုဲဂွံမိၚ်တဝှ်ဓဝ်တၠပညာတုဲ အၚပ်ပိုဲဟဲအာတုဲရအဴ၊ ပုဏ္ဏက သၟိက်ပဂမာန်ပိုဲမ္ဂးဂှ် ပိုဲစရိုဟ်ဍာ် ထပ်တဲတ္ၚဲဝွံရ” ဂၞကျာ်ဂး။
ဂၞကျာ်ဂွံမိၚ်တဝှ်ဓဝ်ဗောဓိသတ်တုဲ အၚာပ်ဂၞကျာ်ဟဲ ယဲဂၞကျာ်ဗၠးအာရ၊ ညံၚ်ပူဂဵုမယဲက္ဍၚ် အစာသဝ်မၞုံဂမြၚ်မဆိုက်ဗ္ဒက် ဖျုၚ်ဂဥုဲဒ:ဂှ် ရဴယဲဂှ် မဂွံဗၠးအာဗွဲသွာကီု၊ ဂၞကျာ်ညံၚ်တၠယဲ ဗောဓိသတ်ညံၚ်အစာသဝ် မဆိုက်ဗ္ဒက်ပ္ဍဲဂဥုဲဂှ်ကီုရ၊ ရှ်ဓဝ်မတုပ်တဴ ညံၚ်ရဴဂဥုဲဒိပ်ဂှ် ဗောဓိသတ် ဖျုၚ်ကတောဝ်ဒးယဲဂၞကျာ် ဂွံဗၠးအာဟေၚ် ဂၞကျာ်အၚပ်ဟဲအာတုဲ သာ်ဝွံ ဟီုကဵုဗောဓိသတ်ရ။
“ယွတလပညာ တလပညာ မကၠုၚ်လၟုဟ်ဝွံ လံအာမ္ဂး ပ္ဍဲဍုၚ်ရး ဣန္ဒပတ္တနာဂဵုတေံ သၟိၚ်ကောရဗျကီု သီုဂၞကျာ် ညးရးနိဂီုဂမၠိုၚ် သ္ဒးဒှ်ယဲပူမှ် သ္ဒးဒှ်လၞီလၞာ် သ္ဒးဗ္ဂူဒၟံၚ်ဗြဲမတ် မ္ဒးဇွောဝ်ဒၟံၚ်ဍာ်ရမတ်ရသွံ၊ ပိုဲကဵုပလံၚ်ပ္တိုန်ဏာရ”ဂၞကျာ်ဂး။
“ယွံဂၞကျာ် လဟီုဂၞကျာ်ဝွံဂှ် ဒှ်မဒ္ဂေတ်ဗက်သဘဴဓဝ်ရ၊ ဒှ်မဒ္ဂေတ်ဗက် တလပညာတံရ၊ ဒှ်ကရုဏာ မၞုံသတ္တံဂမၠိုၚ်ကွေံရ”။
“ယွံဂၞကျာ် လဟီုမွဲ သၟိၚ်နာ်မဟီုလဝ် ကောန်ဗြဴအဲ ဣရန္ဓတဳ တလကုသဵုရုပ် အဲသကဵုပုဏ္ဏကရမ္ဂးဂှ် သ္ဂောံဇိုန်ကဵုကွေံဟွံဆောတ်မ္ဂးဂှ် ညံၚ်ကံမဟွံယောၚ်ကဵုဇဍာံရ၊ လဟီုဟွံဆောတ်ယောၚ်ကွေံရ၊ ဒှ်မၞုံကဵုသစ္စဗွဲစၟတ်ရ”ဗောဓိသတ်ဂး။
သၟိၚ်နာ်ဝရုဏ မိၚ်လဟိုဗောဓိသတ်ဗက် ကော်နၚ်ကောန်ဗြဴ ဣရန္ဓတဳတုဲ ကဵုဗလိုပ်ဟုံကျိုၚ်ကျဝ် အပေါတ်ဂ္ညိထဝ်သြန် လစိန်သီုလကံက် ဒြၚ်ဗံက်လၜက်သၞေက်တုဲ ညံၚ်ကဝ်လဗဗြိုက် မ္ဒးကၞာတ် ညံၚ်ပြာသာဒ် မ္ဒးသၞောတ်တဲအစာဝဍ္ဎကဳ ဗဳသ္ကဝ် မသောန်ဗဂေါဝ်လဝ်တုဲဂှ် မဒှ်ဗဗဵုမတ်ညးကီု ကောန်ဗြဴသၟိၚ်နာ် ဣရန္ဓတဳ တလပြာသာဒ်ရုပ် ထပ်တဲစရိုဟ်ဍာ် ပြေၚ်ဝိဝါဟကဵုပုဏ္ဏကရ၊ ပုဏ္ဏကဂွံတုဲ မိပ်စိုတ်ဗွဲမလောန်တုဲ ရဴဝွံ ဍေံမဟီုကဵုတၠပညာရ။
