သၟိင်တ္ၚဲကၠောအ်ၜဳ (ဒွက်)

ဒွက်သၟိင်တ္ၚဲကၠောအ်ၜဳ ဝွံ ဒှ်ဒွက် နာဲဗဳထဝ်မန်ဇြာ ညးချူလဝ် ပ္ဍဲကဵု ဝတ္ထုဇၞော်ညး ဟံသာဝတဳဂြးစပ် မဒှ်လိက် မပတိတ်လဝ် ပ္ဍဲသၞာံ ၂၀၁၇။ ဒွက်သၟိင်တ္ၚဲကၠောအ်ၜဳဂှ် ချူလဝ် ပရူ သၟိင်တ္ၚဲ ညံင်ရဴကွဳ မနွံကဵု ချေဟ်သန္ဓဴလ္ၚီ မတတ်အာ ဒေသဍုင်မန်တုဲ ၜက်တိတ်အာ ၜဳဇၞော်၊ အလုံမွဲအကာသဂှ် မနွံကဵု အသာ်နာနာ၊ ဗီုရုပ်နာနာတုဲ ကောန်ညးရာမညတအ် ဒှ်လၞီတုဲ ဘိက်ပၟိင် ညံင်ဂွံကလေင်ကၠုင် ပ္ဍဲဇရေင်ညးတအ် မွဲဝါပၠန်ရ။ ဗွဲစၟတ် အစာချူဒွက်ဝွံ ရန်ကဵု ပရေင်အရာမၞိဟ်မွဲမွဲ မဒးသ္ၚောမ်ဗြီုလေင်တုဲ အရာဂှ် ညံင်ဂွံကလေင်ကၠုင် စၟဳကော်ဒၟံင်ရ။ ပ္ဍဲကဵု ဝတ္ထုဇၞော်ဂှ် ဒှ်ဝတ္ထု ပရူဍုင်ဟံသာဝတဳလီုတုဲ ဍုင်ဟံသာဝတဳဂှ် ပတိုန်စလဝ် နဒဒှ် ညံင်သၟိင်တ္ၚဲတုဲ ၜိုန်ရ ဒတုံတိ ကၠေအ်အာရကီုလေဝ် ညံင်ဂွံ ကလေင်ကၠုင်ပၠန် ရန်တၟအ်တုဲ ချူလဝ် ဒှ်မာန်ရ။ ဒွက်ဂှ် အစာကွိင်ကွိုက်မန်ဒယှ် နာဲထဝ်ပေင် ကၠောန်လဝ် အခိုက်ရ။ ပ္ဍဲသဘင်ဆက်မိတ်လိက် ဟံသာဝတဳဂြးစပ် မကၠောန်ဗဒှ် ပ္ဍဲဟဝ်တေဝ်ရာမည ပ္ဍဲဍုင်မတ်မလီု သၞာံ ၂၀၁၇ ဂှ် ဗညာတိုန်နန် ဒယှ်ေလဝ် ကိုပ်ကၠာအိုတ်ရ။

လိက်ဒွက် အတိုင်လိက် ဟံသာဝတဳဂြးစပ်

မဂဳတ ဒွက် သၟိင်တ္ၚဲကၠောအ်ၜဳ နာဲထဝ်ပေင် ညးမဖျေဟ်လဝ် အခိုက်။

လွဳမာန်စက်ထဝ် နူဗမံက်စဝ်ကၠုင် ဂေတ်ဂပဝ်ကွဳ လၟုဟ်ၜဳဇၞော်တတ်ကၠုင် ကၠုင်ညိရလေဝ်။

သြနာဲ နာဲတၠယာန် သိန္ဓဴလ္ၚီဟာန် တက်ပရဟ်ဗ္ဒဴ ဒဴထောအ်ပိုယ်မာန်။
သြနာဲ သြနာဲ တကအ်ပိုယ် တကအ်ကြေင် တကအ်တၟေင် ဌာန်ကျာ်နာဲအရှန် နာဲလ္ပခၠန် ကလေင်ပၠန်ညိရလေဝ်အဴ။

ရံင်အာဇိုင်ၜဳ ပါန်ခဳချူဗ္ဂေါဝ် ပယျောဝ်အကာသထာန်၊ လ္ၚဵုလွံက်ချီု ခၠင်ပ္ဍီုခဏ လ္ၚဵုသၠုဲ သာ်ကၠေင်င္ၚုဲက၊ လျးခၠင်ခဏ တူကာသဂင် လ္ၚဵုဖလီု ညံင်ဍီုမာဲက္ၜင်၊ လ္ၚဵုလျးဂွု တုပ်ညံင်ကၞုသင် မွဲသာ်လျးအာ ညံင်နဳလာက္ၜင် ညံင်သာ်ဗဒါ ဂၠံကာသဂင်၊ လ္ၚဵုတုပ်က္ဍင် ဂၠုင်က္ၜင်နာတ်တြ လ္ၚဵုတုပ်ရ သၟိင်တၠဇာဒိသိုင် ကလိင် စိင်ရော ဥဿောဗျက္ဃ အမှဳ ကၟီ ဗြန် ဟွံတီလၟိဟ် သတ်ဍာ်သတ်ဒဵု ဂွံဆဵုကေတ်ဖအိုတ် ပ္ဍဲစိုတ်မိပ်လဟိင် ဆဂး ပိုယ်သိင်သာ သိင်သာလတူနာဲ။

သြနာဲ နာဲတၠယာန် သိန္ဓဴလ္ၚီဟာန် တက်ပရဟ်ဗ္ဒဴ ဒဴထောအ်ပိုယ်မာန်။
သြနာဲ သြနာဲ တကအ်ပိုယ် တကအ်ကြေင် တကအ်တၟေင် ဌာန်ကျာ်အရှန် နာဲလ္ပခၠန် ကလေင်ပၠန်ရလေဝ်အဴ။

တ္ၚဲသဝ်ယောန်န် ဗၠန်အမ္ဗာစိ လွဳမာန်စက်ထဝ် ဂေတ်ဂပဝ်ဂၠိ ထောအ်တကအ်ကြေင်စိ ဂေတ်ဂၠိဂစာန် တက်ပရဟ်ဗ္ဒဴ သိန္ဓဴလ္ၚီဟာန် ဗၠန်သိန္နေရု ပျးဇမ္ဗုပ္ကာန် ကၠောအ်ပျးတကအ်သအာင် ကၠေအ်ထာန်တကအ်ကြေင် မတ်သၟိင်တ္ၚဲဟေင် ဗၠေင်အာတုဲရ ပါန်ခဳချူဗ္ဂောဝ် ဟွံတီနန္တ မာတ်တ္ၚဲမပၠိုတ် အိုတ်လျးဟေင်ရ သ္ၚဳတူကာသ လျးခဏရေင်။

သြနာဲတၠယာန် သိန္ဓဴလ္ၚီဟာန် တက်ပရဟ်ဗ္ဒဴ ဒဴထောအ်ပိုယ်မာန်။
သြနာဲ သြနာဲ တကအ်ပိုယ် တကအ်ကြေင် တကအ်တၟေင် ဌာန်ကျာ်နာဲအရှန် နာဲလ္ပခၠန် ကလေင်ပၠန်ရလေဝ်အဴ။

နိဿဲ

လိက်ဟံသာဝတဳဂြးစပ်