“ယွံတၠပညာ နူအဲမဂွံမိၚ်ဓဝ်တၠအဲ ပ္ဍဲက္ဍိုပ်တၟံ ကာလာဂိရိဂှ် လမျီုတလအဲဂှ် အဲဗလးကဵုစဴဍုၚ်တုဲရ၊ တၠအဲဟွံစဴ တၠအဲမစှ်ေကၠုၚ်ဍုၚ်နာ် စှ်ေခၞံကဵုဒတုဲမြမောဝ်အဲ သမ္ဘာမလေဝ်သကဵုဂွံဗဵုဒ္ၚောဝ် ဒတုဲမြမောဝ်သၟိၚ်နာ် သီုဂၞကျာ်ဂှ်လေဝ် ကဵုဂွံဒှ် တၠအဲဂးလဝ် ၜိုန်အဲမဆဳဒဝ်ကီု တၠအဲဟွံဒိုအ် တၠအဲမစှ်ေကၠုၚ် အတိုၚ်ဂလာန်တၠအဲဂှ် လၟုဟ်ဝွံ ဒှ်စၟတ်ကွေံရသွံ၊ အဒွိဓာပဏ္ဍိတဝစနာ၊ ဂလာန်တၠပညာမ္ဂးဂှ် ဟွံဒှ်ၜါကွေံသွံ၊ ပတၠဓဝ်သုစရိုတ် မပ္ကၚ်ရၚ်လဝ်ဓဝ် ကုသဵုသပ္ပရိုဟ်ညံၚ်တၠအဲဂှ် သ္ဇိုၚ်သ္ဂောံသန်ရ၊ ညးမပတၠပညာ ညံၚ်တလအဲဂှ် သ္ဇိုၚ်သ္ဂောံမာန်သန် သမ္ဘာမိက် မဒှ်ဂၞပ်စိုတ်အဲဂှ် ဒှ်တၠအဲ မဇိုန်ကဵုအဲရ၊ တၠအဲမဒှ်ကညာ နိမိတ်ထမိက်ပ္ဍဲအဲရ၊ မၞိက်ဂကူ ဝိပူလာပ်မပြဲ အဲမဗဗဵုသၟိၚ်ကောရဗျဂှ် အဲသ္ပပူဇဴ တၠအဲလၟုဟ်ရ”ပုဏ္ဏဂး။
“ယွံမၚ်ဗၠာဲ ကညာနိမိတ် ကလိဂွံရ ယဝ်သဒှ်ဂှ် ဒှ်မကလိဂွံ မဂ္ဂညာန်သမ္တီရ၊ တၠပညာမှတ်ပဒဒှ်ေဒယှ်ေညိ၊ တၠပညာ မှတ်အာဂၠာဲသၟာန်သၟုက်ပယတ်ညိ၊ ပညာဂှ် မှတ်ပတၠပယတ်ညိ၊ ပ္ဍဲမဂၠာဲသ္ၚဳပညာဂှ် လ္ပလၞုဟ်အိုတ်ညိ၊ စိုတ်ကဵုဒ္ဂေတ်တဴ ပ္ဍဲဂလာန်တလပညာညိ၊ သမ္ဘာမကဵုသၟဟ်န်ညိ၊ လၟေၚ်ဓဝ်ဟေၚ် ကဵုသ္ဍိုက်မၠိုက်ညိ၊ မၞိက်မပပူဇဴအဲတုဲရ၊ ဇကုအဲ မပလံၚ်ဗစိုပ်ကဵုဍုၚ်အဲညိရကောန်”ဗောဓိသတ်ဂး ။
၁၁။ ခဏ်ခဏ်ကလေၚ်စဴနူဍုၚ်နာ်[ပလေဝ်ဒါန် | ပလေဝ်ဒါန် တမ်ကၞက်]
ပုဏ္ဏကမိၚ်တုဲ ဒက်ချေံသိန္ဓဴတုဲ “ယွံတၠပညာ ညံၚ်တိုန်က္ဍိုက်ချေံအဲရ၊ အဲပလံၚ်ပ္တိုန်ဏာတၠပညာရ”ဍေံဂး၊ ပုဏ္ဏကက္ဍိုက်ဂတ ဗောဓိသတ်က္ဍိုက်ဒေါဝ် ဣရန္ဓတဳက္ဍိုက်ကြဴတုဲ ကလာၚ်တိုန်အာရ၊ ပုဏ္ဏကလေဝ် ပလံၚ်ဗောဓိသတ် ဟတီဗၞတ်တွဵု အဟာရဘောဇိုန်သွက်ညးဂမၠိုၚ် မဂွံစသီုဖအိုတ်ရ၊ ဇန်တံညးဂမၠိုၚ် အလုံဂတာဇမ္ဗုဒိပ် ပ္တေဟ်ဗောဓိသတ်တုဲ ပ္တုဲဒါန် ဒဂိုန်သဳ ပၚ်မှိၚ်ဓဝ် ပၟဝ်ဘာဝနာတုဲ ၜးအဿဘဴ မဂွံစဴစိုပ်ဍုၚ်သွဝ် လ္တူပြာသာဒ်ထဝ် ဒေန်ထဝ် သၞာထဝ် ဆုကဝ်လဗဗြိုက် ဂွံစသိုၚ်ပိုန်ဒိပ် တသိုက်ဒိပ်ဖအိုတ်ရ။
သတ္တာ၊ ၚ်တၠဳမၞုံကုပိုန်ကျာ်တြဲ၊ ဓမ္မံ၊ န်တဝှ်ဓဝ်မရဴဝွံ အဟရိတွ၊ ရေၚ်တၠုၚ်နၚ်တုဲ၊ ဘိက္ခဝေ−ယွံခမဳတံ၊ ဆကာလၟုဟ်ဝွံ အဲမဂွံပတၠပညာဟသေၚ်တုန် အတိက်တေံကီုလေဝ် ပတၠပညာ မဂွံတွံဓဝ် ဒလောံဗ္တောန်ဇန်တြုံဗြဴ ဂွံဟံၚ်ဖျဴဗစိုပ်ကဵုဍုၚ်သွဝ် ကုညးဂမၠိုၚ်တုဲရလေဝ်ခမဳတံ၊ သာ်ဝွံ ကျာ်ဂမျိုၚ်ဂးတုဲ ဇာတကံ−န်ဇာတ်အတိက်ဂှ်၊ သမောဓာနေသိ−စိုန်ကျာ်တြဲသၟဟ်ကၠေံရ။
၁၂။ ခဏ်ပံၚ်ဇာတ်[ပလေဝ်ဒါန် | ပလေဝ်ဒါန် တမ်ကၞက်]
တဒါပဏ္ဍိတဿ တာတာပိတရော မဟာရာဇာ ကုလာနိ အဟေသုံဇေဋ္ဌ ဘရိယာ ရာဟုလမာတာ၊ ဇေဋ္ဌပုတ္တော ရာဟုလော ဝိမလာညပလဝဏ္ဏာ၊ ဝရုဏ နာဂရာဇာ သာရိပုတ္တော၊ သုပဏ္ဏရာဇာ မုဂ္ဂလာနော၊ သက္ကော အနုရုဒ္ဓေါ၊ ဓနဥ္စယျ ကောရဗျရာဇာ အာနန္ဒော၊ ပုဏ္ဏကော ခန္ဒော၊ သေသာဗုဒ္ဓ ပရိသာ၊ ဝိဓုရပဏ္ဍိတော ပနအဟနမေတါတိ။
ယွံမဳတံ−မိမဝိဓုရတၠပညာမတုဲတေံဂှ် ကၠုၚ်ဒှ်မိမအဲကျာ်လၟုဟ်ဝွံရ၊ သမ္ဘာဝိဓုရဇၞော်မတုဲတေံဂှ် ကၠုၚ်ဒှ် မိရာဟုလလၟုဟ်ဝွံရ၊ ကောန်ဇၞော်မတုဲတေံဂှ် ကၠုၚ်ဒှ် ရာဟုလလၟုဟ်ဝွံရ၊ ဂၞကျာ်သၟိၚ်နာ် ဝိမာလာဒေဝဳ မတုဲတေံဂှ် ကၠုၚ်ဒှ်ဥပ္ပဵုလဝန် လၟုဟ်ဝွံရ၊ သၟိၚ်နာ်ဝရုဏ မတုဲတေံဂှ် ကၠုၚ်ဒှ်သာရိပိုတ်လၟုဟ်ဝွံရ၊ သၟိၚ်သ္ပဝ်မတုဲတေံဂှ် ကၠုၚ်ဒှ်မှာထေရ်မောဂ္ဂလာန်လၟုဟ်ဝွံရ၊ သၟိၚ်အိန်မတုဲတေံဂှ် ကၠုၚ်ဒှ်ဇနုရုဒ္ဓလၟုဟ်ဝွံရ၊ သၟိၚ်ဓနဥ္စယျ မတုဲတေံဂှ် ကၠုၚ်ဒှ်အနန်လၟုဟ်ဝွံရ၊ ပုဏ္ဏက မတုဲတေံဂှ် ကၠုၚ်ဒှ်ပူရိသတ်အဲကျာ်လၟုဟ်ဝွံရ၊ ဝိဓုရတၠပညာ မဝေတ်ကၠေံကလော်ပုဏ္ဏကမတုဲတေံဂှ် အဟံဨဝံသမ္မာသမ္ဗုဒ္ဓေါ−ကၠုၚ်ဒှ်အဲကျာ် လၟုဟ်ဝွံရ၊ ဇာတ်ဝိဓုရတၠပညာ စိုန်တုဲဆဝွံရမိဂ္ဂး ။ ။
နိဿဲ[ပလေဝ်ဒါန် | ပလေဝ်ဒါန် တမ်ကၞက်]
https://drive.google.com/file/d/1x_LPBkTN_v6WrZtq3g87E4s5pLPjCVHA/view?usp=sharing
ပြကိုဟ်ဇာတ်စှ် ကျာ်ဇၞော်အဇွောံ